“Etetal Ilujen Eneo”
“Etetal ilujen eneo ilo aitokõn im ilo drilpen.” —JENESIS 13:17.
1. Ta nan in jiroñ eo ekaitoktoklimo Anij ear lelok ñan Abraham?
KWOJ mõnõnõ ke in ito-itak ilo eneo, bõlen kõmmane juõn trip ilo wa eo ilo jemlokin week eo? Ro jet rekõnan ito-itak kin bicycle ñan air exercise im aluije ene eo im jab kakaiuriur. Ro jet rekõnan etetal ñan air jiniete juõn jikin. Trip rot kein ekkã air kadu. Ak lemnak kin eñjake eo an Abraham ke Anij ear jiroñ e: “Kwon jutõk, im etetal ilujen eneo ilo aitokõn im ilo drilpen; bwe I naj lewoj ñõn yuk”!—Jenesis 13:17.
2. Elikin an kar ilok jen Egypt, Abraham ear etal ñan ia?
2 Lemnak kin wãwen ko rar bed ke kar kwalok nan kein. Abraham ear bõk lio belen im ro jet im rar bed jidik ilo Egypt. Jenesis chapter 13 ej jiroñ kij bwe rar ilok jen Egypt im bõk menin mour ko air ñan “Rõk [Negeb].” Elikin, Abraham “e ar ilok ilo an etetal jen Rõk [Negeb] ñõn Betel.” Ke juõn abañ ear walok ikõtan ri lale kidu ko an Abraham im ri lale kidu ko an Lot im ear alikar bwe erro ar aikwij jebel jen don ñan air bukõt melaj ko, ilo joij Abraham ear kõtlok bwe Lot en kãlet mokta. Lot ear kãlet “ene biken wõt juõn iturin Jordan,” juõn komlal ewãmourur “einwõt jikin kallip an Jeova,” im tokelik ear jokwe ilo Sodom. Anij ear ba ñan Abraham: “Kwon bõk mejõm kiõ im reilok jen ijo kwoj ber ie, ñõn eañ, im rõk, im rear, im kabilũñ.” Alikar jen juõn jikin utiej ilo Bethel, Abraham ear maroñ reilok im lo mõttan ko jet in ene eo. Ak, ear aikwij kõmman elaplok jen baj reilok im lale eneo. Anij ear kir e ñan an “etetal ilujen ene eo” im jiniete ene ko.
3. Etke ebin lo ilo lemnak eo ad ito-itak ko an Abraham?
3 Jekdon ewi joñan an Abraham etetal ilo eneo mokta jen an kar tõbar Hebron, ear laplok an jelã kin Enen Kallimur eo jen elõñ iad. Lemnak kin jikin ko rej konono kaki ilo bwebwenato in—Negeb, Bethel, ene biken wõt juõn in Jordan, Sodom, im Hebron. Ebin ke am lo ilo lemnak eo am kin ia eo jikin kein rej bed ie? Ñan elõñ armij men in ebin kinke eiet ian armij ro an Jehovah rar lolok jikin ko rar read kaki ilo Bible, im ito-itak ilujen ene eo ilo aetokin im drilpen. Ak, ewõr unin ñan ad itoklimo in jelã kin jikin ko ilo Bible. Etke?
4, 5. (a) Ewi wãwen Jabõn Kennan Ko 18:15 ewõr kõtan ñan jelãlokjen im melele kin ene ko ilo Bible? (b) Ta eo Zephaniah chapter 2 (NW) ej kalikar kake?
4 Nan in Anij ej ba: “Buruen dri jelalokjen, ej jibarek jela; im lojiliñin dri meletlet, ej kabukot jela.” (Jabõn Kennan Ko 18:15) Jemaroñ bõk jelãlokjen kin elõñ katak ko, ak jelãlokjen eo ejimwe kin Jehovah Anij im kõmman ko an ej men eo eaorõktata. Emol, men ko jej read ilo Bible raorõk ñan bõk jelãlokjen in ejimwe. (2 Timote 3:16) Ak, men in ekoba melele. Melelen, maroñ eo ñan lo ak kile wãwen eo mõttan in melele ko ewõr kõttair ñan don. Men in ej jerbal bareinwõt ñan melele ko kin jikin ko me Bible eo ej konono kaki. Ñan wanjoñok, elõñ iad jej jelã kin ia eo Egypt ej bed ie, ak ewi melele eo ad kin nan ko bwe Abraham ear ilok jen Egypt ñan “Rõk [Negeb],” tokelik ñan Bethel, inem ñan Hebron? Kwo melele ke kin kõtan eo an jikin kein ñan don?
