Ñããt eo Enaaj Itok Jem̦l̦o̦kin Lal̦ In? Men eo Jesus Ear Ba

L̦ÕMN̦AK KÕN RUO MEN KO JESUS EAR BA KÕN JEM̦L̦O̦KIN LAL̦ IN:

“Kõn men in, kom̦win ekkõl wõt kõnke kom̦ jaje raan eo im awa eo.”​—MATU 25:13.

“Kom̦win ekkõl wõt im ruj wõt kõnke kom̦ij jab jel̦ã iien eo em̦õj karõke.”​—MARK 13:33.

Kõn men in, ejjel̦o̦k juon armej ioon lal̦ in elukkuun jel̦ã ñããt eo enaaj jem̦l̦o̦k jukjukun pãd in. Bõtab em̦õj an Anij ‘karõke iien eo’​—ak “raan eo im awa eo”—​me enaaj itok jem̦l̦o̦kin. (Matu 24:36) Men in ej ke mel̦el̦ein bwe jeban maroñ jel̦ã ñan jidik ñããt eo enaaj epaaktok jem̦l̦o̦kin? Ejjab ñan jidik. Jesus ear ba ñan ri-kal̦oor ro an bwe ren ekkõl wõt im lale jet wãween ko me renaaj wal̦o̦k im rej kaalikkar bwe epaaktok jem̦l̦o̦kin lal̦ in.

KÕKAL̦L̦E EO

Aolep men ko Jesus ear ba bwe renaaj wal̦o̦k, eñin ej kõkal̦l̦e eo bwe “epaak jem̦l̦o̦kin jukjukun pãd in.” Ear ba: “Juon lal̦ enaaj tarin̦aeik bar juon lal̦, im aelõñ ko renaaj tarin̦aeik doon. Bareinwõt, enaaj wõr ñũta im m̦akũtkũt lal̦ ilo elõñ jikin ko.” (Matu 24:3, 7) Ear bareinwõt ba bwe enaaj wõr “nañinmej ko rekapopo ilo elõñ jikin ko.” (Luk 21:11) Kwõj ke lo an wal̦o̦k men kein me Jesus ear kanaan kaki?

El̦ap an tarin̦ae ko, ñũta ko, im m̦akũtkũt lal̦ ko, ekoba nañinmej ko rel̦l̦ap ko̦kkure mour ko an armej ilo raan kein. Ñan waanjoñak, ilo 2004 eo, juon m̦akũtkũt lal̦ el̦ap ilo Indian Ocean ear kõm̦m̦an bwe en wal̦o̦k juon tsunami me ear m̦an enañin 225,000 armej ro. Ium̦win jilu iiõ, enañin 6.9 milien armej rar mej kõn wõt nañinmej in COVID-19 me ear wal̦o̦k ipel̦aakin lal̦ in. Jesus ear ba bwe ñe men kein rej wal̦o̦k, men in ej kaalikkar bwe epaaktok jem̦l̦o̦kin jukjukun pãd in.

“RAAN KO ÃLIKTATA”

Baibõl̦ ej n̦aetan tõre eo m̦okta jãn jem̦l̦o̦kin lal̦ in, “raan ko ãliktata.” (2 Piter 3:3, 4) 2 Timote 3:1-5 ej ba bwe an nanal̦o̦k m̦wil ko m̦wilin armej im wãween aer mour, ej bar kõkal̦l̦en raan ko ãliktata. (Lale bo̦o̦k eo etan “M̦okta Wõt jãn Jem̦l̦o̦kin Lal̦ In.”) Kwõj ke lo an armej ro l̦õmn̦ak wõt kõn er make, kũbbon̦, lãj, im jab kwal̦o̦k yokwe ñan ro jet ilo raan kein? Men in ej bar kam̦ool bwe jej mour ilo raan ko ãliktata im bwe elukkuun epaaktok jem̦l̦o̦kin jukjukun pãd in.

Naaj ewi toun raan ko ãliktata? Ekkar ñan Baibõl̦, enaaj ium̦win “jidik wõt iien.” Innem, Anij enaaj “ko̦kkure ro rej ko̦kkure lal̦ in.”​—Revelesõn 11:15-18; 12:12.

EPAAKTOK PEDETAIJ EO IJIN IOON LAL̦!

Em̦õj an Anij karõk raan eo im awa eo me enaaj bõktok jem̦l̦o̦kin jukjukun pãd in enana. (Matu 24:36) Ewõr bar juon ennaan em̦m̦an​—eñin bwe Anij “ejjab kõn̦aan bwe jabdewõt en jako.” (2 Piter 3:9) Ej lel̦o̦k ñan armej ro iien ñan aer maroñ katak kõn ankilaan im pokake e. Etke? Kõnke ekõn̦aan bwe jen el̦l̦ã jãn jem̦l̦o̦kin jukjukun pãd in im mour ilo lal̦ eo an ekããl, ñe lal̦ in enaaj juon pedetaij.

Anij ear karõk bwe en wõr juon jerbalin katakin me ej wal̦o̦k ipel̦aakin lal̦ in ñan jipañ armej ro katak kõn wãween aer maroñ pãd ilo lal̦ eo ekããl ium̦win Aelõñ eo an. Jesus ear ba bwe naaj kwal̦o̦k ennaan eo em̦m̦an kõn Aelõñ eo an Anij “ipel̦aakin lal̦ in.” (Matu 24:14) Ri-Kõnnaan ro an Jeova ipel̦aakin lal̦ in rar jol̦o̦k elõñ pilien awa ko ilo aer kwal̦o̦k naan im katakin armej ro kõn kõjatdikdik eo Baibõl̦ ej kwal̦o̦k kake. Jesus ear ba bwe naaj kõm̦m̦ane jerbalin kwal̦o̦k naan in ipel̦aakin lal̦ m̦okta jãn an itok jem̦l̦o̦kin.

M̦õttan jidik enaaj jem̦l̦o̦k an armej ro irooj iood. Bõtab eñin ej ennaan eo em̦m̦an, bwe kwõmaroñ el̦l̦ã jãn jem̦l̦o̦kin jukjukun pãd in im pãd ilo Pedetaij eo ijin ioon lal̦ me Anij ear kallim̦ur kake. Katak eo tok juon enaaj kõnono kõn wãween kwõmaroñ mour ilo lal̦ eo ekããl.