Kiiñ ro Ruo ilo Raan ko Ãliktata me Rej Jum̦aik Doon
Jet iaan kanaan ko ilo jaat in rej kwal̦o̦k kõn men ko me rar wal̦o̦k ilo juon wõt iien. Aolepeer rej kam̦ool bwe jej mour ilo “iien ãliktata” ak raan ko ãliktata.—Dan. 12:4.
Eoon ko Rev. 11:7; 12:13, 17; 13:1-8, 12
Kanaan Ium̦win elõñ iiõ ko “menninmour eo eawiia” ej itoitak ilo lal̦ in. Ilo raan ko ãliktata, bar eo kein kajiljilimjuon ej kinejnej. Im tokãlik, emo bar in im “aolepen lal̦ in” ej l̦oore menninmour in. Setan ej kõjerbale menninmour in ñan “tarin̦aeiki bween ro nejin [kõrã eo].”
Jejjet Kũtien Ãlikin ibwijleplep eo, ear kiiõ wõr kien ko an armej me rar jum̦aik Jeova. Elõñ iiõ ko tokãlik, ilo kar Pata eo an Lal̦ Kein Kajuon, kien eo an Britain ej lukkuun m̦õjn̦o̦l̦o̦k. Bõtab, ebar kajoor ke Amedka ej kobal̦o̦k im jerbal ippãn. El̦aptata ilo raan ko ãliktata, Setan ej kõjerbale kien ko ilo jukjukun in pãd in an ñan jum̦aik im kaeñtaane armej ro an Anij.
Eoon ko Dan. 11:25-45
Kanaan Ilo raan ko ãliktata, kiiñ in eañ im kiiñ in rak renaaj tarin̦aeik doon ñan bõk maroñ im kajoor.
Jejjet Kũtien Jãmne im Anglo-Amedka rej tarin̦aeik doon. Ilo 1945 eo Soviet Union ekoba aelõñ ko rej jerbal ippãn im jipañe rej erom kiiñ eo an eañ. Ilo 1991 eo, ejako an wõr maroñ ippãn Soviet Union, im tokãlik, Russia ekoba ro rej jerbal ippãn im jipañe, rej kiiõ erom kiiñ eo an eañ.
Eoon ko Ais. 61:1; Mal. 3:1, UBS; Luk 4:18
Kanaan Jeova ej jilkinl̦o̦k “ri-keeañ” eo an ñan “kõpooj ial̦ eo” m̦okta jãn an jutak Aelõñ eo an Anij me Messaia eo ej tõle. Kumi in ej jino “kwal̦o̦k naan ko rem̦m̦an ñan ro ettã bũrueer.”
Jejjet Kũtien Jãn 1870 eo m̦aanl̦o̦k C. T. Russell im ro m̦õttan rar kijejeto ilo aer kate er ñan kõmel̦el̦e kõn katak ko rem̦ool jãn Baibõl̦. Ilo kar 1880 jim̦a ko, rar jino kwal̦o̦k joñan an aorõk bwe ri-karejar ro an Anij ren kwal̦o̦k naan. Rar kõm̦m̦an bok ko ãinwõt, “Wanted 1,000 Preachers” im “Anointed to Preach,” ilo kajin Pãlle.
Eoon ko Matu 13:24-30, 36-43
Kanaan Juon ri-kõjdat ej ekkat mar ko ibul̦õn juon mel̦aaj in wiit, im mar kein renaaj eddekl̦o̦k im pinej wiit ko m̦ae iien m̦adm̦õd eo. Im ilo iien m̦adm̦õd eo, naaj kõjjenolo̦k mar ko jãn wiit ko.
Jejjet Kũtien Jãn jinoin 1870 eo, ear jino ealikkarl̦o̦k wõn Kũrjin ro rem̦ool im ro rej riabin Kũrjin. Ilo raan ko ãliktata, em̦õj jino ain Kũrjin ro rem̦ool ippãn doon im kõjjenolo̦k er jãn riabin Kũrjin ro.
Eoon ko Dan. 2:31-33, 41-43
Kanaan Ne ko kõm̦m̦an jãn aen im kũl̦e ej m̦õttan juon ekjab me ej kõm̦m̦an jãn elõñ kain aen ko.
Jejjet Kũtien Kũl̦e ej kõkkar kõn armej ro rej jum̦ae me rej pãd ium̦win kien eo an Britain im ium̦win kien eo an Amedka. Kõn armej rein, eñin unin kien kein rejjab maroñ kõjerbale aolepen maroñ ko aer.
Eoon ko Matu 13:30; 24:14, 45; 28:19, 20
Kanaan Naaj aini “wiit” ko im bõkl̦o̦k ñan “im̦õn kakkon̦” eo im jitõñ “ri-karejar eo etiljek im mãlõtlõt” ñan bõk eddon “ri-karejar ro.” Jerbalin kwal̦o̦k naan eo kõn “ennaan eo em̦m̦an kõn Aelõñ eo” ej jino ajeeded “ipel̦aakin lal̦ in.”