5 Ak ilo schedule in read Bible eo am kwomaroñ kar read Zephaniah chapter 2. Ijo kwar konono kin etan jikin kwelok ko, armij ro, im ailiñ ko. Gaza, Ashkelon, Ashdod, Ekron, Sodom, im Nineveh im bareinwõt Canaan, Moab, Ammon, im Assyria rej aolep konono kaki ilo chapter eo. Kwar ke lo tõbrak ilo am lo ilo lemnak eo am jikin kein ijo armij ro rar jokwe ie, armij ro me rar koba ilo jejjet in kitien kanan eo an Anij?
6. Etke jet Ri Christian ro rej kile aorõkin map ko? (Lale box eo.)
6 Elõñ ro rej katak kin Nan in Anij rar bõk tokjen jen air lale map ko kin ene ko ilo Bible. Rej kõmmane men in, jab kinke rej baj itoklimo wõt kin map ko, ak kinke rej kile bwe ilo air kajerbal map ko, remaroñ kalaplok jelãlokjen eo air kin Nan eo an Anij. Map ko remaroñ bareinwõt jibañ ir kalaplok melele eo air, ilo air lo ewi wãwen men ko ededelok air jelã kaki ewõr kõtair ñan melele ko jet. Ilo ad etale jet wanjoñok ko, bõlen kwe bareinwõt kwonaj kamũlallok kamolol eo am kin Jehovah im enaj laplok am melele kin bwebwenato ko ilo Nan eo an.
Eaorõk ñan Jelã Ewi Etolokin
7, 8. (a) Ta men in kabwilõñlõñ eo Samson ear kõmmane ilo Gaza? (b) Ta melele eo emaroñ kõmman bwe en laplok an kabwilõñlõñ? (c) Ewi wãwen jelãlokjen im melele eo kin bwebwenato in ikijen Samson emaroñ jibañ kij?
7 Ilo Dri Ekajet Ro 16:2, kwomaroñ konono kin Ri Ekajet eo Samson ke ear bed ilo Gaza. Ãt in Gaza emakijkij an walok ilo news report ko ilo ran kein, inem bõlen ewõr am jelã kin tu-ia eo Samson ear bed ie, ilo territory eo an Ri Philistia ro ebak ñan Mediterranean Coast. Kiõ lale Dri Ekajet Ro 16:3: “Samson e ar babu mae lukwõn boñ im ej jerkak ilukwon boñ, im kapjere aur ko in kejem in jikin kwelok eo, im jur ko iturin, im kõtepi, alal im aolep, im likiti i aieran, im bõkliñlok ñõn jabõn tol eo iman Hibron.”
8 Ejelok bere bwe, aor ko in kejam eo im jur ko iturin ilo juõn me einwõt Gaza rar kilep im eddo. Baj lemnak ñan kajeoñ in kotaki! Samson ear kõmmane, ak ear bõklok ñan ia, im kar kain rot ial eo an? Eokwe, Gaza ej bed iturin barijet joñan utiejen lojet. Bõtab, Hebron ej bed itu-rear joñan utiejen 3,000 nee—ear aikwij kar wanliñlok! Jejjab lukkun jelã tu-ia eo ear bed “tol eo iman Hibron” ear bed ie, ak jikin kwelok eo ear bed enañin 37 mile etolok jen Gaza—im ear aikwij wanliñlok! Ilo ad jelã kin ewi aetokin ial eo an Samson ej kõmman bwe en laplok an kabwilõñlõñ men eo ear kõmmane, ejjab ke? Im kememej kin etke Samson ear maroñ kõmmane men kein—“Jitõb õn Jeova e ar kanuij itok ion.” (Dri Ekajet Ro 14:6, 19; 15:14) Einwõt Ri Christian ro rainin, jejjab kõtmene bwe jitõbõn Anij enaj kõmman bwe en kajurlok enbwinid. Ak, ejja jitõb in wõt ekajur emaroñ kalaplok ad melele kin men ko remũlal ilo jitõb im kõmman bwe armij eo iloa en kajur. (1 Dri Korint 2:10-16; 13:8; Dri Epesõs 3:16; Dri Kolosse 1:9, 10) Aet, ñe je melele kin bwebwenato eo kin Samson ej kalikar bwe jitõbõn Anij emaroñ jibañ kij.
