KATAK 33
AL 130 M̦õn̦õn̦õ in Jeorl̦o̦k Bõd
Wãween an Eklejia eo Maroñ Anõke L̦õmn̦ak eo an Jeova kõn Ro Rej Kõm̦m̦an Jerawiwi
“El̦aññe jabdewõt ej jerawiwi, ewõr juon ad rijjipañ.”—1 JON 2:1.
UNIN KATAK IN
Men ko jemaroñ katak jãn wãween an kar eklejia eo ilo Korint kõm̦adm̦õde juon apañ ke juon Kũrjin ear kõm̦m̦ane juon jerawiwi el̦ap.
1. Ta kõn̦aan eo an Jeova ñan aolep armej?
KE JEOVA ear kõm̦anm̦an armej, ear lel̦o̦k ñan er maroñ eo ñan kããlõt. Ekkã ad kõjerbal menin letok in ñe jej kõm̦m̦an pepe. Pepe eo eaorõktata juon armej emaroñ kõm̦m̦ane ej ilo an wũjlepl̦o̦k mour eo an ñan Jeova im erom uwaan baam̦le eo An. Jeova ekõn̦aan bwe aolep armej ren kõm̦m̦ane men in. Etke? Kõnke ej yokwe armej im ekõn̦aan men eo em̦m̦antata ñan er. Ekõn̦aan bwe ren jem̦jerãiki im bõk mour indeeo.—Dut. 30:19, 20; Gal. 6:7, 8.
2. Ewi wãween an Jeova eñjake kõn ro rej kõm̦m̦an jerawiwi im rejjañin ukel̦o̦k? (1 Jon 2:1)
2 Meñe ãindein, ak Jeova ejjab iuun jabdewõt armej ñan karejar ñan e. Ej kõtl̦o̦k bwe kajjojo armej en make pepe kõn ta eo enaaj kõm̦m̦ane kõn mour eo an. Ta el̦aññe juon Kũrjin em̦õj an peptaij ej rupe juon iaan kien ko an Anij im kõm̦m̦ane juon jerawiwi el̦ap? El̦aññe ejjab ukel̦o̦k, ej menin aikuj ñan jol̦o̦ke jãn eklejia eo. (1 Kor. 5:13) Meñe men in emaroñ wal̦o̦k, ak Jeova ej lukkuun kõjatdikdik bwe eo ear kõm̦m̦an bõd enaaj jepl̦aak ñan E. Ilo m̦ool, eñin un eo eaorõk unin an kar letok katok in pinmuur eo—bwe en maroñ jeorl̦o̦k bõd ko an ro rej ukel̦o̦k. (Riit 1 Jon 2:1.) Anij eo ad me el̦ap yokwe ippãn ej lukkuun rõjañ ro rej kõm̦m̦an jerawiwi ñan ukel̦o̦k.—Zek. 1:3; Rom 2:4; Jem. 4:8.
3. Ta ko jenaaj etali ilo katak in?
3 Jeova ekõn̦aan bwe jen bõk l̦õmn̦ak eo an kõn kõm̦m̦an ko rebõd im ro rej kõm̦m̦ani jerawiwi ko rel̦l̦ap. Katak in enaaj kwal̦o̦k ewi wãween jemaroñ kõm̦m̦ane men in. Ilo am̦ riiti katak in, lale (1) wãween an kar eklejia eo ilo Korint kõm̦adm̦õde juon apañ ke juon Kũrjin ear kõm̦m̦ane juon jerawiwi el̦ap, (2) ta naanin tõl ko rijjilõk Paul ear lel̦o̦k ñan er ke juon armej ear ukel̦o̦k, im (3) ta eo bwebwenato in ilo Baibõl̦ ej katakin kõj kõn wãween an Jeova l̦õmn̦ak kõn Kũrjin ro rej kõm̦m̦ane juon jerawiwi el̦ap.
