Rijjilõk ro rar pokake kien eo an Jesus ñan kajeedede nuuj eo em̦m̦an ilo aolepen lal̦ in. Ilo iiõ eo 47, em̦m̦aan ro me rar tõl rũttõmak ro ilo Antiok rar jilkinl̦o̦k Paul im Barnebas bwe ren ilo̦k im kwal̦o̦k naan ilo jet aelõñ. Rukwal̦o̦k naan rein ruo rekijejeto rar itoitak ilo aolepen Eijia Minor (raan kein rej ba Turkey) im etal ñan jikin ko ãinwõt Derbe, Listra, im Aikoniõm.

Paul im Barnebas rar kwal̦o̦k naan ñan aolep armej, jekdo̦o̦n rũm̦weiie ak rijjeram̦õl, im jekdo̦o̦n ro reddik ak ro rerũtto. Elõñ armej rar m̦õn̦õn̦õ in roñjake im tõmak katak ko rem̦ool kõn Christ. Ke Paul im Barnebas rar kwal̦o̦k naan ñan kabna eo an Saiprõs etan Serjiõs Paulõs, juon rianijnij ear kajjioñ kabõjrak erro. Ak Paul ear ba ñan rianijnij in: ‘Jeova enaaj kajeik eok.’ Ilo iien eo wõt, rianijnij in ear pilo. Ke kabna eo ear lo men in, ear kiiõ oktak im juon rũttõmak.

Paul im Barnebas rar kwal̦o̦k naan aolep jikin. Rar kwal̦o̦k naan jãn em̦ ñan em̦, ilo jikin wia ko, itõrerein ial̦ ko, im ilo im̦õn kabuñ ko an RiJu. Ke erro kar kõmour juon em̦m̦aan ilo Listra me ear jaje etetal, armej ro me rar lo menin bwilõñ in rar l̦õmn̦ak erro jim̦or rej anij. Kõn men in, rar kajjioñ in kabuñ ñan erro. Ak Paul im Barnebas rar kabõjrak er im ba: ‘Kom̦win kabuñ ñan Anij wõt. Kõm̦ro bar armej ãinwõt kom̦.’ Innem jet iaan RiJu ro rar itok im kajjioñ ukot an armej ro l̦õmn̦ak im kareel er bwe ren jum̦aik Paul. Armej rein rar kade im kadiwõje nabõjl̦o̦k jãn Listra, im rar likũti wõt kõnke rar l̦õmn̦ak emej. Ak Paul ear mour wõt! Ilo m̦õkaj, rũttõmak ro rar itok im jipañe im rar bar kadel̦o̦ñe ñan jikin in. Tokãlik, Paul ear jepl̦aak ñan Antiok.

Ilo iiõ eo 49, Paul ear bar kõm̦m̦ane juon an tũreep in kwal̦o̦k naan. Ear jepl̦aak ñan Eijia Minor im lol̦o̦k rũttõmak ro ie, innem ear etal wõt ñan jikin ko rettol̦o̦k ilo Europe im kwal̦o̦k naan kõn nuuj eo em̦m̦an. Ear etal ñan Atens, Epesõs, Pilippai, Tessalonika, im jikin ko jet. Ro rar kobal̦o̦k ippãn ilo tũreep in kar Sailas, Luk, im juon likao etan Timote. Ereañ kar jerbal ippãn doon ñan kajutak eklejia ko im jipañ rũttõmak ro bwe ren kajoor ilo tõmak. Ium̦win juon jimattan iiõ, Paul ear pãdwõt ilo Korint im kõkajoor rũttõmak ro ijo. Ear kwal̦o̦k naan, katakin, im jeje lõta ñan elõñ eklejia ko. Ear bareinwõt jerbal ilo an kõm̦m̦an em̦ nuknuk. Tokãlik, Paul ear bar jepl̦aak ñan Antiok.

