Jen “Tũriam̦okake” Armej Ro
1. Ta eo el̦ap an armej ro aikuji rainin?
1 Rainin, elõñ armej ro rej aikuj jipañ. Jorrããn ko rej wal̦o̦k ilo lal̦ in ej kõm̦m̦an bwe elõñ ren bũrom̦õj, inepata, im l̦õmn̦ak bwe eban em̦m̦anl̦o̦k mour ilju im jekl̦aj. Kõj ro doon Jeova ewõr ad maroñ ñan kwal̦o̦k bwe jej kõn̦aan jipañ armej ro. (Matu 22:39; Gal. 6:10) Ewi wãween jemaroñ kõm̦m̦ane men in?
2. Ta wãween eo em̦m̦antata jemaroñ tũriam̦okake armej ro?
2 Kwal̦o̦k Naan: Anij wõt emaroñ lukkuun kaenõm̦m̦an kõj. (2 Ko. 1:3, 4) Jeova ej rõjañ kõj bwe jen anõke joñok eo an im “tũriam̦okake” ro jet. Jeova ear letok ñan kõj jerbal eo ñan lol̦o̦k armej ro im kwal̦o̦k naan ñan er kõn Aelõñ eo An. (1 Pit. 3:8) Ad niknik in kõm̦m̦ane jerbal in ej wãween eo em̦m̦antata jemaroñ kaenõm̦m̦an ro “e rup bũrueir.” Etke? Kõnke Aelõñ eo an Anij wõt emaroñ namejelan jorrããn ko rej wal̦o̦k ñan armej ro. (Ais. 61:1) El̦ap an Jeova tũriam̦okake armej ro doon. Kõn men in, m̦õttan jidik enaaj jol̦o̦k aolep men ko renana im kõm̦m̦an bwe lal̦ en obrak kõn armej ro rewãnõk.—2 Pit. 3:13.
3. Ewi wãween jemaroñ watõk armej ro ãinwõt kar Jijej?
3 Watõk Armej ro Ãinwõt kar Jijej: Meñe Jijej ear kwal̦o̦k naan ñan elõñ jarlepju in armej, ak ear l̦õmn̦ak kõn kajjojo iaaer. Ear kile bwe kajjojo armej ro rar aikuj jipañ ñan ejaak juon jem̦jerã ippãn Anij. Armej ro rar ãinwõt jiip ro me ejjel̦o̦k aer ri tõl. Jijej ear tũriam̦okake armej ro im kõn men in ear jino an katakin er. (Mark 6:34) Ñe jej watõk armej ro ãinwõt kar Jijej, men in enaaj lujur kõj ñan tũriam̦okake er kajjojo. Men in enaaj alikkar ilo wãween ad kõnono im ilo turin mejed. Jerbal in kwal̦o̦k naan enaaj men eo eaorõktata ilo mour eo ad im jenaaj jel̦ã kilen ukoktak bwe naan ko ad en jejjet ñan aikuj ko an kajjojo armej ro.—1 Ko. 9:19-23.
4. Etke jej aikuj kwal̦o̦k tũriam̦o?
4 Elõñ armej ro jãn aolep aelõñ ko rej m̦õn̦õn̦õ in roñjake nuuj eo em̦m̦an kõn Aelõñ eo im bareinwõt kõn an ro jeid im jatid kwal̦o̦k aer kõn̦aan jipañ er. Ilo ad wõnm̦aanl̦o̦k im kwal̦o̦k tũriam̦o ñan armej ro, jej kautiej im kabuñbũruon Jeova, Anij in tũriam̦o.—Kol. 3:12.