WÃWEEN AN KAR EKLEJIA EO ILO KORINT KÕM̦ADM̦ÕDE JUON APAÑ KE JUON KŨRJIN EAR KÕM̦M̦ANE JUON JERAWIWI EL̦AP
4. Ta eo ear wal̦o̦k ilo eklejia eo ilo Korint? (1 Korint 5:1, 2)
4 Riit 1 Korint 5:1, 2. Ilo tũreep in mijinede eo an Paul kein kajilu, ear roñ kõn juon men enana ear wal̦o̦k ilo eklejia eo ekããl ilo Korint. Juon iaan em̦m̦aan ro jeid im jatid ilo eklejia eo ear l̦õñ ippãn kõrã eo pãleen jemãn. M̦anit rot in ear lukkuun nana, joñan rejjañin kar “loe ibwiljin armej in aelõñ ko”! Eklejia eo ear jab baj anlo̦ke wõt an em̦m̦aan in kõm̦m̦ane men in enana, ak rar bar m̦õn̦õn̦õ kake. Bõlen jet remaroñ kar l̦õmn̦ak bwe rar anõke wãween an Jeova kwal̦o̦k tũriam̦o ñan armej ro rejjab weeppãn. Bõtab, Jeova ejjab anlo̦ke an armej ro an kõm̦m̦ani m̦anit ko renana. Ilo an kar em̦m̦aan in peran in kõm̦m̦ane men in enana, ejjel̦o̦k pere bwe ear ko̦kkure etan eklejia eo. Emaroñ kar bar kapoik Kũrjin ro jet me rar aetõle. Kõn men in, ta eo Paul ear jiroñ eklejia eo bwe ren kõm̦m̦ane?
5. Ta eo Paul ear jiroñ eklejia eo bwe ren kõm̦m̦ane, im ta mel̦el̦ein an kar ba men in? (1 Korint 5:13) (Bar lale pija eo.)
5 Riit 1 Korint 5:13. Jeova ear kõm̦akũt Paul ñan je juon lõta im kõmel̦el̦e bwe ej menin aikuj ñan jol̦o̦ke eo ear jab kõn̦aan ukel̦o̦k jãn eklejia eo. En kar ewi wãween an Kũrjin ro retiljek kõm̦m̦an ñan rijjerawiwi in? Paul ear jiroñ er bwe ren “bõjrak jãn [aer] kobal̦o̦k ippãn.” Ta mel̦el̦ein men in? Paul ear kõmel̦el̦e bwe naanin tõl in ekitibuj aer “jab m̦õñã ippãn armej rot in ñan jidik.” (1 Kor. 5:11) El̦aññe jej jijet im m̦õñã ippãn juon armej, emaroñ l̦apl̦o̦k ad jol̦o̦k iien im bwebwenato ippãer. Kõn men in, alikkar bwe Paul ear ba bwe eklejia eo en jab aetõle em̦m̦aan eo ear jerawiwi. Ilo aer ãindein, renaaj maroñ kõjparok er jãn aer po ippãn em̦m̦aan in. (1 Kor. 5:5-7) Ejjab men in wõt, ak enaaj bar jipañ im kõm̦akũt em̦m̦aan in ñan kile joñan an nana men eo ear kõm̦m̦ane, im emaroñ jook im kõn̦aan ukel̦o̦k jãn jerawiwi eo an.
Jeova ear kõm̦akũt Paul ñan je juon lõta ñan eklejia eo im kõmel̦el̦e bwe ej menin aikuj ñan jol̦o̦ke em̦m̦aan eo ear jab kõn̦aan ukel̦o̦k jãn eklejia eo (Lale pãrokõrããp 5)
6. Ewi wãween an kar lõta eo an Paul jipañe eklejia eo im em̦m̦aan eo ear jerawiwi?
6 Ãlikin an kar Paul jilkinl̦o̦k lõta eo an ñan Kũrjin ro ilo Korint, ear jino l̦õmn̦ak kõn ewi wãween an eklejia eo nãj em̦m̦akũt kõn lõta eo an. Tokãlik, Taitõs ear bõktok juon ennaan em̦m̦an me ear kam̦õn̦õn̦õik Paul—ear em̦m̦an an eklejia eo em̦m̦akũt kõn lõta eo an Paul. (2 Kor. 7:6, 7) Rar pokake naanin tõl ko an. Ejjab men in wõt, ak jejjo allõñ ãlikin an kar Paul jilkinl̦o̦k lõta eo an, em̦m̦aan eo ear jerawiwi ear ukel̦o̦k im bõjrak jãn kõm̦m̦an ko an renana! Ear ukot kõm̦m̦an ko an im wãween an l̦õmn̦ak, im ear jino l̦oore kien ko rewãnõk an Jeova. (2 Kor. 7:8-11) Kiiõ ta eo Paul enaaj kar jiroñ eklejia eo ñan kõm̦m̦ane?