Innem ilo kar iiõ eo 52, Paul ear jino kõm̦m̦ane tũreep eo an kein kajilu. Ear jino jãn Eijia Minor im etal ñan ijoko itueañ im tõpar Pilippai, innem ear wanlal̦l̦o̦k wõt ñan Korint. Ear pãd ilo Epesõs ium̦win jet iiõ, im ear katakin im kõmour armej ro ijo im jipañ eklejia eo. Bareinwõt, aolep raan ear jutak im kõm̦m̦an katak im̦aan armej ro ilo juon m̦õn jikuul̦. Elõñ armej rar m̦õn̦õn̦õ in roñjake im rar kõm̦m̦an oktak ilo mour ko aer. Ãliktata, Paul ear etal ñan Jerusalem ãlikin an kar kwal̦o̦k naan ilo elõñ aelõñ ko.

Ilo Pilippai, ear wõr juon jiroñ me ej rũkõm̦akoko im juon jetõb ettoon ear del̦o̦ñ ñan ippãn. Jetõb ettoon in ear kõjerbale jiroñ in bwe en bubu ak kwal̦o̦k kõn kobban ilju im jekl̦aj. Joñan, jiroñ in ear kõm̦m̦an elõñ jããn ñan armej ro ear jerbal im kõm̦akoko ñan er. Ke Paul im Sailas rar itok ñan Pilippai, jiroñ in ear l̦oor erro ium̦win elõñ raan, im jetõb ettoon eo ear kõm̦m̦an bwe en lam̦õj im ba: “Em̦m̦aan rein rej ri-karejeran Anij eo Eutiejtata.” M̦ae juon raan, Paul ej kab ba ñan jetõb ettoon in: ‘Ilo etan Jesus, kwõn diwõjl̦o̦k jãn jiroñ n̦e!’ Innem jetõb ettoon eo ear diwõjl̦o̦k.

Armej ro me jiroñ in ej kõm̦akoko ñan er rar lukkuun illu ke rar kile bwe ejako kiiõ aer naaj kõm̦m̦an jããn jãn e. Kõn men in, rar bõkl̦o̦k Paul im Sailas ñan ippãn rikien ro im ba: ‘Armej rein ruo rej rupe kien im kainepataik aolep armej ro ilo Pilippai in!’ Innem rikien rein rar jiroñ rijerbal ro bwe ren deñl̦o̦ke erro im likũt erro ilo kalbuuj. L̦eo me ear lale im̦õn kalbuuj eo ear likũt erro ilo ijo emaroktata im elukkuun pen ñan rõl̦o̦k im diwõj jãne, innem ear l̦ake neerro ikõtaan al̦al̦ ko.

Ilo ijin, Paul im Sailas rar al im nõbar Jeova, im rũkalbuuj ro jet rar roñjake aerro al. Ak ilo jidimkij, ear m̦akũtkũt lal̦ ke ej lukwõn boñ, im aolepen jikin kalbuuj eo ear em̦m̦akũtkũt jãn lõñ ñan lal̦. Innem kõjãm ko ilo jikin kalbuuj eo rar pel̦l̦o̦k, im jeen im l̦ak ko an rũkalbuuj ro rar tũm̦. L̦eo ej lale im̦õn kalbuuj eo ear kakõtkõt l̦o̦k ñan ijo elukkuun pen rõl̦o̦k jãne ilo jikin kalbuuj eo, im ear loe an kõjãm ko pel̦l̦o̦k. Ke ej lo aer pel̦l̦o̦k, ear l̦õmn̦ak bwe em̦õj an aolep rũkalbuuj ro ko. Kõn men in, ear bõk juon jãje bwe en itõn m̦an e make.

