Wãween an Jeova Jipañ Kõj ñan Kijenmej Wõt

1. Etke ejjab pidodo ñan kijenmej wõt, im wõn eo enaaj jipañ kõj? (1 Piter 5:10)

ILO raan kein ãliktata me reppen, armej ro an Jeova rej aikuj kijenmej wõt. Jet rej eñtaan kõn nañinmej ko rel̦l̦ap. Ro jet rej bũrom̦õj kõnke ejako juon eo ejitõnbõro ippãer ilo mej. Im ro jet rej iioon jum̦ae jãn baam̦le eo aer ak ri-utiej ro ilo kien. (Matu 10:​18, 36, 37) Kwõmaroñ lõke bwe jekdo̦o̦n ta apañ ko kwõj iiooni, Jeova emaroñ jipañ eok ñan kijenmej wõt.—Riit 1 Piter 5:10.

2. Etke jemaroñ kijenmej wõt?

² Ñan kijenmej ej mel̦el̦ein bwe jej dãpij wõt ad tiljek ñan Jeova im karejar ñane ilo lañlõñ meñe jej iioon wãween ko reppen, ro jet rej kaeñtaan kõj, ak jej iioon menin kapo ko ñan kõm̦m̦ane juon jerawiwi. Bwe jen maroñ kijenmej jej aikuj bareinwõt tõmak bwe enaaj em̦m̦anl̦o̦k wãween ko jej iiooni. Jemaroñ kijenmej wõt jab kõn kajoor eo ad make, ak kõn wõt kajoor eo jãn Jeova, eo ej letok “kajoor eo . . . el̦ap jãn joñan.” (2 Kor. 4:7) Ilo katak in, jenaaj kõnono kõn emãn men ko Jeova ej litok ñan jipañ kõj kijenmej wõt. Jenaaj bareinwõt lale wãween ad maroñ kortokjãn kajjojo iaan men kein emãn.

JAR

3. Etke jemaroñ ba bwe jar ej juon men ekabwilõñlõñ?

³ Jeova ear letok juon men ekabwilõñlõñ me emaroñ jipañ kõj ñan kijenmej wõt. Ear kõm̦m̦an bwe jen maroñ kõnono ippãn meñe kõj rijjerawiwi. (Hib. 4:16) L̦õmn̦ak kõn men in: Jemaroñ jar ñan Jeova ilo jabdewõt iien im kõn jabdewõt men. Jekdo̦o̦n ta kajin eo ad, ia eo jej pãd ie, meñe jej make iaad ak kalbuuj, ak Jeova emaroñ roñ ad jar ñane. (Jona 2:​1, 2; Jrb. 16:​25, 26) Ñe jejjab maroñ kwal̦o̦k naan ko jekõn̦aan ba kõn wõt an l̦ap ad inepata, ewõr an Jeova maroñ ñan mel̦el̦e ta eo jej kajjioñ in ba. (Rom 8:​26, 27) Alikkar bwe jar ej juon men ekabwilõñlõñ!

4. Etke jemaroñ ba bwe ej ankilaan Jeova bwe jen jar im kajjitõk bwe en jipañ kõj kijenmej wõt?

⁴ Ilo Naan ko an, Jeova ej kaenõm̦m̦an kõj bwe “jabdewõt men eo jej kajjitõk kake im ej ekkar ñan ankilaan, ej roñjake kõj.” (1 Jon 5:14) Jemaroñ ke kajjitõk ippãn Jeova bwe en jipañ kõj ñan kijenmej wõt? Aet! Men in ej ekkar ñan ankilaan. Etke jemaroñ ba men in? Ñe jej kijenmej wõt ium̦win apañ ko, Jeova emaroñ uwaake eo ej kinaake ak kakũtõtõiki, Setan Tepil̦ eo. (JK. 27:11) Kobal̦o̦k ippãn men in, Baibõl̦ ej ba bwe Jeova elukkuun kõn̦aan “lel̦o̦k kajoor ñan ro rej tiljek ñane.” (2 Kro. 16:​9, UBS) Kõn men in, jemaroñ lukkuun lõke bwe ewõr ippãn Jeova kajoor eo im kõn̦aan eo ñan jipañ kõj kijenmej wõt.—Ais. 30:18; 41:10; Luk 11:13.

