Jen Anõke Ri Kanaan Ro—Joel
1. Ewi wãween jemaroñ anõke joñak eo an Joel kõn ettã bõro ñe jej kwal̦o̦k naan?
1 Wõn in kar ri kanaan Joel? Men eo wõt ear kwal̦o̦k kõn e make ej bwe e “nejin Petuel.” (Joel 1:1) Ri kanaan in ear ettã bũruon. El̦ap an kar kwal̦o̦k kõn ennaan eo an Jeova im jab kõn jerbal eo an ãinwõt juon ri keeañ. Ãindein, ijello̦kun ad kappok nõbar ñan kõj make, jen lel̦o̦k nõbar ñan Jeova im jitõñl̦o̦k ñan Baibõl̦ eo ilo ad kwal̦o̦k naan ñan armej. (1 Ko. 9:16, UBS; 2 Ko. 3:5, UBS) Bareinwõt, ennaan eo jej kwal̦o̦ke ej kakajoor kõj. Ta naan ko ilo kanaan eo an Joel im rej kõm̦m̦an ad kijejeto im rej letok ñan kõj kõjatdikdik rainin?
2. Kõnke epaak raan eo an Jeova, men in en kar kõm̦akũt kõj ñan ta?
2 ‘Raan an Jeova Epaak.’ (Joel 1:15): Meñe kar je men in elõñ to̦ujin iiõ ko remootl̦o̦k, ak jej lo an jejjet kitien ilo raan kein ad. Jorrããn ko rej wal̦o̦k im an armej ro jab kõn̦aan roñjake kõj im aer kajjirere kõn ad kwal̦o̦k naan rej kaalikkar bwe jej pãd ilo raan ko ãliktata an jukjukun pãd in enana. (2 Ti. 3:1-5; 2 Pi. 3:3, 4) Ñe jej kõl̦mãnl̦o̦kjen̦ kõn joñan an epaaktok jem̦l̦o̦kin, men in en kar kõm̦akũt kõj ñan likũt jerbal in kwal̦o̦k naan m̦oktata ilo mour ko ad.—2 Pi. 3:11, 12, UBS.
3. Etke jerbal in kwal̦o̦k naan el̦ap an aorõk kiiõ ke ej epaaktok iien eñtaan eo el̦ap?
3 Jeova “Enaaj Kõjparok Ro Doon.” (Joel 3:16): Ilo eoon in ej ba bwe lañ im lal̦ renaaj m̦akũtkũt. Men in emaroñ jitõñl̦o̦k wõt ñan iien eo Jeova enaaj ekajete armej ro ilo eñtaan eo el̦ap. El̦ap an kaenõm̦m̦an ñan jel̦ã bwe Jeova enaaj lo̦mo̦o̦ren ri karejar ro an retiljek ilo iien in. (Rev. 7:9, 14) Ke jej kwal̦o̦k naan im lo wãween an Jeova kakajoor im kõjparok kõj, men in ej kakajoor tõmak eo ad im katakin kõj ñan kijenmej. Men kein renaaj jipañ kõj ilo iien eo enaaj itok eñtaan eo el̦ap.
4. Etke jemaroñ m̦õn̦õn̦õ im reim̦aanl̦o̦k ñan raan ko im̦aan?
4 Jet rej ba bwe ennaan eo Joel ear kwal̦o̦ke ekabbeerer. Ak ilo m̦ool ennaan eo an ej lel̦o̦k ñan ro doon Anij juon kõjatdikdik em̦m̦an bwe renaaj bõk lo̦mo̦o̦r. (Joel 2:32) Kõn men in, jen reim̦aanl̦o̦k ñan raan ko im̦aan im kijejeto in keeañ kõn nuuj eo em̦m̦an kõn Aelõñ eo an Anij. Jen kõm̦m̦ani men kein im l̦oore naan ko ilo Joel 2:23. Ej ba: “Kom̦win m̦õn̦õn̦õ im lañlõñ ilo Jeova ami Anij.”