Jipañ Er Bwe Ren “Pen ilo Tõmak”

Jej lukkuun m̦õn̦õn̦õ bwe Jeova ej kajeraam̦m̦an jerbal eo ad ñan kũrtok armej ñan m̦ool eo. Kiiõ, epaakel̦o̦k joñan in 300,000 armej ro rej peptaij kajjojo iiõ. (Dt. 28:⁠2) Ãlikin an juon ri katak peptaij, jet iien ri kwal̦o̦k eo ej bõjrak jãn an katak ippãn. Im ej wõnm̦aanl̦o̦k wõt im jipañ ro jet. Ak bõlen ri katak eo make emaroñ kabõjrak an katak kõnke ekõn̦aan jol̦o̦k el̦apl̦o̦k iien ilo jerbal in kwal̦o̦k naan. Bõtab, elukkuun aorõk bwe tõmak eo an ri katak eo en pen im kajoor. Katak ko im joñak eo an Kũraij rej aikuj pãd ilo bũruon im l̦õmn̦ak ko an. (Kol. 2:6, 7; 2 Ti. 3:12, UBS) Kõn men in, ãlikin an juon ri katak peptaij, ej aikuj wõnm̦aanl̦o̦k wõt im katak m̦ae iien em̦õj an kõjem̦l̦o̦ke bok ko Katak ko Rem̦ool im “Yokwe eo an Anij.”​—⁠Lale Ad Jerbal ñan Aelõñ Eo an Eprõl̦ 2011, peij 2.