Baamle ko Remaroñ Bõk Jibañ

1. Ewi wãwen baamle ko ilo Israel rar bõk tokjen jen karõk eo kin ran in Sabat kajjojo wik?

¹ Kejbãrok ran in Sabat ear juõn karõk emmõn jen Jeova me baamle ko rar bõk elap tokjen ko jene. Dri Israel ro rar kakije jen jerbal ko air im kajerbal ien in ñan kalomõnlokjen kin jerbal ko remmõn an Jeova im kin kõtan eo air ibben. Ro jemen im jinen rar maroñ kortokjen ien in ñan katakin ro nejiir ñan yokwe Kien ko an Jeova. (Dut. 6:​6, 7) Kajjojo wik ilo ran in Sabat, ro dron Jeova rar lemnak wõt kin wãwen ko rar maroñ kakõmmanmanlok kõtan eo air ibben Jeova.

2. Ta eo kien eo kin ran in Sabat ej katakin kij kin Jeova?

² Ilo ran kein, Jeova ejjab kakien baamle ko ñan air kejbãrok ran in Sabat. Bõtab kien eo kin ran in Sabat ej katakin kij juõn men kin Anij. Ien otemjej ej kaurõk jimjerã eo an ibben armij ro dron im ekõnan bwe ren bõk tokjen ko remmõn jen air drebij juõn kõtan emmõn ibben. (Ais. 48:​17, 18) Rainin, juõn ian wãwen ko me Jeova ej kalikar an kaurõk jimjerã eo an ibbed ej ikijen karõk eo kin Ien Kabuñ an Baamle kajjojo wik.

3. Taunin kar karõk Ien Kabuñ an Baamle eo?

³ Unin Kar Karõk Ien Kabuñ an Baamle. Ilo Jãnwõde 2009, kar jino kõmmane Katak Baibel an Congregation eo ilo ejja boñin eo ej walok Jikuul in Kwalok Nan eo an Dri Kristian im Kwelok in Ad Jerbal ñan Ailiñ Eo. Juõn ian un ko unin air kar kõmmane karõk in ej ñan kebellok juõn ien emmõn bwe kajjojo baamle ko ren kakajur jimjerã eo air ibben Jeova. Remaroñ kõmmane men in ilo air karõk juõn jota kajjojo wik ñan air kõmmane ien kabuñ an baamle. Kar rejañ kajjojo baamle ñan ukõt ran in katak eo air ibben baamle eo ñan ien eo rekin kõmmane book study eo, elañe remaroñ. Bareinwõt kar rejañ ir bwe ren bõk air ien im jab ekkaiurir ñe rej bwebwenato ibben dron kin Baibel eo im bwe ren katak kin men ko rejejit ñan aikwij ko air.

4. Aitokõn Ien Kabuñ an Baamle eo ej aikwij ke juõn awa wõt? Joij im kemelele.

⁴ Bwe jen bed ilo kwelok in bookstudy eo, jaar aikwij ien ñan ad keboji nuknuk ko ad im ilok ñan jikin kwelok eo im kõmmani men ko eierlok wõt meñe aitokõn kwelok eo kar juõn wõt awa. Bõtab kinke kar ukõt kwelok in book study eo ñan bar juõn jota, kiõ ebellok aolepen joten eo ñan ad kabuñ ñan Jeova einwõt juõn baamle. Kin men in, aitokõn Ien Kabuñ an Baamle eo ejjab aikwij juõn awa wõt. Jen men in, jej aikwij karõke ien eo ekkar ñan joñan maroñ ko an ro uan baamle eo ad im ñan kajejit aikwij ko air.

5. Ro uan baamle ko rej aikwij ke kajerbal aolepen Ien Kabuñ an Baamle eo ñan air bwebwenato ibben dron kin Baibel eo? Joij im kemelele.

⁵ Jej Aikwij Ke Kajerbal Aolepen Ien Kabuñ an Baamle eo ñan Bwebwenato Ibben Dron kin Baibel Eo? Baamle ko rej kõketak dron ñe rej bwebwenato kin katak ko jen Baibel eo ibben dron. Emaroñ eindrein bareinwõt ibben dri belele ro im ejelok nejiir. (Rom 1:​12, UBS) Men in ej kõmman air ebake dron. Eñin unin eaurõk bwe jen karõk ien ñan ad bwebwenato ibben dron kin Baibel eo ilo Ien Kabuñ an Baamle eo. Bõtab, kajjojo uan baamle eo remaroñ bareinwõt kajerbal ien eo ñan katak ibbeir make. Ñan wanjoñok, elikin air bwebwenato ibben dron kin Baibel eo, ro uan baamle eo remaroñ bed iloan rum eo wõt im katak ibbeir make kin katak ko rekajjo jen dron. Bwelen juõn emaroñ karerelok an kabojaklok iman ñan kwelok ko ak eo juõn emaroñ riiti Imõniaroñroñ ko. Jet baamle ko rar bebe ñan air jab aluij TV ilo aolepen boñin eo.

