Jen M̦õn̦õn̦õ kõn Iien Pãlele eo an L̦aam̦ Eo!

1, 2. (1) An wõn kõm̦are eo me ro ilañ renaaj lukkuun m̦õn̦õn̦õ kake? (2) Ta kajjitõk ko jej kijooror in lo uwaakier ilo katak in?

ÑE JEJ kõpooje juon iien kõm̦are, ekkã an bõk iien ñan kõppojak ñan iien rot in. Kiiõ jenaaj bwebwenato kõn iien kõm̦are eo an juon kiiñ me enañin de 2,000 iiõ in an aolep kõppojak ñane! M̦õttan wõt jidik, kiiñ in enaaj kobal̦o̦k ippãn kõrã eo naaj pãleen. Ilo iien in ekam̦õn̦õn̦õ, enaaj el̦l̦aaj ainikien kõjañjañ ko ilowaan m̦weo im̦õn Kiiñ eo, im ainikien enjel̦ ro ilañ renaaj al im ba: ‘Kom̦win nõbar Jeova! Adwõj Anij L̦apl̦ap. Jen lañlõñ im m̦õn̦õn̦õ; jen nõbar an utiej! Bwe emoottok iien pãlele eo an L̦aam̦ eo, im em̦õj an lio pãlele kalitlit e make ñane.’​—Revelesõn 19:6, 7, UBS.

² ‘L̦aam̦ eo’ me eoon in ej kõnono kake ej Jijej Kũraij. (Jon 1:29) Ro ilañ renaaj kanooj m̦õn̦õn̦õ ilo naaj iien pãlele ak kõm̦are eo an ilo kõkkar. Kain rot nuknuk ko Jijej enaaj kõn̦aki ilo iien kõm̦are eo? Wõn kõrã eo enaaj m̦areiki ilo kõkkar? Ewi wãween kar kõpooje kõrã in ñan iien in? Ñããt iien kõm̦are in? Jejel̦ã bwe enaaj l̦ap an ro ilañ m̦õn̦õn̦õ ilo iien in, ak ta kõn ro me renaaj mour ijin ioon lal̦ ñan indeeo, renaaj ke bar m̦õn̦õn̦õ? Eokwe, ejjel̦o̦k pere bwe jej kijooror in lo uwaak in kajjitõk kein ilo katak in. Innem, em̦m̦an jen wõnm̦aanl̦o̦k im etale eoon ko tok jet ilo bok in Sam 45 jebta.

EÑAJ BWIIN NUKNUK KO AN

3, 4. (1) Ta eo ri jeje sam ear ba kõn nuknuk in m̦are ko an Kiiñ eo? (2) Ta eo ej kal̦apl̦o̦k wõt an Kiiñ eo m̦õn̦õn̦õ ke ej epaaktok iien an m̦are? (3) Wõn “lerooj” eo im “kõrã ro nejin kiiñ” me rej bar m̦õn̦õn̦õ ippãn Kiiñ eo?

³ Riit Sam 45:8, 9. Jijej Kũraij, eo im enaaj m̦are ilo kõkkar, ej kõn̦ak nuknuk ko raiboojoj an kiiñ ñan iien pãlele ak kõm̦are eo. Nuknuk ko an rebwiin kañajñaj ko kar kãreiki jãn “kein tol̦aj ko rem̦m̦antata” ãinwõt mõr im kassia. Ilo iien ko etto, Ri Israel ro rekõn kar kobaiki men kein ilo oil in ekkapit eo ekwõjarjar me em̦õj kãreiki ñan juon bõkãñaj.​—Exodus 30:23-25, UBS.

⁴ Ainikien kõjañjañ ko ilañ me rej jañ ilowaan m̦weo im̦õn Kiiñ eo, rej kõm̦m̦an bwe en l̦apl̦o̦k wõt an Kiiñ in m̦õn̦õn̦õ ke ej epaaktok iien an m̦are. Wõn ro ilañ me rej bar m̦õn̦õn̦õ ippãn? Ej “lerooj” eo me ej kõkkar kõn m̦õttan in doulul eo an Anij ilañ me ebar kitibuj “kõrã ro nejin kiiñ” ak enjel̦ ro rekwõjarjar. Ainikien ko ilañ rej ba: “Jen lañlõñ im m̦õn̦õn̦õ; . . . Bwe emoottok iien pãlele eo an L̦aam̦ eo.”