Jejjet Kũtien Ilo kar 1919 eo, kar jitõñ bwe ri-karejar eo etiljek im mãlõtlõt en bõk eddon armej ro an Anij. Jãn kar iien in m̦aanl̦o̦k, Rũkkatak Baibõl̦ ro rar kal̦apl̦o̦k jerbalin kwal̦o̦k naan eo aer. Rainin, Ri-Kõnnaan ro an Jeova rej kwal̦o̦k naan ilo elõñl̦o̦k jãn 200 aelõñ ko im rej kõm̦m̦ani bok ko me rej pedped ioon Baibõl̦ ilo elõñl̦o̦k jãn 1,000 kajin ko.
Eoon ko Dan. 12:11; Rev. 13:11, 14, 15
Kanaan Juon menninmour awiia eo ewõr ruo an doon ej jino kõm̦m̦an “ekjabin menninmour awiia eo,” im “lel̦o̦k menono in mour” ñan ekjab in.
Jejjet Kũtien Aelõñ eo Ekajoortata ilo Lal̦ in Anglo-Amedka ej jino kajutak League of Nations. Aelõñ ko jet rej rejetake doulul in. Innem tokãlik, kiiñ eo an eañ ej kobal̦o̦k ippãn League of Nations, bõtab ear m̦õttan doulul in jãn 1926 ñan 1933 wõt. Armej ro rar tõmak bwe League of Nations emaroñ kar bõktok aenõm̦m̦an ñan lal̦ in, bõtab Aelõñ eo an Anij wõt emaroñ kõm̦m̦ane men in. Im armej ro rej tõmak bwe United Nations (UN) emaroñ bar kõm̦m̦ane men in.
Eoon ko Dan. 8:23, 24
Kanaan Juon kiiñ elãj ej bõktok “ko̦kkure el̦ap jãn joñan.”
Jejjet Kũtien Aelõñ eo Ekajoortata ilo Lal̦ in Anglo-Amedka, em̦õj an kõm̦m̦an jorrããn ko rel̦l̦ap. Ñan waanjoñak, ilo kar Pata eo an Lal̦ Kein Karuo, Amedka ear kõm̦m̦an jorrããn ko rel̦l̦ap me rejjañin kar wal̦o̦k ilo bwebwenatoun armej ke ear jol̦o̦k atomic baam̦ ko ioon aelõñ eo me Britain im Amedka ak Anglo-Amedka ear kõjdate.
Eoon ko Dan. 11:31; Rev. 17:3, 7-11
Kanaan Menninmour eo “ebũrõrõ” ewõr joñoul doon ej wanlõñtak jãn abyss eo im ej kiiñ eo kein karalitõk. Bokin Daniel ej ba bwe kiiñ in ej “men eo ekajjõjõ me ej bõktok jorrããn.”
Jejjet Kũtien League of Nations ear bõjrak ilo kar Pata eo an Lal̦ Kein Karuo. Ãlikin pata eo, kar “kajutak” United Nations. Ãinwõt League of Nations, United Nations ej bõk nõbar me Aelõñ eo an Anij ej tõllo̦kũn ñan bõke. United Nations enaaj ko̦kkure kabuñ ko.
Eoon ko 1 Tes. 5:3; Rev. 17:16
Kanaan Aelõñ ko renaaj ba bwe ewõr “aenõm̦m̦an im jokwane,” im “doon ko joñoul” im “menninmour awiia eo” rej tarin̦aeik “kõrã eo ekijoñ” im ko̦kkure. Ãlikin iien in, naaj ko̦kkure aelõñ kein.
Jejjet Kũtien Aelõñ ko remaroñ ba bwe em̦õj aer bõktok aenõm̦m̦an im jokwane. Innem, aelõñ ko rej rejetake United Nations rej ko̦kkure kabuñ ko reriab. Men in ej kõkal̦l̦en jinoin eñtaan eo el̦ap. Eñtaan eo el̦ap enaaj jem̦l̦o̦k ilo iien eo naaj ko̦kkure aolepen jukjukun pãd in ilo naaj Armagedon.
Eoon ko Ezk. 38:11, 14-17; Matu 24:31
Kanaan Gog ej nitbwili ãne eo ãneen armej ro an Anij. Innem, enjel̦ ro rej aini “ro kar kããlõt er.”
Jejjet Kũtien Kiiñ eo an eañ, enaaj jerbal ippãn kien ko jet an lal̦ in im renaaj kajjioñ ko̦kkure armej ro an Anij. Ãlikin an jinoe iien in, naaj aini bween rũkkapit ro ñan lañ.
Eoon ko Ezk. 38:18-23; Dan. 2:34, 35, 44, 45; Rev. 6:2; 16:14, 16; 17:14; 19:20
Kanaan “Eo ej jijet” ioon “juon kidia emouj” ej “bõk anjo̦” ilo an ko̦kkure Gog im rũttarin̦ae ro an. Naaj jol̦o̦k “menninmour awiia eo,” ñan “lom̦al̦o in kijeek eo,” im naaj kattipdikdiki ekjab kileplep eo.
Jejjet Kũtien Jesus, eo ej Kiiñ in Aelõñ eo an Anij, enaaj lo̦mo̦o̦ren armej ro an Anij. Jesus, ekoba 144,000 ro me renaaj tõl ippãn im jarin tarin̦ae in enjel̦ ro an, naaj ko̦kkure aolep aelõñ ko rej tarin̦aeik armej ro an Anij. Eñin naaj jem̦l̦o̦kin lal̦ in an Setan.