6. Ewi wãwen jemaroñ bwebwenato ibben dron ilo Ien Kabuñ an Baamle?

⁶ Wãwen ko Jemaroñ Bwebwenato Ibben Dron kin Baibel Eo. Ñe jej bwebwenato ibben dron ilo Ien Kabuñ an Baamle, jejjab aikwij kõmmane ikijen kajitõk im uak wõt. Ñan kõmman bwe Ien Kabuñ an Baamle en lap an limo ibben aolep, eloñ baamle ko rej bwebwenato ibben dron kin Baibel eo ilo ejja wãwen eo jej kõmmane kwelok in Jikuul in Kwalok Nan eo im kwelok in Ad Jerbal ñan Ailiñ Eo. Rej kõmmane Ien Kabuñ an Baamle ilo eloñ mõttan ko im wãwen ko. Ñan wanjoñok, baamle eo emaroñ riit Baibel eo ibben dron, kabojaklok iman jet katak ko ñan kwelok ko, innem tokelik kamelmel kin jerbal in kwalok nan. Peij 6 ej kwalok kin wãwen ko jet jemaroñ kõmmane Ien Kabuñ an Baamle.

7. Ewi wãwen ritto ro rej aikwij jerbal ibben ro nejiir ilo Ien Kabuñ an Baamle?

⁷ En Lap Yokwe im Mõnõnõ ilo Ien Kabuñ an Baamle. Elañe ewor ainemõn im yokwe, enaj emmõn an ro uan baamle eo katak Baibel eo. Elañe elõñlok jen juõn baamle ej jokwe ilo mweo, enaj emmõn ñe kwoj kõmman karõk bwe Ien Kabuñ an Baamle eo am en juõn ien eaurõk ñan kwe im ro nejõm wõt. Jet ien, kwe im ro nejõm kom maroñ jijõt inabõj ion jaki eo im bwebwenato kin Baibel eo ibben dron. Jab ãliklik in kakije iomin jet minit elañe ej menin aikwij. Jet baamle ko rej keboji jet ekan ko ñan air mõñã elikin air katak. Ritto ro remaroñ kajerbal Ien Kabuñ an Baamle ñan kwalok kin juõn abañ ak mõjno me rej kile ibben ro nejiir. Bõtab, ejjab jimwe ñan air kowe ak kajimwe ro nejiir ñe rej kõmmane men in. Bõtab ikijen abañ ko ebin konono kaki, emmõnlok ñe rej kebake ajiri eo ilo bar juõn ien ilo wik eo im kennan ibben wõt kin abañ eo. Ilo wãwen in ajiri eo eban jook iman mejen ro jein ak jatin. Ien Kabuñ an Baamle ej aikwij juõn ien elimo im ekamõnõnõ me aolep rej reimanlok kake, elaptata kinke Anij eo jej kabuñ ñan e ej juõn Anij emõnõnõ.​—1 Tim. 1:​11.

8, 9. Ewi wãwen ro bõran baamle ko rej aikwij kabojaklok iman?

⁸ Wãwen eo Bõran Baamle eo Emaroñ Kabojaklok Iman. Baamle eo enaj bõk elap tokjen elañe bõran baamle eo ej kabojaklok iman mokta jen kajjojo Ien Kabuñ an Baamle eo. Emaroñ kõmmane men in ilo an bebe lok iman kin ta ko rej aikwij bwebwenato kaki im etali ibben dron. (Ken. 21:⁠5) Enaj emmõn elañe leo ej kebake lio im kajitõk kin lemnak ko an mokta. (Ken. 15:​22) Bareinwõt, enaj emmõn elañe jet ien ej kajitõk ibben ro nejin kin lemnak ko air. Elañe kwoj kõmmane men in, kwonaj maroñ in jelã kin ta ko rej kaitoklimoik im kainebataik ro nejõm.

