Kwalok Am Itoklimo—Ilo Am Joij
1 “Jehovah e joij.” (Sam. 145:8) Meñe e eo Eutiejtata ilo aolepen lañ im lal, e joij, ej kea im ej kwalok tiriamo ilo an jerbal ibben armij ro rejjab wãppen. (Jen. 13:14; 19:18-21, 29) Jemaroñ kakõmõnmõnlok wãwen ad kwalok kin news eo emõn ilo ad anõk Anij eo ad ejoij. (Kol. 4:6) Wãwen in ej kitibuj elaplok jen ad baj kwalok wõt kautiej ilo ad konono.
2 Jen Em Ñan Em: Ta elañe jaar lolok ri mweo ilo juõn ien ejjab emõn ak ñe ej lukkun boub ñan an konono ibbed? Jej aikwij kile kin wãwen ko ibbeir ilo ad kõmman bwe ennan eo ad en kadu ak ilo ad jiroñ ir bwe jenaj bar jeblak ilo bar juõn ien. Jej aikwij bõprae ad jibed armij ro ñan air bõk book ko elañe rejjab kõnan. Lemnak kin ro jet enaj bareinwõt mõkaj an kamakit kij ñan kwalok kautiej kin men ko air, einwõt kili kejam in worwor ko im kejam ko im ilo ad katakin ajiri ro nejid bwe ren kõmman eindein. Jej aikwij lale bwe jabdewõt book ko jej likiti ilo moko ejelok armij ie rej aikwij jab ejjerwawa ñan an armij ro jet loi. Aet, joij enaj kamakit kij ñan ad kõmman emõn ñan armij ro einwõt ad kõnan bwe ren kõmman ñan kij.—Luk 6:31.
3 Jerbal Iturin Ial: Ñe jej jerbal iturin ial, jemaroñ kwalok ad kea ilo ad jab binej an armij ro etetal im ilo ad jab koba ibben don iman kejam in mõn wia ko. Jenaj jelã kin wãwen ko ibben ro jet, im jenaj bukõt bwe jen konono ibben ro emaroñ wõr air ien im jab ro me jejelã ke rej ekaiuriur. Jet ien, kin an lap ainikien ko iturin ial jemaroñ aikwij konono ilo juõn ainikien ellaj bwe ren maroñ roñ kin ta ko jej ba. Bõtab, jej aikwij kõmmane ilo kautiej, jab kemjãje kin kij make.—Mat. 12:19.
4 Kwalok Nan Ilo Am Kajerbal Telephone: Lemnak kin ro jet enaj kamakit kij bwe jen kõmman jerbal in kwalok nan ilo telephone ilo juõn jikin me ejelok keroro ie. Jej kwalok ad jelã manit ñe jej mõkaj im kwalok kajjid im kamelele kin unin jej telephone lok ñan ir. Konono ilo jikin kennan eo im ilo juõn ainikien emõn enaj jibañ ñan kobaik ro jet ilo bwebwenato eo ekõketak kin men ko lor Jitõb. (1 Kor. 14:8, 9) Ilo ad kwalok joij, kea, im jelã manit ilo wãwen ko otemjej, jej kajeoñe Anij eo ad ejoij, Jehovah.