Jeova ear ba ñan Samuel: ‘Etal ñan m̦weo im̦õn Jesse kõnke juon iaan likao ro nejin enaaj kiiñ ioon Israel.’ Innem ke Samuel ear etal, ear loe l̦eo erũttotata nejin Jesse im ear l̦õmn̦ak ippãn make im ba: ‘Eñin ej likao eo kar kããlõte.’ Ak Jeova ear ba ñan Samuel bwe ejjab likao eo in. Jeova ear ba: ‘Ijjab lale wõt tulikin im paotokin juon armej, ak ij bar lale bũruon.’

Jesse ear ãñintok likao ro jet 6 nejin ñan ippãn Samuel. Ak Samuel ear ba: ‘Jeova ear jab kããlõt juon iaaer. Ebar wõr ke nejũm̦ l̦addik?’ Innem Jesse ear ba: ‘M̦õttan wõt l̦adik eo ediktata Devid, ak ej lale jiip ko nejũ.’ Ke Devid ear jãdel̦o̦k, Jeova ear ba ñan Samuel: ‘L̦adik eo n̦e!’ Innem Samuel ear lutõke weil̦ in ekkapit eo ñan ioon bõran Devid ñan kaalikkar bwe e eo enaaj kiiñ ioon Israel.

Tokãlik, RiIsrael ro im RiPilistia ro rar pojakin tarin̦aeik doon. Ak m̦okta jãn aer kar tarin̦ae, ekar wõr juon an RiPilistia ro rũttarin̦ae elukkuun ineea etan Golaiat me ear ire ñan er. Kajjojo raan, Golaiat ear kajjirere im kakũtõtõik RiIsrael ro. Ear lam̦õjl̦o̦k im ba: ‘Kom̦win kããlõt juon iaan em̦m̦aan ro ami bwe en itok im ire ippa. Ñe enaaj wiin, kõm naaj ami rũkõm̦akoko. Ak ñe inaaj wiin, kom̦ naaj ammim rũkõm̦akoko.’

Kõnke l̦õm̦aro jein Devid rar m̦õttan rũttarin̦ae ro an Israel, Devid ear etal ñan ijo rar kajutak em̦ nuknuk ko aer ie im bõkl̦o̦k kijeer m̦õñã. Ke Devid ear roñ naan ko an Golaiat, ear ba: ‘Inaaj ire ippãn!’ Ak Kiiñ Saul ear ba: ‘Jaab, kwõj dik wõt.’ Bõtab Devid ear ba: ‘Jeova enaaj jipañ eõ.’

Saul ear kõtl̦o̦k an Devid kõn̦ak nuknukun tarin̦ae ko an, ak Devid ear ba: ‘Ijjab maroñ tarin̦ae kõn men kein.’ Innem Devid ear bõk buwat eo an kõm̦m̦an jãn juon m̦õttan nuknuk jidikdik me kar lukwõje ruo to n̦a ippãn. Im ear etal ñan reba eo im kããlõt 5 dekã meoeo im likũti ilo iep eo an. Innem ear ettõrl̦o̦k ñan ippãn Golaiat. Riineea in ear lam̦õjl̦o̦k ñane im ba: ‘L̦addik jidikdik en̦, kwõn itok. Inaaj lel̦o̦k ãnbwinnũm̦ bwe en kijen bao ko imejatoto im menninmour kan̦ rawiia.’ Ak Devid ear jab mijak. Ear bar lam̦õjl̦o̦k im ba: ‘Kwe kwõj itok kõn juon jãje im juon m̦ade, ak ña ij iwõj ilo etan Jeova. Ejjab kõm eo kwõj jum̦aiki, ilo m̦ool Anij eo kwõj jum̦aiki. Aolep armej ro ijin renaaj lo bwe el̦apl̦o̦k an Jeova kajoor jãn juon jãje im juon m̦ade. Enaaj kõm̦m̦an bwe kõmin anjo̦ ioomi.’

