Jen Anõke Rũkanaan ro Ãinwõt—Habakkuk
1. Etke jemaroñ mel̦el̦e kõn l̦õmn̦ak im eñjake eo an kar Habakkuk?
1 Ilo ad jelm̦ae an l̦apl̦o̦k nana ipel̦aakid, jemaroñ bõk ejja l̦õmn̦ak eo wõt an kar Habakkuk, ke ear kajjitõk ippãn Jeova: “Etke kwõj kõm̦m̦an bwe in iioon jorrããn kein rel̦l̦ap? Etke kwõj pãdwõt im jab lali men kein rebõd?” (Hab. 1:3, UBS; 2 Ti. 3:1, 13, UBS) Ad kõl̦mãnl̦o̦kjen̦ kõn ennaan eo an Habakkuk im kõn an kar tiljek, enaaj jipañ kõj ñan kijenmej ilo ad kõttar raanin ekajet eo an Jeova.—2 Pi. 3:7, UBS.
2. Ewi wãween ad maroñ kwal̦o̦k bwe ewõr ad tõmak?
2 Ear Tõmak: Ijello̦kun an kar Habakkuk l̦e jãn joñan an nana an mour im ebbeer kõn men ko renana ear iiooni, ear ekkõl im tiljek wõt. (Hab. 2:1, UBS) Jeova ear kakajoor rũkanaan Habakkuk ke ear ba bwe naan ko An renaaj jejjet ilo iien eo em̦õj an karõke im bwe “rũwãnõk enaaj mour kõn an tõmak.” (Hab. 2:2-4) Ta mel̦el̦ein men in ñan Kũrjin ro raan kein me rej mour ilo raan ko ãliktata? Ej mel̦el̦ein bwe ijello̦kun ad kõn̦aan jel̦ã ñããt eo jem̦l̦o̦kin nana otemjej enaaj itok, eaorõk bwe jen tõmak bwe enaaj itok. Tõmak ej jipañ kõj ñan ekkõl wõt im likũt bwe jerbalin kwal̦o̦k naan en men eo m̦oktata ilo mour ko ad.—Hi. 10:38, 39, UBS.
3. Etke jej aikuj lañlõñ wõt ilo ad karejar ñan Jeova?
3 Lañlõñ ilo Jeova: Elõñ men ko renaaj mãlejjoñe tõmak eo ad el̦aññe Gog in Magog enaaj tarin̦aeik armej ro an Jeova. (Ezk. 38:2, 10-12, UBS) Tarin̦ae ej kõm̦m̦an bwe en pen mour, joñan ej bar jelõt ro rej anjo̦ ilo iien tarin̦ae. Emaroñ jabwe m̦õñã, ejjel̦o̦k jikin ad jokwe, im penl̦o̦k wãween mour. Ta eo kwõnaaj kõm̦m̦ane ñe wãween kein reppen renaaj wal̦o̦k? Habakkuk ear jel̦ã bwe enaaj iioon men ko reppen im nana, kõn men in ear kate e ñan lañlõñ wõt ilo an kar karejar ñan Jeova. (Hab. 3:16-19, UBS) Lañlõñ eo jãn Jeova enaaj jipañ kõj kijenmej wõt ium̦win wãween ko renana im reppen ilju im jekl̦aj.—Nih. 8:10; Hi. 12:2.
4. Ta eo jemaroñ lañlõñ kake kiiõ im ilju im jekl̦aj?
4 Ro me Jeova enaaj kõjparok wõt er ilo iien eo enaaj bõktok raanin ekajet eo an, renaaj wõnm̦aanl̦o̦k wõt im katak kõn Anij im karõk ko an. (Hab. 2:14) Ro rar mej me renaaj jerkak im mour renaaj bar katak kõn Jeova. Ilo bar raan kein, jen kate kõj jabdewõt iien ñan kwal̦o̦k kõn Jeova im jerbal ko an rem̦m̦an!—Sam 34:1; 71:17, UBS.