Jorrããn ko Rej Tõll̦o̦k ñan Juon Kõjatdikdik

“Ilo raan ko ãliktata, iien ko re nana renaaj wal̦o̦ktok.”​—2 TIMOTE 3:⁠1.

EM̦ÕJ ke am̦ lo ak roñ kõn wãween kein rekabũrom̦õjm̦õj?

● Juon nañinmej el̦ap ear bõk mour eo an elõñ armej.

● Juon ñũta ear kõm̦m̦an bwe elõñ to̦ujin armej ren kwõle im mej.

● Juon m̦akũtkũt lal̦ ear ko̦kkure m̦oko im̦õn armej ro im elõñ to̦ujin armej ro rar mej.

Ilo peij ko tok jet, kwõnaaj lo jet kein kam̦ool ko kõn jorrããn kein im rar wal̦o̦k. Bareinwõt kwõnaaj lo an Baibõl̦ kar kanaan bwe men kein renaaj kar wal̦o̦k ilo “raan ko ãliktata.”

Kar jab je katak kein bwe kwõn tõmak bwe jej mour ilo juon lal̦ enana. Bõlen em̦õj am̦ iion jorrããn kein. Bõtab, kar jei katak kein ñan kaenõm̦m̦an eok bwe ewõr juon kõjatdikdik em̦m̦an. Katak kein renaaj kwal̦o̦k kõn jiljino kanaan ko im em̦õj aer jejjet kitieer. Kanaan kein rej kalikkar bwe m̦õttan jidik enaaj jem̦l̦o̦k ‘raan kein ãliktata.’ Renaaj bar kwal̦o̦k kõn ta ko ekkã an armej ba kõn men kein im kõmel̦el̦e bwe ewõr juon kõjatdikdik ej pãd im̦aan.

Kanaan 1. M̦akũtkũt Lal̦

“Enaaj l̦ap an lal̦ m̦akũtkũt.”​​​—LUK 21:⁠11.

● Kar kwal̦o̦k lõñtak juon ajri 1 1/2 an iiõ etan Winnie jãn bul̦õn m̦oko rar okjak im rup jãn kar m̦akũtkũt lal̦ eo ilo aelõñ in Haiti. Juon kumi in ri nuuj kõn jorrããn eo ear wal̦o̦k rar roñ ainikien an jañ. Ajri in ear mour wõt ak jemen im jinen rar mej.

TA KO KEIN KAM̦OOL KO REJ KWAL̦O̦K? Ke ear m̦akũtkũt lal̦ ilo Haiti ilo Jãnwõde 2010, ear wõr elõñl̦o̦k jãn 300,000 armej rar mej. Joñan kajoor in m̦akũtkũt lal̦ eo kar 7.0. Bareinwõt ear wõr 1.3 milien armej ro im ear ejjel̦o̦k jikin aer jokwe. Ejjab Haiti wõt ear jelm̦ae juon m̦akũtkũt lal̦ me el̦ap an kajoor. Ear bar wõr 18 m̦akũtkũt lal̦ ko rel̦ap rar wal̦o̦k ipel̦aakin lal̦ in jãn Eprõl̦ 2009 ñan Eprõl̦ 2010.

TA EO EKKÃ AN ARMEJ RO BA? Ejjab l̦apl̦o̦k oran m̦akũtkũt lal̦ ko rej wal̦o̦k. El̦apl̦o̦k ad jel̦ã jãn armej ro jem̦aan ñe ej wal̦o̦k m̦akũtkũt lal̦ ko kõnke ewõr kein jerbal ko rekapeel raan kein.

EM̦OOL KE MEN IN? Baibõl̦ eo ejjab kwal̦o̦k jete oran m̦akũtkũt lal̦ ko renaaj wal̦o̦k ilo raan ko ãliktata. Bõtab, ej ba bwe “enaaj l̦ap an lal̦ m̦akũtkũt” ilo “jet ãne.” Wãween in ej m̦õttan kakõl̦l̦en raan ko ãliktata.​​​—Mark 13:8; Luk 21:⁠11.

