Nan eo an Jehovah Ej Mour Wõt
Katak ko Relap Jen Book in Obadiah, Jonah, im Micah
“EÑIN nan in kanan eo an Obadiah.” (Obadiah 1) Nan kein rej jinoin nan ko ilo book eo ilo Bible etan Obadiah. Ri kanan eo ejjab kwalok jabdewõt men kin e make ijellokin wõt ãt eo etan ilo book in me ear jeje kake ilo 607 B.C.E. Ilo juõn book me ededelok an kar jeje enañin rubuki yiõ ko mokta lok iman, ri kanan Jonah ej kwalok kin ta eo e make ear iione ke ear bõk jerbal eo an einwõt juõn missionary. Yiõ ko jiljinoñoul in an Micah kõmmane jerbal in kanan eo an ej bed ikõtan yiõ in kanan ko an Obadiah im Jonah, me ej kitibuj yiõ ko jen 777 B.C.E. ñan 717 B.C.E. Men eo wõt Micah ej kwalok kin e make ej bwe ear itok jen “jikin kwelok Moresheth” im bwe Jehovah ear kwalok ennan eo an ñan e “ilo ien eo ke Jotham im Ahaz im Hezekiah rar king in Judah.” (Micah 1:1) An ri kanan in jelã kin mour ilo melaj ej alikar ilo wanjoñok ko ej kajerbali ñan kalikar point ko raorõk ilo ennan eo an.
‘NAJ KOKKURE IM KÕTTÃIK EDOM ÑÕN INDRIO’
(Obadiah 1-21)
Ikijen Edom, Obadiah ej ba: “Kinke kwar ankwonake im mõn ro inen Jacob, ro jeiũm im jatũm, naj kokkure yuk im kõttãik yuk ñõn indrio.” Ri kanan in ej kememej wõt kõmman ko renana im lej an Ri Edom ro nae ro nejin Jacob—Ri Israel ro. Ilo 607 B.C.E., ke Ri Babylon ro rar kajeebeplok Jerusalem, Ri Edom ro rar “jutak wõt” im koba ibben “ruamaijet ro” me rar nitbwili Jerusalem.—Obadiah 10, 11.
Ilo oktan, juõn ien ñan bar jeblak ej bed iman armij ro inen Jacob. Kanan eo an Obadiah ej ba: “Ion Tol Zion jet renaj joor, im enaj juõn jikin kwelok ekkwojarjar.”—Obadiah 17.
Emwij Uaki Kajitõk ko Rej Bedbed ion Bible:
eoon 5-8—Ta eo eaorõk ñe keidi jeebeplok eo an Edom ñan itok eo an ri kwot ro rej itok ilo boñ im armij ro rej ae grape? Elañe ri kwot ro rar itok ilo Edom, renaj kar bõk wõt men ko rekõnan. Elañe ri madmõd ro rar itok, renaj kar door jet leen wijki ko ñan ro rej koloruk. Ak, ñe Edom ej buñ, ‘ri tarinae ro mõttan jen ailiñ ko jet’—Ri Babylon ro—renaj lukkun rakimi aolep men ko mweien raorõk.—Jeremiah 49:9, 10.
eoon 10—Ewi wãwen kar ‘kokkure im kõttãik Edom ñõn indrio’? Einwõt kar kanan kake, ailiñ in Edom, eo ear wõr juõn kien im armij ro ilo juõn jikin kar karõke ion lal, ear lukkun jako. Nabonidus, King in Babylon, ear anjo ion Edom enañin 550 yiõ ko mokta jen an kar Jesus itok. Ke kar tõbartok yiõ ko ilo 300 B.C.E., Ri Nabataean ro rar jokwe ilo jikin ko ilo Edom, im Ri Edom ro rar aikwij emmakit im jokwe ilo jikin eo turõk in Judea, me rej jelã kajjen einwõt Idumea. Elikin an kar Rome kokkure Jerusalem ilo 70 C.E., Ri Edom ro rar lukkun jako.
Tokjen Katak ko ñan Kij:
eoon 3, 4. Kin air jokwe ilo juõn jikin ebin an ri kijirãt ro kebak ir kin an lõñ tol ko reutiej im komlal ko remũlal rej bed ie, Ri Edom ro rar mone ir make ilo air eñjake air ainemõn im jokane. Ak rejjab maroñ ko jen ekajet ko an Jehovah.
eoon 8, 9, 15. Meletlet im kajur an armij rejjab maroñ kejbãrok ir jen ‘ran eo an Jehovah.’—Jeremiah 49:7, 22.
eoon 12-14. Ri Edom ro rej juõn joñok in kakkõl ñan ro rej lañliñ ñe ri karejar ro an Anij rej iion abañ im melejoñ ko rebin. Ñe ri kijirãt ro rej kokkure armij ro an, Jehovah ej watõke einwõt juõn bwid elap.
eoon 17-20. Kanan eo kin bar jeblak eo an ro inen Jacob ear jino in jejjet kitien ke juõn bwen armij ro rar jeblak ñan Jerusalem jen Babylon ilo 537 B.C.E. Nan eo an Jehovah emol im ej jejjet kitien ien otemjej. Jemaroñ lukkun liki kin kallimur ko an.
