Ta ko Aelõñ eo an Anij Enaaj Katõpraki?

MEN KO EM̦ÕJ AN AELÕÑ EO AN ANIJ KÕM̦M̦ANI

Ilo katak eo m̦okta, jaar kõnono kõn kõkal̦l̦e ko Jesus ear kwal̦o̦k kaki. Kõkal̦l̦e kein rej kaalikkar bwe Aelõñ eo an Anij em̦õj an jutak ilañ im Jesus Christ ej Kiiñ.

Baibõl̦ eo ej ba bwe ñe Jesus enaaj bõk kajoor im maroñ, enaaj jol̦o̦k Setan im tim̦on̦ ro an jãn lañ. Jerbal ko aer renana rej kõm̦m̦ani rejelõt wõt lal̦ in kiiõ im eñin unin an men ko renana rej wal̦o̦k jãn kar iiõ eo 1914.​—Revelesõn 12:7, 9.

Jekdo̦o̦n ñe el̦ap men ko renana rej wal̦o̦k ilo lal̦ in, ak Jesus, ãinwõt Kiiñ in Aelõñ eo an Anij, elõñ men ko ear kõm̦m̦ani ñan jipañ armej ro ipel̦aakin lal̦ in. Jej kam̦m̦oolol kõn jerbal eo ñan katakin armej ro ipel̦aakin lal̦ in kõn Baibõl̦ eo me Jesus ear kanaan kake, elõñ rej katak ñan jerbali naanin kakapilõklõk ko jãn Baibõl̦ ilo mour ko aer kajjojo raan. (Aiseia 2:2-4) Elõñ milien armej rar katak ñan jab kõm̦m̦an bwe jerbal eo aer en men eo aorõktata jãn jabdewõt men, im rej katak ñan kakõm̦m̦anm̦an mourin baam̦le ko aer, im ñan lañlõñ kõn m̦weiuk ko ijello̦kun aer erom ri-kõm̦akoko ñani. Kiiõ armej rein rej katak ñan tokjãn eo aer im rej erom kain armej ro me Anij ekõn̦aan bwe ren pãd ilo Aelõñ eo an.

TA MEN KO AELÕÑ EO AN ANIJ ENAAJ KATÕPRAKI TOKÃLIK?

Meñe Jesus ej irooj kadede ilañ, ak kien ko an armej rej tõl wõt ioon lal̦ in. Bõtab, em̦õj an Anij jiroñ Jesus im ba: “Kwõn irooj ilo bwiljin ro ri kõjdat Eok.” (Sam 110:2) Ejjabto Jesus enaaj lukkuun ko̦kkure aolep ro rej jum̦ae im bõktok aenõm̦m̦an ñan ro rej m̦õn̦õn̦õ in pokake Anij.

Ilo naaj iien en̦, Aelõñ eo an Anij enaaj em̦m̦akũt ñan

• Ko̦kkure kabuñ ko reriab. Kabuñ ko me rar kwal̦o̦k riab ko kõn Anij im kõm̦m̦an bwe mour ko an armej en pen, renaaj jako. Baibõl̦ eo ej kwal̦o̦k bwe kabuñ ko reriab rej ãinwõt juon kõrã ekijoñ. Elõñ renaaj ilbõk kõn iien eo ej bõk ko̦kkure.​—Revelesõn 17:15, 16.

• Naaj kõjem̦l̦o̦k an armej tõl. Aelõñ eo an Anij enaaj kõjem̦l̦o̦k an aolep kien ko an armej tõl.​—Revelesõn 19:15, 17, 18.

• Jol̦o̦k armej ro renana. Ak ta kõn armej ro me rekõn̦aan wõt kõm̦m̦ani men ko renana im rejjab kõn̦aan pokake Anij? “A ro renana, renaaj jako jãn ãneo, im renaaj tũm̦wi jãne ro rej m̦on̦e armej.”​—Jabõn Kõnnaan 2:22.

• Jol̦o̦k Setan im tim̦on̦ ro. Setan im tim̦on̦ ro enaaj ejjel̦o̦k aer maroñ in “bar m̦on̦e aelõñ ko.”​—Revelesõn 20:3, 10.

Ta naaj mel̦el̦ein aolepen men kein ñan ro rej m̦õn̦õn̦õ in pãd ium̦win tõl eo an Aelõñ eo an Anij?

MEN KO AELÕÑ EO AN ANIJ ENAAJ KÕM̦M̦ANI ÑAN ARMEJ

Ãinwõt juon eo ej tõl im Kiiñ ilañ, Jesus enaaj katõpraki elõñl̦o̦k men jãn jabdewõt men ko ri-tõl ro an armej remaroñ kõm̦m̦ani. Ro renaaj jipañe im tõl ippãn me kar kããlõt er jãn lal̦ in ibwiljin armej ro ej 144,000. (Revelesõn 5:9, 10; 14:1, 3) Enaaj lale bwe ankilaan Anij en pãdjaake aolepen lal̦ in. Ta ko Aelõñ eo an Anij enaaj kõm̦m̦ani ñan armej ro ilo lal̦ in?

• Jol̦o̦k nañinmej im mej. “Ri-jokwe ie ejãmin ba, ‘inañinmej,’” im “enaaj ejjel̦o̦k bar mej.”​—Aiseia 33:24; Revelesõn 21:4.

• Bõktok aenõm̦m̦an eo em̦ool im jokwane. “Aenõm̦m̦an an ro nejũm̦ enaaj l̦ap,” im “enaaj jijet ium̦win vain eo an im ium̦win wõjke fig eo an, im ejjel̦o̦k enaaj kaamijak bar juon.”​—Aiseia 54:13; Maika 4:4.

• Naaj lel̦o̦k jerbal ko el̦ap tokjãer. “Enaaj etto aer m̦õn̦õn̦õ kake jerbal an peier. Rejjãmin jerbal pata.”​—Aiseia 65:22, 23.

• N̦amejal̦an jorrããn ko ilo lal̦ in im mejatoto. “Ãne jem̦aden im eo e m̦õrã renaaj m̦õn̦õn̦õ, im ãne jem̦aden enaaj lañlõñ, im ebbõl ãinwõt wũt rose.”​—Aiseia 35:1.

• Katakin armej ro kõn ta ko rej aikuj kõm̦m̦ani bwe ren maroñ bõk mour indeeo. “Bwe ren maroñ bõk mour indeeo, rej aikuj in jel̦ã kõn kwe, Anij eo wõt em̦ool, im Jesus Christ, eo kwaar jilkintok.”​—Jon 17:3.

Anij ekõn̦aan bwe kwõn m̦õn̦õn̦õ kõn jeraam̦m̦an kein. (Aiseia 48:18) Katak eo tok juon enaaj kõmel̦el̦eik ta ko kwõmaroñ kõm̦m̦ani kiiõ bwe kwõn maroñ bõk jeraam̦m̦an in elukkuun em̦m̦an ilju im jekl̦aj.