5. Ewi wãween an jar maroñ jipañ kõj ñan lo aenõm̦m̦an? (Aiseia 26:3)

⁵ Baibõl̦ ej ba bwe ñe jej jar ñan Jeova kõn men ko jej inepata kaki, “aenõm̦m̦an eo jãn Anij, eo el̦ap jãn jel̦ã otemjej enaaj kõjparok [bũruod] im l̦õmn̦ak ko [ad].” (Pil. 4:7) L̦õmn̦ak kõn ta mel̦el̦ein men in. Armej ro im rejjab karejar ñan Jeova rej iioon wãween ko reppen, im rej kajjioñ elõñ wãween ko ñan lo aenõm̦m̦an. Ñan waanjoñak, jet armej rej julo̦k aolep men ko rej l̦õmn̦ak kaki bwe ren maroñ aenõm̦m̦an. Ad kõm̦m̦ane men in elukkuun kauwõtata ñan mourin jetõb eo ad. (Keidi Matu 12:​43-45.) Im meñe armej ro rej eñjake aer aenõm̦m̦an jãn wõt aer kajjioñe wãween kein, bõtab rejjab lo aenõm̦m̦an eo em̦ool im em̦m̦anl̦o̦k me ej itok jãn Jeova. Ñe jej jar ñan Jeova, jej kwal̦o̦k bwe jej lukkuun atartar ioon im ej wõnm̦aanl̦o̦k wõt im letok ñan kõj “aenõm̦m̦an eo el̦ap.” (Riit Aiseia 26:3.) Juon wãween Jeova ej kõm̦m̦ane men in ej ikijjeen an jipañ kõj ñan keememej eoon ko rekaenõm̦m̦an me rej jãn Naan ko an. Eoon kein rej kaenõm̦m̦an l̦õmn̦ak ko ad im bũruod kõnke jejel̦ã bwe Jeova ej kea kõn kõj im ekõn̦aan jipañ kõj.—Sam 62:​1, 2.

6. Ewi wãween kwõmaroñ lukkuun kortokjãn jeraam̦m̦an eo ewõr ippãd ñan jar? (Bar lale pija eo.)

⁶ Men eo kwõmaroñ kõm̦m̦ane. Ne kwõj kijenmej ium̦win juon apañ me ej mãlejjoñe tõmak eo am̦, “jol̦o̦k menin eddo ko am̦ ioon Jeova” im kajjitõk bwe en lewaj aenõm̦m̦an eo an. (Sam 55:22) Kwõmaroñ bareinwõt jar bwe en lewaj mãlõtlõt eo kwõj aikuji ñan kõm̦adm̦õde apañ eo kwõj iioone. (JK. 2:​10, 11) Bareinwõt, jab mel̦o̦kl̦o̦k men ko kwõj kam̦m̦oolol kaki. (Pil. 4:6) L̦õmn̦ak kõn wãween ko Jeova ej jipañ eok ñan kijenmej wõt ium̦win apañ eo kwõj iioone, im kam̦m̦oolole kõn an jipañ. Jab kõtl̦o̦k bwe apañ ko kwõj iiooni ren kõm̦m̦an bwe en pen am̦ lo jeraam̦m̦an ko ewõr ippam̦.—Sam 16:​5, 6.

NAANIN ANIJ

7. Ñe jej katak Baibõl̦, ewi wãween an men in maroñ jipañ kõj ñan kijenmej wõt?

⁷ Jeova ear letok ñan kõj Naan ko an ñan jipañ kõj ñan kijenmej wõt. Elõñ eoon ko ilo Baibõl̦ rej kaalikkar ñan kõj bwe Jeova enaaj jipañ kõj. L̦õmn̦ak kõn juon waanjoñak. Matu 6:8 ej ba: “Jememiwõj ilañ ejel̦ã ta ko kom̦ij aikuji m̦okta jãn ami kajjitõk ippãn.” Jesus ear ba naan kein im ejjel̦o̦k juon ejel̦ãl̦o̦k kõn Jeova ijello̦kun e. Kõn men in, ejjel̦o̦k unin ad pere bwe Jeova em̦õn̦õn̦õ in letok men ko jej aikuji ilo iien ko jej iioon apañ. Ewõr eoon ko jet ilo Baibõl̦ me remaroñ jipañ kõj ñan dãpij wõt ad kijenmej.—Sam 94:19.

8. (1) Kwal̦o̦k juon naanin kakapilõk jãn Baibõl̦ me emaroñ jipañ kõj ñan kijenmej wõt. (2) Ta eo enaaj jipañ kõj ñan keememejtok naanin kakapilõk ko jãn Baibõl̦ ilo iien ko jej aikuji?

