Katak eo Ejjab Mol Ken Kalailim: Meri Ej Jinen Anij

Ewi wãwen an kar katak in ejjab mol jino walok? “Mõnit eo ñõn koutiej jinen Anij ear laplok ke . . . jar in dri pegan ro rar ibweptok ñõn kabuñ eo . . . Tõmak im lemnok ko air [an dri pegan ro me rar oktõk ñõn kabuñ in Kristian] rar ejaak iomin elõñ tausan yiõ ko mantak ikijen kabuñ ñõn anij kõra eo elap im ‘virjin eo ekwojarjar.’ ”a

Ta eo Baibel ej katakin kake? “Kwo naj bõroro, im kemour nejõm man, im kwo naj likit etan Jisõs. E naj laplap, im naj naetan Nejin Eo Eutiejtata. . . . im kin men in Eo kwojarjar e naj lotak naj likit etan Nejin Anij.”​—Luk 1:​31-​35.

Eon kein rej kwalok ilo alikar bwe Meri ear jinen “Nejin Anij,” im ear jab jinen Anij. Anij emaroñ ke kar ber iloan lojen Meri elañe ‘lõñ ko re jab bwe ñõn An ber’? (1 Kiñ Ro 8:​27) Meri mõke ear jab ba bwe men in ear walok. Katak eo kin jilu anij ilo juõn ear kõmõn bwe armij ren bwok kin wõn Meri. Ke Kumi in dri tel ro ilo Epesõs rar kwalok ñõn aolep bwe Meri ej Theotokos (juõn nan in Grik me ej melelen “eo ear keutak Anij”), ak “Jinen Anij,” ilo yiõ eo 431, rar kõmõn bwe en walok mõnit eo ñõn kabuñ ñõn Meri. Jikin kwelok eo ilo Epesõs, ijo kumi in dri tel ro ilo kabuñ eo rar kweloklok ie, kar jikin eo elap me armij ro rar kabuñ ñõn ekjõp ko ie im rar koutiej anij kõra eo air etan Artemis, iomin elõñ buki yiõ ko.

Inem elõñ ian wãwen ko kin kabuñ ñõn ekjõp in Artemis me ear “wõtlok jen lõñ,” kar kobaiki iben wãwen kabuñ ñõn Meri, im juõn iair kar ikijen mõnit eo ilo air maaj. (Jerbal 19:35, UBS) Bar juõn mõnit me jidrik kin jidrik ear jino koba iben katak ko an Kristian, kar mõnit eo ñõn air kajerbal ekjõp ko kin Meri im ro jet ilo ien air kabuñ.

[Kamelele eo itulal]

Keiri eon kein ilo Baibel: Matu 13:53-​56; Mark 3:​31-​35; Luk 11:27, 28

MOL EO:

Meri ear jinen Nejin Anij, im ear jab jinen Anij. Katak eo ejjab mol kin jilu anij ilo juõn ear tellok armij ñõn air kabuñ ñõn Meri einwõt Jinen Anij