Ekar wõr juon jikin etan Õr me ejjab lukkuun ettol̦o̦k jãn Bebel. Ilo jikin in, armej ro rar kabuñ ñan elõñ kain anij ko im rar jab kabuñ ñan Jeova. Ak ekar wõr juon em̦m̦aan ilo Õr me ear kabuñ ñan Jeova wõt. Etan in Ebream.

Jeova ear ba ñan Ebream: ‘Etal jãn ãnin ãneem̦ im ro nukum̦, im etal ñan ãneo inaaj kwal̦o̦k waj ñan kwe.’ Innem Ear kallim̦uri im ba: ‘Kwõnaaj oktak im juon aelõñ el̦ap, im inaaj kõm̦m̦ani men ko rem̦m̦an ñan armej ro iaolepen lal̦ in kõn wõt kwe.’

Ebream ear jab jel̦ã ia eo Jeova ej jilkinl̦o̦k e ñane, ak ear kwal̦o̦k an lõke wõt Jeova. Innem Ebream, lio pãleen etan Sera, kab Tira, l̦al̦l̦ap eo jemãn im l̦eo naaj nejin etan Lot, rar kõpooji men ko m̦weieer im jino etal ilo ial̦ eo aer eaetok.

Kar 75 an Ebream iiõ ke e im baam̦le eo an rar tõparl̦o̦k ãneo Jeova ear kõn̦aan bwe ren loe. Etan ãneo in Kenan. Ilo jikin in, Anij ear kõnono ñan Ebream im ear kõm̦m̦ane kallim̦ur in ippãn: ‘Aolepen ãnin kwõj loe, inaaj lewaj ñan ro nejũm̦.’ Ak Ebream im Sera rar lukkuun rũtto im ear ejjel̦o̦k nejierro ajri. Innem ewi wãween an naaj Jeova kajejjet kallim̦ur in an?

Ebream im Sera rar pãlele ium̦win elõñ iiõ. Rar etal jãn m̦weo im̦weer elukkuun em̦m̦an ilo Õr im rar jokwe kiiõ ilo em̦ nuknuk ko. Ak Sera ear jab kwal̦o̦k an abn̦õn̦õ kõn wãween ko ear iiooni, kõnke ear lõke Jeova.

Joñan an kar Sera kõn̦aan juon nejin ajri ear ba ñan Ebream: ‘Ñe ewõr nejũm̦ ippãn lio karejera Hegar, inaaj bõke bwe en lukkuun nejũ.’ Tokãlik, Hegar ear kal̦otake juon nejin l̦addik. Im kar etan l̦adik eo in Ishmael.

Elõñ iiõ ko tokãlik ke Ebream ear 99 an iiõ im Sera ear 89 an iiõ, ekar wõr jilu aerro rilotok. Ebream ear kũrl̦o̦k erjel bwe ren itõn kakkije ium̦win juon wõjke im m̦õñã. Kwõjel̦ã ke kar wõn rilotok rein? Kar jilu enjel̦! Rar ba ñan Ebream: ‘Iiõ in lal̦, ilo ejja iien in wõt, kwe im lio pãleem̦ enaaj wõr juon nejimiro l̦addik.’ Sera ear pãd ilowaan em̦ nuknuk eo im roñjake. Ear ettõñ ippãn make im ba ilo bũruon: ‘Emaroñ ke lukkuun wõr nejũ ajri ke kiiõ ilel̦l̦ap?’

Iiõ eo tok juon, Sera ear kal̦otak juon nejin l̦addik, ãinwõt an kar enjel̦ eo an Jeova kallim̦ur. Innem Ebream ear likũt etan l̦adik eo, Aisak, mel̦el̦ein “Ettõñ.”

Emaroñ kar l̦alem an Aisak iiõ ke Sera ear lo an Ishmael kajjirere kake. Sera ear kõn̦aan kõjparok l̦adik in nejin, innem ear etal ñan ippãn Ebream im kajjitõk bwe en jilkinl̦o̦k Hegar im Ishmael jãn ippãer. Ilo jinoin, Ebream ear jab kõn̦aan kõm̦m̦ane men in. Ak Jeova ear kõjparok Aisak ilo an kar ba ñan Ebream: ‘Kwõn roñjake Sera. Inaaj lale Ishmael. Ak ikijjeen Aisak, kallim̦ur ko aõ renaaj jejjet im m̦ool.’

Lot kar l̦eo naaj nejin Ebream, im ear jokwe ippãn ilo Kenan. Juon iien, ekar etal im lukkuun lõñ menninmour ko nejierro. Joñan aer lõñ, ear jabwe ãneo ñan aolepeer. Kõn men in, Ebream ear ba ñan Lot: ‘Kõjro ejjab maroñ jokwe ippãn doon ilo juon wõt jikin. Jouj im kããlõt ijo kokõn̦aan etal ñane, im inaaj etal ñan bar juon jikin.’ Men in Ebream ear kõm̦m̦ane ej kaalikkar an jel̦ã l̦õmn̦ak kõn ro jet m̦okta jãn e.