Innem Devid ear bõk juon dekã im likũti ilo buwat eo an im kõmaat joñan an kõrro̦o̦lo̦le im buwate l̦o̦k Golaiat. Im kõn jipañ eo jãn Jeova, dekã eo ear kãlo̦k im lel im pejlo̦k dem̦an Golaiat. Innem Golaiat ear okjak im mej. Ke ear wal̦o̦k men in, RiPilistia ro rar ko. Ak baj kwe, kwõj ke lõke Jeova ãinwõt kar Devid?

Ãlikin an kar Devid m̦an Golaiat, Kiiñ Saul ear kããlõt Devid bwe en tõl kumi in tarin̦ae eo an. Elõñ tarin̦ae ko Devid ear anjo̦ ioer, im ear lukkuun buñbuñ ippãn armej ro. Ñe ej ro̦o̦ll̦o̦k ñan ijo jikin ãlikin an tarin̦ae, kõrã ro rekõn eb im al ilo aer ba: ‘Saul ear m̦an 1,000, ak Devid ear m̦an 10,000!’ Innem Saul ear jino ebbanbane Devid im kõn̦aan m̦ane.

Devid ear lukkuun jel̦ã kõjañjañ kõn kein kõjañjañ eo nejin (harp). Juon raan ke ear kõjañjañ ñan Saul, Saul ear bõk juon m̦ade im kade l̦o̦k Devid. Ak ear m̦õkaj an Devid jillo̦k jãn an kar lel, im m̦ade eo ear lõlõ ilo kiin m̦weo. Ebar lõñ iien ko jet Saul ear kajjioñ in m̦ane Devid. Ãliktata, Devid ear ko im kũttiliek ilo ãne jem̦aden.

Saul ear bõk 3,000 rũttarin̦ae ro ippãn bwe ren pukot im m̦an Devid. Juon iien Saul ear del̦o̦ñe ro̦ñin tol̦ eo me Devid im l̦õm̦aro m̦õttan rar kũttiliek ie. L̦õm̦arein m̦õttan Devid rar wũnojidikdik ñane im ba: ‘Juon in iien epel̦l̦o̦k ñan am̦ m̦an Saul.’ Innem Devid ear ajjãdikdikl̦o̦k im m̦wijiti jidikin kopã eo an Saul, ak Saul ear jaje. Bõtab ear nana an Devid mour kõn an kar jab kwal̦o̦k kautiej ñan Saul, kiiñ eo Jeova ear kããlõte. Innem ear kabõjrak l̦õm̦aro m̦õttan jãn aer m̦an Saul. Tokãlik ke Saul ear pãd nabõj, Devid ear lam̦õjl̦o̦k ñane im ba bwe meñe emaroñ kar m̦ane ke ear pãd lowaan ro̦ñ eo ak ear jab. Kõn men in, ear ke jako an Saul dike Devid?

Eokwe ear jab. Ear kõn̦aan wõt apãde Devid. Juon boñ, Devid im l̦eo naaj nejin etan Ebishai rekar ajjãdikdikl̦o̦k ñan ijo Saul im rũttarin̦ae ro an rar kajutak em̦ nuknuk ko aer ie. Rar loe an Abner kiki, ak en kar emmej wõt bwe en lale im kõjparok Saul. Ebishai ear ba: ‘Juon in iien epel̦l̦o̦k! Kõjro m̦ane.’ Devid ear ba ñane: ‘Jeova enaaj pepe kõn ta eo enaaj kõm̦m̦ane ñan Saul. Kõjro bõk m̦ade n̦e an im nien dãn n̦e an im etal.’