9, 10. (a) Ta eo ear koba ilo anjo eo an Gideon nae Ri Midian ro? (b) Ewi wãwen jelã eo ad kin jekjekin ene eo emaroñ jibañ kõmman bwe en laplok an wõr melelen bwebwenato in?
9 Bar juõn bwebwenato me ej kalikar kin aorõkin ad jelã kin etolok in men ko ej ikijen anjo eo an Gideon ion Ri Midian ro. Elõñ ro rej konono Bible rej jelã bwe Ri Ekajet eo Gideon im ro mõttan 300 rar anjo ion 135,000 ri kijirãt ro air—Ri Midian ro, Ri Amalek ro, im ro jet rar kajjur air camp ilo ene emõn biken in Jezreel, ebak ñan tol eo edik in Moreh. Lõmaro mõttan Gideon rar uk jilel ko, rupe jãbi ko ñan kwalok kijeek ko air, im rar lamõj: “Jãji eo an Jeova im an Gideon!” Men in ear kabwok im kalelñoñ ri kijirãt ro, im kõmman bwe ren jino mõn don. (Dri Ekajet Ro 6:33; 7:1-22) Eñin ke aolepen men ko rar walok, juõn wõt emmakit ilo boñ? Konono manlok ilo Dri Ekajet Ro chapter 7 im 8. Kwonaj lo bwe Gideon ear wõnmanlok ilo tarinae eo. Ian aolep jikin ko rej konono kaki, jet ian jikin kein rejaje kajjeir rainin, inem rejjab walok ilo map ko ilo Bible. Mekarta, ebwe jikin ko rejelã kaki, inem jemaroñ lale im lo makitkit ko an Gideon.
10 Gideon ear lukwarkware bwen ri tarinae ro ñan Beth-shittah inem tu-rak ñan Abel-meholah, ebak ñan Jordan. (Dri Ekajet Ro 7:22-25) Bwebwenato eo ej ba: “Im Gideon e ar itok ñõn Jordan, im elã, im man ro jilu buki iben, re kijelok, ak rar lukworkwor ir wõt.” Elikin air ellã jen Jordan, Ri Israel ro rar lukwarkware ri kijirãt ro itu-rak lok ñan Succoth im Penuel, ebak ñan Jabbok, inem wanliñlok ñan tol ko redik ilo Jogbehah (ebak ñan Amman, Jordan ilo ran kein). Melelen bwe rar lukwarkware im tarinaik ri kijirãt ro enañin 50 mile ko. Gideon ear jibwe im mõn ruo king in Ri Midian ro; inem ear jeblak ñan jikin kwelok eo an, Ophrah, ebak ñan jikin eo tarinae eo ear jino ie. (Dri Ekajet Ro 8:4-12, 21-27) Alikar, jerbal eo an Gideon ear laplok jen jejjo wõt minute ko in air uk jilel ko, kabelbel kijeek urur ko, im lamõj. Im lemnak kin ewi wãwen men in ej kalaplok kajurin nan ko kin ri tõmak maan ro: “Bwe aõ ien e naj erik jen bwebwenato kin Gideõn [im ro jet me] ar kakajur ir jen air mõjno, r’ar beranlok ilo tarinae.” (Dri Hibru 11:32-34) Ri Christian ro bareinwõt remaroñ mõk, ak ejjab aorõk ke bwe jen wõnmanlok im kõmanman ankil an Anij?—2 Dri Korint 4:1, 16; Dri Galetia 6:9.
Ewi Wãwen An Armij Lemnak im Emmakit?