⁸ Naanin kakapilõk ko ilo Baibõl̦ remaroñ jipañ kõj ñan kijenmej wõt. Aet, rej letok mãlõtlõt eo jej aikuji ñan ad maroñ kõm̦m̦ani pepe ko rem̦m̦an. (JK. 2:​6, 7) Ñan waanjoñak, Baibõl̦ eo ej rõjañ kõj ñan l̦õmn̦ak wõt kõn men ko an raan eo wõt im en jab l̦e jãn joñan ad inepata kõn men ko an ilju. (Matu 6:34) Ñe jej riiti Baibõl̦ eo kajjojo raan im lukkuun kõl̦mãnl̦o̦kjen̦ kõn men ko jej riiti, enaaj pidodo ad keememejtok naanin kakapilõk ko jãn Baibõl̦ ñe jej aikuj kõm̦m̦ane juon pepe ak ñe jej aikuj jipañ jel̦ã kilen kijenmej ium̦win juon apañ.

9. Ewi wãween an bwebwenato ko ilo Baibõl̦ kal̦apl̦o̦k ad lõke bwe Jeova enaaj jipañ kõj?

⁹ Ilo Baibõl̦, elõñ bwebwenatoun armej ro ãinwõt kõj. Armej rein rar lõke Jeova im bõk jipañ jãne. (Hib. 11:​32-34; Jem. 5:17) Ñe jej kõl̦mãnl̦o̦kjen̦ kõn bwebwenato kein, jej kal̦apl̦o̦k ad lõke bwe Jeova ej “ad likõpejñak im ad kajoor; Epojak iien otemjej in jipañ kõj ñe jej jorrããn.” (Sam 46:​1, UBS) Ñe jej kõl̦mãnl̦o̦kjen̦ kõn ri-karejar ro an Jeova ilo iien ko etto me rar dãpij aer tiljek ilo iien ko reppen, men in ej kõm̦akũt kõj ñan anõke tõmak eo aer im aer kar kijenmej wõt.—Jem. 5:​10, 11.

10. Ewi wãween kwõmaroñ lukkuun kortokjãn Naanin Anij?

¹⁰ Men eo kwõmaroñ kõm̦m̦ane. Riiti Baibõl̦ eo kajjojo raan im kõm̦m̦an juon laajrak in eoon ko me el̦ap aer jipañ eok. Elõñ rej lo bwe aer riiti unin tõl eo ilo jibboñ ej jipañ er ñan bõk l̦õmn̦ak ko rekõketak ilo aolepen raan eo. Juon jeid im jatid kõrã etan Mariea ear lo an men in jipañe ke jinen im jemãn jim̦or rar bõk nañinmejin kããnjer. Ta eo ear jipañe ñan kijenmej wõt ke ear lale jinen im jemãn ilo allõñ ko ãliktata m̦okta jãn aer jako? Ej ba: “Aolep jibboñ ikõn riiti eoon eo jãn Liñõri Baibõl̦ Raan Otemjej im kõl̦mãnl̦o̦kjen̦ kake. Aõ ekkeini aõ kõm̦m̦ane men in ear jipañ koobrak l̦õmn̦ak eo aõ kõn Jeova im men ko rem̦m̦an ej katakin kõj jãn Baibõl̦ im jab l̦õmn̦ak wõt kõn apañ ko iar iiooni.”—Sam 61:2.

RŨTTÕMAK RO JEID IM JATID

11. Etke ad jel̦ã bwe jejjab make iaad ñe jej iioon apañ ko ej kaenõm̦m̦an kõj?

¹¹ Jeova ear letok ñan kõj rũttõmak ro jeid im jatid ñan jipañ kõj kijenmej wõt. Ad jel̦a bwe jej eñtaan kõn “ejja men ko wõt ro jeid im jatid ipel̦aakin lal̦ in rej eñtaan kaki,” ej kaenõm̦m̦an kõj kõnke jejel̦ã bwe jejjab make iaad. (1 Pit. 5:9) Men in ej mel̦el̦ein bwe ro jeid im jatid rar iiooni apañ ko rej ãinl̦o̦kwõt apañ ko jej iiooni im rar tiljek wõt ñan Jeova. Alikkar bwe kõj bareinwõt jemaroñ kijenmej wõt!—Jrb. 14:22.

