Katak Ko Remol Ia eo Kwomaroñ Loi Ie?
JUÕN emaan ilo Tibet ej likit jar ko an emwij jeje iloan juõn men im karolole. Ej tõmak bwe kajjojo ien ej karolole jar ko, ej eliji jar ko an. Ilo mweo imõn juõn ri India, ri mweo rar kajenolok juõn room edik bwe ren jar ie, ekoba lelok kaijurjur ko reñaj, wũt ko, im men ko jet ñan ekjap ko air. Ilo Italy, juõn kõrã ej jibwe juõn marmar im badikdik iman ekjap in Mary, ilo ien ej jar.
Bõlen kwar lo wãwen an kabuñ ko jelet armij ro. Book eo The World’s Religions—Understanding the Living Faiths (Melele kin Tõmak Ko An Armij Ilo Kabuñ Ko an Lal) ej ba “Kabuñ ... ej wõnmanlok einwõt juõn men in aikwij ñan armij ro ibelakin lal.” Ilo book eo God—A Brief History (Juõn Bwebwenato Ekadu Kin Anij), ri jeje book in John Bowker ear ba: “Ien otemjej ear wõr juõn ak elõñlok jen juõn kumi in armij rar tõmak ilo Anij, einwõt ri tel im ri kõmanman eo air. Eindein bareinwõt ibben jukjuk im bed ko me rar jab kõnan bwe en wõr kabuñ ko.”
Emol, kabuñ ear jelet mour ko an elõñ million armij ro. Men in ejjab kamol ke bwe armij ro rej lukkun kõnan im aikwij bõk katak ko an Anij? Ilo book eo an, etan The Undiscovered Self, juõn doctor etan Dr. Carl G. Jung ear konono kin aikwij eo an armij ñan kabuñ ñan juõn eo eutiej im ej ba bwe “aikwij in ear alikar jen jinoin bed eo an armij ro ñan kiõ.”
Ak, elõñ armij rejjab tõmak ilo Anij ak rejjab itoklimo kin kabuñ. Jet armij rej bere kin an Anij bed ak rej karmijeteik e kinke kabuñ ko air rar likjap in kabwe aikwij ko air kin ekan ko lor jitõb. Armij ro rej ba bwe kabuñ kar melelen “tiljek ñan juõn tõmak; kate wõt im bokake; eddeb ilo yokwe.” Ekkar ñan melele in, enañin aolep armij rej kabuñ ñan Anij ilo kajjo wãwen ko. Ekoba ro rej ba ejelok Anij.
Jen jinoin bwebwenato eo an armij, jibadbad ko ñan kabwe aikwij ko air kin jelãlokjen eo an Anij ear kõmman bwe ren kajutak elõñ wãwen kabuñ ko. Kin men in elõñ kain lemnak ko kin kabuñ rar walok ibelakin lal. Ñan wanjoñok, meñe enañin aolep kabuñ rej tõmak ilo juõn eo ekajur bõtata, rejjab juõn wõt ilo lemnak kin wõn e. Enañin aolep kabuñ rej kwalok nan kin aikwij eo ñan bõk lomor. Ak remaroñ einjuõn jen don ilo katak ko air kin ta in lomor im ewi wãwen air maroñ bõke. Kinke elõñ katak ko an kabuñ rekajjo jen don, ewi wãwen ad maroñ kile katak ko remol me Anij ej buñburuen kake?