EPOJAK KÕRÃ EO ÑAN IIEN KÕM̦ARE EO

5. Wõn kõrã eo Jijej enaaj m̦areiki ilo kõkkar?

⁵ Riit Sam 45:10, 11. Em̦õj ad jel̦ã bwe Jijej Kũraij ej Kiiñ eo me ej itõn m̦are. Ak wõn kõrã eo enaaj m̦areiki ilo kõkkar? Eokwe, ejjab lukkuun kõrã men in. Ilo m̦ool, kõrã in ej kõkkar kõn aolep ri kapit ro me oraer ej 144,000. Im Jijej ej e eo im ej bõran eklejia eo an ri kapit rein. (Riit Epesõs 5:23, 24.) Ri kapit rein renaaj irooj im tõl ippãn Kũraij ilo Aelõñ eo an Anij ilañ. (Luk 12:32) Bareinwõt, rej “l̦oor L̦aam̦ eo ijo jabdewõt Ej etal ie.” (Revelesõn 14:1-4) Rej erom “lio pãleen L̦aam̦ eo” im ijo jikier enaaj pãd ilo lañ ippãn L̦aam̦ eo.​—Revelesõn 21:9; Jon 14:2, 3.

6. (1) Etke kar n̦aetan ri kapit ro bwe rej “kõrã eo nejin kiiñ”? (2) Etke kar jiroñ er bwe ren mel̦o̦kl̦o̦k ri aelõñ ak armej ro aer?

⁶ Bok in Sam ej kwal̦o̦k bwe kõrã in me enaaj m̦are ej “nejin kiiñ.” (Sam 45:13) Wõn “kiiñ” in? Ej Jeova. Jeova ear bõk ri kapit ro bwe ren “nejin.” (Rom 8:15-17, UBS) Im kar jiroñ ri kapit rein: “Kwõn mel̦o̦kl̦o̦k ri aelõñ ro am̦ im m̦õn jem̦am̦.” Kõnke ri kapit rein rej kõkkar kõn kõrã eo me enaaj m̦are ilañ, rej aikuj kiiõ ‘kõl̦mãnl̦o̦kjen̦ kõn men ko ilañ, im jab kõn men ko ioon lal̦.’​—Kolosse 3:1-4.

7. (1) Ta eo Kũraij ear kõm̦m̦ane bwe en kõpooje kõrã eo enaaj pãleen ilo kõkkar ñan iien kõm̦are eo an? (2) Ta l̦õmn̦ak eo an kõrã in kõn Kiiñ eo enaaj pãleeke?

⁷ Ium̦win elõñ buki iiõ ko, Kũraij ear kõpooje kõrã eo enaaj pãleen ilo kõkkar ñan iien pãlele ak kõm̦are eo me enaaj wal̦o̦k ilañ. Rijjilõk Paul ear je im ba bwe Kũraij ear “yokwe eklejia, im make lel̦o̦k E kõn e, bwe En kokwõjarjar e, ke Ear karreoik e ilo naan kõn kwal̦kol̦ kõn dãn, bwe En lel̦o̦k eklejia ñan E make wõt eaiboojoj, im ejjel̦o̦k an mããr, ak l̦oktõktõk ak jabdewõt iaan men rot kein, a bwe en kwõjarjar im ejjel̦o̦k n̦otaan.” (Epesõs 5:25-27) Paul ear ba ñan ri kapit ro ilo Korint: ‘Ij kam̦o kõn kom̦ ilo kam̦o ekkar ñan Anij, bwe iar karõk kom̦ ñan juon pãleemi, bwe in lel̦o̦k kom̦ ãinwõt bõjin erreo ñan Kũraij.’ (2 Korint 11:2) Kiiñ eo, Jijej Kũraij, ej watõk kõrã in naaj pãleen ilo kõkkar bwe edeo̦. Etke? Kõnke wãween an kabuñ ej erreo im ej kabuñbũruon Anij. Im kõrã in ej badikdik ñan Kiiñ eo enaaj pãleeke, im ej watõke bwe ej an “irooj.”