12. Ewi wãween an rũttõmak ro jeid im jatid maroñ jipañ kõj, im ewi wãween jemaroñ jipañ er? (2 Korint 1:​3, 4)

¹² Ilo ad kijenmej ium̦win juon apañ, rũttõmak ro jeid im jatid remaroñ kõkajoor kõj. Rijjilõk Paul ear lo an m̦ool men in. Ilo lõta ko an, ear kwal̦o̦k etan ro rar jipañe ke ear kalbuuj im ear kam̦m̦oolol er. Rar kaenõm̦m̦ane, kõkajoore, im jipañ Paul kõn aikuj ko an. (Pil. 2:​25, 29, 30; Kol. 4:​10, 11) Jemaroñ bareinwõt iioon wãween rot in ilo raan kein. Ñe jej aikuj jipañ ñan kijenmej wõt, ro jeid im jatid repojak in jipañ kõj, im ñe rej aikuj jipañ jebar pojakin jipañ er.—Riit 2 Korint 1:​3, 4.

13. Ta eo ear jipañ juon jeid im jatid kõrã etan Maya ñan kijenmej wõt?

¹³ El̦ap an kar ro jeid im jatid kõkajoore juon jeid im jatid kõrã jãn Russia etan Maya. Ilo 2020 eo, bwilijmããn̦ ro rar etale kobban m̦weo im̦õn im tokãlik kar liaakel̦o̦k ñan im̦õn ekajet eo kõn wõt an kar kwal̦o̦k kõn tõmak eo an ñan ro jet. Maya ej ba: “Ilo kar tõre eo me iar lukkuun m̦õjn̦o̦, ro jeid im jatid rar call, im jejetok, im kwal̦o̦k aer lukkuun yokwe eõ. Meñe iar jel̦ã bwe ewõr juon aõ baam̦le el̦ap ilo tõmak me el̦ap yokwe ippãer, ak jãn kar 2020 eo iar lukkuun kile an m̦ool men in.”

14. Ta ko jemaroñ kõm̦m̦ani bwe jen maroñ bõk tokjãn jãn jipañ eo jãn ro jeid im jatid? (Bar lale pija eo.)

¹⁴ Men eo kwõmaroñ kõm̦m̦ane. Ilo am̦ kijenmej ium̦win juon apañ, kwõn jab kattol̦o̦k eok make jãn rũttõmak ro jeim̦ im jatũm̦. Jab ãliklik in kajjitõk jipañ jãn em̦m̦aan ro rej lale eklejia. Em̦m̦aan rein remaroñ “ãinwõt jikin tilekek jãn kõto, im juon kein tõrak jãn l̦añ [ko].” (Ais. 32:2) Keememej bwe ro jeim̦ im jatũm̦ rej bareinwõt kijenmej ium̦win apañ ko. Ñe kwõj kwal̦o̦k jouj im jipañ ro jet, kwõnaaj lo m̦õn̦õn̦õ ilo am̦ kijenmej ium̦win apañ eo kwõj iioone.—Jrb. 20:35.

KÕJATDIKDIK EO AD

15. Ewi wãween an kar kõjatdikdik jipañ Jesus, im ewi wãween an jipañ kõj? (Hibru 12:2)

¹⁵ Em̦õj an Jeova letok ñan kõj juon kõjatdikdik me jemaroñ lõke. Kõjatdikdik in emaroñ jipañ kõj ñan kijenmej wõt. (Rom 15:13) Keememej bwe unin an kar Jesus maroñ kijenmej wõt ilo raan eo epentata ilo mour eo an ijin ioon lal̦ ej kõnke ear wõr an kõjatdikdik. (Riit Hibru 12:2.) Jesus ear jel̦ã bwe an dãpij wõt an tiljek enaaj kokkwõjarjar ãt eo etan Jeova. Jesus ear bareinwõt reim̦aanl̦o̦k ñan an bar kobal̦o̦k ippãn Jemãn im tokãlik jerbal ippãn ro jatin ilo Aelõñ eo ilañ. Ejja ãindeinl̦o̦k wõt, kõjatdikdik eo ad ñan mour indeeo ilo lal̦ eo ekããl an Anij ej jipañ kõj ñan kijenmej wõt ium̦win jabdewõt apañ jej iiooni ilo lal̦ in an Setan.

16. Ewi wãween an kar kõjatdikdik eo ad jipañ juon jeid im jatid kõrã ñan kijenmej wõt, im ta eo kwõj katak jãn naan ko an?