EWI AM̦ L̦ÕMN̦AK? Ej ke wal̦o̦k m̦akũtkũt lal̦ ko rel̦ap ãinwõt an kar Baibõl̦ kanaan?

Jet remaroñ l̦õmn̦ak bwe m̦akũtkũt lal̦ ejjab lukkuun kam̦ool bwe jej mour ilo raan ko ãliktata. Bõtab, ejjab kanaan in wõt kõn m̦akũtkũt lal̦ ej jejjet kitien. Jen etale bar juon kanaan.

[Blurb on page 4]

“Kõm [scientist ro] kõmij ba m̦akũtkũt lal̦ ko rel̦ap. Ak aolep armej rej ba ej juon men ekaamijak im enana.”​​—KEN HUDNUT, JUON SCIENTIST IN AMERIKA.

[Picture Credit Line on page 4]

© William Daniels/Panos Pictures

Kanaan 2. Ñũta

“Enaaj wõr ñũta.”​​​—MARK 13:⁠8.

● Juon em̦m̦aan ear etal ñan bukwõn eo etan Quaratadji, ilo aelõñ in Niger bwe en kappok kijen m̦õñã. Jar ko rilikin im ro jatin rar bar itok jãn bukwõn ko jet bwe ren kappok kijeer m̦õñã kõn an l̦ap ñũta. Ak l̦ein ear babu im make iaan ioon juon jaki. Etke emake iaan? Irooj in bukwõn eo etan Sidi ear ba: “L̦ein ejjab maroñ naajidiki [baam̦le eo an], im epen an ro̦o̦l ñan ippãer kõnke el̦ap an bũrom̦õj bwe ejjel̦o̦k an maroñ ñan jipañ er.”

TA KO KEIN KAM̦OOL KO REJ KWAL̦O̦K? Ilo pel̦aakin lal̦ in, elõñ armej rej kwõle kõn an ejjel̦o̦k kijeer m̦õñã. Ñe ear jiljilimjuon armej ilo juon kumi, eokwe juon iaaer enaaj jidik wõt an m̦õñã kõnke ejabwe. Elõñl̦o̦k armej ro rej kwõle ilo jet jikin ko ilo Africa. Ñe ear jilu armej, juon iaaer enaaj jitlo̦k ium̦win juon iien eaitok. Ñan waanjoñak, ewõr ruo ri pãlele im juon nejier niñniñ. Ewõr m̦õñã ak ebwe wõt ñan ruo armej. Alikkar bwe l̦eo enaaj kõtl̦o̦k bwe kõrã eo im niñniñ eo ren m̦õñã. Ak enaaj etal im kiki meñe ekwõle. Men in ej wal̦o̦k ippãn baam̦le ko aolep raan.

TA EO EKKÃ AN ARMEJ RO BA? El̦aññe jenaaj kallib enaaj kanooj lõñ m̦õñã im enaaj bwe ñan aolep armej. Men eo de in, jej aikuj jel̦ã lolorjaki men ko ilo lal̦ in me rej kõm̦m̦an an wõr m̦õñã.

EM̦OOL KE MEN IN? Em̦ool, elõñ m̦õñã ko remaroñ wal̦o̦k jãn jikin kallib ko an ri kallib ro im remaroñ jilkinl̦o̦k ñan jikin ko jet. Bareinwõt kien ko remaroñ kar lolorjake m̦õñã kein im kõm̦m̦an bwe en ejjel̦o̦k kwõle. Bõtab, rejañin lo tõprak meñe elõñ iiõ in aer kajjioñ kõm̦adm̦õde apañ in.