WÃWEEN AN KAR EKLEJIA EO AIKUJ KÕM̦M̦AN ÑAN EM̦M̦AAN EO EAR UKEL̦O̦K
7. Ta tokjãn eo Kũrjin ro rar bõke itok jãn aer jol̦o̦ke em̦m̦aan eo ear jerawiwi jãn eklejia eo? (2 Korint 2:5-8)
7 Riit 2 Korint 2:5-8. Paul ear ba bwe “ebwe joñan” kaje eo me ro ilo eklejia eo rar lel̦o̦k ñan em̦m̦aan eo. Mel̦el̦ein bwe ear wõr tokjãn an em̦m̦aan in bõk kaje. Ta tokjãn eo? Men in ear tõll̦o̦ke ñan an ukel̦o̦k.—Hib. 12:11.
8. Ta men eo juon Paul ear jiroñ eklejia eo bwe ren kõm̦m̦ane?
8 Innem Paul ear jiroñ eklejia eo bwe ren “m̦õn̦õn̦õ in jol̦o̦k an [em̦m̦aan eo] bõd im kaenõm̦m̦ane” im “kam̦ool ñane bwe [rej] yokwe e.” Jej lo bwe elõñl̦o̦k men ko Paul ear kõn̦aan bwe eklejia eo en kõm̦m̦ani ijello̦kun aer baj kõtl̦o̦k an em̦m̦aan eo bar jepl̦aak ñan eklejia eo. Paul ear kõn̦aan bwe ren kaalikkar ñan em̦m̦aan in ear ukel̦o̦k ikijjeen naan im kõm̦m̦an ko aer bwe rar m̦oolin jol̦o̦k an bõd im bwe rej lukkuun yokwe e. Ilo aer ãindein, rar kaalikkar bwe rar m̦õn̦õn̦õ bwe em̦õj an jepl̦aak ñan eklejia eo.
9. Etke jet remaroñ kar jab lukkuun m̦õn̦õn̦õ in jol̦o̦k bõd eo an em̦m̦aan eo ear ukel̦o̦k?
9 Ear ke wõr ro ilo eklejia eo me rar jab lukkuun m̦õn̦õn̦õ ke em̦m̦aan in ear jepl̦aak ñan eklejia eo? Baibõl̦ ejjab ba, bõtab men in emaroñ kar wal̦o̦k. Ilo m̦ool, kõm̦m̦an ko an em̦m̦aan in rar bõktok apañ ioon eklejia eo im bõlen kõm̦m̦an an ro jet metak im jook. Jet remaroñ kar l̦õmn̦ak bwe ejjab jim̦we ñan aer karwaineneiktok em̦m̦aan in ñan eklejia eo kõnke er eo rar lukkuun kate er ñan dãpij wõt aer mour erreo. (Keidi Luk 15:28-30.) Meñe ãindein, ak etke ear lukkuun aorõk bwe eklejia eo en kwal̦o̦k yokwe eo em̦ool ñan em̦m̦aan in ear jepl̦aak ñan eklejia eo?
10-11. Ta eo en kar wal̦o̦k el̦aññe em̦m̦aan ro rej lale eklejia rar m̦akoko in jol̦o̦k bõd eo an em̦m̦aan eo ear ukel̦o̦k?
