Lukkuun Bõk Tokjãn jãn Pija Ko

Eobrak bok ko ad kõn pija ko me rej katakin kõj boin ko raorõk. Ewi wãween am̦ maroñ lukkuun bõk tokjãn jãn pija kein?

• M̦okta jãn am̦ riiti katak eo, lale aolepen pija ko ie. Pija kein remaroñ kãitoklimoik eok im kõm̦m̦an am̦ kõn̦aan riiti katak eo. Ñan waanjoñak, kwõl̦ak loe juon m̦õñã ekaijol̦jol̦, ejjel̦o̦k pere kwõlukkuun kijooror in kañe. Ejja ãindeinl̦o̦k wõt, kwõmaroñ kijooror in riiti juon katak el̦aññe kwõj m̦okta lali pija ko ie. Kõn men in, kajjitõk ippam̦ make, ‘Ta ko ij loi ilo pija ko?’—Amos 7:​7, 8.

• Ilo am̦ riiti katak eo, kõl̦mãnl̦o̦kjen̦ kõn unin kar kããlõt pija ko ie. Riiti kõmel̦el̦e ko itulal̦in pija ko ak kõmel̦el̦e ko kõn pija ko, ñe ewõr. L̦õmn̦ak kõn wãween an pija ko ekkejell̦o̦k ippãn boin ko ilo katak eo im wãween am̦ maroñ jerbali men ko kwõj katak jãni ilo mour eo am̦.

• Ãlikin am̦ riiti katak eo, bar lali pija ko im kõjerbali ñan jipañ eok keememej boin ko rel̦l̦ap. Innem, kiil mejam̦ im kajjioñ pijaikl̦o̦k kajjojo iaan pija ko ekoba boin ko kwõj katak jãni.

• Kwõmaroñ ke bar lali pija ko ilo magazine in im lale ñe kwõmaroñ keememej boin ko kwaar katak jãn pija kein?