Juõn Letter jen Kumi eo Ej Tel
Yokwe Dri Kennan ro Mõtam an Jeova:
Ej juõn jerammõn elap ñõn ar bõk ãt eo etan Jeova, eo ej Iroij Potata Ijoko Otemjej! Ãt in ej ñõn indrio, eban joko, im jeban keiri iben jabrewõt men. Jeova eo ear letok ãt eo etan ñõn kij im jen yiõ eo 1931, jar bõk ãt in ejej uan ñõn kajenolok kij. (Ais. 43:10) Kin juõn buru elemõnõnõ jej kwalok etad einwõt Dri Kennan ro an Jeova.
Devil eo elap an kate bwe en jolok etan Anij. Dri ailiñ ko iomin kajur eo an rej karmijeteik ãt eo etan Jeova. Babilõn Elap, rolul in kabuñ ko rewan ibelakin lõl, elap an drike ãt in ekwojarjar im emwij an joloke jen elõñ ukok in Baibel ko. An Jisõs koutiej etan Jemen elap an oktõk jen ir ke ear likit ãt in moktata ilo jar eo an me ear katakin dri kalor ro an kake. Ear ba: “Inem en wãwen drein ami jar, Jememuij i lõñ, En kwojarjar Etõm.” (Matu 6:9) Tokelik, ke ear jar kin aolepen buruen ñõn Jemen, ear ba: “I ar kwalok etõm ñõn armij ro Kw’ar letok ñõn Iõ jen lõl.” (Jon 17:6) Ilo ar kajeoñwe joñok in emõn an Jisõs, elaplok ar naj kate kij im kwalok etan Jeova iaolepen lõl.
Unin tel in yiõ eo an 2009, ‘En let ar kennan kin nuuj eo emõn,’ ear kamakõt kij bwe jen kamat ar maroñ ñõn kõtõbrõk jerbal in kwalok nan eo ar. (Jerb. 20:24, NW) Ejelok berre bwe elap an kar Jeova kejerammõn jerbal in ar ilo yiõ eo ej kab jemlok. Jerbal in kwalok nan ear lukkun lap an walok iaolepen lõl ñõn kaibujuij im koutiej etan Jeova. Oran dri kwalok ro ej kab tõbar 7,313,173 im rein rar kobaik ainikeir ilo air kwalok nan ñõn aolep, im katakin ro emol burueir im rej bukot mejelan abañ ko rej wõnmaik kajjojo ran. Oran dri kwelok ro ilo ien Kwojkwoj in Kememej mij eo an Kraist, 18,168,323 ej kalikar bwe ebellok wõt ñõn million ro bwe ren kir etan Jeova mokta jen an jemlok jukjuk in ber in enana.
Toõn wõt an Jeova kõtlok ien, jenaj wõnmanlok wõt ilo ar kwalok kin nuuj eo emõn kin Ailiñ eo ilo kijejeto, im kamat ar maroñ ñõn kõtõbar armij ro ilo jikin eo jej ber ie. (Matu. 24:14; Mark 13:10) Jen aor ñõn aor, ilo ial ko, ikijen letter im telephone, ak kwalok nan ilo jabrewõt ien emõntok, jen kate wõt in kwalok etan Jeova im karõk ko an ñõn aolep, joñõn ar maroñ.
Eor unin ar tõmak bwe mõtõn wõt jidrik Jeova enaj kokwojarjar etan. (Ezek. 36:23) Ebak ien eo ñe ro im rej katton etan renaj joko. Joñõn an naj emõn ran eo ñõn ro dri korijeran Jeova im retiljek, ro rar kwalok etan Jeova im jurake iroij potata an!
An Jeova yokwe im kejbãrok ro dron ear alikar ilo kwelok ko relap etan, “Komin Ekil Wõt!” im rar walok ilo elõñ mõtõn ko ilo lõl in ilo 2009. Kwelok kein rar jet ian ien ko relap ilo bwebwenato an ro dron Anij, im rej kakajur kij bwe jen kalaplok ar ekil wõt kin ran eo an Jeova.—Mark 13:37; 1 Tes. 5:1, 2, 4.
Emol an Jeova emõn ñõn kij; ej kobrõk buruer kin lõñliñ. Ej kababu kij ilo melaj in ujoij emaroro im tel kij iturin dren ko relae.—Sam 23:1, 2; 100:2, 5.
Jerammõn ko an Jeova ren ber iomi ilo ami edrep im boub wõt ilo jerbal in kwalok nan kin Ailiñ eo ilo aliñ ko rej ber iman!
Kin yokwe eo emãnãn an Kraist ñõn rolul in jimjãn jimjãtin ibelakin lõl,
Ro jeõmi im jãtõmi,
Kumi eo Ej Tel Dri Kennan ro an Jeova