10 Baj l̦õmn̦ak m̦õk kõn ta eo en kar wal̦o̦k el̦aññe em̦m̦aan ro rej lale eklejia eo rar m̦akoko in kõtl̦o̦k an em̦m̦aan eo jepl̦aak ñan eklejia eo, ak ñe eklejia eo ear m̦akoko in kwal̦o̦k yokwe ñan em̦m̦aan in ãlikin an jepl̦aak ñan eklejia eo. Emaroñ kar lukkuun ebbweer kõn an “l̦e jãn joñan an bũrom̦õj.” Emaroñ kar bõk l̦õmn̦ak eo bwe ejjab maroñ bar uwaan eklejia eo. Im emaroñ kar bõjrak jãn an kate bwe en bar em̦m̦an kõtaan eo an ippãn Anij.
11 Men eo el̦apl̦o̦k an nana ej ñe Kũrjin ro ilo eklejia eo rar m̦akoko in jol̦o̦k an em̦m̦aan in bõd, eokwe ren kar likũt jem̦jerã eo aer ippãn Jeova ilo kauwõtata. Etke? Kõnke rejjab anõke l̦õmn̦ak eo an Jeova, eo em̦õn̦õn̦õ in jeorl̦o̦k bõd. Ak rej anõke l̦õmn̦ak eo an Setan, eo elãj im ejjel̦o̦k tũriam̦o ippãn. Ren kar kõtl̦o̦k bwe Setan en kõjerbal er ñan ko̦kkure mourin jetõb eo an em̦m̦aan in.—2 Kor. 2:10, 11; Eps. 4:27.
12. Ewi wãween an eklejia eo ilo Korint maroñ anõke Jeova?
12 Innem ewi wãween an eklejia eo ilo Korint maroñ anõke Jeova, im jab Setan? Ikijjeen aer l̦oore wãween an Jeova kõm̦m̦an ñan ro rej ukel̦o̦k. L̦õmn̦ak kõn ta ko jet iaan ri-jeje Baibõl̦ ro rar ba kõn Jeova. Devid ear ba bwe Jeova ‘em̦m̦an im ekõn̦aan jol̦o̦k bõd.’ (Sam 86:5) Maika ear je: “Ejjel̦o̦k Anij ãinwõt kwe; kwõj jeorl̦o̦k jerawiwi ko an armej ro.” (Mai. 7:18) Im Aiseia ear ba: “Rijjerawiwi en ilo̦k jãn ial̦ eo an, im ri-jab wãnõk jãn l̦õmn̦ak ko an; innem en jepl̦aak ñan ippãn Jeova, im Enaaj tũriam̦okake e, im ñan ippãn adwõj Anij, bwe enaaj kanooj wũjlep in jol̦o̦k bõd ko an.”—Ais. 55:7.
13. Etke ear ekkar bwe eklejia eo en kõjepl̦aak em̦m̦aan eo ear ukel̦o̦k ñan eklejia eo? (Lale bo̦o̦k eo etan “Ñããt eo kar Kõjepl̦aak Em̦m̦aan eo ñan Eklejia eo ilo Korint?”)
13 Bwe ren maroñ anõke Jeova, ro ilo eklejia eo ilo Korint rar aikuj karwaineneiki em̦m̦aan eo ear jepl̦aak im kaalikkar bwe rej yokwe e. Ilo an eklejia eo l̦oore naanin jiroñ ko an Paul ñan karwaineneiki em̦m̦aan eo ear ukel̦o̦k, rar kwal̦o̦k aer “pokake ilo men otemjej.” (2 Kor. 2:9) Em̦ool bwe ear mootl̦o̦k jejjo wõt allõñ ãlikin aer kar jol̦o̦ke jãn eklejia eo. Bõtab an kar em̦m̦aan in bõk kaje, men in ear jipañe ñan ukel̦o̦k. Kõn men in, ejjel̦o̦k unin ñan aepedped in kõjepl̦aake ñan eklejia eo.
WÃWEEN JEMAROÑ ANÕKE AN JEOVA EKAJET JIM̦WE IM KWAL̦O̦K TŨRIAM̦O
14-15. Ta eo jej katak jãn wãween an kar eklejia eo ilo Korint kõm̦adm̦õde apañ eo kõn em̦m̦aan eo ear kõm̦m̦ane juon jerawiwi el̦ap? (2 Piter 3:9) (Bar lale pija eo.)
