Kilen bwe Jen Lo Tõprak Ippãn Rũkkatak ro Ad
1. Ta eddo eo an rukwal̦o̦k naan ro ñe rej katak Baibõl̦ ippãn armej ro?
1 Ejjel̦o̦k juon emaroñ karejar ñan Anij el̦aññe Jeova “ejjab kamaroñe.” (Jon 6:65, UBS) Meñe ãindein ak rukwal̦o̦k ro rej aikuj kõm̦m̦ane ijo kun̦aaer ñan jipañ ro rej katak Baibõl̦ ippãer bwe ren ruwaakl̦o̦k ñan Jemãer ilañ. (Jem. 4:8) Men in ej kitibuj an juon aikuj kõppojakl̦o̦k im̦aan ñan rũkkatak ro an. Ejabwe ñan baj riiti wõt pãrokõrããp im kajjitõk ko ilo bok eo. Ñe jej kõm̦m̦ane men in, eban lukkuun jipañ rũkkatak ro ad ñan mel̦el̦e kõn katak ko im kõm̦m̦an wõnm̦aanl̦o̦k.
2. Ta eo enaaj wal̦o̦k ñe ejejjet im em̦m̦an ad katak ippãn rũkkatak ro ad?
2 Ewõr jilu buñtõn ne ko juon rukwal̦o̦k ej aikuj kõm̦m̦ani ñan an lo tõprak ippãn rũkkatak ro an. Ej aikuj jipañ rũkkatak ro an ñan (1) mel̦el̦e katak ko ilo Baibõl̦, (2) tõmak katak ko ilo Baibõl̦, im (3) l̦oore men ko rar katak jãn Baibõl̦. (Jon 3:16, UBS; 17:3; Jem. 2:26, UBS) Emaroñ bõk iien ñan ad jipañ juon armej bwe en kõm̦m̦ani buñtõn ne kein jilu. Bõtab, kajjojo iaan buñtõn ne kein enaaj jipañe ñan ejaake juon jem̦jerã epaak ippãn Jeova im kõm̦akũti ñan wũjlepl̦o̦k mour eo an ñane.
3. Etke rukwal̦o̦k ro rejel̦ã katakin rej kajjitõk kõn ta l̦õmn̦ak eo an rũkkatak ro aer?
3 Ta L̦õmn̦ak eo an Rũkkatak eo Ad?: Lale ñe rũkkatak eo ad emel̦el̦e im ñe ej tõmak men ko ej katak kaki. En jab l̦ap wõt ad kõnono ak jen rõjañe rũkkatak eo ad bwe en kwal̦o̦k l̦õmn̦ak eo an. (Jem. 1:19) Emel̦el̦e ke kõn ta eo Baibõl̦ ej ba kõn men ko jej katak ippãn kaki? Emaroñ ke kõmel̦el̦eiki ilo naan ko an make? Ta l̦õmn̦ak eo an kõn men eo ej kab m̦õj an katak kake? Ej ke tõmak bwe men ko Baibõl̦ ej ba rejim̦we im m̦ool? (1 Te. 2:13) Emel̦el̦e ke bwe men ko ej katak rej kaalikkar bwe ej aikuj kõm̦m̦an oktak ilo mour eo an? (Kol. 3:10, UBS) Ñan ad jel̦ã uwaakin kajjitõk kein, jej aikuj kwal̦o̦k kajjitõk ko me renaaj kõm̦akũti ñan kwal̦o̦k l̦õmn̦ak ko an, innem roñjake.—Matu 16:13-16.
4. Ta eo jej aikuj kõm̦m̦ane ñe jej loe bwe epen an rũkkatak eo ad tõmak ak l̦oore men ko ej katak kaki jãn Baibõl̦?
4 Ekkã an pen im bõk iien ñan an jet rũkkatak jol̦o̦k m̦anit im l̦õmn̦ak ko remminene kaki. (2 Ko. 10:5, UBS) Ta el̦aññe rũkkatak eo ad ejjab tõmak ak l̦oore men ko ej katak kaki? Eokwe, jej aikuj kijenmej wõt. Kijenmej enaaj jipañ kõj ñan kõtl̦o̦k iien ñan an Naanin Anij im kajoor eo an Anij jerbal ilo bũruon. (1 Ko. 3:6, 7; Hi. 4:12) Ijello̦kun ad iuuni, em̦m̦anl̦o̦k jen wõnm̦aanl̦o̦k ñan katak eo juon ñe jej loe bwe epen an mel̦el̦e ak l̦oore katak eo jãn Baibõl̦. Ilo ad wõnm̦aanl̦o̦k wõt im katak ippãn im kwal̦o̦k ad jouj im kijenmej, emaroñ tokãlik jino kõm̦m̦an oktak ilo mour eo an.