EWI AM̦ L̦ÕMN̦AK? Ejejjet ke kitien kanaan eo ilo Mark 13:8? Meñe elõñ wõnm̦aanl̦o̦k ko ilo raan kein, armej ro ipel̦aakin lal̦ rej ke jorrããn wõt kõn an l̦ap ñũta?

M̦akũtkũt lal̦ im ñũta rej apañ ko ekkã aer kõm̦m̦an bwe en wal̦o̦k kakõl̦l̦e eo juon kõn raan ko ãliktata.

[Blurb on page 5]

“Elõñl̦o̦k jãn juon m̦õttan jilu ajri ro rar mej jãn nañinmej in nimonia, ilo̦k lo̦je, im nañinmej ko jet. Ajri rein remaroñ kar mour wõt el̦aññe rar jab jabwe õn.”​​—ANN M. VENEMAN, EKÕN LALE JÃÃN IN JIPAÑ KO AN UNITED NATIONS ÑAN AJRI RO.

[Picture Credit Line on page 5]

© Paul Lowe/Panos Pictures

Kanaan 3. Nañinmej ko Rel̦ap

‘Enaaj wõr . . . nañinmej ko rel̦ap.’​​​—LUK 21:⁠11.

● Ilo juon iaan aelõñ ko ilo Africa me el̦ap an jorrããn kõn tarin̦ae ko, ewõr juon em̦m̦aan ej jerbal ilo public health etan Bonzali im ej jipañ armej ro renañinmej. L̦ein ear kate ñan kããjmour ri jerbal ro ilo bukwõn eo an me rej mejl̦o̦k kõn juon kain nañinmej in piba etan Marburg. Kõn an aikuj jipañ ear eoware ri utiej ro ilo bar juon bukwõn bwe ren jipañe ak ejjel̦o̦k juon ear uwaake. Emãn allõñ ko tokãlik, rej kab l̦õmn̦ak in jipañ, bõtab Bonzali emej. Ear po ippãn ri jerbal ro me ear kajjioñ in jipañ er.

TA KO KEIN KAM̦OOL KO REJ KWAL̦O̦K? Nañinmej in nimonia, ilo̦k lo̦je, HIV/AIDS, TB, im malaria rej jet iaan nañinmej ko rel̦ap me rekapopo. Ilo iiõ eo 2004, tarrin 10.7 milien armej ro rar mej jãn aolep nañinmej kein. Ñan bar kalikkarl̦o̦k men in: Loan wõt iiõ eo 2004, kajjojo armej rein rar mej jãn juon iaan nañinmej kein ãlikin jilu second.

TA EO EKKÃ AN ARMEJ RO BA? Oran armej ro ipel̦aakin lal̦ ej l̦apl̦o̦k wõt innem ekõm̦m̦an an lõñl̦o̦k nañinmej ko. Elõñl̦o̦k armej ro remaroñ po im nañinmej.

EM̦OOL KE MEN IN? Em̦ool bwe ej orl̦o̦k wõt oran armej ro ipel̦aakin lal̦ in. Bareinwõt ej l̦apl̦o̦k wõt an taktõ ro kapeel ilo aer kakõlkõl nañinmej ko. Im el̦ap aer jel̦ã kilen bõbrae im kamarmire nañinmej ko. Kõn men in, en kar dikl̦o̦k an nañinmej ko jelõt armej ro. Bõtab, ej l̦apl̦o̦k wõt an armej ro bõk nañinmej ko.

EWI AM̦ L̦ÕMN̦AK? Armej ro rej ke bõk nañinmej ko rel̦ap ãinwõt an Baibõl̦ kar kanaan?

M̦akũtkũt lal̦, ñũta, im nañinmej ko rel̦ap rej ko̦kkure im kaiñtan elõñ milien armej ro. Bareinwõt, elõñ bar milien armej ro rej eñtaan kõnke enana an ro jet kõm̦m̦an ñan er, el̦aptata ro im rejitenburu ippãer im ren kar kõjparok er. Jen bar lale ta eo Baibõl̦ ej bar kanaan bwe enaaj wal̦o̦k ilo raan kein ãliktata.