14 Ilo Baibõl̦, kar likũti bwebwenato in kõn wãween an kar eklejia eo ilo Korint kõm̦adm̦õde apañ in “ñan katakin kõj.” (Rom 15:4) Ilo bwebwenato in, jej katak bwe Jeova ejjab anlo̦ke an armej ro an kõm̦m̦ani m̦anit ko renana. Jet remaroñ l̦õmn̦ak bwe kõnke Jeova ej juon eo el̦ap tũriam̦o ippãn, enaaj kõtl̦o̦k bwe juon eo ejjab ukel̦o̦k jãn kõm̦m̦an ko an renana en pãdwõt ilo eklejia eo. Bõtab, ejjab eñin wãween an Jeova kwal̦o̦k tũriam̦o. Jeova ej juon Anij etũriam̦o, bõtab ejjab anlo̦ke an armej ro kõm̦m̦an jerawiwi; im ejjab oktak l̦õmn̦ak eo an kõn ta ko rem̦m̦an im renana. (Jud 4) El̦aññe en kar ãindein, men in en kar likũt mourin jetõb eo an aolep ilo eklejia eo ilo kauwõtata.—JK. 13:20; 1 Kor. 15:33.
15 Meñe ãindein, ak jej katak bwe Jeova ejjab kõn̦aan bwe jabdewõt armej en jako ak bõk ko̦kkure. Ekõn̦aan lo̦mo̦o̦ren armej jabdewõt iien epel̦l̦o̦k ñan an kõm̦m̦ane men in. Ej kwal̦o̦k tũriam̦o ñan armej ro rej kõm̦m̦an oktak im rekõn̦aan bwe en bar em̦m̦an jem̦jerã eo aer ippãn. (Ezk. 33:11; riit 2 Piter 3:9.) Eñin unin, ke em̦m̦aan eo ilo Korint ear ukel̦o̦k im bõjrak jãn an kõm̦m̦an jerawiwi, Jeova ear kõjerbale Paul ñan kõmel̦el̦e ñan eklejia eo bwe rej aikuj jol̦o̦k an em̦m̦aan in bõd im karwaineneiki ñan eklejia eo.
Jej anõke an Jeova kwal̦o̦k yokwe im tũriam̦o ikijjeen ad karwaineneik ro rej jepl̦aak ñan eklejia eo (Lale pãrokõrããp 14-15)
16. Ta am̦ l̦õmn̦ak kõn wãween an kar eklejia eo ilo Korint kõm̦adm̦õde apañ eo kõn em̦m̦aan eo ear jerawiwi?
16 Ilo ad etale wãween kar kõm̦adm̦õde apañ eo ilo Korint, jaar maroñ lo bwe Jeova ej juon eo el̦ap an yokwe, wãnõk, im ekajet jim̦we. (Sam 33:5) Ad katak kõn men in ej kõm̦akũt kõj ñan nõbar Anij eo ad. El̦aptata kõnke kõj aolep rijjerawiwi im jej aikuji an jeorl̦o̦k ad bõd. Kõj kajjojo el̦ap ad kam̦m̦oolol Jeova kõn katok in pinmuur eo, eo me ej kõpel̦l̦o̦k ial̦an an maroñ jeorl̦o̦k ad bõd. El̦ap ad bõk kaenõm̦m̦an ñan jel̦ã bwe Jeova elukkuun yokwe armej ro an im ekõn̦aan men eo em̦m̦antata ñan er!
17. Ta ko jenaaj etali ilo katak ko tokãlik?
17 Bõtab, ta el̦aññe juon ej kõm̦m̦ane juon jerawiwi el̦ap ilo raan kein? Ewi wãween an em̦m̦aan ro rej lale eklejia maroñ anõke joñak eo an Jeova ilo aer kajjioñ jipañe juon eo ear jerawiwi bwe en ukel̦o̦k? Ewi wãween an eklejia eo maroñ em̦m̦akũt ñe em̦m̦aan ro rej pepe ñan jol̦o̦ke juon armej jãn eklejia eo ak bar kõjepl̦aaktok juon armej ñan eklejia eo? Jenaaj etale kajjitõk kein ilo katak ko tokãlik.
AL 109 Yokwe jãn Bũruod