Lot ear lo juon jikin eaiboojoj me ear pãd iturin jikin eo etan Sodom. Ear l̦ap dãn im lõñ ujooj ko remaroro ijin. Kõn men in, Lot ear kããlõte ijin, innem e im baam̦le eo an rar em̦m̦akũtl̦o̦k im jokwe ie. Tokãlik, rar bar em̦m̦akũt im jokwe ilo Sodom.

Armej ro ilo Sodom im ilo jikin eo juon epaak etan Gomorra rar lukkuun nana. Joñan aer nana, Jeova ear pepe bwe enaaj ko̦kkure jikin kein ruo. Ak ear kõn̦aan kõjparok Lot im baam̦le eo an. Kõn men in, ear jilkinl̦o̦k ruo enjel̦ bwe ren kõjjel̦ãik er im ba: ‘M̦õkaj im ilo̦k! Etal jãn jikin in bwe Jeova epojak in ko̦kkure.’

Ak Lot ear jab m̦õkaj im etal jãn ijin kõnke ear bõk an iien im kattoto. Kõn men in, enjel̦ ro rar jibwe pein Lot, kab pein lio pãleen im jiroñ ro ruo nejierro, im rar m̦õkaj in kadiwõj er jãn jikin in im ba: ‘Kom̦win ko! Ko bwe kom̦win mour, im jab reilik. Ñe kom̦ naaj reilik, kom̦ naaj mej!’

Ke Lot im baam̦le eo an rar tõpar jikin eo etan Zoar, Jeova ear ko̦wõtlo̦k kijeek ioon Sodom im Gomorra. Jikin kein ruo rar lukkuun jorrããn. Ke lio pãleen Lot ear jab pokake Jeova im reilikl̦o̦k, ear oktak im erom juon jurõn jo̦o̦l̦! Ak kõnke Lot im jiroñ ro ruo nejin rar pokake Jeova, rar jab jorrããn ak jako. Remaroñ kar lukkuun bũrom̦õj kõn an kar kõrã eo jineer jab pokake. Men in ej katakin kõj bwe elukkuun aorõk ñan ad pokake Jeova.

Ebream ear katakin Aisak, l̦adik eo nejin, ñan yokwe Jeova im ñan lõke aolepen kallim̦ur ko an. Juon iien Jeova ear kajjitõk ippãn Ebream ñan kõm̦m̦ane juon men elukkuun pen. Emaroñ kar 25 an Aisak iiõ ilo kar iien in. Ta eo ear kajjitõk ippãn ñan kõm̦m̦ane?

Anij ear ba ñan Ebream: ‘Jouj im bõk l̦adik n̦e ej make wõt nejũm̦, im katok kake ãinwõt juon menin katok ilo tol̦ eo ej pãd ilo jikin eo etan Moraia.’ Ebream ear jab jel̦ã ñan jidik etke Jeova ear kajjitõk ippãn bwe en kõm̦m̦ane men in. Ak ear roñjake im pokake Jeova.

Ilo jibboñõn raan eo tok juon, Ebream, Aisak, im ruo iaan rijerbal ro an, rar jino etal ñan Moraia. Ilo raan eo kein kajilu, rar reilo̦k im loi tol̦ ko. Ebream ear jiroñ rijerbal ro an bwe ren pãd wõt im kõttar bwe erro Aisak naaj etal im katok. Ebream ear lil̦o̦k kan̦e ko bwe Aisak en bũki, innem ear bõk juon bakbõk ippãn. Aisak ear kajjitõk ippãn jemãn im ba: ‘Ewi menninmour eo jenaaj katok kake?’ Ebream ear uwaak im ba: ‘Nejũ, Jeova enaaj letok juon.’

Ke erro kar tõparl̦o̦k tol̦ eo, erro kar kalõk juon jikin aerro katok. Innem Ebream ear lukwõje pein im neen Aisak im kõbabuuki ioon jikin katok eo.

Innem Ebream ear jibwe bakbõk eo. Ilo iien eo wõt ej kõm̦m̦ane men in, enjel̦ eo an Jeova ear kũr jãn lañ im ba: ‘Ebream! Kwõn jab kõm̦m̦an jabdewõt ñan l̦adik n̦e! Kiiõ ijel̦ã bwe kwõj tõmak ilo Anij kõnke kwaar pojak in katok kake l̦adik n̦e nejũm̦.’ Innem Ebream ear reilo̦k im loe juon jiip el̦orak ilo mar ko. Kõn men in, ear m̦õkaj im mejal̦e to ko ilo pein im neen Aisak, im ear bõktok jiip eo im katok kake.

Jino jãn iien in m̦aanl̦o̦k, Jeova ear n̦aetan Ebream, jeran. Kwõjel̦ã ke etke? Kõnke Ebream ear pokake im kõm̦m̦ani aolep men ko Jeova ear kõn̦aan bwe en kõm̦m̦ani. Ear pokake meñe jet iien ear jab jel̦ã etke Jeova ear kajjitõk ippãn ñan kõm̦m̦ane juon men.

Jeova ear bar kwal̦o̦k kallim̦ur eo an ñan Ebream ilo an kar ba: ‘Inaaj kajeraam̦m̦an eok, im inaaj koorl̦o̦k ro ineem̦.’ Bareinwõt, Jeova ear kallim̦uri Ebream im ba bwe enaaj kõjerbal baam̦le eo an ñan kajeraam̦m̦an aolep armej ro rem̦m̦an.