Ke ej itõn kõm̦m̦ane men in, Paul ear lam̦õjl̦o̦k ñane im ba: ‘Jab m̦an eok make! Kõm aolep im pãd ije!’ L̦ein ear buul̦ l̦o̦k ñan ippãn Paul im Sailas im buñpedo im̦aan mejãerro, im ej kajjitõk ippãerro: “Ta eo ij aikuj kõm̦m̦ane bwe in maroñ bõk lo̦mo̦o̦r?” Erro uwaak im ba ñane: ‘Kwe im ro ilo m̦weo im̦õm̦ rej aikuj tõmak ilo Jesus.’ Innem Paul im Sailas rar katakin er kõn naan ko an Jeova, im l̦ein im aolep ro ilo m̦weo im̦õn rar peptaij.

Timote ear juon likao ilo eklejia eo ilo Listra. Jemãn ear juon RiGrik, im jinen ear juon RiJu. Jãn ke Timote ear dik wõt, Eunis kõrã eo jinen im lel̦l̦ap eo jibwin etan Lois rar jim̦or katakin Timote kõn Jeova.

Ke Paul ej lol̦o̦k eklejia eo ilo Listra ilo tũreep in kwal̦o̦k naan eo an kein karuo, ear kile an Timote lukkuun yokwe rũttõmak ro jein im jatin im an m̦õn̦õn̦õ in jipañ er. Paul ear m̦õn̦õn̦õ in bõke Timote bwe en etal ippãnl̦o̦k ilo tũreep eo an. Ilo aerro kar jerbal ippãn doon, Paul ear jipañ Timote bwe en jel̦ã kilen kwal̦o̦k naan im katakin ro jet kõn nuuj eo em̦m̦an.

Anij ear kõjerbal jetõb kwõjarjar eo an ñan tõl Paul im Timote ilo aolepen ial̦ ko aerro. Juon boñ, Paul ear lo juon em̦m̦aan ilo juon pijen im ej ba ñane bwe en itok ñan Masedonia im jipañ armej ro ie. Kõn men in, Paul, Timote, Sailas, im Luk, rar ilo̦k ñan Masedonia im kwal̦o̦k naan ñan armej ro im kajutak jet eklejia.

Ilo jikin eo etan Tessalonika me ej pãd ilo Masedonia, elõñ em̦m̦aan im kõrã ro ijin rar erom Kũrjin. Ak ear wõr jet RiJu ro rar ebbanbane Paul, Timote, im Sailas. Kõn men in, RiJu rein rar kakobaiktok elõñ armej bwe ren jum̦aik er im bõkl̦o̦k er ñan ippãn ruutiej ro an Tessalonika. Rar lam̦õj im ba: ‘Armej rein rej jum̦ae kien eo an Rom!’ Innem kõnke Paul, Timote, im Sailas rar pãd ilo kauwõtata, erjel rar ko ñan Beria ilo boñõn eo wõt.

Armej ro ilo Beria rar lukkuun m̦õn̦õn̦õ in katak kõn nuuj eo em̦m̦an jãn rein, joñan elõñ RiGrik im RiJu ro ilo ijin rar erom rũttõmak. Ak ke jet RiJu rej itok jãn Tessalonika im kõm̦m̦an poktak, Paul em̦õkaj im etal ñan Atens. Ak kõn Timote im Sailas, erro kar jim̦or pãdwõt ilo Beria im kõkajoor rũttõmak ro ie. Tokãlik, Paul ear jilkinl̦o̦k Timote bwe en bar ro̦o̦ll̦o̦k ñan Tessalonika im jipañ rũttõmak ro ijo kõn an l̦ap aer kar iioon jum̦ae im eñtaan jãn rũkõjdat ro. Tokãlik, Paul ear jilkinl̦o̦k Timote bwe en lol̦o̦k elõñ eklejia ko jet im kõkajoor er.

Paul ear ba ñan Timote: ‘Ro rekõn̦aan jerbal ñan Anij, renaaj iioon eñtaan.’ Timote ear iioon eñtaan im ear pãd ilo kalbuuj kõn tõmak eo an. Ak ear m̦õn̦õn̦õ bwe ear maroñ kam̦ool an tiljek ñan Jeova.

