Kwar Jela Ke?
Ien bwinbwin ta eo rar kõmõne me ear tellok ñõn an kar Jisõs lotak ilo Betleem?
Ekkar ñõn Gospel eo an Luk, ke Sizar Augõstõs ear kõtellok kien eo ñõn aolep jikin ko rej ber iomin kien eo an Rom bwe ren bwinbwin oran armij ro, “ir otemjej rej ilok bwe ren jeje ir, jabrewõt iair ñõn jikin kwelok eo an.” (Luk 2:1-3) Bukwon eo an Josep, jemen Jisõs, kar Betleem, im ke Josep im Meri rar ilok ñõn bukwon eo ekkar ñõn kien eo, men in ear kõmõn bwe Jisõs en lotak ilo Betleem. Kar kõmõni bwinbwin kein ñõn an biruru air bõk owõj jen armij ro im bõk armij ro ñõn air ber ilo jar in tõrinae ko.
Ke ailiñ in Rom ear anjo ion ailiñ in Ijipt ilo yiõ eo 30 mokta jen ien lotak eo an Kraist, dri Ijipt ro rar kajerbale bwinbwin rõt in elõñ yiõ ko mokta jen an ailiñ in Rom kajerbale. Dri meletlet ro an lõl rej tõmak bwe dri Rom ro rar kajerbal ejja wãwen bwinbwin eo wõt dri Ijipt rar kõmõne ñõn aolep ailiñ ko rar ber iomin kajur eo an Rom.
Men in ej alikar jen nan in kakien eo an juõn komja in Rom eo ear iroij ion Ijipt ilo yiõ eo 104, elikin ran ko an dri jilik ro. Nan in kakien in jemaroñ loe kiõ ilo jikin kaluijuj ak Laibrãre eo an dri Britain, ej ba: “Gaius Vibius Maximus, Komja in Ijipt (ej ba): Ar lo bwe ej bar ien ñõn air ilok jen im ñõn im ñõn bwinbwin oran armij ro, ej juõn menin aikwij ñõn ar kõmõn bwe aolep ro im rej jokwe ilo jikin ko ilikin bukwon ko air ren jeblak ñõn kabijukneir, bwe ren maroñ dreloñ ilo bwinbwin eo, im bwe ren maroñ lale im kejbãrok wãto ko air.
Etke Josep ear lemnok in lelok ñõn Meri juõn peba in jibel ke erro jañin kar mare?
Ekkar ñõn Gospel eo an Matu, Josep ear lo bwe Meri ebõroro ke “rejro karõk dron” mokta jen airro mare. Josep ear jab jela bwe Meri ear bõroro “kin Jitõb Kwojarjar,” im emaroñ kar lemnok bwe Meri ear jab tiljek ñõn e, inem ear lemnok in jibel jen e.—Matu 1:18-20.
Iben dri Ju ro, rej watõk bwe ñe ruo armij emwij air kalimuri dron einwõt ñe emwij air mare. Bõtab, rein ruo rejjab jokwe iben dron einwõt dri belele ro mae ien eo ear rerelok air mare. Ñe ruo armij rej kalimuri dron ñõn air mare kar watõk men in bwe ej juõn kalimur ebin, kin men in elañe leo ej ukot an lemnok ak bwelen kin jet un ko rejjab mare, jiroñ eo ejamin mareik bar juõn likao mae ien emwij an bõk juõn peba in jibel. Elañe leo ej mij mokta jen an mareik kõra eo ear kalimur ñõn an mareiki, kar watõk lio bwe ej kõra ejoko belen. Ak elañe kõra eo ear lũñ ilo ien eo emwij an kar kalimur ñõn an mareik juõn likao, inem rar watõk lio einwõt juõn dri lũñ im ear tellokin mij.—Duteronomi 22:23, 24.
Ej alikar bwe Josep ear kile ta eo enaj kar walok ñõn Meri elañe ro jet renaj kar jela bwe ear bõroro. Meñe ear jela bwe ear aikwij bõk mantak wãwen eo ñõn ro ej tellokir, ak ear kõnan kejbãrok im ear jab kõnan kajok Meri. Kin men in, ear bebe in jibel jen Meri ilo ittino. Elañe eor juõn peba in jibel iben juõn kõra eo eor nejin, menin enaj kamol bwe emwij an kar mare mokta.
[Kamelele in juõn pija ilo peij 18]
Kien eo an komja in Rom eo ilo Ijipt ñõn bwinbwin oran armij, ilo yiõ eo 104.
[Kamelele in juõn pija ilo peij 18]
© The British Library Board, all rights reserved (P.904)