[Blurb on page 6]

“Ekaamijak ñe juon menin mour awiia ej kiji eok, ejja joñan an kaamijak wõt ñe ewõr juon nañinmej ej m̦õñãñe ilo ãnbwinnũm̦ im ekapopo.”​​—MICHAEL OSTERHOLM, JUON TAKTÕ.

[Picture Credit Line on page 6]

© William Daniels/Panos Pictures

Kanaan 4. Edikl̦o̦k an Armej Yokwe Doon

‘Armej reban yokwe ro nukier.’​​​—2 TIMOTE 3:​1-3.

● Chris ej jerbal ilo juon doulul ilo aelõñ in North Wales me rej jipañ ro rej jorrããn kõn an ro ilo baam̦le eo aer m̦an im ko̦kkure er. Chris ej ba: “Ij keememej an kar juon kõrã itok im kappok jipañ. Iar loe kõrã in m̦oktal̦o̦k ak joñan an kar l̦ap aer m̦an e, iar jab kile e. Jet kõrã ro joñan aer metak im bũrom̦õj rejjab maroñ reitok im kallimjek kõj.”

TA KO KEIN KAM̦OOL KO REJ KWAL̦O̦K? Ilo juon aelõñ ilo Africa, enañin 33 bõjjããn in kõrã ro kar rape er ke rar ajri. Ke rar kõm̦m̦an etale ko ilo ejja aelõñ in wõt, rar lo bwe elõñl̦o̦k jãn 33 bõjjããn in em̦m̦aan ro rar ba bwe ejjab nana m̦an kõrã ro. Bõtab, ejjab kõrã ro wõt rej iion wãween in enana. Ñan waanjoñak, ilo aelõñ in Canada, ewõr enañin 30 bõjjããn in em̦m̦aan ro me kõrã ro pãleer rar m̦ane er.

TA EO EKKÃ AN ARMEJ RO BA? Jãn jem̦aan in an jorrããn jab in wal̦o̦k. Ak ej kab l̦apl̦o̦k ad jel̦ã im kõnono kake men in raan kein.

EM̦OOL KE MEN IN? Ilo raan kein, jej kile im el̦apl̦o̦k ad kajjioñ in kõm̦adm̦õde apañ in kõn an armej ro ko̦kkure ro pãleer. Ak men in ear ke kadikl̦o̦k an wal̦o̦k apañ in? Jaab ñan jidik. Ej l̦apl̦o̦k wõt an armej ro jab yokwe ro rejetaer ak ro nukier ilo raan kein.

EWI AM̦ L̦ÕMN̦AK? Ejejjet ke kitien kanaan eo ilo 2 Timote 3:​1-3? Edikl̦o̦k ke an armej ro yokwe ro pãleer ak ro nukier?

Kanaan eo kein kal̦alem me jej lo an jejjet kitien kiiõ ej kõn lal̦ in. Jen lale ta eo Baibõl̦ ej ba kõn men in.

[Blurb on page 7]

“Juon jorrããn el̦ap im edik aer ripoote ñan bõlijmããn ro ej ñe armej ro rej ko̦kkure im m̦an ro uwaan baam̦le ko aer. Ekkã wõt an kõrã ro calle bõlijmããn ro ãlikin an l̦õm̦aro pãleer m̦ane er 35 katten.”​​—NAAN KO AN JUON KÕRÃ IM EJ RI KÕNONO ÑAN DOULUL EO AN WALES IM EJ JIPAÑ RO IM REJ CALL KÕN APAÑ IN.

Kanaan 5. Rej Ko̦kkure Lal̦

“[Anij enaaj] ko̦kkure ro rej ko̦kkure lal̦.”​​—REVELESÕN 11:⁠18.

