“Anõke Jenkwon Ne ko Neen”
1. Ewi wãwen jemaroñ erom ri kwalok ro rekeie?
1 Jesus ear jab school ilo school ko an ri kaki, ak ear Ri Kwalok eo elaptata ilo bwebwenato. Ilo kamolol, kar kejbãrok juõn lokbook emwij je kin jerbal in kwalok nan eo an Jesus ñan tokjen eo ad. Ñan ad maroñ erom ri kwalok ro rekeie, jej aikwij “anõke jenkwon ne ko neen.”—1 Pit. 2:21.
2. Ta eo enaj jibañ kij ñan kaddek ejja yokwe eo wõt an kar Jesus ñan armij ro?
2 Kwalok Yokwe ñan Armij: Yokwe eo emol ñan armij ear kamakit Jesus. (Mark 6:30-34) Elõñ ro ilo territory eo ad rej “iñtan” im elap air aikwiji mol eo. (Rom. 8:22) Ad kalmenlokjen kin wãwen eo enana ej walok ñan ir im an Jehovah yokwe im itoklimo kake ir enaj kamakit kij ñan wõnmanlok wõt im kwalok nan. (2 Pit. 3:9) Bareinwõt, enaj bidodolok an armij ro mõnõnõ in roñjake ennan eo ad elañe rej kile bwe emol ad kea kin ir.
3. Ilo ien rot ko Jesus ear kwalok nan ñan ro jet?
3 Konono ilo Jabdewõt Ien Emõntok: Jesus ear kajerbal jabdewõt ien emõntok ñan kwalok kin news eo emõn ibben ro jet. (Mat. 4:23; 9:9; Jon 4:7-10) Eindein, jekõnan bwe jen bojak ñan konono kin mol eo ke jej wõnmanlok wõt im kõmmani men ko ekkã ad kõmmani aolep ran. Jet rej bõk wõt Bible eo im book ko ibbeir bwe remaroñ kwalok nan ilo jikin jerbal, ilo jikin school, ñe rej itoitak im kaikujkuj, im ko eierlok wõt.
4. Ewi wãwen jemaroñ kõmman bwe Ailiñ eo en unin tel in jerbal in kwalok nan eo ad?
4 Ailiñ eo En Men eo Eaorõktata: News eo emõn kin Ailiñ eo ear unin tel in kwalok nan eo an Jesus. (Luk 4:43) Meñe ennan eo ad emaroñ jab kajju kwalok kin Ailiñ eo, jej aikwij kememej in jibañ ri mweo ñan lo aikwij eo kin e. Bareinwõt ñe jej kwalok kin wãwen ko renana ilo lal in me rej kalikar bwe jej mour ilo ran ko eliktata, men eo elaptata ej bwe jen “bõktok gospel in men ko remõn.”—Rom. 10:15.
5. Ñan an keie jerbal in kwalok nan eo ad, ta jerbal eo eaorõk an Bible eo?
5 Atartar ion Nan in Anij: Ilo aolepen ien jerbal in kwalok nan eo an Jesus ear atartar wõt ion Jeje ko ilo Bible. Ear jab katakin kin men ko an make. (Jon 7:16, 18) Ear mour kin Nan in Anij im ear kajerbale einwõt juõn kein kejbãrok ke Satan ear kajeoñ kabo e. (Mat. 4:1-4) Ñan an keie ad katakin ro jet, jej aikwij readi Bible eo aolep ran im jerbale ilo mour eo ad. (Rom. 2:21) Elañe jej uaki kajitõk ko ilo jerbal in kwalok nan, jej aikwij in kamelele kin ewi wãwen Bible eo ej rejetake men eo jej ba im read jen Bible eo elañe jemaroñ ilo ien eo wõt. Jekõnan bwe ri mweo en lo bwe jejjab kwalok lemnak ko ad make ak nan ko ad rej bedbed ion lemnak ko an Anij.
6. Ta eo Jesus ear kõmmane ñan tõbar buruen ri roñjake ro an?
6 Tõbar Buru eo ilo Am Katakin: “Ejelok armij e ar konono einwõt armij in.” (Jon 7:46) Eindein an kar ri karejar ro ba kin Jesus ke priest ro reutiej im Pharisee ro rar kajitõk etke rar jab kalbuji. Ijellokin an baj lelok wõt kein kamol ko, Jesus ear katakin ilo juõn wãwen me ear tõbar buruen ro ear katakin ir. (Luk 24:32) Jesus ear kajerbal wanjoñok ko kin men ko rej walok ilo mour ko an armij ro jen ran ñan ran, ñan jibañ ir melele ennan eo an. (Mat. 13:34) Jesus ear jab kobrak ri roñjake ro an kin melele ko elap jen joñan air maroñ bõki. (Jon 16:12) Ear lelok aibujuij ñan Jehovah im jab ñan e make. Einwõt Jesus, jemaroñ erom ri katakin ro remõn ikijen wõt ad ‘kejbãrok men in katakin ko ad.’—1 Tim. 4:16.
7. Etke Jesus ear kate wõt ilo jerbal in kwalok nan?
7 Kate Wõt Iumin Jab Kea im Jumae: Meñe Jesus ear kõmman jerbal ko relap, elõñ rar jab roñjake e. (Luk 10:13) Meñe ro uan family eo an Jesus make ak rar lemnak bwe ear “uriekak.” (Mark 3:21) Bõtab, Jesus ear kate wõt. Ear debij juõn lemnak emõn kinke ear lukkun liki bwe ebed ibben mol eo me emaroñ kar kanemkwoj armij ro. (Jon 8:32) Kin jibañ eo an Jehovah, kij bareinwõt jej kate wõt bwe jen jab ebwer.—2 Kor. 4:1.
8, 9. Ilo wãwen et eo jemaroñ kajeoñe Jesus ilo ad karmijete kõnan ko ad make kin news eo emõn?
8 Karmijete Kõnan ko Am Make ñan Bõk Kunam: Jesus ear karmijete jokane eo kin mweiuk kin jerbal in kwalok nan. (Mat. 8:20) Ear jab mõk in kwalok nan, jet ien ear kwalok nan lok im enañin boñ. (Mark 6:35, 36) Jesus ear jelã bwe ear wõr wõt jidik ien ibben ñan an kõtõbrak jerbal eo. Kinke “e karu ien jen kiõ,” kij bareinwõt jej aikwij karmijete kij make kin ien ko ad, kajur ko ad, im mweiuk ko mweied ilo ad kajeoñe Jesus.—1 Kor. 7:29-31.
9 Ri Christian ro ilo ebeben eo kein kajuõn rar ri kwalok ro rekeie kinke rar katak jen Jesus. (Jerb. 4:13) Kij bareinwõt jemaroñ kajejjet jerbal in kwalok nan eo ad elañe jej kajeoñe Ri Kwalok eo elaptata ilo bwebwenato.—2 Tim. 4:5.