Kilen Jeje eo Etto im Baibel Eo

ELIKIN kar bwokwoj kajin eo an armij ro ilo Bebel, wãwen jeje ko re kaju wãweir rar jino ejaak. Armij ro rar ber ilo Mesopotemia, einwõt dri Sumeria im dri Babilõn rar kajerbal kilen jeje eo etto (cuneiform). Nan in ear itok jen kajin Latin im ej jitõñlok ñõn kakkõle eo einwõt triangle me rar je ion dreka ko kõmõn jen kle.

Ro rej ekkatak kin mour an armij in etto rar lo kilen jeje eo etto bwe ej kwalok kin armij ro im ien ko rej walok ilo Baibel eo. Ta eo jejela kin kilen jeje in jen etto? Ewi wãwen jeje kein rej kamol bwe jemaroñ liki Baibel eo?

Jeje ko Eto Air Ber

Dri meletlet ro rej tõmak bwe ilo jinoin wãwen kar kilen jeje eo rar kajerbale ilo Mesopotemia ear ikijen air kajerbal kakkõle ak pija ko me rej jutõk kin juõn nan ak lemnok. Ñõn wanjoñok, kakkõle eo kin kau koman ej einwõt bõran juõn kau. Kinke ear lõñ men ko rar aikwij likiti ilo lokbuuk, kilen jeje eo etto ear ejaak. Buk eo ej kemelele kin wãwen mour an armij in etto ilo Baibel ej ba, “Kakkõle ko rar maroñ kiõ jutõk kin nan ko im mõtõn ko ilo juõn nan.” Tokelik, 200 kakkõle ko re kaju wãweir rar kõmõn bwe kilen jeje eo etto “en lukkun kwalok kin wãwen konono me ej koba nan ko rebin im wãwen karõk nan ko.”

Ilo ien ko an Ebream ilo enañin 2,000 B.C.E., kilen jeje eo etto ear emõnlok. Jen ien in liktak, 15 kajin ko rar lore wãwen kilen jeje in. Elõñlok jen 99 percent in kilen jeje eo etto rar lo ilo dreka kle ko. Iomin 150 yiõ ko remotlok, kar lo elõñ dreka ko ilo Or, Uruk, Babilõn, Nimrud, Nippur, Ashur, Nineve, Mari, Ebla, Ugrit, im Amarna. Buk eo ej kemelele kin wãwen mour an armij in etto ej ba: “Dri meletlet ro rej antonelok bwe oran dreka ko rar loi kin kilen jeje eo etto ej ber ikõtan juõn im ruo million im rej bar lo 25,000 jeje ko kajuju yiõ.”

Ro rej ekkatak kin kilen jeje eo etto ibelakin lõl rej bõk juõn erro elap im bin kin jerbal in ukok. Ekkar ñõn juõn watwat, “juõn mõtõn joñoul wõt in jeje ko etto kar riiti ilo ran kein.”

Kin air kar lo bwe ruo im jilu kajin ko rar kajerbal kilen jeje eo etto, eñin unin rar maroñ ukote jeje kein. Dri meletlet ro rar kile bwe ilo lokbuuk kein ear or ejja jeje ko wõt ilo kajin ko reoktak jen dron ilo kilen jeje eo etto. Men eo ear kabidodo jerbal in ukok eo ej ilo air kar kile bwe ekkã air kar eliji ãt ko, title ko, menmenbwij eo an iroij ro, im bareinwõt nan ko rej tibloñtak ir mõke.

Ilo 1850 jima ko, dri meletlet ro rar maroñ riiti kajin eo aolep armij remelele kake ilo Middle East eo etto, an dri Akkad, ak dri Assiria im dri Babilõn, ilo kilen jeje eo etto. Encyclopedia Britannica ej kemelele: “Ke ear mwij ukot kajin Akkad, kar maroñ melele wãwen eo kar kajerbale ñõn jeje, im kar maroñ lor joñok in ñõn ukot kajin ko jet ilo kilen jeje eo etto.” Ewi wãwen jeje kein rej ekkeijaklok ñõn jeje ko ilo Baibel eo?

Kein Kamol eo ej Errã Iben Baibel Eo

Baibel eo ej kwalok bwe kiñ ro an dri Kenean ro rar iroij ilo Jerusalem mae ien eo Devid ear bõk anjo ilo 1070 B.C.E. (Josh. 10:​1; 2 Sam. 5:​4-9) Ak jet dri meletlet ro rej berre men in. Bõtab, ilo 1887 juõn kõra dri jerata ear lo juõn dreka kle ilo juõn jikin ilo Ijipt etan Amarna. Elikin kar ukot 380 nan ko, dri meletlet ro rar kile bwe rej letter ko ikõtan iroij ro an Ijipt (Amenotep III im Akenaton) im ailiñ ko an dri Kenean. Letter ko jiljino kar jen Abdai-Iba iroij eo an Jerusalem.

