Karõk ko Rekããl ñan Kwal̦o̦k Naan Ilo̦bwilej
1. Ta joñak eo em̦m̦an jemaroñ katak jãn Kũrjin ro m̦okta?
1 Kũrjin ro m̦okta rar jab kwal̦o̦k naan wõt jãn em̦ ñan em̦. Rar bar kwal̦o̦k naan ilo̦bwilej. (Jrb. 20:20) Ñan waanjoñak, rar etal im kwal̦o̦k naan ilo tampel̦ eo kõnke rar jel̦ã bwe remaroñ iioon elõñ armej ro ie. (Jrb. 5:42, UBS) Ke rijjelõk Paul ear pãd ilo Atens, raan otemjej ear kwal̦o̦k naan ñan armej ro ilo jikin wia ko. (Jrb. 17:17) Rainin, wãween eo el̦aptata jej kajeededl̦o̦k nuuj eo em̦m̦an ej ilo ad em̦ ñan em̦. Bõtab, jej bar jibadekl̦o̦k armej ro ilo jikin baak wa ko, jikin peejnej ko, jikin piknik ko, jikin ko me elõñ m̦õn wia ko im ekkã an lõñ armej, im ijoko jabdewõt jemaroñ iioon armej ñan kwal̦o̦k naan ñan er. Kõmij rõjañ aolep ñan kwal̦o̦k naan ilo̦bwilej. Bõtab, enaaj wõr ruo karõk ekããl ñan kwal̦o̦k naan ilo̦bwilej me elõñ renaaj maroñ bõk kun̦aaer ie.
2. Ta karõk eo kar jino kõm̦m̦ane ilo Nobõm̦ba 2011 eo?
2 Juon Karõk Ejejuwaan ñan Kwal̦o̦k Naan Ilo̦bwilej: Ilo Yearbook eo an 2013, ilo peij 16 im 17, ej kwal̦o̦k kõn jinoin aer kar kajjioñe karõk eo ekããl ñan kwal̦o̦k naan ilo̦bwilej ilo New York City ilo Nobõm̦ba 2011 eo. Ekar wõr poster ko im bok ko ilo jet kajin ko im rej pãd ioon tebõl̦ ko im cart ko ilo jikin ko me ekkã an armej ro itoitak ie. Kajjojo raan, elõñ to̦ujin armej rej itoitak ilo jikin kein, ekoba ro rej jokwe ilo apartment ko me rejjab kõtl̦o̦k ad kwal̦o̦k naan ie im ro me ekkã aer jako jãn m̦õko im̦weer. Elukkuun kar lõñ armej ro rar m̦õn̦õn̦õ in ebbõk aer bok. Ium̦win juon wõt allõñ, kar lel̦o̦k 3,797 Naan in Keeañ im Awake! ko ñan armej ro im bareinwõt 7,986 bok ko. Elõñ armej ro rar kõn̦aan bwe juon en katak Baibõl̦ ippãer. Unleplep in karõk in ej bwe jen jino katak Baibõl̦ ippãn armej ro. Kõn men in, rej jilkinl̦o̦k ak lel̦o̦k atõrej ko an armej ro me rar kwal̦o̦k aer itoklimo ñan eklejia ko bwe juon en jepl̦aak ippãer.
3. Ewi wãween jet jikin ko ilo lal̦ in rej jino karõk in ekããl ñan kwal̦o̦k naan?
3 El̦ap tõprak ko rar loi ke rar kajjioñe karõk in ekããl. Kõn men in, jet jikin ipel̦aakin lal̦ in em̦õj aer jino kõjerbal karõk in ekããl ñan kwal̦o̦k naan ilo jikin ko me rel̦l̦ap im elukkuun lõñ armej ie. Ra ko renaaj kããlõt jikin ko me aolep iien ej obrak armej ie kõn aer kõttar train, baj, ak ial̦aer. Bareinwõt, rej bar kããlõt ijoko me elukkuun lõñ jikin jerbal im opij ak apartment ko ie. Ãlikin, ra eo enaaj jejel̦o̦k ñan eklejia ko me renaaj bõk kun̦aaer ilo karõk in im kwal̦o̦k l̦o̦k ta ko rej aikuj kõm̦m̦ani. Ekkã aer kõjerbal regular im special pioneer ro ñan kõm̦m̦ane jerbal in. Ilo jet jikin, rej bar kõjerbal auxiliary pioneer ro.