⁹ Ejjab aolep ien bõran baamle eo ej aikwij jolok elap ien ñan an kabojaklok iman. Emmõn ñe ewor juõn lajrak me baamle eo rej lore ilo Ien Kabuñ an Baamle eo kajjojo wik. Men in enaj jibañ bõran baamle eo bwe en jab aikwij lemnak ak kõmman juõn lajrak ekãl kajjojo ien. Elikin an jemlok Ien Kabuñ an Baamle eo, enaj emmõn elañe bõran baamle eo ej kabojaklok iman ñan wik eo tok juõn kinke ilo ien in enaj bidrodrolok an jelã kin katak ko me renaj jejjet ñan ir. Jet bõran baamle ko rej kõlajrak ilo juõn peba men ko baamle eo renaj katak kaki ñan wik eo tok juõn im rej likiti ilo juõn jikin me aolep remaroñ loe. Ñe ro uan baamle eo rej lo peba eo, men in enaj jibañ ir jelã ta ko rej aikwij kabojaklok iman im renaj kijorur ñan Ien Kabuñ an Baamle.

10. Ta ko ro im ejelok beleir remaroñ kõmmani ilo Ien Kabuñ an Baamle?

¹⁰ Ta Elañe Ejelok Beleiõ ak Eo Beleiõ Ejjab Bed ilo Mol Eo? Ro im ejelok beleir remaroñ kajerbal Ien Kabuñ an Baamle eo ñan katak ibbeir make. Men in ej aikwij kitibuj air riit Baibel, kabojaklok iman ñan kwelok ko im air riiti Imõniaroñroñ ko. Jet dri kwalok ro rej bareinwõt bukot melele ko jen book ko ad ñan kalaplok air melele kin juõn katak. Jet ien, remaroñ kir bar juõn dri kwalok ak juõn baamle ñan air kobalok ibben bwe ren kõketak dron kin katak ko jen Baibel.

11, 12. Ta jerammõn ko jenaj loi ñe jej ekkeini ad kõmmane Ien Kabuñ an Baamle?

¹¹ Ta Jerammõn ko Jenaj Loi Ñe Jej Ekkeini Ad Kõmmane Ien Kabuñ an Baamle? Ro im rej kabuñ ñan Jeova kin aolepen burueir, renaj ebakelok e. Bareinwõt, ñe ro uan baamle eo rej kabuñ ñan Jeova ibben dron men in enaj kõmman air lukkun ebake dron. Ruo dri belele rar je im kwalok kin jerammõn ko rej loi: “Ejelok nejimro im kimro ej jimor pioneer. Kimro ej lukkun kijorur ñan Ien Kabuñ an Baamle eo amro. Elaplok amro jelã kajen dron kiõ im jimjerã eo amro ibben Jeova ej kajurlok. Ñe kimro ej ruj ilo ran eo kimro kar karõk ñan katak ibben dron, kimro ej mõnõnõ im ba: ‘Ilukkun kijorur ñan Ien Kabuñ an Baamle eo arro jotenin!’ ”

¹² Karõk eo kin ien kabuñ an baamle eo ej bareinwõt jibañ baamle ko me relukkun boub. Juõn kõrã jeid im jatid im ejelok belen me ewor ruo nejin ladrik im ej pioneer, ear je: “Kar mokta ear jeja amjil katak ibben dron kinke iar lukkun mõk. Ear ejelok aõ ien ñan kõmmani aolep men ko iar aikwij in kõmmani. Innem ij jejewõj ñan kamolol kom jen buruõ kin karõk eo kin Ien Kabuñ an Baamle. Kiõ kimjil ej ekkeini amjil katak ibben dron kajjojo wik, im kin men in kimjil ej lo elõñ jerammõn ko.”

13. Ta eo kajjojo baamle ko rej aikwij kõmmane bwe ren lo tokjen ko remmõn jen karõk eo kin Ien Kabuñ an Baamle?

¹³ Einwõt karõk eo kin ran in Sabat, Ien Kabuñ an Baamle ej juõn menin letok jen Jeova ñan jibañ baamle ko. (Jem. 1:​17) Elañe baamle ko ilo Israel rar kortokjen ran in Sabat, men in enaj kar jibañ ir kakajurlok jimjerã eo air ibben Jeova. Ilo ejja wãwen in wõt, baamle ko ad renaj lo tokjen ko remmõn elañe ejimwe ad kajerbale joten eo kar karõk ñan Ien Kabuñ an Baamle. (2 Kor. 9:​6, UBS; Gal. 6:​7, 8; Kol. 3:​23, 24) Ilo air kortokjen karõk in, kajjojo baamle ko renaj ba ejja nan kein me dri jeje sam ear ba: “Ak ña, ekanuij emmõn aõ bed ebake Anij! Ilo Iroij aõ Anij ij lo aõ jokane.”​​—Sam 73:⁠28.