“NINEVEH ENAJ JORRÃN”
(Jonah 1:1–4:11)
Jen an bokake nan in jiroñ eo an Anij ñan “ilok ñõn Nineveh, jikin kwelok en elab, im kwalok ñõne” juõn ennan in ekajet, Jonah ear ko ñan juõn jikin etolok. Ilo an jilkinlok “juõn kõto elab” im kajerbal “juõn eek kilebleb,” Jehovah ear ukõt ial eo an Jonah im bar jiroñ e alen eo kein karuo bwe en etal ñan jikin kwelok eo elap an Assyria.—Jonah 1:2, 4, 17; 3:1, 2.
Jonah ej deloñ ilo Nineveh im keañ ilo alikar ennan in: “Eñoul ran jen kiõ Nineveh enaj jorrãn!” (Jonah 3:4) Juõn oktak me ear jab kõtmene kake ear walok jen jerbal in kwalok nan eo an im men in ear kõmman bwe Jonah en “illu.” Jehovah ear kajerbal “juõn wut” ñan katakin Jonah kin tiriamo.—Jonah 4:1, 6.
Emwij Uaki Kajitõk ko Rej Bedbed ion Bible:
3:3—Emol ke bwe joñan an lap Nineveh “ej tarrin jilu ran in dribloke”? Aet. Ilo ien ko etto, Nineveh emaroñ kar koba bukwon ko jet itueañ jen Khorsabad ñan bukwon ko iturak ñan Nimrud. Aolep bukwon kein me rar bed ibelakin jikin kwelok in Nineveh rar tõbar joñan in 60 mile.
3:4—Jonah ear aikwij katak ke kajin Assyria bwe en maroñ kwalok nan ñan Ri Nineveh ro? Bõlen ededelok an kar Jonah jelã kajin Assyria, ak emaroñ kar bõk maroñ eo ñan konono kake ilo juõn wãwen ekabwilõñlõñ. Bar juõn wãwen ej bwe emaroñ kar kwalok ennan eo an ilo kajin Hebrew, im bar juõn ear ukõt ainikien. Elañe ear ilo wãwen eo eliktata, nan ko an enaj kar kalaplok itoklimo eo kin ennan eo an.
Tokjen Katak ko ñan Kij:
1:1-3. Elañe ilo jelã kake juõn armij ej karõk makitkit ko jet bwe en bõprae an lukkun bõk kunan ilo jerbal in kwalok nan kin Ailiñ eo im kõmman ri kalor ro, men in ej kalikar bwe ej kõmmane jerbal kein kin juõn un enana. Ilo juõn wãwen, armij eo ej kõmmane men in ej ko jen juõn jerbal letok in Anij.
1:1, 2; 3:10. Jehovah ej kwalok tiriamokake jab ñan juõn wõt ailiñ ak bwij ak kumi in armij. “[Jehovah] Ejoij ñõn armij otemjej, im ej tiriamokake menin kõmõnmõn ko an otemjej.”—Psalm 145:9.
1:17; 2:10. Jilu ran im boñ ko Jonah ear bed ilo lojen ek kileplep eo ilo kanan ej jitõñlok ñan mij im jerkakbiji eo an Jesus.—Matu 12:39, 40; 16:21.
1:17; 2:10; 4:6. Jehovah ear lomoren Jonah jen lomalo elimajnono. Anij ear bareinwõt “kaddrek juõn wut ion Jonah kein kallure bwe en jokane.” Ri kabuñ ro an Jehovah rainin remaroñ liki Anij eo air, im ilo joij eo an, ej kejbãrok im lomoriir.—Sam 13:5; 40:11.
2:1, 2, 9, 10. Jehovah ej roñjake jar im akwelap ko an ri karejar ro an.—Sam 120:1; 130:1, 2.
3:8, 10. Anij eo emol ear “ukõt an lemnak” kin jorrãn eo ear konono kake, im “ear jab kaje ir.” Etke? Kinke Ri Nineveh ro “rar oktak jen jerawiwi ko air.” Eindeinlok wõt rainin, emaroñ oktak ekajet eo an Anij elañe juõn ri jerawiwi emol an ukwelok.
4:1-4. Ejelok juõn armij emaroñ kõmman bwe en wõr joñan an Anij kwalok tiriamo eo An. Jej aikwij kejbãrok bwe jen jab kõrraate wãwen ko Jehovah ej kwalok tiriamo eo an.
