Moses—Juon Em̦m̦aan Ettã Bũruon
TA IN ETTÃ BÕRO?
Juon armej me ettã bũruon eban l̦õmn̦ak bwe em̦m̦anl̦o̦k im eutiejl̦o̦k jãn ro jet. Bareinwõt, juon eo ettã bũruon ejel̦ã bwe ej juon ri jerawiwi ãinwõt armej otemjej im bwe ewõr joñan maroñ ko an.
EWI WÃWEEN MOSES EAR KWAL̦O̦K AN ETTÃ BŨRUON?
Moses ear jab kõtl̦o̦k bwe maroñ eo an en kõm̦m̦an bwe en oktak im utiej bũruon. Ñe ro jet rej kamaroñ juon ñan tõl, ekkã ad maroñ kile el̦aññe armej in ettã bũruon ak eutiej bũruon. Juon ri jeje etan Robert G. Ingersoll ear ba bwe epidodo ñan jel̦ã el̦aññe juon armej ettã bũruon ak eutiej bũruon ñe jej lale wãween an kõjerbal maroñ eo an ioon armej ro. Eñin unin jejel̦ã bwe Moses ear kwal̦o̦k juon joñak em̦m̦an kõn ettã bõro. Ewi wãween?
Jeova ear kamaroñ Moses bwe en tõl Ri Israel ro. Meñe ear l̦ap an Moses maroñ ioon armej ro, bõtab ear jab oktak im utiej bũruon. Ñan waanjoñak, l̦õmn̦ak m̦õk kõn wãween an kar kõm̦adm̦õde abõn̦õn̦õ eo an jet kõrã kõn jolõt ko aer jãn jemãer. (Bõnbõn 27:1-11, UBS) Ear jab pidodo ñan an Moses uwaake kajjitõk ak abõn̦õn̦õ eo aer kõnke pepe eo enaaj kar kõm̦m̦ane eban kar jelõt wõt kõrã ro ak enaaj bar jelõt ro ilo epepen ko tokãlik.
Ta eo Moses ear kõm̦m̦ane? Kõnke e eo ej tõl Ri Israel ro, ear ke l̦õmn̦ak bwe ejel̦ã kadede ta eo enaaj kõm̦m̦ane ñan kõm̦adm̦õde apañ eo? Ear ke lõke e make im l̦õmn̦ak bwe emaroñ kõm̦adm̦õde apañ eo kõnke ekapeel, el̦ap an imminene, im el̦ap an jel̦ã kõn l̦õmn̦ak ko an Jeova?
Bõlen juon eo eutiej bũruon en kar l̦õmn̦ak rot in. Ak Moses ear jab. Baibõl̦ ej ba: “Moses ear kwal̦o̦k abn̦õn̦õ eo aer ñan Irooj” ak Jeova. (Bõnbõn 27:5, UBS) Baj l̦õmn̦ak m̦õk! Meñe emootl̦o̦k de 40 iiõ in an Moses tõl Ri Israel ro, bõtab ear jab atartar ioon make. Ear atartar wõt ioon Jeova im lõke e. Men in ej kaalikkar bwe ear lukkuun ettã bũruon Moses.
Moses ear jab l̦õmn̦ak bwe e wõt eo ej tõllo̦kũn ñan tõl. Ear m̦õn̦õn̦õ ke Jeova ear kõtl̦o̦k bwe Ri Israel ro jet ren ri kanaan. (Bõnbõn 11:24-29) Ke jemen lio ippãn ear jiroñ e ñan kããlõt jet em̦m̦aan ñan jipañe ilo jerbal ko an, ear kõttãik e im kõm̦m̦ane men eo ear ba. (Exodus 18:13-24) Im m̦oktal̦o̦k jãn an mej, meñe ear kajoor wõt, ak ear kajjitõk ippãn Jeova ñan jitõñ juon ñan pinej jenkwan. Ke Jeova ear kããlõt Joshua, Moses ear lukkuun rejetake em̦m̦aan in kõn aolepen bũruon. Ear bareinwõt rõjañ armej ro ñan l̦oor tõl eo an Joshua ñan Ãnen Kallim̦ur eo. (Bõnbõn 27:15-18, UBS; Duteronomi 31:3-6; 34:7, UBS) Ilo m̦ool, Moses ear watõk bwe ej juon jeraam̦m̦an ñan tõl Ri Israel ro ñan kabuñ ñan Jeova. Bõtab, ear jab utiej bũruon im l̦õmn̦ak wõt kõn e make.
TA KO JEJ KATAK JÃN MOSES?
Jen jab utiej bõro kõn maroñ ak kapeel ko ad. Keememej: Bwe jen maroñ jerbal ñan Jeova, ej aikuj ettã bũruod. El̦apl̦o̦k an aorõk ippãn Jeova ñe ettã bũruod jãn ñe ewõr ad kapeel. (1 Samuel 15:17) Ñe ettã bũruod, jenaaj kate kõj ñan l̦oore naan in kakapilõk in jãn Baibõl̦: “Kwõn lõke Jeova kõn aolepen bũruom̦, im kwõn jab atartar ioon jel̦ãl̦o̦kjen̦ eo am̦.”—Jabõn Kõnnaan 3:5, 6.
Joñak eo an Moses ej katakin kõj ñan jab l̦õmn̦ak bwe jem̦m̦anl̦o̦k im aorõkl̦o̦k jãn ro jet kõn wõt maroñ ko ewõr ippãd ak jerbal ko jej kõm̦m̦ani.
Ewi wãween joñak eo em̦m̦an an Moses kõn ettã bõro emaroñ jipañ kõj? Ñe jej kate kõj ñan kwal̦o̦k ettã bõro, jenaaj kõm̦m̦an bwe en pidodol̦o̦k an armej ro jet jerbal ippãd, im renaaj kõn̦aan epaake kõj. Men eo eaorõkl̦o̦k ej bwe Jeova, eo ebar ettã bũruon, enaaj buñbũruon kõn kõj. (Sam 18:35) “Anij ej jum̦ae ro eutiej bũrueer, ak ej jouj ñan ro ettã bũrueer.” (1 Piter 5:5, UBS) Eñin unin eaorõk bwe jen kwal̦o̦k ettã bõro ãinwõt kar Moses!