● Ilo bukwõn in Kpor ilo aelõñ in Nigeria, ewõr juon em̦m̦aan etan Saturday Pirri. Jerbal eo an l̦ein ej jekaro im kõm̦m̦an jemañũñ im wiakaki. Kõn an kar lutõk oil ilo Niger Delta, men in ear kõm̦m̦an bwe en jorrããn peejnej eo an. L̦ein ej ba: “Kõn an kar lutõk oil eo, men in ear m̦an ek ko, ko̦kkure kilim, im kajorrããn l̦we ko kõmij mour jãni. Ijaje inaaj pukot aõ mour jãn ia kiiõ.”

TA KO KEIN KAM̦OOL KO REJ KWAL̦O̦K? Ekkar ñan jet ri mãlõtlõt, ewõr 6.5 milien tõn in kwõpej ko rej juloki ilo lo̦jet kajjojo iiõ. Enañin 50 bõjjããn in kwõpej kein rej bũl̦ajtiik im enaaj bõk buki iiõ ko in aer peto petak ilo lom̦al̦o, innem rej kab m̦adeoñeoñ im jako. Armej ro rejjab baj ko̦kkure wõt lal̦ in ak el̦ap aer kajerbal men ko ie im reiten maat. Ñan waanjoñak, etar jãn joñan an armej ebbõk im kajerbal wõjke ko, oil, im men ko erl̦o̦k wõt. Ri mãlõtlõt ro rar katak im lo bwe ej bõk juon iiõ im l̦alem allõñ bwe men kein ilo lal̦ in me el̦ap an armej kajerbali iloan juon iiõ, ren bar make eoñ im wal̦o̦k. Juon nuujpeba ilo Aujtõrõlia ear ba: “El̦aññe ãindein an orl̦o̦k oran armej ro im l̦apl̦o̦k aer kajerbal men ko ilo lal̦ in, mel̦el̦ein bwe ilo 2035, jenaaj aikuj ruo planet ko bwe en bwe ñan aolep.”

TA EO EKKÃ AN ARMEJ RO BA? Armej ro el̦ap aer mãlõtlõt im remaroñ make pukot kilen ñan kõm̦adm̦õd apañ ko rej wal̦o̦k. Jemaroñ namejelan apañ kein im kõjparok lal̦ in bwe en jab jorrããn.

EM̦OOL KE MEN IN? Elõñ armej ro im doulul ko rej kate er im kõjjel̦ãik armej ro kõn men ko rej kajorrããn lal̦ in ad. Ak meñe ãindein, lal̦ in ej l̦apl̦o̦k wõt an ettoon im jorrããnl̦o̦k.

EWI AM̦ L̦ÕMN̦AK? Anij ear kallim̦ur bwe enaaj ko̦kkure ro rej ko̦kkure lal̦ im kõjparoke jãn an jorrããn. Kwõl̦ak lale jej aikuji ke bwe Anij en bõk kun̦aan im kabõjrak jorrããn ko ilo lal̦ in?

Ijello̦kun an Baibõl̦ eo kwal̦o̦k kõn kanaan ko l̦alem jej kab etali, ej bareinwõt kwal̦o̦k kõn men ko rem̦m̦an me renaaj wal̦o̦k ilo raan ko ãliktata. Jen lale juon waanjoñak kõn men in ilo kanaan eo kein kajiljino.

[Blurb on page 8]

“Ilo jinoin iar jokwe ilo juon jikin aiboojoj bõtab ear oktak im juon jikin kwõpej.”​​—ERIN TAMBER, EJ JOKWE ITURIN LO̦JET ILO AMERIKA, JIKIN IN EAR JORRÃÃN JÃN OIL EO EAR LUTÕK ILO LOM̦AL̦O IN MEXICO ILO 2010.

[Box on page 8]

Anij Ej Ke Kõm̦m̦an bwe Jorrããn ko Ren Wal̦o̦k?

