Bwebwenato ko ilo Baibõl̦ Rejjab Ino̦ñ Bajjek
‘Iar kanooj etale men otemjej jãn jinoin bwe in jeje jim̦we wõt.’—LUK 1:3.
EWI WÃWEEN AN BAIBÕL̦ EO OKTAK? Ekkã an ino̦ñ ko kwal̦o̦k bwebwenato ko ilo juon wãween rekabwilõñlõñ ak rejjab kwal̦o̦k jikin ko, iien ko, im lukkuun etan armej ro. Bõtab, Baibõl̦ eo eoktak kõnke ej kwal̦o̦k aolep jikin ko, iien ko, im lukkuun etan armej ro ilo bwebwenato ko ie. Men in ej kõm̦m̦an bwe ro rej riiti Baibõl̦ eo ren tõmak bwe naan ko ie relukkuun m̦ool otem m̦ool.—Sam 119:160.
JUON WAANJOÑAK: Baibõl̦ eo ej kwal̦o̦k bwe “Nebukadnezar kiiñ in Babilon . . . ear bõkl̦o̦k [Kiiñ in Juda] Jihoiakin ñan Babilon” ãinwõt juon ri kõm̦akoko. Tokãlik, ilo “iiõ eo Ivil-merodak ear jino an kiiñ in Babilon, ear jouj ñan Jihoiakin, kiiñ in Juda, im kadiwõje jãn prisõn.” Kiiñ eo ear bareinwõt “lel̦o̦k ñan e m̦ani in kõke aikuj ko an raan otemjej, toõn wõt an mour.”—2 Kiiñ 24:11, 15; 25:27-30, UBS.
MEN KO RO REJ KATAK KÕN MOUR AN RI ETTO RAAR LOI: Ke ri mãlõtlõt ro rar ekkatak kõn mour an Ri Babilon ro etto, rar lo jet jeje ko me em̦õj je iiõ ko Nebukadnezar II ear irooj. Jeje kein rej kwal̦o̦k laajrakin aolep ri jerbal ro ilo m̦õn kiiñ eo im ri kalbuuj ro me kar lel̦o̦k aer kõj ñan kõke aikuj ko aer. Ilo laajrak in, ear wal̦o̦k etan “Yaukin [Jihoiakin],” eo im ear “kiiñ in ãnen Yahud (Judah),” im bareinwõt ro uwaan baam̦le eo an. Ak ta kõn Ivil-merodak, eo me tokãlik ear bõk jikin Nebukadnezar? Kar lo juon jãpe iturin jikin kweilo̦k eo ilo Susa im em̦õj je naan kein ilo kilin: “M̦weo m̦õn Amil-Marduk [Ivil-Merodak], Kiiñ in Babilon, nejin Nebukadnezar, Kiiñ in Babilon.”
EWI WÃWEEN AM̦ L̦ÕMN̦AK? Ebar wõr ke juon bok ekwõjarjar, ijello̦kun Baibõl̦ eo, me em̦ool bwebwenato ko ie im ej kwal̦o̦k aolep jikin ko, iien ko, im lukkuun etan armej ro ilo bwebwenato ko ie?
[Caption ilo page 5]
“Mel̦el̦e ko me Baibõl̦ ej kwal̦o̦k kõn iien im jikin ko me bwebwenato ko ie rar wal̦o̦k, rejim̦we im jejjetl̦o̦k jãn jabdewõt mel̦el̦e ko ilo jeje in etto ko.”—BOK EO ETAN ETALE KO AN RI MÃLÕTLÕT RO KÕN JEJE KO ILO KALLIM̦UR M̦OKTA, AN ROBERT D. WILSON
[Pija ilo peij 5]
JEJE KO AN RI BABILON ME REJ KWAL̦O̦K KÕN JIHOIAKIN, KIIÑ IN JUDA
[Pija Credit Line ilo peij 5]
© bpk, Berlin/Vorderasiatisches Museum, SMB/Olaf M. Tessmer/Art Resource, NY