Kainemõn Ro Erup Burueir
1 Ejelok ilo bwebwenato an armij bwe ear wõr juõn menin aikwij ñan lelok kainemõn. Ilo ad lor King eo ad, Jesus Christ, jej bar jerbal ñan “kitimi ro erup burueir.”—Ais. 61:1.
2 Wãwen ñan Lelok Kainemõn: Ñan kainemõn armij, jerbal in kwalok nan eo ad ej aikwij in juõn ennan ejokkin wõt juõn im kõketak. Ñe jej kõmman bwe en dik ad bwebwenato kin nana ko rej walok ilo lal in im tõmak ko rejjab mol, inem nan ko remol ilo Bible im kejatdikdik eo ekalañliñ kin kallimur ko an Anij renaj men ko raorõktata ilo bwebwenato eo. Ejjab melelen bwe jejjab maroñ bõkmantak ilo bwebwenato eo ad kin Armageddon. Jerbal eo ad ej ñan keañ kin “yiõ in joij an Jeova, im ran in kwi an aruij Anij,” im ñan “kakkõl e bwe en ukõt mour eo an.” Bõtab, nan in kakkõl eo kin Armageddon im kamelele ko kin ien kokkure eo en jab laplok jen unin tel eo kin kwalok gospel in an ailiñ in lañ.—Ais. 61:2; Ezek. 3:18; Mat. 24:14.
3 Jen Em-ñan-Em: Ekkã ad iion armij ro erup burueir kin air nañinmij, kin mij eo an juõn eo ejitenburu ibbeir, jab ekajet jimwe ko, ak abañ ko kin money. Einwõt ro rej anõk Christ, jej “tiriamokake” im kwalok ad kea ñan ro jej iion ir ilo jerbal in kwalok nan eo ad. (Luk 7:13; Rom. 12:15) Meñe jej readi juõn ak ruo eon ko me rej ekkejellok ibben abañ eo, jej aikwij einwõt ro me e “mõkõj [air] roñjake,” ilo wãwen in jej kõtlok bwe armij eo en kwalok eñjake ko an. (Jem. 1:19) Elikin ad roñjake mokta, enaj laplok ad bojak ñan lelok kainemõn.
4 Ñe ej ekkar ilo ien bwebwenato eo, jemaroñ ba, “Ij mõnõnõ in kwalok jet nan in kainemõn ko jen Bible eo.” Kajerbal lolokjen eo emõn bwe kwon jab kajeoñ in jumae aolep lemnak ko rebwid armij eo ej kwaloki. Jen men in, jen kate kij ñan kõketak im kainemõn ir ikijen ad kajerbal eon ko ilo Bible ñan kakajur lemnak ak eñjake eo air. Ikijen men in, kwomaroñ bukõt point kein ilo book in Reasoning From the Scriptures (Kamelele ilo Kõmmanwa Jen Bible Eo) peij 117-121 iumin katak eo “Encouragement” (Kõketak). Ak kwomaroñ likit ibben ri mweo juõn copy in tract eo Kainemõn kin ro re Barõk im etale nan in rejañ eo iloan.
5 Bukõt Ien ko Remõn ñan Kainemõn Ro Jet: Ewõr ke juõn ri turum, ri jerbal eo mõttam, ri school eo mõttam, ak uan family eo am me kwo jelã bwe ej aikwij kainemõn? Etke kwojjab kate yuk ñan lolok rein ilo moko imwiir kin mejenkajjik eo ñan lelok nan in kainemõn ko jen Bible eo? Ilo am jelã kin etke rej aikwij bõk kainemõn, kwomaroñ keboj ennan eo am ekkar ñan wãwen eo rej iione. Jet rej lelok nan in kainemõn ilo air jeje letter ko ak konono ilo telephone ko. Yokwe eo emol kin armij ro enaj kamakit kij ñan kwalok tiriamokake im ñan lelok nan in kainemõn eo rej aikwiji jen jeje ko ilo Bible eo.—Luk 10:25-37.
6 Aet, emwij jitõñ kij ñan ad kainemõn im kamõnõnõik ro rej buromõj, im ñan kabin kejatdikdik eo kin juõn ilju eo ekalañliñ. Eñin ej kainemõn eo armij ro ibelakin lal rej aikwiji. Ad konono ilo lañliñ kin men ko otemjej remõn Anij ear kallimur kaki enaj bõktok ainemõn im kejatdikdik ñan ro emol burueir. Jen kememej wõt aikwij eo ñan kũtimi ro erup burueir.—Aiseia 61:1.