“Ro Em̦m̦an Bũrueer” Renaaj Em̦m̦akũt

1. Ewi wãween an armej ro em̦m̦akũt ñan ennaan eo em̦m̦an? (Jerbal 13:​47, 48; 16:​14, 15)

ELÕÑ armej ilo tõre ko an rijjilõk ro rar kajju bõk m̦ool eo im kõn̦aan erom juon Kũrjin ke rar roñ ennaan eo em̦m̦an. (Riit Jerbal 13:​47, 48; 16:​14, 15.) Ejja ãindeinl̦o̦k wõt ilo raan kein, jet rej lañlõñ ilo iien eo jinointata rej roñ ennaan eo em̦m̦an. Im ewõr ro jet me ilo jinoin rejjab itoklimo kõn ennaan eo em̦m̦an, ak tokãlik rej kõpel̦l̦o̦k bũrueer im katak kõn Jeova im tõmak ilo E. Ta ko jej aikuj kõm̦m̦ani ñe jej iioon “ro em̦m̦an bũrueer” ilo jerbalin kwal̦o̦k naan?

2. Ewi wãween an jerbalin kwal̦o̦k naan eo ad ãinwõt jerbal eo an juon ri-ekkat?

² L̦õmn̦ak kõn waanjoñak in. Jemaroñ keidi jerbalin kwal̦o̦k naan eo ad ñan jerbal eo an juon ri-ekkat. Ñe ekalo juon iaan menin eddek ko ilo atake eo an, enaaj m̦õkaj im m̦adm̦õde. Ijoke, ilo ejja iien eo wõt, ej wõnm̦aanl̦o̦k wõt im utdikdiki im lale menin eddek ko jet me rejjañin kalo. Ejja ãindeinl̦o̦k wõt, ñe jej lo juon eo epojakin eo̦roñ ennaan eo em̦m̦an, jekõn̦aan jipañe ñan erom juon ri-kal̦ooran Christ ilo iien eo em̦õkaj tata. Bõtab, ilo ejja iien eo wõt, jej wõnm̦aanl̦o̦k wõt im jipañ ro me rej aikuj iien ñan kile aorõkin men ko rej katak kaki jãn Baibõl̦. (Jon 4:​35, 36) Lol̦o̦kjen̦ enaaj jipañ kõj ñan jel̦ã wãween eo em̦m̦antata ñan jipañ kajjojo iaan ro jej kõnono ippãer ilo jerbalin kwal̦o̦k naan. Jen kiiõ etale ta ko jemaroñ kõm̦m̦ani ñan jipañ ro rej kwal̦o̦k aer itoklimo ilo iien eo jinointata jej kõnono ippãer. Jenaaj bareinwõt kõnono kõn wãween ad maroñ jipañ rein ñan kõm̦m̦an wõt wõnm̦aanl̦o̦k ko.

ÑE ARMEJ REJ ITOKLIMO IN EO̦ROÑ ENNAAN EO EM̦M̦AN

3. Ta eo jemaroñ kõm̦m̦ane ñe jej iioon ro rej kwal̦o̦k aer itoklimo kõn ennaan eo em̦m̦an? (1 Korint 9:26)

³ Ñe jej iioon armej ro rej kwal̦o̦k aer itoklimo kõn ennaan eo em̦m̦an, jekõn̦aan jipañ er bwe ren jino etetal ilo ial̦ eo ej tõll̦o̦k ñan mour indeeo ilo iien eo em̦õkaj tata. Ñe jej iioon armej rein, jejjab kõn̦aan jenliklik in kajjitõk ñe rekõn̦aan katak Baibõl̦ im kũrtok er ñan iien kweilo̦k ko ad ilo iien eo jinointata jej kõnono ippãer.—Riit 1 Korint 9:26.

