Wõnm̦aanl̦o̦k Wõt im Jar bwe Anij En Buñbũruon Ippãd

Anij ear lel̦o̦k ñan armej juon menin lel̦o̦k ejejuwaan—maroñ eo ñan kõnono ippãn im kwal̦o̦k eñjake ko aer ñane ilo jar. Ri-kanaan Devid ear jar im ba: “O Kwe kwõj roñjake jar, ñan Kwe kanniõk [ak armej] otemjej enaaj itok.” (Sam 65:2) Bõtab, ewi wãween ad aikuj jar bwe Anij en roñjake im kõjeraam̦m̦an kõj?

JAR JÃN BŨRUOD IM KÕN JUON BÕRO ETTÃ

Jar ko am̦ make rej kõpel̦l̦o̦k juon ial̦ ñan am̦ ‘kwal̦o̦k bũruom̦ im̦aan [Anij]’​—ñan kwal̦o̦k ta ko rej pãd ilo bũruom̦. (Sam 62:8) Eo Ekajoor Bõtata ej kaorõk jar ko me rej itok jãn bõro.

KŨR ANIJ IKIJJEEN AD KÕJERBAL ÃT EO ETAN

Meñe elõñ an Anij taitõl̦, ak ewõr juon wõt make etan. “Ña Jeova, eñin Eta.” (Aiseia 42:8) Ãt in Jeova ej wal̦o̦k elõñl̦o̦k jãn 7,000 alen ilo Jeje ko Rekkwõjarjar. Elõñ ri-kanaan ro rar ãñinñini Anij ilo aer kõjerbale ãt eo etan. Ebream ear ba: “O Jeova . . . inaaj kõnono [ippam̦].” (Jenesis 18:30) Kõj bareinwõt jej aikuj bar kõjerbale etan Anij, Jeova, ñe jej jar.

JAR ILO KAJIN EO AM̦ MAKE

Anij emel̦el̦e kõn l̦õmn̦ak im eñjake ko ad, jekdo̦o̦n kajin ta eo jej kõjerbale. Naan ko an rej kõkajoor kõj bwe: “Anij ejjab kalijekl̦o̦k, bõtab ilo aelõñ otemjej, ej buñbũruon kake jabdewõt eo ej mijake im kõm̦m̦ani men ko rejim̦we.”​—Jerbal 10:34, 35.

Ijoke, ñan bõk kõjeraam̦m̦an jãn Anij, ebar wõr men ko jej aikuj kõm̦m̦ani ijello̦kun ad baj jar wõt. Ilo katak eo tok juon, jenaaj etale ta ko jej aikuj kõm̦m̦ani.