MOURIN KŨRJIN

Kããlõt Menin Kam̦õn̦õn̦õ ko ilo Mãlõtlõt

Etke jej aikuj kããlõt menin kam̦õn̦õn̦õ ko ilo mãlõtlõt? Kõnke ñe jej kããlõt ñan alwõj juon pija, roñjake juon al, lale juon weepjait, riiti juon bok, ak iukkure kõn juon game ilo mijjin ko, ilo m̦ool jej bar kããlõt ñan koobrak l̦õmn̦ak ko ad kõn men kein. Kããlõt ko ad rej jelõt kõm̦m̦an ko ad. Bõtab, enañin aolep menin kam̦õn̦õn̦õ ko ilo raan kein ewõr men ko ie me Jeova ej kamoiki. (Sam 11:5; Ga 5:19-21) Kõn men in, Baibõl̦ ej rõjañ kõj ñan wõnm̦aanl̦o̦k wõt im l̦õmn̦ak kõn men ko rej bõktok nõbar ñan Jeova.—Pil 4:8.

ALWÕJE PIJA EO ETAN WHAT ENTERTAINMENT SHOULD I CHOOSE? INNEM UWAAKI KAJJITÕK KEIN:

Ewi wãween an juon iaan iukkure ko ilo iien ko etto ilo aelõñin Rom ãinl̦o̦kwõt jet iaan menin kam̦õn̦õn̦õ ko ilo raan kein?
Ewi wãween an ro uwaan eklejia eo maroñ jipañ jo̦dikdik ro ñan kããlõt menin kam̦õn̦õn̦õ ko ilo mãlõtlõt?
Ewi wãween ad aikuj l̦oore Rom 12:9 ñe jej kããlõt menin kam̦õn̦õn̦õ ko?
Ta jet iaan menin kam̦õn̦õn̦õ ko rem̦m̦an ilo jikin eo kwõj jokwe ie?

MENIN KAM̦ÕN̦ÕN̦Õ KO ME KWÕJ EM̦M̦AKŨTKŨT KE AK ME KWÕJJAB LUKKUUN EM̦M̦AKŨTKŨT?

Menin kam̦õn̦õn̦õ ko me ekkã an em̦m̦an ippãn elõñ armej ej alwõj ak riit kõn men ko ro jet rej kõm̦m̦ani ijello̦kun aer em̦m̦akũtkũt. Pijain alwõj ko, bok ko, im bũrookraam̦ ko ilo tipi rej kwal̦o̦k kõn men ko kar kine ak ejaaki me rej jãn l̦õmn̦ak ko an ro jet im jab jãn kõj make. Meñe ejjab nana menin kam̦õn̦õn̦õ kein me jejjab lukkuun em̦m̦akũtkũt ie, bõtab elõñ rej kile bwe el̦apl̦o̦k aer bõk tokjãn ilo menin kam̦õn̦õn̦õ ko me rej kõjerbal maroñ, kajoor, im l̦õmn̦ak ko aer. Ñan waanjoñak, jet em̦m̦an ippãer kõjañjañ kõn kein kõjañjañ ko ak jiña. Ak jet em̦m̦an ippãer kõm̦m̦ani men ko relimo inabõj ãinwõt iukkure, tutu lik ak iar, ak camp. Jabdewõt menin kam̦õn̦õn̦õ ko jej kããlõte, jen “kõm̦m̦an men otemjej ñan aiboojoj eo an Anij.”—1Ko 10:31.