Kõmman Bible Study ko Rej Wõnmanlok Part 5

Bebe kin Ewi Joñan Katak eo Kwonaj Etale

¹ Ke Jesus ear katakin, ear lemnak kin maroñ ko an ri kalor ro an, im konono ñan ir “einwõt air maroñ in roñjake.” (Mark 4:33; Jon 16:12) Ilo juõn wãwen einlok wõt, ro rej katakin kin Nan in Anij rainin rej aikwij bebe kin ewi joñan katak eo renaj etale ilo juõn ien katak Bible. Joñan katak eo rej etale ej wawa ion maroñ eo im wãwen ko ibben eo ej katakin im ri katak eo jimor.

² Kalek Tõmak eo Ebin: Jet ri katak ro rej aikwij ruo ak jilu ien katak ñan melele kin ta eo ri katak ro jet remaroñ melele ilo juõn wõt ien katak. Jejjab kõnan bõprae an ri katak eo bõk jelãlokjen eo ejimwe kin tokjen eo ñan kadedelok an katak book eo ilo mõkaj. Kajjojo ri katak ej aikwiji juõn bedbed ebin kin tõmak eo an ekãl ilo Nan in Anij.​—Ken. 4:7; Rom 12:2.

³ Ke kwoj kõmmane katak eo kajjojo week, bõk jabdewõt ien kwoj aikwiji ñan jibañ ri katak eo ñan melele im bõk ta eo ej katak kake jen Nan eo an Anij. Bõprae am kakaiuriur kin juõn katak im ri katak eo ejjab bõk tokjen jen mol ko ej katak kaki. Kõtlok bwe en bwe ien ñan jitõñlok ñan point ko relap im ñan etale eon ko me rej letok bedbed in katak ko.​—2 Tim. 3:16, 17.

⁴ Kõmman Bwe Katak eo En Wõnmanlok Wõt: Ke jekõnan bõprae ad kakaiuriur kake katak eo, jekõnan bareinwõt bõprae ad oktak im mad. Elañe ri katak eo elap an konono kin abañ ko an make, jemaroñ aikwij karõk ñan bwebwenato kin men kein elikin ien katak eo.​—Ekkl. 3:1.

⁵ Ijo tu-rãjet, kijejeto eo ad make kin mol eo emaroñ kõmman bwe en bin ad jab le jen joñan ad konono ilo ien katak eo. (Sam 145:6, 7) Kwalok juõn point ak experience jen ien ñan ien emaroñ wõr tokjen ñan katak eo, ak jejjab kõnan bwe en lukkun lõñ ak aetok im rej oktak im kautameik ri katak eo jen an bõk jelãlokjen eo ejimwe kin irinekatak ko ilo Bible.

⁶ Ilo ad etale juõn joñan emõn in katak eo ilo kajjojo ien katak, jej jibañ ri katak Bible ro ñan “etal ilo maram jen Jeova.”​—Ais. 2:5.