4. Ta ko ri kwal̦o̦k naan ro rej kõm̦m̦ani ñe rej bõk kun̦aaer ilo karõk in ekããl ñan kwal̦o̦k naan ilo̦bwilej?
4 Kilen Ad Kwal̦o̦k Naan: Ekkã an ro me rej bõk kun̦aaer ilo karõk in ekããl ñan kwal̦o̦k naan ilo̦bwilej rej kõttar wõt an armej ro itok ñan tebõl̦ ko ak cart ko im alwõji bok ko. Ñe juon ej bõjrakl̦o̦k, rej ba ñane bwe emaroñ bõk jabdewõt bok ko me ekõn̦aan riiti. Im ñe ewõr an kajjitõk, eokwe pioneer ro rej m̦õn̦õn̦õ in uwaake kajjitõk ko an ilo aer kõjerbal Baibõl̦. Ñe enaaj ebbõk an bok, pioneer ro reban kajjitõk bwe armej in en jabawõt. Ak el̦aññe enaaj kajjitõk kõn ia eo doulul in ej ebbõk jããn ie ñan kõm̦m̦ane jerbal in, eokwe remaroñ ba bwe jabdewõt eo em̦õn̦õn̦õ in jabawõt, emaroñ jilkinl̦o̦k ñan juon iaan atõrej ko ilo bok ko. Ñe ekkar, rej ba: “Kokõn̦aan ke bwe juon en lowaj eok ilo m̦weo im̦õm̦?” ak “Kwaar ke jel̦ã bwe kõmij katak Baibõl̦ ippãn armej ro kõn bok n̦e ilo ejjel̦o̦k on̦ean?”
5. Etke ruo ri pãlele me rar bõk kun̦aaer ilo karõk in ekããl rar lukkuun m̦õn̦õn̦õ?
5 Ro im rar bõk kun̦aaer ilo karõk in ekããl rar lukkuun m̦õn̦õn̦õ. Ruo ri pãlele me rar bõk kun̦aaer rar ba: “Ke kõmro ar jutak iturin tebõl̦ eo im lo an elõñ to̦ujin armej ro etetal kajjojo raan, kõmro ar lukkuun m̦õn̦õn̦õ kõn jerbal eo el̦ap me jej kõm̦m̦ane ñan tõpar aolep armej ro ipel̦aakin lal̦. Am̦ro kar lo joñan armej ro wõj im l̦õmn̦ak kõn joñan an Jeova kaorõke kajjojo iaaer, men in ear l̦ap an kar kakajoor kõmro ñan wõnm̦aanl̦o̦k wõt im likũt jerbal in kwal̦o̦k naan m̦oktata ilo mour ko am. Ej ãinwõt ñe kõmro ej lo an Jeova etale bũruon armej ro wõj rej etetal iturin tebõl̦ eo im lale wõn ro em̦ool bũrueer. Kõmro ar eñjake an enjel̦ ro jipañ kõmro.”
6. (1) Ta bar karõk eo juon ekããl ñan kwal̦o̦k naan ilo̦bwilej me eklejia ko rej make loloorjake? Etke eoktak karõk in jãn karõk eo juon? (2) Ewi wãween eklejia ko remaroñ karejar ippãn doon ñe rej bõk kun̦aaer ñan kwal̦o̦k naan ilo̦bwilej?
6 Karõk eo me Eklejia ko Rej Make Loloorjake: Ewõr bar juon karõk ekããl ñan kwal̦o̦k naan ilo̦bwilej. Em̦m̦aan ro rej lale eklejia ko rej loloorjake karõk in. Ri kwal̦o̦k ro me rej bõk kun̦aaer ilo karõk in rej kõjerbal juon tebõl̦ ak cart im rej likũti bok ko ioon men kein ilo jikin ko me ekkã an obrak kõn armej. Im rej kõm̦m̦ane men in ilo jikin ko wõt me eklejia eo aer ej kwal̦o̦k naan ie. Eoktak jidik karõk in jãn karõk eo juon. Ilo karõk eo juon, ra eo me eklejia ko rej pãd ium̦win, ej er eo me rej bõk eddon kããlõt ro jãn kajjojo eklejia ko ñan kwal̦o̦k naan ilo̦bwilej ilo ijoko ebool̦ armej ie.—Lale bo̦o̦k eo “Jej Aikuj Ami Karejar.”