Innem Devid ear wanlõñl̦o̦k ñan ioon juon tol̦ epaake ijo ñan an jutak ie im reilal̦l̦o̦k bwe en loe jikin kõppãd eo an Saul. Ear lam̦õjl̦o̦k im ba: ‘Abner, etke kwaar jab kõjparok kiiñ n̦e am̦? Ewi m̦ade eo im nien idaak eo an Saul?’ Saul ear kile ainikien Devid im ear ba: ‘Meñe kwõmaroñ kar m̦an ña, ak kwaar jab. Kiiõ ijel̦ã bwe kwe eo kwõnaaj kiiñ in Israel.’ Innem Saul ear ro̦o̦l ñan m̦weo im̦õn. Ak ejjab aolep ro ilo baam̦le eo an Saul rar dike Devid.

Jonetan, rũttotata eo nejin Kiiñ Saul, ear juon rũttarin̦ae eperan. Devid ear bar ba bwe Jonetan el̦ap an m̦õkaj jãn ikõl̦ im el̦ap an kajoor jãn l̦aiõn. Juon raan Jonetan ear reilo̦k im loe jet rũttarin̦ae an Pilistia ioon juon tol̦. Ear ba ñan l̦eo ej ineeki kein tarin̦ae ko an: ‘Kõjro naaj tarin̦aeik er el̦aññe Jeova enaaj kwal̦o̦ktok juon kõkal̦l̦e. Ñe RiPilistia ran̦ renaaj ba ñan kõjro bwe kõjro en wanlõñl̦o̦k, mel̦el̦ein bwe kõjro naaj tarin̦aeik er.’ Innem RiPIlistia ro rar lam̦õjl̦o̦k ñan erro im ba: ‘Komiro en wanlõñtak bwe jen tarin̦ae!’ Kõn men in, erro kar wanlõñl̦o̦k im tarin̦aeik er ioon tol̦ eo im erro kar anjo̦ ioon 20 rũttarin̦ae ro.

Kõnke Jonetan ear rũttotata eo nejin Kiiñ Saul, en kar e eo ej kiiñ ãlikin jemãn. Ak em̦õj an kar Jeova kããlõt Devid bwe en e eo enaaj kar kiiñ ioon Israel. Meñe Jonetan ear jel̦ã kõn men in, ak ear jab ebbanbane Devid. Jonetan im Devid rar lukkuun epaake doon. Erro kar jim̦or kallim̦ur bwe erro naaj kõjparok im jipañ doon. Jonetan ear lel̦o̦k kopã eo an, jãje eo an, lippo̦n̦ eo an, im kañũr eo an ñan Devid ñan kaalikkar bwe erro naaj m̦õttãik wõt doon.

Ke Devid ear ko im kũttiliek jãn Saul, Jonetan ear etal ñan ijo ear pãd ie im ear ba ñane: ‘Kwõn kajoor im peran. Em̦õj an Jeova kããlõt kwe bwe kwõn kiiñ. Jema ebar jel̦ã kõn men in.’ Kokõn̦aan ke m̦õttãik juon armej ãinwõt Jonetan?

Elõñ alen an kar Jonetan jipañe l̦ein m̦õttan meñe emaroñ kar kauwõtata ñane. Ear jel̦ã bwe jemãn ear kõn̦aan m̦an Devid, ak ear ba ñane: ‘Kwõnaaj jerawiwi ñe kwõnaaj m̦an Devid kõnke ejjel̦o̦k men en̦ enana ear kõm̦m̦ane.’ Ke Jonetan ear ba men in, Saul ear lukkuun illu ippãn. Jet iiõ ko tokãlik, Saul im Jonetan rar jim̦or mej ilo juon tarin̦ae.

Ãlikin an kar Jonetan mej, Devid ear pukote l̦eo nejin Jonetan etan Mipiboshet. Ke Devid ear loe Mipiboshet, ear ba ñane: ‘Kõnke em̦m̦an an kar jem̦am̦ kõm̦m̦an ñan ña, inaaj lale im kõjparok eok toon wõt am̦ mour. Kwõnaaj jokwe ilo m̦weo im̦õ im kwõnaaj m̦õñã ilo tebõl̦ in m̦õñã eo aõ.’ Devid ear jab mel̦o̦kl̦o̦ke l̦eo m̦õttan, Jonetan.