Paul ear ba ñan RiPilippai ro: ‘Ij jilkinwaj Timote ñan kom̦. Enaaj katakin kom̦ mour ãinwõt juon rũkarejeran Jeova. Im enaaj katakin kom̦ kilen kwal̦o̦k naan.’ Paul ear jel̦ã bwe emaroñ lõke Timote. El̦ap aerro kar epaake doon im erro kar jerbal ippãn doon ium̦win elõñ iiõ ko.

Tũreep in kwal̦o̦k naan eo kein kajilu an Paul ear jem̦l̦o̦k ilo Jerusalem. Eñin ijo rar jibwe im likũti ilo kalbuuj. Juon boñ, Jesus ear ba ñane ilo juon pijen: ‘Kwõnaaj etal im kwal̦o̦k naan ilo aelõñin Rom.’ Tokãlik rar bõkl̦o̦k Paul jãn Jerusalem ñan Seseria, im ear kalbuuj ijin ium̦win ruo iiõ. Ke kar ekajete im̦aan kabna eo etan Festõs, Paul ear ba: ‘Ij akwel̦ap bwe Sizar en ekajete eõ ilo Rom.’ Innem Festõs ear ba: ‘Eokwe kõnke kokõn̦aan bwe Sizar en ekajete eok, kwõnaaj etal ñan ippãn Sizar.’ Kõn men in, rar bõkl̦o̦k Paul bwe en uwe ilo wa eo ej jerakl̦o̦k ñan Rom, im rũttõmak ro ruo, Luk im Aristarkõs, rar etal ippãnl̦o̦k.

Ke rej pãd ilo lom̦al̦o, ear wal̦o̦k juon l̦añ el̦ap ium̦win elõñ raan. Joñan, aolep rar l̦õmn̦ak bwe renaaj mej. Ak Paul ear ba: ‘Em̦m̦aan ran̦, em̦õj an juon enjel̦ kõnono ñan ña ilo ettõn̦ak im ba: ‘Paul, kwõn jab mijak. Kwõnaaj baj tõparl̦o̦k wõt Rom, im aolep ro ilo wa in reban jako.’ Kõn men in, kom̦win peran! Kõj aolep jeban mej.’

L̦añ eo ear wõnm̦aanl̦o̦k wõt ium̦win 14 raan, innem rel̦ak reilo̦k, reloe juon ãne etan Malta. Wa eo rar uwe ie ear ãr ak itaak, im ear rup im bwilo̦k m̦õttan ko ie. Ak aolep ro 276 ilo wa eo rar maroñ tõpar ãne. Jet rar aõ ãnel̦o̦k, ak ro jet rar bõk m̦õttan ko rar rup jãn wa eo im eppepe kaki l̦o̦k ñan parijet. Armej ro ilo Malta rar lale er im ittil kijeek bwe ren kõmmããn̦ãn̦.

Jilu allõñ tokãlik, ruwaj ro rar bõk Paul im jerakl̦o̦k ñan Rom ilo bar juon wa. Ke ear tõparl̦o̦k ijin, rũttõmak ro jein im jatin rar itok bwe ren iioone. Ke Paul ej reilo̦k im lo er, ear kam̦m̦oolol Jeova im ear bar jino an peran. Meñe ear juon rũkalbuuj, ak kar kõtl̦o̦k an jokwe ilo juon em̦ me juon ruwaj ear aikuj pãd im waje. Ium̦win ruo iiõ in an kar kalbuuj ilo m̦wiin. Armej ro rekõn lol̦o̦ke, im ekõn kwal̦o̦k naan ñan er kõn Aelõñ eo an Anij im katakin er kõn Jesus. Bareinwõt Paul ear jeje lõta ñan eklejia ko ilo Eijia Minor im ilo Judia. Ealikkar bwe Jeova ear lukkuun kõjerbale Paul ñan kajeedede nuuj eo em̦m̦an ñan elõñ aelõñ ko.