1 | Jar “Kom̦win Likũt Ippãn Aolepen Men ko Kom̦ij Eddodo Kaki”

BAIBÕL̦ EO EJ BA: “Kom̦win likũt ippãn aolepen men ko kom̦ij eddodo kaki, kõnke ej kaorõk kom̦.”—1 PITER 5:7.

Mel̦el̦ein Men In

Jeova Anij ej rõjañ kõj ñan kwal̦o̦k bũruod im kõnnaan ñane kõn jabdewõt men jej eddodo kake. (Sam 55:22) Jemaroñ jar kõn jabdewõt men me ej kainepataik kõj, meñe el̦ap ak edik. Ñe eaorõk ippãd, ebar aorõk ippãn Jeova. Ad jar ñane ej juon buñtõn ne elukkuun aorõk bwe jen maroñ lo aenõm̦m̦an ilo kõl̦mãnl̦o̦kjen̦ ko ad.—Pilippai 4:6, 7.

Wãween an Men in Maroñ Jipañ

Ñe jej eñtaan kõn an wõr juon ad nañinmej ilo kõl̦mãnl̦o̦kjen̦, jemaroñ l̦õmn̦ak bwe jej lukkuun make iaad. Armej ro jet remaroñ jab aolep iien lukkuun mel̦el̦e kõn eñjake kein jej bũki. (Jabõn Kõnnaan 14:10) Bõtab ñe jej lukkuun kwal̦o̦k bũruod ñan Anij ilo jar kõn wãween ad eñjake, enaaj aolep iien roñjake kõj im mel̦el̦e kõn eñjake ko ad. Jeova ej lo kõj, ejel̦ã kõn men ko jej eddodo kaki im rej kõmmetak kõj, im ekõn̦aan bwe jen jar ñane kõn jabdewõt men jej inepata kake.—2 Kronikel 6:29, 30.

Ñe jej kõnono ñan Jeova ilo jar, men in ej kal̦apl̦o̦k ad lõke bwe ej kea kake kõj. Jemaroñ bõk ejja eñjake eo an ri-jeje sam eo me ear jar im ba: “Kwaar lo aõ jorrããn; Kwaar jel̦ã eñtaan ko aõ.” (Sam 31:7) Ad jel̦ã bwe men ko jej iiooni rej jelõt Jeova emaroñ lukkuun jipañ kõj ñan kijenmej ium̦win wãween ko reppen. Bõtab el̦apl̦o̦k men ko ej kõm̦m̦ani jãn an baj kile wõt men ko jej eñtaan kaki. El̦apl̦o̦k an mel̦el̦e jãn jabdewõt armej kõn wãween ko jej iiooni im ej jipañ kõj ñan bõk kaenõm̦m̦an im kõketak jãn Baibõl̦ eo.

Wãween an Baibõl̦ eo Jipañ Julian

Wãween an Nañinmejin Inepata Jelõt Eõ

“Ewõr aõ nañinmejin inepata (anxiety) im obsessive-compulsive disorder (OCD). Ilo jidimkij ak ilo iien ko ijjab kõtmãne, imaroñ oktak im jino inepata. Ñan waanjoñak, emaroñ em̦m̦an aõ mour kiiõ, im ejjabto tokãlik elukkuun l̦ap aõ inepata im ijjab jel̦ã etke. El̦apl̦o̦k aõ inepata ñe ij pãd ibwiljin ro jet. Ekanooj in l̦ap aõ inepata kõn wãween aer l̦õmn̦ak kõn ña.

“Ro me rejel̦ã kõn nañinmej kein aõ el̦ap aer kate er ñan rejetake eõ. Meñe jet iien rej ba naan ko rejjab lukkuun jipañ, ak el̦ap aõ kam̦m̦oolol kõn aer kajjioñ jipañ.

“Jet iien nañinmej kein aõ rekõm̦m̦an bwe en pen aõ jar. Ij aikuj lukkuun kate eõ bwe kõl̦mãnl̦o̦kjen̦ e aõ en jab m̦ad ñe ij kõnono ñan Jeova ilo jar. Enañin aolep iien eobrak kõmãlij e aõ kõn elõñ kain l̦õmn̦ak ko, im ekõm̦m̦an bwe en lukkuun pok kõl̦mãnl̦o̦kjen̦ e aõ. Ñe men in ej wal̦o̦k, elukkuun pen aõ kõmel̦el̦e ñan Jeova kõn wãween aõ l̦õmn̦ak im eñjake.”

Wãween an Baibõl̦ Jipañ Eõ

“Men eo iar katak jãn aõ katak Baibõl̦ ej bwe jar ko ad rejjab aikuj aetok ak wãjepdik bwe Anij en buñbũruon kaki. Jet iien ñe ijjab maroñ kõmel̦el̦eik wãween aõ eñjake, ij jar wõt im ba: ‘Jeova jouj im jipañ eõ.’ Ilo iien kein, ij kile bwe Jeova emel̦el̦e kake ña im ej letok men eo ij aikuji ilo iien eo. Kobal̦o̦k ippãn jar, iar bar kappok jipañ jãn taktõ ro. Im im̦õn̦õn̦õ in ba bwe ikijjeen menin jipañ kein ruo, em̦m̦anl̦o̦k nañinmej e aõ. Meñe ejjab pidodo im ij aikuj lukkuun kate eõ ñan kajjitõk jipañ jãn Jema ilañ, ak ij kõm̦m̦ane men in kõnke ijel̦ã bwe ej yokwe eõ im ekõn̦aan jipañ ña.”