Jelãlokjen eo Ej Tellok ñan Mour Indio
1 Elap an juburuõd ñe jej lo an mõnõnõ turin mejen armij ro ñe rej melele mol eo jen Bible eo! Ilo ad jaketo-jaketak jelãlokjen eo kin Anij im karõk ko an kin armij, men in emol an wõr tokjen. Jelãlokjen rot in emaroñ tellok armij ro ñan bõk mour indio.—Jon 17:3.
2 Etke Emõnlok: Rainin jemaroñ bõk jelãlokjen ilo elõñ wãwen ko im kin jabdewõt men. (Ekkl. 12:12) Ak jelãlokjen rot in ejjab joñan aorõkin wõt “men ko relap an Anij.” (Jerb. 2:11) Jelãlokjen eo an lal in ear maroñ ke karuaklok armij ro ñan Ri Kõmanman eo im ñan air jelã karõk ko an? Ear jibañ ke armij ro ñan air melele kin ta eo ej walok ñan kij ñe jej mij ak etke elap an wõr eñtan? Ear lelok ke kejatdikdik ñan armij? Ear jibañ ke kakõmanmanlok mour in family eo? Jaab. Jelãlokjen eo an Anij wõt emaroñ jibañ kij lo uak ko remol ñan kajitõk ko raorõk ilo mour.
3 Jelãlokjen eo an Anij ej letok juõn men me elikjap ilo lal in rainin—wãwen in kõkamanmanlok mwil emõn im nana. Nan in Anij ej jolok kalijeklok kin kil, bwij, im ailiñ eo jen buruen ro rej mõnõnõ in bõk im jerbale katak ko an. (Hib. 4:12) Ear kamakit armij ro ñan air karmijete aolep wãwen ko relej im ñan air ‘kõnõk armij ekãl.’ (Kol. 3:9-11; Mic. 4:1-3) Bareinwõt, jelãlokjen eo an Anij ear lelok kajur ñan elõñ million armij ñan air anjo ion manit ko im kadkad ko me Anij ejjab buñburuen kaki. (1 Kor. 6:9-11)
4 Etke Eaorõk Kiõ: Ri Katakin eo ad Elap ej kakkõl kij kin ta melelen ien ko jej bed ie. Kanan in ekajet ko an ewõr melele ko rejejjet ñan ran kein me jej aikwij keañ kaki ibelakin lal. (Rev. 14:6, 7) Christ ej iroij ilañ, mõttan jidik enaj kajeebeplok dolul in kabuñ ko rewan, im Ailiñ in Anij ebojak in kokkure aolep kien ko ion lal. (Dan. 2:44; Rev. 11:15; 17:16) Kin men in, eaorõk bwe armij ro ren kile King eo ej iroij kiõ me Anij ear kãlete, ñan air diojlok jen Babylon Elap, im ñan air kir etan Jehovah ilo tõmak. (Sam. 2:11, 12; Rom. 10:13; Rev. 18:4) Jen bõk kunad joñan wõt ad maroñ ñan lelok ñan ro jet jelãlokjen in ej tellok ñan mour indio.