Wãween an Ri-Kõm̦anm̦an eo Kwal̦o̦k Kallim̦ur ko An

Jãn jinoin kar kõm̦anm̦an armej, ri-Kõm̦anm̦an eo ad ear kõnono ippãn armej ikijjeen enjel̦ im ri-kanaan ro. Bareinwõt, ear kããlõt bwe naan eo an im jeraam̦m̦an ko ej kallim̦ur kaki ren pãd ilo jeje. Kallim̦ur kein jãn Anij rejelõt ilju im jekl̦aj eo am̦. Innem, ia eo kwõmaroñ lo kallim̦ur ko an Anij ie ilo raan kein?

Ennaan eo jãn Anij ñan kõj epãd ilo Jeje ko Rekkwõjarjar. (2 Timote 3:16) Ewi wãween an Anij kar kõjerbal ri-kanaan ro ñan je naan eo an? (2 Piter 1:21) Anij ear likũt l̦õmn̦ak ko an ilo l̦õmn̦ak ko an ri-jeje ro, im rein rar jei l̦õmn̦ak ko An. Ejja ãindeinl̦o̦k wõt ilo raan kein. El̦aññe juon em̦m̦aan ewõr an peejnej ej kõjerbal juon an ri-jeje ñan je juon ennaan jãn e, jenaaj watõk wõt bwe ennaan eo ej an em̦m̦aan eo me ewõr an peejnej. Ejja ãindeinl̦o̦k wõt, meñe Anij ear kõjerbal em̦m̦aan ro ñan je ennaan eo an, ak e eo ej lukkuun ri-Jeje in Jeje ko Rekkwõjarjar.

NAAN EO AN ANIJ ELUKKUUN AJEEDED

Joñan an l̦ap an aorõk naan eo an Anij, ekõn̦aan bwe aolep armej ren riiti im mel̦el̦e kake. Rainin, ‘ennaan eo [an] em̦m̦an me ej ñan indeeo’ epel̦l̦o̦k ñan ‘aelõñ otemjej, bwij, im kajin.’ (Revelesõn 14:6) Ikijjeen kõjeraam̦m̦an eo jãn Anij, em̦õj ukote aolepen ak m̦õttan Jeje ko Rekkwõjarjar ilo elõñl̦o̦k jãn 3,000 kajin ko, bok in ej make wõt lõñtata iaan bok ko ilo lal̦ in.