4. Kwal̦o̦k juon bwebwenato kõn juon eo ear kajju kõn̦aan katak Baibõl̦.

⁴ Kajjitõk ñe rekõn̦aan katak. Ewõr jet jej iioon er im rekajju kõn̦aan katak Baibõl̦. Ñan waanjoñak, juon raanin Taije, juon jiroñ ilo Canada ear kepaake juon iaan wabwilbwil ko ad im ear bõk juon an kaape in brochure eo etan M̦õn̦õn̦õ kõn Mour ñan Indeeo! Kõrã eo jeid im jatid iturin wabwilbwil eo ear kõmel̦el̦e ñan jiroñ eo bwe emaroñ katak kake brochure eo ilo ejjel̦o̦k on̦ããn. Jiroñ eo ear kõn̦aan katak innem erro kõrã eo jeid im jatid rar lel̦o̦k nõm̦ba eo aerro ñan doon. Tokãlik ilo ejja raan eo wõt, jiroñ eo ear text e eo jeid im jatid im kajjitõk ñããt eo remaroñ katak. Kõrã eo jeid im jatid ear kajjitõk ñe emaroñ iioone ilo wiikããn eo, im jiroñ eo ear kajjitõk: “Emaroñ ke ilju bwe ipel̦l̦o̦k?” Innem ilo Bõl̦aide raan eo tok juon, erro ar katak. Bareinwõt, jiroñ in ear kobal̦o̦k ilo iien kweilo̦k eo ilo wiikããn eo wõt, im ear kõm̦m̦an el̦ap wõnm̦aanl̦o̦k ko.

5. Ewi wãween jemaroñ kwal̦o̦k lol̦o̦kjen̦ ilo iien eo jej kajjitõk ñe juon ekõn̦aan katak Baibõl̦? (Bar lale pija ko.)

⁵ Alikkar, jejjab kõtmãne bwe aolep armej ro jej iioon er renaaj kõn̦aan kajju katak ãinwõt kar jiroñ eo. Ñan jet, emaroñ bõk jidik iien. Bõlen ilo jinoin ad kõnono ippãn armej rot in, jej aikuj kõnono kake juon men ewõr an itoklimo kake. Ñe jenaaj dãpij wõt juon l̦õmn̦ak em̦m̦an im kwal̦o̦k wõt ad itoklimo kake e, ium̦win juon iien ekadu, jemaroñ naaj jino katak Baibõl̦ ippãn. Naan ta ko jemaroñ kõjerbali ñe jej kajjitõk ñe juon ekõn̦aan katak Baibõl̦? Kar kwal̦o̦k kajjitõk in ñan elõñ iaan ro jeid im jatid me relukkuun jel̦ã kilen jino katak Baibõl̦ ippãn armej.

6. Ta ko jemaroñ ba ñan jipañ armej ro ñan kile bwe aer katak Baibõl̦ ej juon men em̦m̦an ñan er?

⁶ Ro jeid im jatid me kar kwal̦o̦k kajjitõk in kõn aer jino katak Baibõl̦ ippãn armej, rej ba bwe ilo jet aelõñ em̦m̦anl̦o̦k ñan jab kõjerbali naan ko ãinwõt “katak,” “katak Baibõl̦,” ak “katakin kwe” ñe jej kõmel̦el̦e ñan armej ro kõn ta ko rej wal̦o̦k ñe jej katak ippãn armej. Rein jeid im jatid rej kile bwe em̦m̦anl̦o̦k ñan kõjerbali naan ko ãinwõt “bwebwenato,” “etale,” ak “jel̦ãl̦o̦k kobban Baibõl̦ eo.” Bwe kwõn maroñ jepl̦aak im bar bwebwenato ippãn armej eo, kwõmaroñ ba: “Ekabwilõñlõñ bwe jemaroñ lo uwaakin kajjitõk ko raorõk kõn mour ilo Baibõl̦” ak “Baibõl̦ eo ejjab juon bokin kabuñ wõt ak emaroñ bar jipañ kõj ilo mour ko ad.” Kwõmaroñ bar ba: “Ejjab bõk el̦ap iien; kwõmaroñ katak juon men eaorõk ium̦win 10 l̦o̦k ñan 15 minit.” Kwõjjab aikuj kõjerbal naan ko ãinwõt “karõk” ak “aolep wiik,” kõnke armej ro remaroñ l̦õmn̦ak bwe renãj aikuj iioone eok aolep iien.