‘REJ TÕLL̦O̦K KÕRÃ EO ÑAN KIIÑ EO’

8. Etke ejejjet an kar ri jeje sam ba bwe elukkuun “aiboojoj” im deo̦ kõrã eo naaj pãleen Kiiñ eo?

⁸ Riit Sam 45:13, 14. Em̦õj kõpooje kõrã eo ãinwõt “lio pãlele ej lõtlõt im pojak in wõnm̦ae l̦eo pãlele,” im elukkuun “aiboojoj” im deo̦ ñan iien m̦are eo an ippãn Kiiñ eo. Ilo Revelesõn 21:2 (UBS), ej keidi kõrã in ñan jikin kweilo̦k eo etan Jerusalem Ekããl. Jikin kweilo̦k in ej romaak kõn “aiboojoj an Anij” im “meram eo an ej ãinwõt dekã ekanooj aorõk, ãinwõt dekã jasper alikkar ãinwõt kristal.” (Revelesõn 21:10, 11) Ilo bok in Revelesõn, ej kwal̦o̦k kõn joñan aiboojoj eo an Jerusalem Ekããl. (Revelesõn 21:18-21) Eñin unin ri jeje sam ear ba bwe elukkuun “aiboojoj” im deo̦ kõrã eo naaj pãleen Kiiñ eo! Im enaaj lukkuun aiboojoj iien in kõnke enaaj wal̦o̦k ilo lañ.

9. (1) Wõn eo rej tõll̦o̦k kõrã eo ñan ippãn? (2) Kain rot nuknuk ko kõrã in ej kõn̦aki?

⁹ Kiiõ rej tõll̦o̦k kõrã eo ñan ippãn Kiiñ in Aelõñ eo an Anij. Kiiñ in ear kõpooje im karreoiki kõrã in me ej itõn m̦areiki ikijjeen “naan” eo. Kõn men in, ‘ekwõjarjar im ejjel̦o̦k n̦otaan’ kõrã in. (Epesõs 5:26, 27) Bareinwõt, nuknuk ko ej kõn̦aki relukkuun jejjet im ekkar ñan iien in eaorõk. ‘Nuknuk ko an relõtlõt kõn kool̦.’ Innem, ke rej bõkl̦o̦ke ñan ippãn Kiiñ eo “ej kõn̦ak nuknuk ko raiboojoj.” Ilo iien pãlele ak kõm̦are eo an L̦aam̦ eo, kar kamãlim an kõrã in “kanuknuk e make kõn nuknuk linen erreo im rabõlbõl. Nuknuk linen eo ej jerbal ko rem̦m̦an an ro doon Anij.”—Revelesõn 19:8, UBS.

EMOOTTOK IIEN KÕM̦ARE EO AN L̦AAM̦ EO

10. Ñããt naaj iien kõm̦are eo an L̦aam̦ eo?

¹⁰ Riit Revelesõn 19:7 (UBS). Ñããt naaj iien kõm̦are eo an L̦aam̦ eo? Eokwe, meñe Revelesõn 19:7 ej ba bwe “em̦õj an lio pãlele kalõtlõt e make” ñan iien m̦are eo, bõtab eoon ko tok jet ilo jebta in rejjab kwal̦o̦k kõn an wal̦o̦k iien kõm̦are eo. Rej kwal̦o̦k wõt kõn men ko rej wal̦o̦k ilo jem̦l̦o̦kinl̦o̦k eñtaan eo el̦ap. (Revelesõn 19:11-21, UBS) Mel̦el̦ein ke men in bwe Kiiñ eo enaaj m̦are m̦okta jãn an ilo̦k im kam̦õjl̦o̦k an tarin̦ae? Ejjab. Meñe bok in Revelesõn ej kwal̦o̦k ta ko renaaj wal̦o̦k ak ejjab mel̦el̦ein bwe men kein renaaj jejjet ekkar ñan wãween kar kõllaajraki. Bõtab, ilo bok in Sam 45 jebta ej kwal̦o̦k bwe Kiiñ eo, Jijej Kũraij, ej kõn̦ak kañõr in jãje eo an im ej tarin̦aeik ri kõjdat ro an m̦okta. Im ãlikin an bõk anjo̦, kiiõ ej kab wal̦o̦k iien kõm̦are eo an Kiiñ in im kõrã eo.​—Sam 45:3, 4.

