En Bolemen Ar Kapojõk ñõn Kwojkwoj in Kememej Eo
Ej juõn menin kalõñliñ im juõn jerammõn elap kin ro dri kaloran Kraist bwe en bolemen air kapojõk ilo joten eo ñe renaj ememeje mij eo an Jisõs Kraist! (Luk 22:19) En ewi wãwen ar kapojõk kin Kwojkwoj in?
◼ Ien im Jikin eor: Aolep rej aikwij melele kin auõ eo im jikin eo naj kõmõne Kwojkwoj in ie. Elañe elõñlok jen juõn congregation renaj kwelok ilo Kingdom Hall eo, eaurõk bwe aolep ren kajejit auõ in itok im drioijlok ilo juõn lajrõk emõn kin an karu ien ikõtan kwelok kein kajuju. Naj aikwij lale bwe en jab binjak jikin drioij-dreloñ ko, ilo mõn kwelok eo, turin ial, im ijoko wa ko rej ber ie.
◼ Peba in Kir ko: Aolep dri kwalok ro eor ke air peba in kir, im emwij ke air riiti? Kwonañin kamelmel ke wãwen am naj lelok peba in kir in? Kwonaj lelok peba in ñõn wõn? Jen kate bwe aolep peba in kir kein ren mat.
◼ Ial: Jet ian ro im eor air itoklimo kab jet ian ro jeer im jãter remaroñ aikwij ial ak jibõñ ilo bar jet wãwen ko. Ta karõk ko emwij bebe kaki ñõn jibõñ rein?
◼ Bred im Wain: Jab leto letak bred im wain eo mokta jen an tulok al. Lale bwe en or ro im renaj lelok bred im wain ñõn ro uan eklisia ro im rejjab maroñ in kwelok kin air ridto im mõjino. Naj aikwij kabukot bred im wain, ko rekkar im keboji.—Lale Imõniaroñroñ eo an Pãpode 1, 2003, peij 22, pãrokõrããp 14.
◼ Kingdom Hall: En let ar karreoiki mõn kwelok eo mokta jen ien kwelok eo. Pileij ko, kõp in wain ko, kab tebel im eran tebel ko ren karbõp im jejit. Men kein ren rerelok mokta jen an ijjino kwelok eo. Elañe jenaj kajerbal bar juõn jikin kwelok, lale bwe en pojõk kein konono ko ie bwe en emõn an dri kwelok ro maroñ roñjake. Mokta jen ien eo, naj aikwij ekãlel im kemeleleik ro renaj kajijet armij kab ro renaj leto letak bred im wain, kin ta kwonair, lajrõk in kwelok eo, im air aikwij karbõp.
Ilo ien in elap an aurõk, ien Kwojkwoj in Kememej mij eo an Jisõs Kraist, jenaj lukkun kõnan pojõk, kajuju iar einwõt juõn congregation. Emol, jerammõn eo elap jen Jeova enaj ber iben aolep ro rej kwalok air kamolol jen burueir kin men ko Jeova ear letok ñõn armij ro ikijen katok eo an Nejin ejitenburu iben, Jisõs Kraist.