7. Ñããt eo jet armej rar kile bwe em̦õj aer lo m̦ool eo? (1 Korint 14:​23-25)

⁷ Kũrtok er ñan iien kweilo̦k ko. Ilo tõre ko an rijjilõk Paul, ewõr ro rar kile bwe em̦õj aer lo m̦ool eo ilo iien eo jinointata rar kobal̦o̦k ilo iien kweilo̦k ko an Kũrjin ro. (Riit 1 Korint 14:​23-25.) Ekkã ad bar lo men in ilo raan kein. Ekkã an m̦õkajl̦o̦k an ro rekããl kõm̦m̦an wõnm̦aanl̦o̦k ko ãlikin wõt aer jino kobatok ilo iien kweilo̦k ko ad. Ñããt eo kwõmaroñ kũrtok er ñan iien kweilo̦k ko? Bok eo etan M̦õn̦õn̦õ kõn Mour ñan Indeeo! ej kũrtok er ilo katak 10. Ijoke, kwõjjab aikuj kõttar m̦ae iien kwõtõpar katak in bwe kwõn kũrtok er. Ilo iien eo jinointata kwõj bwebwenato ippãer, kwõmaroñ kũrtok er ñan kweilo̦k eo ad ilo wiikããn. Kwõmaroñ kwal̦o̦k taitõl̦in katak eo an public talk eo ak kwõmaroñ kwal̦o̦k juon boin jãn katak eo an Naan in Keeañ eo an wiik eo.

8. Ñe jej kũrtok armej ñan iien kweilo̦k ko ad, ta ko jemaroñ kwal̦o̦k kõn iien kweilo̦k ko ad? (Aiseia 54:13)

⁸ Ñe jej kũrtok juon eo ewõr an itoklimo ñan kweilo̦k ko ad, jemaroñ kõmel̦el̦e kõn wãween an oktak iien kweilo̦k ko ad jãn ta ko rej wal̦o̦k ilo kabuñ ko jet me emaroñ imminene kaki. Ilo jinointata in an juon kõrã kobal̦o̦k ilo juon iien katak Naan in Keeañ, ear kajjitõk ippãn eo ear katak ippãn: “Em̦m̦aan eo ej tõl ejel̦ã etan aolep?” Kõrã eo jeid im jatid ear uwaake im ba bwe jej aolep kate kõj ñan jel̦ã etan aolep ro ilo eklejia eo ad, ãinwõt ad jel̦ã etan ro ilo baam̦le eo ad. Kõrã in ear lo ad lukkuun oktak jãn ro ilo m̦õn jar eo an. Jemaroñ kõmel̦el̦e ñan ro jej kũrtok er juon wãween ebar oktak iien kweilo̦k ko ad jãn kabuñ ko jet. (Riit Aiseia 54:13.) Jej koba ippãn doon bwe jen kabuñ ñan Jeova, katak jãn e, im ñan kõkajoor doon. (Hib. 2:12; 10:​24, 25) Tokjãn men in, iien kweilo̦k ko ad el̦ap aer laajrak im kon̦, el̦ap aer jipañ kõj, im jejjab kitibuj imminene ak m̦anit ko an armej. (1 Kor. 14:40) Bareinwõt, em̦m̦an an meram ilowaan Im̦õn Kweilo̦k eo bwe en em̦m̦an ad katak. Im kõnke jejjab bõk kun̦aad ilo aitwerõk ko an kien, jejjab kõnono kõn men ko an kien im jejjab kõbo̦uwe ippãn doon. M̦okta jãn an rũkkatak eo itok ñan kweilo̦k ko ad, emaroñ juon menin jipañ ñan kaalwõje pijain alwõj eo etan Ta ko Rej Wal̦o̦k ilo Im̦õn Kweilo̦k ko Ammim? Ilo am̦ ãindein, enaaj jipañe ñan jel̦ãl̦o̦k im̦aan ta ko renaaj wal̦o̦k.

9-10. Ñe jej kũrtok juon armej ñan iien kweilo̦k ko ad, ta ko jemaroñ ba ñane bwe en jab ãliklik in itok? (Bar lale pija eo.)