[Naan ko ilo peij 5]

Ien Kabuñ an Baamle ej aikwij juõn ien elimo im ekamõnõnõ me aolep rej reimanlok kake, elaptata kinke Anij eo jej kabuñ ñan e ej juõn Anij emõnõnõ

[Bo̦o̦k eo ilo peij 6]

KEJBÃROK PEBA IN

Jet Wãwen ko ñan Kõmmane Ien Kabuñ an Baamle

Baibel:

• Riit jet ian japter ko me jenaj etali ilo kwelok eo. Ñe jej riiti Baibel eo, bwelen juõn emaroñ riit nan ko an eo im ej kwalok kin bwebwenato eo. Im ro jet remaroñ riiti nan ko an armij ro im kõmman bwe ainikeir en einwõt ainiken armij ro ilo bwebwenato eo.

• Kõmman tieta kin japter ko kom kar riiti ilo Baibel eo.

• Karõk bwe kajjojo uan baamle eo en mokta riit ibbeir make japter ko me jenaj etali ilo kwelok eo ilo wik eo. Rejañ ir ñan je kajitõk ko air kin men ko rar riiti ilo japter ko. Innem bukot melele ko ibben dron ñan uaki kajitõk ko an aolep.

• Je juõn eon ion juõn peba jidrik. Kajeoñ in kiili im kwalok kin melelen eon eo. Kõmmane men in kajjojo wik im kejbãroki peba jidrik kein. Innem, lale jete eon ko kwomaroñ kememeji jen wik ñan wik.

Kwelok Ko:

• Kabojaklok iman jet katak ko ñan kwelok ko ibben dron.

• Kamelmel al in kwelok ko me jenaj al kaki ilo wik eo.

• Elañe juõn ian baamle eo am ewor kwonan ilo Jikuul in Kwalok Nan ak Kwelok in Ad Jerbal ñan Ailiñ Eo, bwebwenato ibben dron kin wãwen eo emaroñ kõmmane ak en kamelmel kake iman baamle eo.

Katak ko Rejejjet ñan Baamle eo Am:

• Kamelmel ibben dron kin wãwen eo ajiri eo nejim emaroñ emakõt ñe ej iioni melejoñ ko ilo jikuul.

• Ajiri ro remaroñ bukot melele ko kin juõn katak im tokelik kemeleleik jemeir im jineir kin katak eo. Ñe rej kõmmane men in, ro jemen im jinen remaroñ arin ajiri ro nejiir im ro nejiir remaroñ arin jemeir im jineir.

Kwalok Nan:

• Kamelmel kin ennan ko kom naj kajerbali ilo jerbal in kwalok nan ilo Jãdede im Jabõt.

• Bwebwenato ibben dron kin mejenkajik ko baamle eo emaroñ kõtõbari ñan kalaplok ijo kwonair ilo jerbal in kwalok nan ilo aliñ eo Kwojkwoj in Kememej eo enaj walok ak ilo ien air kakije jen jikuul.

• Karõk ien bwe iomin jejjo minit, kajjojo uan baamle eo en bukot uak ko ñan kajitõk ko me armij ro rej bõkmantak ilo jerbal in kwalok nan. Innem tokelik, kamelmel kin men in.

Wãwen ko Jet:

• Riit juõn katak jen Imõniaroñroñ eo ekãl ibben dron.

• Kõmman bwe kajjojo uan baamle eo en riiti mokta juõn katak jen Imõniaroñroñ eo ekãl me ej kaitoklimoik e. Innem tokelik, en kwalok men ko remmõn ibben kin katak eo ilo Ien Kabuñ an Baamle.

• Jet ien kwomaroñ kir dri belele ro ak juõn dri kwalok nan ñan kobawõj ibbemi ilo Ien Kabuñ an Baamle. Innem kajitõk ibbeir ñan kwalok bwebwenato ko air kin jerbal in kwalok nan ak kin ewi wãwen rar jelã kin mol eo.

• Aluij juõn ian pija ko jen drolul eo an Jeova im tokelik bwebwenato kake ibben dron.

• Elikin am bed ilo juõn kwelok elap, etale ibben dron katak ko.

• Lale menin kõmmanman ko an Jeova, innem bwebwenato ibben dron kin ta ko rej katakin kij kin Jeova.

• Jerbal ibben dron ñan jiñaiki juõn map ak jaat, ak kõmman annañin men ko kwoj riit kaki ilo Baibel eo.