11. Ito-itak ta eo kar kitibuji mokta im elikin an Ri Israel ro tõbar Kadesh?
11 Jet armij remaroñ kajerbal map ko ñan bukõt jikin ko ilo Bible, ak kwoj lemnak ke bwe map ko remaroñ kwalok kin ta eo ilo lemnak ko an armij? Einwõt wanjoñok eo kin Ri Israel ro ke rar emmakit jen Tol Sinai ñan Enen Kallimur eo. Rar bõjrak jidik jen ien ñan ien ilo ial eo air, ak eliktata rar tõbar Kadesh (ak, Kadesh-barnea). Duteronomi 1:2 ej kwalok bwe ear juõn ial 11-ran aetokin, enañin 170 mile ko. Jen ijin Moses ej jilkinlok 12 ri iaroñroñ ro ñan Enen Kallimur eo. (Bwinbwin 10:12, 33; 11:34, 35; 12:16; 13:1-3, 25, 26) Ri iaroñroñ ro rar etal tu-eañ ilujen Negeb, bõlen ellã jen Beer-sheba, inem ellã jen Hebron, im tõbar jabõn eo tu-eañtata ilo Enen Kallimur eo. (Bwinbwin 13:21-24) Kin air tõmak ennan eo enana an ri iaroñroñ ro joñoul, Ri Israel ro rar aikwij etetal ilo ene jemaden iumin 40 yiõ. (Bwinbwin 14:1-34) Ta eo men in ej kalikar ikijen tõmak im mõnõnõ eo air ñan liki Jehovah?—Duteronomi 1:19-33; Sam 78:22, 32-43; Jud 5.
12. Ta jemlok eo jemaroñ bõke ikijen tõmak eo an Ri Israel ro, im etke ej juõn men jej aikwij kalmenlokjen kake?
12 Lemnak kin men in ikijen wãwen eneo. Elañe Ri Israel ro rar kwalok air tõmak im lor nan in jiroñ eo an Joshua im Caleb, enaj ke kar aikwij aetok ial eo air ñan tõbar Enen Kallimur eo? Kadesh ear enañin joñoul mile jen Beer-lahai-roi, ijo Isaac im Rebekah rar jokwe ie. Ear diklok jen 60 mile ñan Beer-sheba, eo kar jabõn eo tu-raktata in Enen Kallimur eo. (Jenesis 24:62; 25:11; 2 Samuel 3:10) Ke rar etal jen Egypt ñan Tol Sinai inem 170 mile ñan Kadesh, rar bed turin wõt einwõt kejam in deloñ eo ñan Enen Kallimur eo. Ikijen kij, jej bed turin kejam in deloñ eo ñan Paradise eo ion lal me kar kallimur kake. Ta eo jemaroñ katak? Ri jilek Paul ear keidi nan in kakabilek eo an ibben wãwen eo Ri Israel ro rar jelmaiki: “Jen kijejeto bwe jen dreloñ iloan kakije eo, ñe ab ein drein jabrewõt armij e naj buñ kin an jab bokake einwõt ir.”—Dri Hibru 3:16–4:11.
13, 14. (a) Iumin wãwen et eo Ri Gibeon ro rar aikwij bõk buñten nee ko rebin? (b) Ta eo ej kwalok kin lemnak eo an Ri Gibeon ro, im ta eo jemaroñ katak jen men in?
13 Juõn lemnak eoktak—juõn kin liki bwe Anij enaj kajejjet kitien ankil an—ej alikar ilo men eo ear walok ilo Bible me ej kitibuj Ri Gibeon ro. Elikin an kar Joshua tel Ri Israel ro im kijone River Jordan ñan eneo Anij ear kallimur ñan family eo an Abraham, ear ien ñan jolok Ri Canaan ro. (Duteronomi 7:1-3) Men in ear koba Ri Gibeon ro. Ri Israel ro ededelok air kar anjo ion Jericho im Ai im rar camp ebak ñan Gilgal. Ri Gibeon ro rar jab kõnan mij einwõt Ri Canaan ro, inem rar jilkinlok juõn kumi me ej jutak ikijiir. Rar kõmman ilo mon einwõt ñe rar itok jen ilikin territory eo an Ri Canaan ro bwe ren maroñ kõmman juõn bujen ainemõn ibben Ri Hebrew ro.
14 Kumi in rar ba: “Kim ar itok jen juõn ene e kanuij etolok, kin etan Jeova am Anij.” (Joshua 9:3-9) Nuknuk ko air im mõñã ko kijeir rar kamol bwe rar itok jen juõn jikin etolok, ak ilo mol Ri Gibeon ro rar bed enañin 20 mile jen Gilgal. Ilo air tõmak, Joshua im iroij ro an rar kõmman juõn bujen ainemõn ibben Ri Gibeon ro im jikin kwelok ko rebak ñan Gibeon. Etao in an Ri Gibeon ro ear baj juõn wãwen ñan bõprae bwe ren jab mõn ir ke? Jaab, ear kwalok juõn kõnan bwe Anij eo an Israel en buñburuen kake ir. Jehovah ear kowãppen an Ri Gibeon ro erom “dri jekjek kani, im dri itõk dren ñõn jar eo, im ñõn lokatok eo an Jeova,” im kabwe kane ko ñan lokatok eo. (Joshua 9:11-27) Ri Gibeon ro rar kwalok air mõnõnõ in kõmmane jerbal ko rettã ilo jerbal eo an Jehovah. Jet iair rar ian Ri Nethinim ro me rar jeblak jen Babylon im jerbal ilo temple eo me rar bar kaleke. (Ezra 2:1, 2, 43-54; 8:20) Jemaroñ anõk lemnak eo air ilo ad kejbãrok ainemõn eo ad ibben Anij im ilo ad mõnõnõ in kõmman jerbal ko rettã ilo jerbal eo an.