Kõnke Baibõl̦ eo ej kanaan kõn jorrããn ko me jej lo aer wal̦o̦k rainin, innem mel̦el̦ein ke bwe Anij eo ej kõm̦m̦an bwe men kein ren wal̦o̦k? Anij ej ke kõm̦m̦an bwe jen eñtaan? Kwõmaroñ lo uwaak ko ñan kajjitõk kein ilo bok eo n̦aetan Ta eo Baibel eo Ej Lukkun Katakin? ilo jebta 11. Ri Kõnnaan ro an Jeova rar kõm̦m̦ane bok in.

[Picture Credit Line on page 8]

Pija jãn U.S. Coast Guard

Kanaan 6. Jerbal in Kwal̦o̦k Naan Ipel̦aakin Lal̦

“Naaj kwal̦o̦k gospel in an aelõñ in lañ i aolepen lal̦.”​​​—MATU 24:⁠14.

● Juon kõrã etan Vaiatea, ej pãd ilo juon iaan aelõñ ko ilo Pacific in me etan Tuamotu. Ewõr enañin 80 atoll ko ilo Tuamotu me rej ejeplõklõk iloan lom̦al̦o eo me el̦apl̦o̦k jãn 310,000 square m̦ail̦ dettan. Im ewõr tarrin 16,000 wõt armej ro rej jokwe ilo aelõñ in. Bõtab, ri Kõnnaan ro an Jeova rar etal ñan ãne eo ãnen Vaiatea im kwal̦o̦k naan ippãn im armej ro rej jokwe ilo ãne in. Etke? Kõnke Ri Kõnnaan ro an Jeova rekõn̦aan kajedede nuuj eo em̦m̦an ak gospel in Aelõñ eo ippãn armej otemjej, jekdo̦o̦n ia eo rej jokwe ie.

TA KO KEIN KAM̦OOL KO REJ KWAL̦O̦K? Gospel in Aelõñ in Anij em̦õj an pãdjake aolepen lal̦ in. Ilo iiõ eo 2010, Ri Kõnnaan ro an Jeova rar kwal̦o̦k kõn nuuj in em̦m̦an ilo 236 aelõñ ko im rar kwal̦o̦k naan ium̦win elõñl̦o̦k jãn 1.6 bilien awa ko. Mel̦el̦ein bwe kajjojo Ri Kõnnaan ro an Jeova rar jol̦o̦k 30 minit kajjojo raan ilo jerbal in kwal̦o̦k naan. Ium̦win joñoul iiõ ko remootl̦o̦k, rein rar kõm̦m̦an elõñl̦o̦k jãn 20 bilien bok ko im kein katak Baibõl̦ ko im rar ajeji aolepeir ñan armej ro.

TA EO EKKÃ AN ARMEJ RO BA? Kar kwal̦o̦k kõn Naan in Anij jãn to̦ujin iiõ ko remootl̦o̦k.

EM̦OOL KE MEN IN? Em̦ool bwe elõñ rar kwal̦o̦k kõn naan in Anij ñan armej ro. Ak enañin aolepen rein rar kõm̦m̦ane men in ium̦win jidik wõt iien im ilo jejjo wõt jikin ko. Bõtab, oktak eo kõn Ri Kõnnaan ro an Jeova ej bwe rej kõm̦m̦ane jerbal in ipel̦aakin lal̦ ilo juon wãween eo ebolemen. Im rej tõpar elõñ milien armej ro. Meñe rej iion el̦ap matõrtõr jãn jet doulul ko me rebuñbuñ kõn aer kajoor im lãj ak Ri Kõnnaan ro an Jeova rej kijenmej im kijejeto wõt ilo jerbal in kwal̦o̦k naan. (Mark 13:​13) Bareinwõt, rejjab bõk on̦ean aer kõm̦m̦ane jerbal in. Rej m̦õn̦õn̦õ in kajerbale iien ko aer ñan kwal̦o̦k naan im leto letak bok ko aer kõn ejjel̦o̦k on̦ean. Jerbal in aer ej wõnm̦aanl̦o̦k wõt ikijjeen jabawõt ko an ro rej m̦õn̦õn̦õ in jipañ.