⁹ Ewõr jet armej rej ãliklik in itok ñan kweilo̦k ko ad kõnke rekkõl ñe juon enaaj kajjitõk bwe ren erom juon iaan Ri-Kõnnaan ro an Jeova. Kwõmaroñ kaalikkar ñan eo kwõj kũrtok bwe jelukkuun m̦õn̦õn̦õ ñe ewõr ad ri-lotok im jejjab iuuni er ñan bõk kun̦aaer ilo iien kweilo̦k ko ak erom juon iaan Ri-Kõnnaan ro an Jeova. Jej karwaineneik baam̦le ko ñan kobatok, ekoba ajri ro. Ilo iien kweilo̦k ko ad, men ko ajri ro rej katak kaki rejjab oktak jãn rũtto ro. Rej aolep jijet im katak ippãn doon. Ilo wãween in, ro jemãn im jinen rejel̦ã ajri ro rej pãd ippãn wõn im ta ko rej katak kaki. (Dut. 31:12) Jejjab tõltõl jaba ak leto-letak juon envelope bwe armej ro ren kanne kõn jããn. Ijello̦kun ad ãindein, jej l̦oore kakien eo an Jesus me ear ba: “Kar lewaj ñan kom̦ ilo ejjel̦o̦k on̦ããn, kõn men in kom̦win lel̦o̦k ilo ejjel̦o̦k on̦ããn.” (Matu 10:8) Kwõmaroñ bar ba ñan armej eo kwõj kũrtok bwe ejjab aikuj kõn̦ak nuknuk ko el̦ap on̦ãer. Anij ej kalimjek bũruon armej, im jab paotokier.—1 Sa. 16:​7, UBS.

¹⁰ Ñe armej eo ej itok im kweilo̦k, kwõmaroñ jipañe bwe en eñjake an ruwainene. Kwal̦o̦k kajjien ñan em̦m̦aan ro rej lale eklejia im ñan ro jet ilo eklejia eo. Ñe enaaj lo an armej ro jouj im kwal̦o̦k aer kea kõn e, men in emaroñ kõm̦akũti ñan an kõn̦aan bar kobatok. Ilo iien kweilo̦k eo, ñe ejjel̦o̦k an Baibõl̦, komiro maroñ kõjerbale Baibõl̦ eo am̦ ñan lale eoon ko ri-kõnono eo ej kwal̦o̦ki im kwõmaroñ jipañe mel̦el̦e ta ko ri-kõnono eo ej ba im wãween ad katak ippãn doon ãinwõt juon eklejia.

ÑE KWÕJ JINO KATAK BAIBÕL̦ IPPÃN JUON ARMEJ

11. Ewi wãween kwõmaroñ kwal̦o̦k am̦ jel̦ã l̦õmn̦ak kõn iien im jikejuul̦ ko an armej ro?

¹¹ Ta ko jekõn̦aan keememej ñe jej katak ippãn armej? Jekõn̦aan kwal̦o̦k ad jel̦ã l̦õmn̦ak kõn iien ko aer im jikejuul̦ ko aer. Ñan waanjoñak, ñe em̦õj amiro karõk ñããt eo komiro nãj katak, kwõn jab rum̦wij, jekdo̦o̦n ñe armej ro ilo jikin eo kwõj pãd ie ekkã aer rum̦wij. Bareinwõt, ilo iien eo kein kajuon in amiro katak, em̦m̦an ñe en jab lukkuun to. Jet ri-kwal̦o̦k naan me el̦ap imminene ippãer rej ba bwe em̦m̦an ñe ejjab aetok ad katak, meñe armej eo ekõn̦aan wõnm̦aanl̦o̦k wõt. Bareinwõt, en jab l̦ap ad kõnnaan. Kõtl̦o̦k an rũkkatak eo kwal̦o̦k bũruon ak l̦õmn̦ak ko an.—JK. 10:19.