Ke Saul ear mej, Devid ear jino kiiñ ioon armej ro. Ilo iien in, kar 30 an iiõ. Ak ãlikin jet iiõ in an kiiñ, ear kõm̦m̦ani jet bõd ko rel̦l̦ap. Juon boñ ke ej pãd ioon bõrwajin m̦weo im̦õn, ear reilo̦k im loe juon kõrã edeo̦. Devid ear roñ bwe etan kõrã eo in Batshiba im bwe ej pãleen juon rũttarin̦ae etan Uraia. Devid ear ba bwe ren ãñintok Batshiba ñan m̦weo m̦õn, im erro kar babu ippãn doon im tokãlik Batshiba ear bõro̦ro. Devid ear kajjioñ in n̦ooje men in enana ear kõm̦m̦ane. Ear ba ñan l̦eo ej tõl rũttarin̦ae ro bwe en likũti Uraia im̦aantata ñe renaaj tarin̦ae innem ren ko jãne. Ãlikin an kar Uraia mej ilo tarin̦ae, Devid ear m̦areik Batshiba.

Ak Jeova ear loe an wal̦o̦k aolep men kein renana. Innem ta eo enaaj kar kõm̦m̦ane? Eokwe, ear jilkinl̦o̦k rũkanaan Netan ñan ippãn Devid. Netan ear ba ñane: ‘Ewõr juon em̦m̦aan em̦weiie me elõñ nejin jiip, im bar juon em̦m̦aan ejeram̦õl me juon wõt nejin jiip jidikdik im el̦ap an kaorõke. Ak rũm̦weiie eo ear bõke jiip in nejin rijjeram̦õl eo.’ Ke Devid ej roñ men in, ear lukkuun illu im ear ba: ‘Rũm̦weiie en̦ ej aikuj in mej!’ Ak Netan ear ba ñan Devid: ‘Kwe rũm̦weiie eo!’ Kõn men in, Devid ear lukkuun bũrom̦õj im ear kwal̦o̦k bõd eo an ñan Netan. Ear ba: ‘Iar bõd n̦ae Jeova.’ Kõn wõt bõd ko rel̦l̦ap an Devid, elõñ apañ im jorrããn ko rar wal̦o̦k ñan e im baam̦le eo an. Jeova ear kajeik e, ak ear kõtl̦o̦k wõt an mour kõnke ear kwal̦o̦k m̦ool im kõttãik bũruon.

Tokãlik Devid ear kõn̦aan kalõk juon tampel̦ ñan Jeova. Ak Jeova ear kããlõt Solomon, l̦adik eo nejin Devid, ñan kalõke tampel̦ in. Devid ear jino kõpooji men ko Solomon enaaj kar aikuji. Ear ba: ‘Tampel̦ eo an Jeova ej aikuj lukkuun em̦m̦an im aiboojoj. Ak kõnke Solomon ej dik wõt, inaaj jipañe im kõpooji men ko enaaj aikuji.’ El̦ap jããn eo Devid ear jaba kake ñan jipañ ilo naaj jerbalin ekkal eo im ear pukottok jet rijerbal ro rekapeel ñan aer jipañ. Ear bareinwõt aintok gold, jelba, im jet kain al̦al̦ in wõjke jãn jikin ko ilo Tair im Saidon. M̦okta jãn an kar Devid mej, ear kwal̦o̦k ñan Solomon kõn jekjekin naaj tampel̦ eo. Devid ear ba: ‘Jeova ear kõm̦akũt ña bwe in jei men kein ñan kwe. Jeova enaaj jipañ eok. Kwõn jab mijak. Kwõn kajoor im peran, im kate eok ilo jerbal in.’