11. Ta eo Kũraij enaaj kõm̦m̦ane m̦okta jãn iien pãlele ak kõm̦are eo an ilo kõkkar?

¹¹ Em̦õj ad katak jãn Baibõl̦ bwe ilo eñtaan eo el̦ap, men kein jilu renaaj wal̦o̦k ekkar ñan laajrak: M̦oktata, naaj ko̦kkure “kõrã eo el̦ap an kijoñ,” ak Babil̦on El̦ap me ej kõkkar kõn aolep kabuñ ko reriab. (Revelesõn 17:1, 5, 16, 17, UBS; 19:1, 2) Ãlikin men in, Kũraij enaaj ko̦kkure aolep armej ro renana ilo lal̦ in an Setan ilo naaj Armagedon, ak “tarin̦ae eo ilo raan eo el̦ap an Anij Ekajoor Bõtata.” (Revelesõn 16:14-16, UBS; 19:19-21, UBS) Ãliktata, Kiiñ eo enaaj bõk anjo̦ ilo tarin̦ae eo ilo an naaj jol̦o̦k Setan im enjel̦ ro renana ilowaan abys eo. Im renaaj kalbuuj ijin im rejjab maroñ bar kajorrããn ro jet. Enaaj ãinwõt ñe remej.​—Revelesõn 20:1-3.

12, 13. (1) Ñããt enaaj wal̦o̦k iien kõm̦are ak kwõjkwõj in pãlele eo an L̦aam̦ eo? (2) Wõn ro ilo lañ me renaaj m̦õn̦õn̦õ ilo iien kõm̦are eo an L̦aam̦ eo?

¹² Ilo raan ko ãliktata, ri kapit ro me rej tiljek wõt ñan mej renaaj jerkakpeje im mour ilañ. Ilo iien eo ãlikin an Babil̦on El̦ap buñ im m̦okta wõt jãn an itok Armagedon, Kũraij enaaj dedel̦o̦k an ain aolep ri kapit ro 144,000 ñan ippãn ilañ. (1 Tessalonika 4:16, 17) Innem, ãlikin Armagedon, enaaj kiiõ wal̦o̦k iien kõm̦are ak kwõjkwõj in pãlele eo an L̦aam̦ eo. Enaaj juon iien el̦ap an kam̦õn̦õn̦õ! Revelesõn 19:9 (UBS), ej ba: “Em̦õn̦õn̦õ ro em̦õj kũr er ñan kwõjkwõj in pãlele in an L̦aam̦ eo.” Alikkar bwe kõrã eo enaaj lukkuun m̦õn̦õn̦õ ilo iien m̦are in an. Im Kiiñ eo enaaj kanooj lañlõñ im m̦õn̦õn̦õ bwe aolep ri kapit ro em̦õj aer kobal̦o̦k ippãn ilo lañ. (Luk 22:18, 28-30) Bõtab, ewõr bar jet renaaj m̦õn̦õn̦õ l̦o̦k ippãn kõrã eo im L̦aam̦ eo ilo iien kõm̦are in aer.

¹³ Jaar riiti ilo pãrokõrããp ko m̦okta bwe ro ilañ renaaj al im ba: “Jen lañlõñ im m̦õn̦õn̦õ; jen nõbar an utiej! Bwe emoottok iien pãlele eo an L̦aam̦ eo, im em̦õj an lio pãlele kalõtlõt e make ñane.” (Revelesõn 19:6, 7, UBS) Ak ta kõn ri karejar ro an Jeova ijin ioon lal̦? Renaaj ke bar kobal̦o̦k ilo iien in ekam̦õn̦õn̦õ?

