Kwal̦o̦k Kijenmej Ej M̦õttan Jerbal in Kwal̦o̦k Naan
1. Ewi wãween Jeova ej kwal̦o̦k kijenmej ñan armej otemjej?
1 Kijenmej ej men eo el̦ap an Anij kwal̦o̦ke ñe ej jerbal ippãn armej. (Ex. 34:6; Sam 106:41-45; 2 Pi. 3:9) Jemaroñ loe waanjoñak eo an kõn yokwe im kijenmej ikijjeen jerbal in kwal̦o̦k naan eo me ej pãdjake pel̦aakin lal̦ in. Enañin 2,000 iiõ ko in an Jeova jerbal ippãn armej, im ej wõnm̦aanl̦o̦k wõt karuakl̦o̦k armej ro ettã bũrueer ñan ippãn. (Jon 6:44) Ewi wãween jemaroñ l̦oore joñak in an Jeova kõn kwal̦o̦k kijenmej ilo jerbal in kwal̦o̦k naan?
2. Ewi wãween jemaroñ kwal̦o̦k kijenmej ñe jej kwal̦o̦k naan?
2 Jãn Em̦ ñan Em̦: Jej anõke an Jeova kijenmej ilo ad “wõnmanlok wõt” im jab bõjrak in kwal̦o̦k ñan ro rej jañin kwal̦o̦k aer itoklimo. (Jrb. 5:42, UBS) Jej kijenmej wõt meñe rej kajjirere, im jum̦ae kõj ilo kwal̦o̦k naan. (Mark 13:12, 13) Jej bareinwõt kijenmej ñe jej kate wõt kõj im utdikdiki inne in m̦ool eo meñe epen ad tõpare ro rej itoklimo.
3. Etke jej aikuj kijenmej ñe jej bar jepl̦aak ak katak ippãn ri katak ro?
3 Ippãn Ri Katak Ro: Jej aikuj kijenmej ñe jej ekkat menin eddek ko. Jemaroñ utdikdiki, bõtab jeban kõm̦õkajl̦o̦k an eddek. (Jem. 5:7) Ãinl̦o̦k wõt ñe jej katak ippãn ri katak ro, jidik kõn jidik enaaj l̦apl̦o̦k aer mel̦el̦e. (Mark 4:28) Eban m̦õkaj an armej ro jej katak ippãer juloki tõmak im m̦anit ko aer me rej n̦ae Baibõl̦ eo. Jejjab aikuj ka m̦õkajl̦o̦k aer wõnm̦aanl̦o̦k im iuun er bwe ren oktak. Jej aikuj kijenmej im kõtl̦o̦k iien bwe kajoor eo an Anij en jerbal im kam̦akũt bũruon ri katak eo.—1 Ko. 3:6, 7.
4. Ewi wãween kijenmej enaaj jipañ kõj lo tõprak ñe jej kwal̦o̦k ñan ro nukid im rejjab ri tõmak?
4 Ro Nukid im Rejjab Ri Tõmak: Meñe jelukkuun kõn̦aan bwe armej ro nukid ren jel̦ã m̦ool eo, jej kijenmej wõt im kõttar m̦ae juon iien em̦m̦an bwe jen kwal̦o̦k ñan er. Im jejjab aikuj in lel̦o̦k elõñ mel̦el̦e ko kõnke remaroñ ebbeer. (Ekl. 3:1, 7) Kõn men in, jen kõtl̦o̦k bwe m̦wilid en kalikkar kain armej rot kõj im pojak in uwaak iien otemjej ilo jouj im kautiej. (1 Pi. 3:1, 15) Aet, ad kijenmej ilo jerbal in kwal̦o̦k naan, jenaaj lo el̦apl̦o̦k tõprak im jenaaj kabuñbũruon Jemed ilañ.