EWI AM̦ L̦ÕMN̦AK? Em̦õj ke tilmaake gospel in Aelõñ eo iaolepen lal̦ in? An jejjet kitien kanaan in ej ke mel̦el̦ein bwe enaaj wal̦o̦k men ko rem̦m̦an ilo raan ko rej pãd im̦aan?

[Blurb on page 9]

“Jenaaj wõnm̦aanl̦o̦k wõt im kijejeto ilo ad kajerbal jabdewõt wãween ko ñan tõpar armej ro kõn nuuj eo em̦m̦an ak gospel in Aelõñ eo toõn wõt an Jeova kõtl̦o̦k bwe jen kõm̦m̦ane men in.”​​—YEARBOOK EO AN RI KÕNNAAN RO AN JEOVA ÑAN 2010 (2010 YEARBOOK OF JEHOVAH’S WITNESSES).

Iien ko Rem̦m̦anl̦o̦k Repãd Im̦aan!

“Bwe jidik wõt iien, im eo e nana enaaj jako; . . . A ro ettã bũrueir renaaj jolõt ãne eo, im renaaj m̦õn̦õn̦õ kõn aenõm̦m̦an el̦ap.”​​​—SAM 37:​10, 11.

KOKÕN̦AAN ke lo an jejjet kitien kanaan eo ilo eoon eo itulõñ? Ejjel̦o̦k pere bwe kokõn̦aan lo an jejjet kitien. Ewõr unin ad tõmak bwe m̦õttan jidik enaaj jejjet kitien kanaan in.

Katak ko l̦o̦k ilo bok in rar kwal̦o̦k kõn jet kanaan ko ilo Baibõl̦ eo me rej kam̦ool bwe jej mour ilo “raan ko ãliktata.” (2 Timote 3:​1-5) Anij ear kõm̦m̦akũt ro rar je Baibõl̦ eo bwe ren kwal̦o̦k kõn men kein bwe en maroñ wõr ad kõjatdikdik. (Rom 15:⁠4) An kũrm̦ool kanaan kein ej mel̦el̦ein bwe ejjabto apañ ko jej iioni kiiõ renaaj jako.

Ta eo enaaj wal̦o̦k ãlikin an jem̦l̦o̦k raan kein ãliktata? Aelõñ eo an Anij enaaj kien eo im enaaj irooj ioon armej otemjej ioon lal̦. (Matu 6:​9, 10) Baj an̦to̦o̦nel̦o̦k m̦õk naaj wãween mour eo ilo iien in me Baibõl̦ ej kwal̦o̦k kake:

● Enaaj ejjel̦o̦k bar ñũta. “Eneo en obrak kin wheat; Keinikkan ko ren kabwe ion tol ko.”​​​—Sam 72:​16, UBS.

● Enaaj ejjel̦o̦k bar nañinmej. “Ri jokwe ie e jãmin ba, ‘I nañinmej.’ ”​​​—Aiseia 33:⁠24.

● Naaj kõkãle lal̦ in. “Ãne jem̦aden im eo e m̦õrã renaaj m̦õn̦õn̦õ, im ãne jem̦aden enaaj lañlõñ, im ebbõl ãinwõt ut rose.”​​​—Aiseia 35:⁠1.

Erkein jet iaan kanaan ko rekam̦õn̦õn̦õ ilo Baibõl̦ me m̦õttan jidik renaaj jejjet kitieer. Etke kwõjjab kajjitõk ippãn Ri Kõnnaan ro an Jeova kõn etke el̦ap aer tõmak bwe iien ko rem̦m̦anl̦o̦k repãd im̦aan?