Box in Kajitõk
◼ Kain nuknuk rot ko rekkar ñe jej lolok Kingdom Hall ko, Assembly Hall ko, moko ilo Bethel, im office ko ilo ra ko?
Ibelakin lal in, Kingdom Hall ko, Assembly Hall ko, moko ilo Bethel, im ra ko rej jikin ko rejej uair kar ajelok ñan jerbal eo an Jehovah. Jikin kein rejjab lukkun kilep im lap wõnãir, rerreo, ebolemen im aibujuij wãweir. Men in elukkun lap an oktak ñe jej keidi ibben jukjuk im bed in an Satan. Ro rej lolok jikin kein me rej kõmmane jerbal eo an Jehovah ie, rej aikwij bareinwõt kile ir einwõt armij ro an Jehovah, ro im rej kõmanman ankilan.
Einwõt Ri Christian ro, jej “kwalok karkarim einwõt dri jerbal an Anij” ilo aolep wãwen ko, ekitibuj baotokid im nuknuk ko rekkar im karbõb. (2 Kor. 6:3, 4) Jej aikwij bareinwõt kejbãrok mwilid. Ien otemjej nuknuk ko ad im baotokid rej aikwij kwalok kautiej einwõt ro don Jehovah Anij. Elaptata an mol men in ñe jej lolok headquarter ko relap ilo New York im ebar kitibuj ra ko ibelakin lal.
Ilo bwebwenato eo kin aorõkin nuknuk ko ad rekkar im baotokid, Organized to Do Jehovah’s Will (Bojak ñan Kõmanman Ankil an Jehovah) ej kwalok kin aikwij eo kin erreo ilo enbwin, nuknuk ko rekarbõb, im en emõn baotokid ñe jej bõk kunad ilo jerbal in kwalok nan im bed ilo kwelok ko an Christian. Inem, ilo peij 138, paragraph 3, ej ba: “Kememej, ãt in Bethel ej melelen ‘Imõn Anij.’ Kin men in, nuknuk ko ad, baotokid, im mwilid ren einwõt ñe jej kwelok ñan kabuñ ilo Kingdom Hall eo.” Kien in eutiej ej aikwij jerbal ñan ri kwalok ro kin Ailiñ eo ilo bukwon eo im bareinwõt ro jen jikin ko retolok me rej lolok Bethel. Ilo wãwen in, ri lotok ro renaj kwalok kamolol im kautiej.—Sam 29:2.
Nuknuk ko ad ren kalikar kij einwõt ro “rej kwalok air tõmak.” (1 Tim. 2:10) Nuknuk ko rekkar im baotokid enaj jibañ ro jet bõk juõn lemnak emõn kin wãwen kabuñ ñan Jehovah. Bõtab, kimij lo bwe ke jet ro jeid im jatid rar lolok jikin ko me rej kõmmane jerbal eo an Jehovah, rar jabde im nana wãwen air nuknuk, ak kõnaki nuknuk ko elap air kareelel. Kain nuknuk rot kein rejõkkar ñan Ri Christian ro ien otemjej. Ikijen men in, einwõt ilo aolep wãwen mour in Christian, jekõnan kejbãrok kien eo eutiej me ej kõmman bwe armij ro an Anij ren einjuõn jen lõl in ilo ad kõmman men otemjej ñan aibujuij an Anij.—Rom. 12:2; 1 Kor. 10:31.
Inem ñe kwoj lolok headquarter ko im ra ko ilo New York ak ra ko ilo jikin ko jet, jekdon elañe kwar karõk ñan lolok ak bõlen ilo ien kakije eo am ilo jikin aluij ko, kwon kajitõkin yuk make: ‘Nuknuk eo aõ im baotokiõ ej ke kwalok an emõn wãwen, erreo, im aorõkin jikin eo ij loloke? Ej ke kwalok ilo juõn wãwen emõn kin Anij eo ij kabuñ ñan e? Ro jet renaj ke mad im lõkatip kin baotokiõ?’ Ien otemjej jej aikwij, “kaibujuij katak eo an Anij Dri Lomorer ilo men ko otemjelok” ikijen ballid im baotokid!—Taitõs 2:10.