12. Ta mejãnkajjik eo ad ñe jej jino katak ippãn juon armej?

¹² Jãn jinointata in am̦ katak ippãn juon armej, mejãnkajjik eo am̦ ej ñan jipañe ñan jel̦ã kajjien Jeova im Jesus, im bwe en ejaak yokwe eo an ñan erro. Kwõj kõm̦m̦ane men in ikijjeen am̦ kõpel̦l̦o̦ke Baibõl̦ eo im kwal̦o̦k ta eo ej ba ijello̦kun am̦ kwal̦o̦k l̦õmn̦ak ko am̦ ak jel̦ã ko am̦ kõn Baibõl̦ eo. (Jrb. 10:​25, 26) Ke rijjilõk Paul ear katakin armej ro, el̦ap wõt an kar kwal̦o̦k kõn Jesus, eo me Jeova ear jilkintok ñan jipañ kõj jel̦ã Kajjien im yokwe E. (1 Kor. 2:​1, 2) Bareinwõt, Paul ear kaalikkar joñan an aorõk ñan jipañ ri-kal̦oor ro rekããl ñan ejaake kadkad ko rem̦m̦an me rej ãinwõt gold, jelba, im dekã ko raorõk. (1 Kor. 3:​11-15) Kadkad kein rej kitibuj tõmak, mãlõtlõt, lol̦o̦kjen̦, im mijak Jeova. (Sam 19:​9, 10; JK. 3:​13-15; 1 Pit. 1:7) Kwõmaroñ anõke wãween an kar Paul katakin ikijjeen am̦ jipañ rũkkatak ro am̦ ñan ejaak juon tõmak ekajoor im juon kõtaan epaak ippãn Jemãdwõj ilañ.—2 Kor. 1:24.

13. Ewi wãween jemaroñ kwal̦o̦k kijenmej im jel̦ã l̦õmn̦ak kõn eñjake ko an rũkkatak ro? (2 Korint 10:​4, 5) (Bar lale pija eo.)

¹³ Anõke wãween an kar Jesus katakin ikijjeen am̦ kwal̦o̦k kijenmej im jel̦ã l̦õmn̦ak kõn eñjake ko an rũkkatak eo. Kõjparok ñan jab kwal̦o̦k kajjitõk ko remaroñ kõm̦m̦an an armej eo jook. Ñe ej menin aikuj, ñe epen an mel̦el̦e boin ko komiro ej etali, wõnm̦aanl̦o̦k wõt im bar jepl̦aak ñan boin kein tokãlik. Ijello̦kun am̦ iuuni ñan tõmak juon katak jãn Baibõl̦ me ejjañin pojakin tõmake, kõtl̦o̦k iien bwe en eddek m̦ool eo ilo bũruon. (Jon 16:12; Kol. 2:​6, 7) Baibõl̦ ej ba bwe katak ko reriab rej ãinwõt “men ko elukkuun pen aer jako” me jej aikuj ‘julo̦ki.’ Ilo kajin eo jinointata me kar je eoon in, naan kein rej kõmel̦el̦e kõn juon em̦ utiej ekajoor me aikuj bõk ko̦kkure. (Riit 2 Korint 10:​4, 5.) Emaroñ pen an juon armej bõjrak jãn an tõmak men ko eto an kar tõmaki. Kõn men in, jemaroñ aikuj jipañe kalõk ilo kõkkar juon em̦ utiej ekajoor me ekããl. Mel̦el̦ein jej aikuj jipañe kalõke tõmak eo an ilo Jeova. Ilo ad ãindein, enaaj pidodol̦o̦k an julo̦ki katak ko eto an tõmaki.—Sam 91:9.

ÑE RO REKÃÃL REJ ITOK ÑAN IIEN KWEILO̦K KO AD

14. Ewi wãween ad aikuj kõm̦m̦an ñan ro rekããl me rej itok ñan iien kweilo̦k ko ad?

¹⁴ Jeova ej kõtmãne bwe jen jab kwal̦o̦k kalijekl̦o̦k ñan ro rekããl, jekdo̦o̦n ta m̦anit ko aer, bõnbõnier, ak aelõñ eo rej itok jãne. (Jem. 2:​1-4, 9) Kõn men in, ewi wãween jemaroñ kwal̦o̦k yokwe ñan ro rekããl rej itok ñan iien kweilo̦k ko ad?

15-16. Ewi wãween jemaroñ jipañ ro rekããl ñan eñjake aer ruwainene ilo iien kweilo̦k ko ad?