Kwon Mõnõnõ in Lelok Kwe Make
15. Etke jej aikwij itoklimo kin jekjekin ene ko rej walok ilo Jeje ko ilo kajin Greek?
15 Wãwen jekjekin ene ko ilo Bible rej walok ilo bwebwenato ko ilo Jeje Ko ilo Kajin Greek, einwõt ito-itak ko im jerbal in kwalok nan eo an Jesus im ri jilek Paul. (Mark 1:38; 7:24, 31; 10:1; Luk 8:1; 13:22; 2 Dri Korint 11:25, 26) Ilo bwebwenato kein tok, kajeoñ in pijaik ilo lemnak eo am ito-itak ko rej kitibuji.
16. Ewi wãwen Ri Christian ro ilo Beroea rar kwalok air kamolol kin Paul?
16 Ilo trip in missionary eo an kein karuo, Paul ear tõkeãktok ilo Philippi, kiõ rej jelã kake einwõt Greece. Ear kwalok nan ijo, kar kalbuj e inem kõtlok e, im ear etal ñan Thessalonica. (Jerbal 16:6–17:1) Ke Ri Jew ro rar kõmman keojaljal, brother ro ilo Thessalonica rar rejañ Paul bwe en etal ñan Beroea, enañin 40 mile etolok. Paul ear lo tõbrak ilo jerbal in kwalok nan eo an ilo Beroea, ak Ri Jew ro rar itok im kairuj armij ro ijo. Kin men in, “emõkõj an jimjãn jimjãten jilkinlok Paul bwe en ilok ñõn lomalo,” im “ro rej tellok Paul rej añintok e ñõn Atens.” (Jerbal 17:5-15) Alikar, jet ri tõmak ro rekãl rar mõnõnõ in etetal 25 mile ñan Lomalo Aegean, kõllã wõnãn air uwe ion wa eo, im jerak enañin 300 mile ko. Juõn trip einwõt in emaroñ kauwatata, ak ro jein im jatin rar mõnõnõ in kõmmane im ilo wãwen in kaetoklok ien air bed ibben ri karejar in an Anij eo ej ito-itak.
17. Ñe jej jelã kin etolok in kõtan eo ikõtan Miletus im Ephesus ta eo emaroñ emõnlok ad melele kake?
17 Ilo trip eo an kein kajilu, Paul ear tõkeãktok ilo Miletus. Ej kirtok elder ro jen congregation eo ilo Ephesus, enañin 30 mile etolok. Lemnak mõk kin elder ro me rar aikwij bõjrak jen men ko rar kõmmani ñan air ilo ñan ibben Paul. Bõlen rar bwebwenato ilo mõnõnõ kin ien in renaj iion don ke rar etal ilo ial eo lok. Elikin air kwelok ibben Paul im roñ an jar, “elap air jõñ, im buñ ion kenwan Paul, im mejenmaike.” Inem “rej karwõn e ñõn wa” eo ñan an etal ñan Jerusalem. (Jerbal 20:14-38) Elap men ko rar maroñ lemnak im konono kaki ke rar jeblak ilo ial eo air ñan Ephesus. Kwoj bwilõñ ke kin kamolol eo rar kwaloke ilo air etetal ilo ial in aetok ñan air bed ibben ri karejar eo ej ito-itak me emaroñ kamelele im kõketak ir? Kwoj lo ke jabdewõt men ilo bwebwenato in me kwomaroñ jerbale ilo mour im lemnak eo am?
