Footnote

c Bwebwenato eo ej kwalok kin ruo wanjoñok ko kin an pris ro jab kwalok kautiej. Kein kajuõn, Kien eo ear kalikar kin ewi ian mõttan ko ilo menin katok eo rej aikwij lelok ñan pris ro bwe ren mõñã. (Duteronomi 18:3) Bõtab ilo imõn kaber eo, pris ro renana rar kõmmane juõn manit elukkun oktak. Rar kõmman bwe dri jerbal ro air ren kalõre kein ekto eo iloan aenbat eo ke kanniek ko rej kõmat wõt, im rej bõk jabrewõt mõttan ko remmõn me rej lorõk ilo kein ekto eo! Kein karuo, ke armij ro rar bõklok menin katok ko air bwe ren katok kaki ion lokatok eo, pris ro renana rar kõmman bwe dri jerbal ro air ren jibed armij ro bwe ren lelok kanniek eo eikor wõt meñe rejañin kar katok kaki ñan Jeova.—Livitikõs 3:3-5; 1 Samuel 2:13-17.