Kilen Ad Jino Bwebwenato Ippãn Armej ro ilo Ad Kõjerbal Tũrããk ko

Jãn Jãnwõde 2018 eo, ilo itum̦aanin Jerbal eo Ad im Wãween Ad Mour​—Kein Katak, kar likũt waanjoñak ko kõn kilen bwebwenato ippãn armej. Kar rõjañ kõj ñan bwebwenato ippãn armej ro ijello̦kun ad kajju lel̦o̦k aer bok. Ñan jipañ ri-kwal̦o̦k naan ro kakõm̦anm̦anl̦o̦k kilen aer jino bwebwenato ippãn armej ro, pijain waanjoñak ko kõn kilen bwebwenato ippãn armej rej kwal̦o̦k kilen ad jino kõnnaan ippãn armej ro ikijjeen ad kõjerbal wõt Baibõl̦ eo. Ijoke, ej ke mel̦el̦ein men in bwe jejjab aikuj kõjerbal bok ko ad ñe jej kwal̦o̦k naan jãn em̦ ñan em̦? Ejjab ñan jidik. Ñan waanjoñak, tũrããk ko remaroñ juon wãween eo em̦m̦an ñan jino bwebwenato ippãn armej ro. Jemaroñ kõjerbale waanjoñak in itulal̦ ñe jej kõjerbal jabdewõt iaan tũrããk ko:

1. Kõjerbal kajjitõk ko itum̦aanin tũrããk eo me armej ro remaroñ kããlõt uwaak eo aer jãni.

2. Kwal̦o̦k uwaak eo jãn Baibõl̦ jãn eoon eo (ak eoon ko) me epãd ilo peij eo kein karuo ilo ijo itulõñ. Innem ñe ewõr iien, riit im bwebwenato kõn jet iaan boin ko ilowaan tũrããk eo.

3. Lel̦o̦k tũrããk eo ñan ri-m̦weo innem rõjañe bwe en kab riiti men ko jet ilowaan ilo iien eo em̦m̦an ñane.

4. M̦okta jãn am̦ etal, kwal̦o̦k ñane kajjitõk eo itulal̦in ijo ej ba “Jouj im L̦õmn̦ak kõn Kajjitõk In” im kõm̦m̦an karõk ñan amiro naaj bar bwebwenato tokãlik kõn uwaak eo jãn Baibõl̦.

Ñe kwõnaaj jepl̦aak, bwebwenato kõn uwaakin kajjitõk eo innem bar likũt juon kajjitõk ippãn ñan am̦ naaj bar ro̦o̦ll̦o̦k im bwebwenato ippãn kake. Kwõmaroñ kããlõt juon kajjitõk jãn weepjait eo ad ak jãn bok eo me ej wal̦o̦k ilo itulikin tũrããk in. Innem, ilo iien eo ejejjet ak ekkar, kwal̦o̦kl̦o̦k ñane bok eo etan Juon Ennaan Em̦m̦an Jãn Anij! ak juon iaan bok ko jej katak kaki jãn Nien Kein Jerbal eo Ad ñan Katakin.