REJ ITOK KÕN “M̦ÕN̦ÕN̦Õ IM LAÑLÕÑ”

14. Wõn “bõjin ro m̦õttan” kõrã eo me Sam 45 ej kwal̦o̦k kake?

¹⁴ Riit Sam 45:12 (UBS); 45:14, 15. Ri kanaan Zekaraia ear kanaan bwe ilo raan ko ãliktata, armej ro ilo aolepen lal̦ in renaaj m̦õn̦õn̦õ in kabuñ ñan Jeova ippãn bween ri kapit ro. Zekaraia ear ba: “Ilo raan eo, joñoul armej jãn aelõñ ko in kajin otemjej renaaj jibwe tõrerein nuknuk an juon Ri Ju im ba, ‘Kõmin etal ippam̦, bwe kõmij roñ bwe Anij ej ippam̦.’” (Zekaraia 8:23) ‘Armej rein joñoul’ rej bar jitõñl̦o̦k ñan “armej in Tair” im “ro rem̦weiie” me Sam 45:12 ej kwal̦o̦k kake. Rein rej bõkl̦o̦k menin lel̦o̦k ko ñan bween ri kapit ro ilo aer kate er ñan rejetake er. Im ri kapit rein rej jipañ er ilo aer kabuñ ñan Jeova. Jãn kar 1935, bween ri kapit ro rar katakin elõñ milien armej “bwe ren kõm̦m̦ani men ko rejim̦we” im jel̦ã m̦ool eo kõn Jeova. (Daniel 12:3, UBS) ‘Armej rein joñoul’ ej ro me rej tiljek ñan ri kapit ro im em̦õj aer karreoik er make im julo̦k katak ko reriab an kabuñ ko. Eñin unin Sam 45:14 ej ba bwe rej “bõjin ro m̦õttan” kõrã eo im rej l̦oore. Em̦õj an rein ajel̦o̦k mour ko aer ñan Jeova im kam̦ool bwe rej tiljek ñan Kiiñ eo, Jijej Kũraij.

15. Ta eo “bõjin ro m̦õttan” bween ri kapit ro rej kõm̦m̦ane ñan jipañ rein m̦õttaer?

¹⁵ Bween ri kapit ro ilo lal̦ in rej lukkuun kam̦m̦oolol ‘bõjin rein m̦õttaer.’ Etke? Kõn aer kijejeto im jipañ er ilo aer kwal̦o̦k kõn nuuj eo em̦m̦an kõn Aelõñ eo ilo aolepen lal̦ in. (Matu 24:14, UBS) Ejjab baj kajoor eo wõt an Anij im lio pãlele rej ba, “Itok!” Ak ro rej roñ men in rej bareinwõt ba, “Itok!” (Revelesõn 22:17, UBS) Ta mel̦el̦ein men in? Ej mel̦el̦ein bwe ‘jiip ro jet’ rar roñ an ri kapit ro ba, “Itok!” Im rej bar kobal̦o̦k ippãer im kũrtok armej ro ipel̦aakin lal̦ in im ba, “Itok!”—Jon 10:16.

16. Ta iien eo eaorõk Jeova ej bar kũr ‘jiip ro jet’ ñane?

¹⁶ Bween ri kapit ro rej lukkuun yokwe ‘jiip ro jet.’ Im ri kapit rein rej m̦õn̦õn̦õ bwe Jeova ej bar kũr ‘jiip ro jet’ ñan iien kwõjkwõj in pãlele eo aer im L̦aam̦ eo. Kar kanaan bwe ‘bõjin rein m̦õttan’ ri kapit ro renaaj etal “kõn m̦õn̦õn̦õ im lañlõñ.” Kõn men in, aolep ‘jiip ro jet’ me kõjatdikdik eo aer ej ñan mour indeeo ioon lal̦, renaaj bar m̦õn̦õn̦õ ilo kwõjkwõj in pãlele ak kõmare eo an L̦aam̦ eo ilo lañ. Aolep ro uwaan baam̦le eo an Jeova ilañ im ioon lal̦ renaaj m̦õn̦õn̦õ ilo iien in. Bok in Revelesõn ej kwal̦o̦k bwe ‘jar eo el̦ap’ ej “jutak im̦aan tũroon eo im im̦aan mejãn L̦aam̦” eo. Rein rej jerbal ñan Jeova ilo mel̦an ko ilo tampel̦ eo ilo kõkkar, mel̦el̦ein bwe renaaj kabuñ ñan Jeova ijin ioon lal̦.​—Revelesõn 7:9, 15.