Buk eo ej bõk liklok kij ñõn wãwen mour an armij in etto ilo Baibel ej ba: “Dreka eo jen Amarna ej lukkun konono kin Jerusalem einwõt juõn bukwon im jab juõn wãto, im jerbal eo an Abdai-Iba einwõt . . . juõn iroij ear or imõn im 50 an dri tõrinae in Ijipt ilo Jerusalem, ej kwalok bwe Jerusalem ej juõn ailiñ ear ber ilo juõn jikin etoltole.” Ejja buk in wõt ear ba: “Jemaroñ liki bwe ekkar ñõn letter ko jen Amarna, jikin kwelok eo elap an aurõk ilo ien ko etto ear ber.”

Ãt ko ilo Jeje in Etto ko an dri Assiria im dri Babilõn

Dri Assiria ro im tokelik dri Babilõn ro rar je bwebwenato ko air ion dreka kle ko rebakbak, dreka ko rewaitoktok im rolul, im dreka ko rekilep kar kajutaki ñõn kein kakememej. Inem ke dri meletlet ro rar ukot kilen jeje eo etto an dri Akkad, rar lo bwe nan ko ie rej kwalok kin etan armij ro ilo Baibel eo.

Buk eo naetan Baibel eo ilo Alele eo an Britain, ej ba: “Ilo nan ko an ilo 1870 ñõn kumi eo ekãl ej katak kin mour an armij ro etto ilo Baibel, dri meletlet eo Samuel Brich ear maroñ kile [ilo kilen jeje eo etto etan] kiñ ro an dri Hibru etair Omrai, Ehab, Jihu, Azeraia . . . , Menahem, Pika, Hoshia, Hezekaia, im Manassa, im kiñ in dri Assiria ro einwõt Tiglat-piliser . . . [III], Sargon, Senakreb, Isar-hadon im Osnapar, . . . im dri Siria ro Ben-hedad, Hazael im Rizin.”

Buk eo ej kwalok kin Baibel eo im ewi toõn an juõn men ber ej keiri bwebwenato ko ilo Baibel kin Israel im Juda iben kilen jeje eo etto. Ta jemlok eo? “Ñe kobaiki iben dron, eor 15 ak 16 kiñ in Juda im Israel rar walok ilo jeje ko an ailiñ ko jet, im etair im ien eo rar mour ie ear jejit ñõn kemelele ko rar walok ilo buk in Kiñ Ko [ilo Baibel]. Aolep ãt ko kar kwalok kaki ilo jeje ko an ailiñ ko jet kar bar konono kaki ilo buk in Kiñ.”

Juõn dreka ewaitoktok ej kwalok kin Sairõs, kar lo ilo 1879 ej kwalok bwe elikin kar anjo ion Babilõn ilo 539 B.C.E., Sairõs ear kakien bwe ren kajeblak dri kamakoko ro ñõn kabijukneir. Ibwiljin ro rar bõk tokjen kar dri Ju ro. (Ezra 1:​1-4) Elõñ dri meletlet ro ilo ebeben eo kein ka 19 rar tõmak bwe kakien in ilo Baibel ejjab mol. Bõtab, jeje ko etto ilo ien ko an dri Põrsia ekoba dreka eo ej kwalok kin Sairõs, rej kamol bwe Baibel eo ejime im jejit.

Ilo 1883 kar lo elõñlok jen 700 dreka ko kin kilen jeje eo etto ilo juõn jikin ebak Babilõn etan Nippur. Ibwiljin 2,500 ãt ko kar kwalok kaki, enañin 70 iair rar maroñ kile bwe rej etan dri Ju ro. Leo ej etale bwebwenato an armij in etto etan Edwin Yamauchi ej ba bwe rein rar “kõmõn bujen iben armij, rar dri konono ñõn armij im dri kamol ro, bareinwõt dri teltel owõj, im ian dri utiej ro.” Kein kamol eo bwe dri Ju ro rar wõnmanlok wõt im bõk kunair ilo makõtkit kein iturin Babilõn ilo tõre in ej lukkun aurõk. Ej jurake kanan eo ilo Baibel bwe ke “eiet wõt” rar jeblak ñõn Judia jen air kamakoko ilo Assiria im Babilõn, elõñ rar ber.​ —Ais. 10:​21, 22.

Iomin 1,000 B.C.E. ñõn 1 B.C.E, rar kajerbal kilen jeje eo etto im albapeet ko. Ak dri Assiria im dri Babilõn rar bwijrõk air kajerbal kilen jeje eo etto im lor albapeet ko wõt.

Elõñ buki tausan dreka ko rej ber ilo alele ko im rejañin katak kaki. Men ko dri meletlet ro emwij air ukoti rej kwalok menin kamol eo ejejit bwe jemaroñ liki Baibel eo. Jenaj lo kein kamol ko jet bwe Baibel eo emol ñe emwij air katak kin dreka ko jet ilo kilen jeje eo etto.

[Pija etan eo ej komman ilo peij 21]

Pija eo jen Alele eo ilo Britian