Kwõj Ke Kile Kadkad ko Kadkadin Anij?

Ñe kwõj loe juon wũt ebbõl kõl̦arin, iju ko ilañ, ak aiboojojin an al̦ tulo̦k, kwõj ke kile bwe men kein rej jerbal ko an ri-Kõm̦anm̦an eo ad? Menin kõm̦anm̦an ko ipel̦aakid rej lukkuun kaalikkar kadkad ko kadkadin Jeova. (Rom 1:20, UBS) Ñe jej bõjrak jidik im kõl̦mãnl̦o̦kjen̦ kõn men ko jej reilo̦k im loi, jenaaj kile kajoor eo an Anij, kab an yokwe, ekajet jim̦we im mãlõtlõt. Bareinwõt, jenaaj kile bwe ej juon Anij eo el̦ap an jouj.​—Sam 104:24, UBS.

Ta jet iaan menin kõm̦anm̦an ko an Jeova kwõj loi ak kile kajjojo raan? Jekdo̦o̦n ñe kwõj jokwe ilo juon jikin me eobrak kõn armej im eokkut em̦ ie, ak ejjel̦o̦k pere kwõmaroñ lo jet wõjke im bao ko. Ñe jej lukkuun lali im etali menin kõm̦anm̦an ko an Jeova, enaaj jipañ kõj kadikl̦o̦k ad inepata, bõk l̦õmn̦ak eo ejim̦we kõn ta ko raorõkl̦o̦k, im kal̦apl̦o̦k ad tõmak bwe ewõr an Jeova maroñ ñan kabwe aikuj ko ad ñan indeeo. (Mt 6:25-32, UBS) El̦aññe ewõr nejũm̦ ajri, jipañ er bwe ren bar kile kadkad ko kadkadin Jeova me rekanooj in em̦m̦an. Ilo an l̦apl̦o̦k ad kam̦m̦oolol im kaorõk menin kõm̦anm̦an ko ipel̦aakid, enaaj bar l̦apl̦o̦k ad epaake ri-Kõm̦anm̦an eo ad.​—Sam 8:3, 4.

ALWÕJE PIJA EO ETAN, THE WONDERS OF CREATION REVEAL GOD’S GLORY​—LIGHT AND COLOR, INNEM UWAAKI KAJJITÕK KO ITULAL̦:

• Ta eo ej kõm̦m̦an bwe jen lo kõl̦ar ilo menin kõm̦anm̦an ko?

• Etke kõl̦ar ko ilo menin kõm̦anm̦an ko rej okkõtaktak ekkar ñan ijo kwõj jutak ie im kalimjeke?

• Ta eo ej kõm̦m̦an bwe en eokkõtaktak kõl̦arin lañ?

• Kõl̦ar ta ko kwõj loi ilo menin kõm̦anm̦an ko repaake m̦weo im̦õm im relukkuun aiboojoj?

• Etke eaorõk bwe jen bõk ad iien ñan lukkuun etale im lale menin kõm̦anm̦an ko?