RO JIM̦M̦AAN RENAAJ OKTAK IM RO NEJIN

17, 18. (1) Ñe kõrã eo im Kũraij renaaj m̦are ilo kõkkar, ta jeraam̦m̦an ko renaaj wal̦o̦k ilo pedetaij eo ioon lal̦ in? (2) Ñe Kũraij enaaj tõl ium̦win 1,000 iiõ, enaaj erom jemãn wõn ro?

¹⁷ Riit Sam 45:16 (UBS). Ñe kõrã eo im Kũraij renaaj m̦are ilañ ilo kõkkar, “bõjin ro m̦õttan” kõrã in renaaj lukkuun m̦õn̦õn̦õ kõnke elõñ jeraam̦m̦an ko renaaj wal̦o̦k ilo pedetaij eo ioon lal̦ in. Kiiñ eo, Jijej Kũraij, enaaj kõmour ro jim̦m̦aan ilo lal̦ in me ear wal̦o̦ktok jãn er. Im kõnke Kũraij enaaj kõm̦m̦ane men in, rein jim̦m̦aan renaaj oktak im “ro nejin” ilo lal̦ in. (Jon 5:25-29; Hibru 11:35, UBS) Kũraij enaaj kããlõt jet iaan rein “nejin” bwe ren “irooj iaolepen lal̦.” Jej bar kõjatdikdik bwe enaaj kããlõt jet iaan em̦m̦aan ro retiljek im rej lale eklejia ko rainin ñan aer naaj “irooj” im tõl ilo lal̦ eo ekããl.​—Aiseia 32:1.

¹⁸ Ñe Kũraij enaaj tõl ium̦win 1,000 iiõ, enaaj bar erom jemãn armej ro jet. El̦aññe armej ro rej tõmak ilo katok in mour eo an Jijej, eokwe renaaj maroñ bõk mour indeeo im erom ro nejin. (Jon 3:16) Innem, Kũraij enaaj erom ‘Jemãer ñan Indeeo.’​—Aiseia 9:6, 7, UBS.

“NAAJ KABUÑBUÑL̦O̦K WÕT ETAM̦ ÑAN INDEEO”

19, 20. Etke eaorõk bwe aolep Kũrjin ro rainin ren jel̦ã kõn bwebwenato eo ilo Sam 45 jebta?

¹⁹ Riit Sam 45:1, 17 (UBS). Eaorõk bwe aolep Kũrjin ro ren jel̦ã kõn bwebwenato eo kar je ilo Sam 45 jebta. Bween ri kapit ro me rej mour wõt ioon lal̦ in, rej m̦õn̦õn̦õ kõnke rejel̦ã bwe m̦õttan wõt jidik renaaj etal ñan lañ ippãn ri kapit ro jet m̦õttaer im Jijej Kũraij. El̦apl̦o̦k an ‘jiip ro jet’ m̦õn̦õn̦õ in kõttãik er ñan Kiiñ in aer eutiej. Bareinwõt, rej m̦õn̦õn̦õ im kam̦m̦oolol kõn aer maroñ m̦õttaik bween ri kapit ro ilo lal̦ in. Kõn men in, enaaj kanooj lõñ jeraam̦m̦an ko me Kũraij im kõrã eo pãleen ilo kõkkar renaaj bõktok ioon armej otemjej ioon lal̦.​—Revelesõn 7:17; 21:1-4.

²⁰ Ke jej kijoororetok an jejjet im m̦ool kanaan ko kõn Kiiñ eo kar kapiti bwe en kiiñ in Aelõñ eo an Anij, jej bar kijejeto ilo ad kabuñbuñl̦o̦k ãt eo etan. Innem, jen nõbare Kiiñ in “ñan indeeo im indeeo.”