7. El̦aññe ekkar, ta ko em̦m̦aan ro rej lale eklejia renaaj kõm̦m̦ani bwe eklejia ko aer ren bõk kun̦aaer ilo karõk in ekããl?
7 Em̦m̦aan ro rej lale eklejia eo renaaj pepe kõn ia ko me elõñ armej ie im eklejia eo aer emaroñ kõm̦m̦ane karõk in ekããl kõn kwal̦o̦k naan. Ijoko me emaroñ em̦m̦an ñan kõm̦m̦ane men in ie rej jikin kõttar wa ko, jikin piknik ko, jikin ko me elõñ armej ie (public squares), m̦õn kaikujkuj ko rel̦l̦ap, campus ko ilo college, airport ko, im ijoko me armej ro rej kõm̦m̦ani iien ko aer rel̦l̦ap ie. Enaaj l̦ap tõprak ko ñe rej likũt tebõl̦ in bok ko ad ilo ejja jikin eo, raan ko im awa ko wõt. El̦ap tõprak ko rej wal̦o̦k ñe rej kõm̦m̦ane men in ilo jikin kaikujkuj ko rel̦l̦ap (mall) me elõñ m̦õn wia jidikdik ko ie jãn ñe renaaj kõm̦m̦ane ilo inabõjin juon m̦õn wia ekilep. Unin ej kõnke ilo m̦õn wia ko rekilep, armej ro rej baj etal wõt im wiaik aikuj ko aer innem etal. Ñe jej kõm̦m̦ane karõk in itõrerein ial̦ ko ak sidewalk ko, em̦m̦anl̦o̦k ñe jej kõjerbali cart ko reddik bwe jen jab ko̦baj armej. Ededel̦o̦k aer kõm̦m̦an file ko kõn pijain Naan in Keeañ, Katak ko Rem̦ool jãn Baibõl̦ Eo, im bok ko jet ñe jej kwal̦o̦k naan ilo jikin rot kein. Em̦m̦aan ro rej lale eklejia remaroñ downloadi men kein jãn Web site eo ad. Ro me renaaj bõk kun̦aaer renaaj l̦oore ejja kõmel̦el̦e ko wõt ilo karõk eo kein kajuon me ej wal̦o̦k ilo pãrokõrããp 4. Bareinwõt, rej aikuj l̦oori naan in tõl ko an em̦m̦aan eo ej loloorjake jerbal in kwal̦o̦k naan. El̦aññe ewõr juon ej itoklimo im ejjab jokwe ilo jikin ko me eklejia eo ej kwal̦o̦k naan ie, eokwe rej kanne juon peba (Please Follow Up S-43) kõn mel̦el̦e ko kõn armej eo im lel̦o̦k ñan secretary eo an eklejia eo.
8. El̦aññe eklejia eo am̦ ejjab maroñ kõm̦m̦ane karõk ko ruo rekããl ñan kwal̦o̦k naan ilo̦bwilej, ewi wãween kom̦ maroñ kwal̦o̦k naan ilo̦bwilej?
8 Am̦ Kwal̦o̦k Naan Ilo̦bwilej: Bõlen jet eklejia ko rejjab maroñ kõm̦m̦ane karõk in ekããl kõnke emaroñ ejjel̦o̦k juon jikin me eobrak kõn armej ilo jikin ko me rej kwal̦o̦k naan ie. Bõtab, meñe ãindein, ak rej rõjañ ri kwal̦o̦k ro ilo eklejia kein ñan kwal̦o̦k naan ilo̦bwilej. Ewi wãween remaroñ kõm̦m̦ane men in? Eokwe, ilo jikin kwal̦o̦k naan ko ami, ewõr ke im̦õn kaikujkuj ak juon m̦õn wia me ewiin ippãn armej? Ewõr ke jikin piknik me ekkã an lõñ armej ie? Ak ewõr ke jikin ko me armej ro rej kuktok ippãn doon im kõm̦m̦ani m̦akũtkũt ko aer ilo raan ko rel̦l̦ap ak holiday ko? El̦aññe aet, eokwe ej wõr wõt ami maroñ ñan kwal̦o̦k naan ilo̦bwilej.