Katak kin Eneo im Ta eo Ej Bed Iman
18. Ta eo jemaroñ kõmmane ikijen jikin ko ilo Bible?
18 Wanjoñok ko ilõñ rej kwalok kin aorõkin ad aikwij jelã kin eneo me Anij ear lelok ñan Ri Israel ro im eo eaorõk ñan elõñ bwebwenato ko ilo Bible. (Im jemaroñ kalaplok jelã eo ad ilo ad katak kin ailiñ ko jet ibelakin me rej walok ilo bwebwenato ko ilo Bible.) Ke jej kalaplok jelãlokjen im melele eo ad kin Enen Kallimur eo, jej aikwij kememej juõn men eaorõk me Ri Israel ro rar aikwij in kõmmane ñan air deloñ im lañliñ kin eneo “e bwijliplip kin milk im hõnni.” Men in aikwij in kar ñan air mijak Jehovah im kejbãrok kien ko an.—Duteronomi 6:1, 2; 27:3.
19. Paradise et ko ruo rej tellokin ad lemnak kaki?
19 Eindein rainin, jej aikwij kõmmane ijo kunad, ñan ad mijak Jehovah im eddeb ñan ial ko an. Ilo ad kõmmane men in, jenaj maroñ kalaplok im kaibujuij paradise eo ilo jitõb me ej bed kiõ ilo congregation in Christian eo ibelakin lal. Enaj laplok ad jelã kin wãwen ko im jerammõn ko an. Im jej jelã bwe elõñlok jerammõn ko jet renaj itok. Joshua ear tel Ri Israel ro im kijone Jordan loan juõn ene ekouwa im kajuburu. Kiõ ewõr unin ñan ad reimanlok kin liki ñan Paradise eo, eneo emõn ej bed imad.
Kwoj Kememej ke?
• Etke jej aikwij kalaplok jelãlokjen im melele eo ad kin ene ko ilo Bible?
• Melele ta eo ikijen jekjekin eneo me jaar etale ilo katak in ear lap an jibañ yuk?
• Ta eo ear lap an alikar ke kwar kalaplok am melele kin jekjekin eneo ikijen juõn men ear walok?
[Jaat/Mab ilo peij 24, 25]
CHART IN JIKIN KO
(Ñan lale pija eo, jouj im lale ilo bok eo)
A. Barijet in Lomalo Elap (Great Sea)
B. Ene ko Emõn Biken Tu-rilik in Jordan
1. Ene Emõn Biken in Asher
2. Jikin eo Edik in Dor
3. Wũjen an Sharon
4. Ene Emõn Biken in Philistia
5. Komlal eo Iolap in Rear-Rilik
a. Ene Emõn Biken in Megiddo
b. LKomlal in Jezreel
C. Tol ko Tu-rilik in Jordan
1. Tol ko Redik in Galilee
2. Tol ko Redik in Carmel
3. Tol ko Redik in Samaria
4. Shephelah (tol ko redik)
5. Tol ko Redik in Enen Judah
6. Ene Jemaden in Judah
7. Negeb
8. Ene Jemaden in Paran
D. Arabah (Komlal in Rift)
1. Hula Basin
2. Jikin eo Iturin Lomalo in Galilee
3. Komlal in Jordan
4. Lomalo in Salt (Lomalo in Mij)
5. Arabah (tu-rak in Lomalo in Salt)
E. Tol ko/Jikin ko Reutiej Tu-rear in Jordan
1. Bashan
2. Gilead
3. Ammon im Moab
4. Tol in Edom
F. Tol ko in Lebanon
[Mab]
Mt. Hermon
Moreh
Abel-meholah
Succoth
Jogbehah
Bethel
Gilgal
Gibeon
Jerusalem
Hebron
Gaza
Beer-sheba
Sodom?
Kadesh
[Mab/Pija eo ilo peij 23]
(Ñan lale pija eo, jouj im lale ilo bok eo)
CANAAN
Megiddo
GILEAD
Dothan
Shechem
Bethel (Luz)
Ai
Jerusalem (Salem)
Bethlehem (Ephrath)
Mamre
Hebron (Machpelah)
Gerar
Beer-sheba
Sodom?
NEGEB
Rehoboth?
[Tol ko]
Moriah
[Lomalo ko]
Salt Sea
[Reba ko]
Jordan
[Pija]
Abraham ear ito-itak ilo eneo
[Mab ko ilo peij 26]
(Ñan lale pija eo, jouj im lale ilo bok eo)
Troas
SAMOTHRACE
Neapolis
Philippi
Amphipolis
Thessalonica
Beroea
Athens
Corinth
Ephesus
Miletus
RHODES