Kwaar Jel̦ã Ke?

Etke ear juon men em̦m̦an bwe rar maroñ katok kõn m̦ul̦e ko im bao pigeon ko?

IUM̦WIN Kien eo, kar maroñ katok kõn m̦ul̦e ko (turtldove) im bao pigeon ko ñan Jeova. Ekkã an kien ko kõn katok kwal̦o̦k kõn bao kein ruo ippãn doon im rar maroñ kõjerbal juon wõt iaaer. (Liv. 1:14, UBS; 12:8, UBS; 14:30, UBS) Etke men in el̦ap an kar jipañ? Juon un ej kõnke ejjab aolep iien ekar wõr m̦ul̦e ko. Etke?

Bao m̦ul̦e ko ekkã aer em̦m̦akũt ñan bar juon jikin ekkar ñan allõñ ko ilo juon iiõ, rar pãd ipel̦aakin Israel ilo allõñ ko remããn̦ãn̦. Kajjojo iiõ ilo Oktoba, rej em̦m̦akũt ñan ijoko iturõk ilo aelõñ ko remããn̦ãn̦l̦o̦k, im rej jepl̦aak ñan Israel ilo allõñ ko ilo iien spring. (Al. 2:11, 12, UBS; Jrm. 8:7, UBS) Ilo Israel eo etto, men in ear mel̦el̦ein bwe ekar pen ñan an ri-Israel ro lel̦o̦k m̦ul̦e ko ãinwõt menin katok ilo iien ak allõñ ko rem̦õl̦o.

Ijoke, ejjab ekkã an bao pigeon ko em̦m̦akũt ñan bar juon jikin ak aelõñ, innem ekkã an wõr wõt bao rot in ilo Israel aolep iien. Ejjab men in wõt, ak ekkã an armej ro nãjnej bao pigeon ko im rar pãd ilo m̦õko im̦weer. (Keidi Jon 2:14, 16.) Ekkar ñan juon bok (Bible Plants and Animals), ej ba bwe “aolep bukwõn ko im taun ko ilo Palestine rar nãjnej bao pigeon. Ilo kajjojo em̦, em̦õj an armej eo mõn m̦weo kõm̦m̦ane juon jikin an bao jokwe, ak juon ro̦ñ ilo m̦weo im̦õn bwe en jikin an bao ko pãd ie.”—Keidi Aiseia 60:8.

Ealikkar an Jeova kar kwal̦o̦k bwe el̦ap an yokwe im an mel̦el̦e kõn armej ro ilo an kar m̦õn̦õn̦õ in kõtl̦o̦k aer katok kõn bao ko me ear pidodo ñan an ri-Israel ro maroñ bũki ilo jabdewõt allõñ ilowaan juon iiõ.