Juõn Ri Africa Ettã Buruen Eo Ear Yokwe Nan eo an Anij

RO REJ lolok Africa ekkã air bwilõñ kin an bidodo air jino juõn bwebwenato kin Bible ibben armij ro ilo ailiñ eo. Kajitõk ko einwõt, “Ta in Ailiñ in Anij?” ak “Ewõr ke juõn mejelan indio ñan abañ ko einwõt ñitta, nañinmij, tarinae, im kowadoñ?” ebidodo air kaitoklimoen armij ñan roñjake. Elõñ rej mõnõnõ in kõtlok bwe juõn ruwamaejet en kwalok uak ko jen Bible eo ñan ir. Men in ekkã an tellok ñan juõn katak kin Bible. Im ke ri katak ro rej kõmman wõnmanlok ko ilo jitõb, rej erom Ri Christian ro emwij air baptais.

Juõn ian Ri Africa ro moktata me ear emmakit ilo wãwen in kar kwalok kake ilo Bible ilo Jerbal 8:​26-​40. Ej juõn emaan in Ethiopia eo ear etal ñan Jerusalem ñan an kabuñ ñan Anij eo emol, Jehovah.

Einwõt ej walok ilo pija eo ilal, emaan in Ethiopia eo ej jeblak ilo chariot eo an ñan kabijuknen, im ej readi booklemlem eo. Juõn ruwamaejet ej kebak e im kajitõk: “Kwoj melele ke men eo kwoj konono kake?” Ilo ettã buru, Ri Ethiopia eo ej kwalok bwe ej aikwij bõk jibañ im ej akwelap ñan ruwamaejet eo, Ri Christian ri evanjel eo Philip, bwe en uwe ilo chariot eo. Inem ej kajitõk ibben Philip ñan kameleleik e kin ta melelen mõttan eo ilo Jeje Ko ej kab readi. Philip ej kamelele bwe ej juõn kanan me ej jitõñlok ñan mij eo an Messiah eo, Jesus Christ. Philip ej bareinwõt kwalok kin men ko jet ikijen “news eo emõn kin Jesus,” ejelok bere ekoba jerkakbiji eo an.

Elikin an roñ mol kein raibujuij, Ri Ethiopia eo ear kõnan erom juõn ri kaloran Jesus im ej kajitõk: “Ta ej bõprae iõ bwe in jab baptais?” Elikin an baptais, Ri Africa in ettã buruen ilo mõnõnõ ear jeblak ñan kabijuknen, im Bible eo ejjab bar konono kake.

Rainin, Ri Kennan ro an Jehovah rej jibañ elõñ million armij ro ibelakin lal ñan katak kin ejja “news eo emõn” wõt. Im rej kõmman enañin jiljino million katak kin Bible ko ilo ejelok wõnãn.