‘Lelok Am’ ñõn Dri Katak ro Am
1. Ta eo jenaj aikwij kõmõne ñõn jibõñ juõn eo ej katak Baibel?
1 Ñõn jibõñ juõn eo ej katak Baibel ñõn ien eo enaj ajelok an mour, ej kitibuj elõñlok men ko jen am baj keini ien am katak Baibel iben. Dri jilik Paul ear keiri kõtan eo an iben ro ear katakin ir einwõt lio dri kakajiriri ej lale ro nejin. Bar kij jej mõnõnõ in lelok ‘ar mour’ ñõn jibõñ dri katak rein ar bwe ren ridtolok ilo mour in Kristian.—1 Tes. 2:7-9.
2. Etke jej aikwij kwalok ar itoklimo, im ewi wãwen jemaroñ kõmõne men in?
2 Kwalok Am Itoklimo: Ñe dri katak Baibel eo ej jerbali men ko ej katak kaki, bõklikõt eo an enaj kamakõte bwe en bwijrõk an kõmao iben ro im rejjab kõnan lor katak ko jen Baibel. (1 Pit. 4:4) Baamle eo an emaroñ joloke. (Matu 10:34-36) Ñõn kainemõn e, jemaroñ kwalok yokwe eo eokmãnãn. Juõn missionary eo eor an iminene ej kakabilek: “Jab mõkõj in etal ñe emwij am katak iben. Elañe kwomaroñ, ber jidrik im kõmao iben.” Pojõk in jibõñ dri katak eo ilo wãwen ko jet. Ñõn wanjoñok, kwomaroñ ke telephone e ak lolok e ñe enañinmij? Kwomaroñ ke jijõt iben ilo ien kwelok ko im jibõñ e kin ajiri ro nejin, elañe ekkar?
3. Ewi wãwen jemaroñ jibõñ dri katak ro ar ñõn air bõk nan in kakajur jen congregation eo?
3 Jibõñ jen Congregation Eo: Elañe kwoj kwalok nan im ebake mweo imõn eo kwoj katak iben, etke kwojjab lolok e im ba kajen ro kwoj kwalok nan ibeir? Jen ien ñõn ien, ñe ekkar, kwon kir dri kwalok ro jet, ak elder ro, bwe ren jerbal ibõm ilo ien am katak iben. Bareinwõt, ilo mõkõj elikin am ijjino katak Baibel iben, rejañ e bwe en kwelok ilo Kingdom Hall eo. An kõmao iben ro uan congregation eo enaj kakajur e, im rein remaroñ naj erom baamle eo an ilo jitõb.—Mark 10:29, 30; Hib. 10:24, 25.
4. Ewi wãwen kate eo ar emaroñ bõk leen ko remõn?
4 Juõn jemen im elap an kate ñõn jibõñ ajiri ro nejin ilo mour in Kristian enaj lap an mõnõnõ ñe rej jutõk bin kin Jeova im etetal ilo mol eo. (3 Jon 4) Jemaroñ bõk ejja mõnõnõ in wõt ñe jej lelok ar ñõn jibõñ ro jej katak Baibel ibeir.