¹⁶ L̦õmn̦ak kõn wãween an kar kõjatdikdik eo ad kõn Aelõñ eo jipañ juon jeid im jatid kõrã jãn Russia etan Alla. Kar kalbuuji l̦eo ippãn Alla im likũti ilo im̦õn kalbuuj eo m̦ae iien kar bõke ñan im̦õn ekajet eo. Ke men in ear wal̦o̦k, Alla ej ba: “Aõ kar jar im kõl̦mãnl̦o̦kjen̦ kõn kõjatdikdik eo ad kõn ilju im jekl̦aj, ear jipañ eõ bwe in jab lukkuun ebbweer. Ijel̦ã bwe ewõr men ko rem̦m̦an rej pãd im̦aan. Jeova enaaj bõk anjo̦, im kõj bareinwõt jenaaj bõk anjo̦.”

17. Ewi wãween jemaroñ kwal̦o̦k bwe jej kaorõk kõjatdikdik eo ad kõn ilju im jekl̦aj? (Bar lale pija eo.)

¹⁷ Men eo kwõmaroñ kõm̦m̦ane. Kõm̦m̦an iien ñan kõl̦mãnl̦o̦kjen̦ kõn ilju im jekl̦aj eo elukkuun em̦m̦an me Jeova ej kallim̦ur kake. Pijaikl̦o̦k am̦ pãd ilo lal̦ eo ekããl an Anij im jeraam̦m̦an ko kwõnaaj bũki. Ñe jenaaj ãindein, jabdewõt apañ jej iioone kiiõ renaaj ãinwõt ñe “remera im rej ñan jidik wõt iien.” (2 Kor. 4:17) Bareinwõt, kate eok joñan wõt am̦ maroñ ñan kwal̦o̦k kõn tõmak eo am̦ ñan ro jet. L̦õmn̦ak kõn joñan an pen mour ko an armej ro rejjab karejar ñan Jeova. Er bareinwõt, elukkuun lõñ apañ ko ilo mour ko aer, bõtab rejaje kõn kallim̦ur ko rem̦m̦an an Jeova. Kwõmaroñ kõm̦m̦an bwe en wõr aer itoklimo kõn kõjatdikdik eo ad kõn Aelõñ eo jãn wõt am̦ bwebwenato jidik ippãer.

18. Etke jemaroñ lõke kallim̦ur ko an Jeova?

¹⁸ Ãlikin an kar Job kijenmej ium̦win elõñ apañ ko im tiljek wõt, ear ba ñan Jeova: “Ijel̦ã bwe kwõkajoor bõtata, im bwe kwõmaroñ kõm̦m̦ane jabdewõt men eo kokõn̦aan.” (Job 42:​2, UBS) Job ear katak bwe ejjel̦o̦k men en̦ emaroñ bõbrae an jejjet kũtien ankilaan Jeova. Ad keememej men in emaroñ kõkajoor kõj bwe jen wõnm̦aanl̦o̦k wõt im kijenmej. L̦õmn̦ak kõn waanjoñak in: Ewõr juon kõrã me enañinmej im ebbweer kõnke elõñ taktõ ro rejjab maroñ kõmoure jãn nañinmej eo an. Bõtab, ke juon taktõ me el̦ap jel̦ã im imminene ko ippãn ej lo ta eo ej kõm̦m̦an bwe en nañinmej im ej kõmel̦el̦e wãween an nãj kõm̦adm̦õde nañinmej eo an, em̦m̦an an kõrã eo mour, meñe enaaj bõk iien ñan an ãjmour. Kiiõ emaroñ kijenmej wõt kõnke ewõr an kõjatdikdik bwe enaaj em̦m̦anl̦o̦k ãjmour eo an. Ejja ãindeinl̦o̦k wõt, ad lõke bwe enaaj jejjet kũtien kõjatdikdik eo ad kõn Pedetaij, ej jipañ kõj ñan kijenmej wõt.

19. Ta ko jej aikuji bwe jen maroñ kijenmej wõt?

¹⁹ Ãinwõt ad kar etale, Jeova ej jipañ kõj ñan kijenmej wõt ium̦win apañ ko ad ikijjeen jar, Naan ko an, rũttõmak ro jeid im jatid, im kõjatdikdik eo ad. Ñe jej lukkuun kortokjãn men kein Jeova ej litok ñan kõj, Jeova enaaj jipañ kõj kijenmej wõt ium̦win aolep apañ ko jej iiooni m̦ae iien ejako apañ ko ilo lal̦ in an Setan.—Pil. 4:13.