Juõn Nan In Kakkõl Jen Etto

Jehovah ejamin kõtlok bwe armij ro renana ren kokkure Paradise eo. Ro jeran wõt renaj jokwe ie. Ta eo enaj walok ñan armij ro renana? Ñan lo uak eo, kwon lemnak kin bwebwenato eo emol kin Noah. Noah ear mour elõñ thousand yiõ ko remotlok. Ear juõn emaan emõn eo ear kate wõt e ñan kõmanmõn ankil an Jehovah. Ak armij ro jet ion lal rar kõmman men ko renana. Inem Jehovah ear jiroñ Noah bwe enaj kar bõktok ibwijleplep eo im kokkure armij ro renana. Ear jiroñ Noah bwe en kalek juõn wa bwe e im family eo an rejamin mij ke Ibwijleplep eo ear itok.​—Jenesis 6:9-18.

Noah im family eo an rar kalek wa eo. Noah ear kakkõl armij ro bwe Ibwijleplep eo enaj kar itok, ak rar jab kõnan roñjake. Rar wõnmanlok im kõmman nana. Ke ear dedelok kalek wa eo, Noah ear ãñinlok men in mour ko ñan loan wa eo, im e kab family eo an rar deloñlok ñan loan bareinwõt. Inem Jehovah ear bõktok juõn lañ elap. Ear wõt iumin 40 ran im 40 boñ. Ibwijleplep eo ear kalibubuik aolepen lal.​—Jenesis 7:7-12.

Armij ro renana rar mij, ak Noah im family eo an rar bõk lomor. Jehovah ear kejbãrok ir ilujen Ibwijleplep eo ñan loan juõn lal erreo. (Jenesis 7:22, 23) Bible eo ej ba bwe enaj wõr juõn ien ñe Jehovah enaj bar kokkure ro rej makoko in kõmman men eo ejimwe. Armij ro remõn rejamin jako. Renaj mour indio ilo juõn Paradise ion lal.​—2 Piter 2:5, 6, 9.

Rainin elõñ armij ro rej kõmman men ko renana. Lal in eobrak kin abañ ko. Elõñ alen Jehovah ej jilkinlok Ri Kennan ro an ñan kakkõl armij ro, ak enañin aolep rejjab kõnan roñjake nan ko an Jehovah. Rejjab kõnan ukõt wãweier. Rejjab kõnan bõk men eo Anij ej ba kin ta eo ejimwe im bwid. Ta eo enaj walok ñan armij rein? Renaj oktak ke juõn ran? Elõñ iair rejamin ukwelok. Ien eo ej itok ñe armij ro renana renaj jako im jab bar mour.​—Sam Ko 92:7.

Lal in ejamin jakolok; enaj erom juõn paradise. Ro renaj erom jeran Anij renaj mour ñan indio ilo Paradise eo ion lal.​—Sam Ko 37:29.