9. Etke jej kate kõj ñan kwal̦o̦k naan ñan armej ro ilo jabdewõt jikin ko jej iioon er?
9 Jeova ekõn̦aan “lo̦mo̦o̦ren armej otemjej, im bwe ren itõm jel̦ã m̦ool.” (1 Ti. 2:4) Eñin unin jej kate kõj ñan kwal̦o̦k ñan aolep armej nuuj eo kõn Aelõñ eo m̦okta jãn an itok jem̦l̦o̦kin. (Matu 24:14) Ilo elõñ jikin ko, elukkuun pen ñan tõpar armej ro ilo m̦õko im̦weer. Jekdo̦o̦n ak bõlen jemaroñ iioon rein ilo jikin ko jet. Bõlen kõl eo wõt bwe jet ren roñ kõn nuuj eo em̦m̦an ej ilo ad kwal̦o̦k naan ilo̦bwilej. Kõn men in, jen kate kõj ñan kajejjet jerbal in ad ñan kwal̦o̦k naan ñan armej ro ilo jabdewõt jikin ko jej iioon er.—2 Ti. 4:5.
[Bo̦o̦k eo ilo peij 5]
Jej Aikuj Ami Karejar
Ekar wõr ripoot ko kõn juon men ear wal̦o̦k ñan eklejia ko me jikin ko rej kwal̦o̦k naan ie repaake doon. Jet ri kwal̦o̦k ro me eoktak eklejia eo aer rar kwal̦o̦k naan ilo ejja jikin eo wõt me ro ilo eklejia eo juon rar kwal̦o̦k ie. Rekar kwal̦o̦k naan ilo ejja tõreren ial̦ eo wõt, jikin baak wa ko, im ilo peejnej ko ak jikin kõttar baj ko. Ri kwal̦o̦k ro jãn eklejia kein rar illik bok ko ilo ejja jikin kõttar ko, ilo ejja m̦õn kwal̦kol̦ eo wõt im ilo peejnej ko. Kõn wõt wãween in, ri jerbal ro im armej ro rej jokwe ilo jikin eo rej illu im abn̦õn̦õ. Meñe eoktak iien ko rej kwal̦o̦k naan ñan er ak rej illu wõt. Kõn men in, ñe jej kwal̦o̦k naan ilo̦bwilej, em̦m̦anl̦o̦k bwe jen kwal̦o̦k naan ilo jikin ko wõt me kar karõke bwe eklejia eo ad en jerbal ie.
Ta el̦aññe ri kwal̦o̦k ro rekõn̦aan kwal̦o̦k naan ilo̦bwilej ilo jikin ko me kun̦aan eklejia eo juon ñan kwal̦o̦k naan ie? Eokwe, rej aikuj kõnono ippãn em̦m̦aan eo ej lale jerbal in kwal̦o̦k naan ilo eklejia eo aer. Em̦m̦aan eo enaaj kõnnaan ippãn eo ej loloorjake jerbal in kwal̦o̦k naan ilo eklejia eo juon ñan bõk mãlim m̦okta jãn an ro ilo eklejia eo an jerbal ijo. Ewõr eklejia ko ilo jet kajin ko im rej jerbal ilo ejja jikin eo wõt. Innem, em̦m̦an bwe em̦m̦aan ro rej loloorjake jerbal in kwal̦o̦k naan ilo eklejia kein ren kõjjel̦ãik doon m̦okta. Ilo wãween in, rej kõjparok ñan jab kallu im kabn̦õn̦õik armej ro ilo jikin eo. El̦aññe aolep rej karejar ippãn doon ilo wãween in, men otemjej renaaj “kon̦ im ilo jim̦we.”—1 Ko. 14:40, UBS.