¹⁵ Jet armej remaroñ itok ñan iien kweilo̦k ko ad kõnke rekõn̦aan jel̦ã ta ko rej wal̦o̦k ilo iien kein ak bõlen kõnke juon armej ilo bar juon bukwõn ear rõjañe ñan kobatok ilo iien kweilo̦k ko ad. Kõn men in, jen jab jenliklik in kepaak rein rekããl. Jen karwaineneik er, ak en jab ilo juon wãween el̦e jãn joñan me emaroñ kõm̦m̦an aer jook. Kajjitõk ñe rekõn̦aan jijet ippam̦. Kwõmaroñ jipañ er ikijjeen am̦ kwal̦o̦k eoon ko jãn Baibõl̦ eo am̦ im kein katak eo jej etale ilo iien kweilo̦k eo, ak kwõmaroñ lel̦o̦k aer make Baibõl̦ im kein katak. Bareinwõt, l̦õmn̦ak kõn eñjake ko aer. Juon em̦m̦aan me ear etal ñan juon Im̦õn Kweilo̦k ear ba ñan em̦m̦aan eo jeid im jatid me ear lel̦o̦k naanin yokyokwe bwe ãliklik kõnke ej nuknukin ekpã. Em̦m̦aan eo jeid im jatid ear jipañe bwe en jab inepata im ear kõmel̦el̦e bwe Ri-Kõnnaan ro an Jeova rej ãinwõt aolep armej. Em̦m̦aan in ear kõm̦m̦an wõnm̦aanl̦o̦k im tokãlik peptaij. Im ej ba eban mel̦o̦kl̦o̦k naan kein an kar em̦m̦aan eo jeid im jatid. Bõtab, ñe jej kwal̦o̦k ad itoklimo kõn ro rekããl, em̦m̦an ñan keememej bwe ñe jej kõnono ippãer m̦okta jãn im ãlikin iien kweilo̦k ko ad, jejjab kõn̦aan kwal̦o̦k kajjitõk ko renaaj kajook er im kõn men ko ejjel̦o̦k ad iel̦o̦k.—1 Pit. 4:15.

¹⁶ Bar juon wãween jemaroñ kõm̦m̦an an ro rekããl eñjake aer ruwainene, ej ilo ad kwal̦o̦k kautiej ñe jej kõnono kõn ro rejjab Ri-Kõnnaan ro an Jeova ak kõn tõmak ko aer ilo iien ko jej bwebwenato, uwaak, im ñe ewõr kun̦aad ijo m̦aan. Jejjab kõn̦aan kõjerbali naan ko me remaroñ kal̦õkatip er ak kõmetak er. (Tai. 2:8; 3:2) Ñan waanjoñak, jejjab kõn̦aan kõnanaik tõmak ko an ro me rejjab Ri-Kõnnaan ro an Jeova. (2 Kor. 6:3) Em̦m̦aan ro jeid im jatid me rej kõm̦m̦an public talk rej lukkuun kõjparok ñan jab kõm̦m̦ane men in. Rej bareinwõt kwal̦o̦k bwe rej l̦õmn̦ak kõn ro rejjab Ri-Kõnnaan ro an Jeova ikijjeen aer kõmel̦el̦eik naan ko ak katak ko me remaroñ jab mel̦el̦e kaki.

17. Ta mejãnkajjik eo ad ñe jej iioon “ro em̦m̦an bũrueer” ilo jerbalin kwal̦o̦k naan?

¹⁷ Kajjojo raan, el̦apl̦o̦k an menin ekkaiuriur jerbalin kwal̦o̦k naan eo ad, im jej wõnm̦aanl̦o̦k wõt im pukot “ro em̦m̦an bũrueer ñan bõk mour indeeo.” (Jrb. 13:48) Ñe jej iioon er, jen jab jenliklik in kajjitõk ñe rekõn̦aan katak Baibõl̦ ak ñan kũrtok er ñan iien kweilo̦k ko ad. Ilo ad ãindein, jej jipañ er ñan bõk buñtõn ne eo jinointata ñan etetal ilo ‘ial̦ eo ej tõll̦o̦k ñan mour indeeo.’—Matu 7:14.