4:11. Ilo meanwõd Jehovah ej kõmman bwe ren kwalok kin ennan in Ailiñ eo ibelakin lal kinke—einwõt ear kõmmane kin armij ro 120,000 ilo Nineveh—ej buromõj kin armij ro “ejelok rueir.” Jejjab aikwij buromõj bareinwõt ke kin armij ro ilo territory eo ad im bõk kunad ilo kijejeto ilo jerbal in kwalok nan kin Ailiñ eo im kõmman ri kalor ro.—2 Piter 3:9.
‘BILÕL EO AIR NAJ JEDEDLOK’
(Micah 1:1–7:20)
Micah ej kajerwawaik jerawiwi ko an Israel im Judah, kanan kin jeebeplok eo an jikin kwelok ko air relap, im kallimur kin bar jeblak eo. Anij enaj “rube worworin” Samaria. Kin ial eo air enana, Israel im Judah rej tellokin “bilõl,” ak jook. Ñe naj kajibokweik ir, bilõl eo air naj jededlok ak laplok “einwõt bao vulture.” Jehovah ej kallimur: “Inaj ain kom otemjej ri Israel ibben dron.” (Micah 1:6, 16; 2:12) Kin ri tel ro im ri kanan ro renana, Anij enaj bareinwõt “rube worworin” Jerusalem. Ak Jehovah enaj “ain [armij ro an] ibben dron.” Jen “Bethlehem Ephrathah” enaj itok “juõn ri tel ñõn Israel.”—Micah 3:12; 4:12; 5:2.
Jehovah ear ke jerbal ibben Israel ilo juõn wãwen ebwid? Men ko rar aikwij kõmmani, ellã jen joñan air bin ke? Jaab. Men eo wõt Jehovah ej kajitõk jen ri kabuñ ro an ej bwe ren ‘kõmmani men ko rejimwe, kwalok yokwe, im mour ilo ettã buru’ ñe rej etetal ibben Anij. (Micah 6:8) Ak, armij ro rar mour ilo ran ko an Micah joñan air kar lukkun nana, “ro rejimwe im mol iair rej einwõt mar ko ejjelok tokjeir,” im rej kokkure im kõmetak jabdewõt armij ro rej kebak ir. Ak ri kanan eo ej ba: “O Iroij, ebar ejjelok anij einwõt kwe.” Anij enaj bar kwalok an tirimokake armij ro an im “jujuri jerawiwi ko am, im juloki na ijo emwilõltata ilo lometo.”—Micah 7:4, 18, 19.
Emwij Uaki Kajitõk ko Rej Bedbed ion Bible:
2:12—Ñããt eo kanan eo kin ‘aini ro rej bed wõt ian Ri Israel ro’ ear jejjet kitien? Jejjet in kitien eo moktata kar ilo 537 B.C.E. ke bwen Ri Jew ro rar jeblak ñan kabijukneir jen air kamakoko ilo Babylon. Ilo ran kein, kanan eo ej jejjet kitien ilo “Israel an Anij.” (Dri Galetia 6:16) Jen 1919, kar aintok Christian ri kabit ro ibben don iloan “worwor eo air.” Kinke juõn “jar elap” in ‘sheep ro jet’ rar koba ibbeir, elaptata jen 1935, rar “obrak kin armij.” (Reveles̃õn 7:9; Jon 10:16) Ibben don, rej kijejeto in kowõnmanlok kabuñ eo emol.
4:1-4—“Ilo ran ko rej itok,” ewi wãwen an Jehovah naj “kõmmõn ainemmõn ikõtan lõl ko rellab, lõl ko rebak im lõl ko rettolok”? Nan eo “lõl ko” ejjab konono kin kumi in ri ailiñ ko ak kien ko. Jen men in, ej konono kin armij ro kajjojo jen aolep ailiñ ko me rar erom ri kabuñ ro an Jehovah. Jehovah ej kõmman ainemõn im kajimwe men ko ikijen kõtan eo air ibben ilo jitõb.
Tokjen Katak ko ñan Kij:
1:6, 9; 3:12; 5:2. Assyria ear kajeebeplok Samaria ilo 740 B.C.E.—ke Micah ear mour wõt. (2 Kiñ Ro 17:5, 6) Ri Assyria ro rar itok wõt ñan Jerusalem ilo ien iroij eo an Hezekiah. (2 Kiñ Ro 18:13) Ri Babylon ro rar tile Jerusalem ilo 607 B.C.E. (2 Kronikel 36:19) Einwõt kar kanan kake, Messiah ear lotak ilo “Bethlehem Ephrathah.” (Matu 2:3-6) Nan in kanan eo an Jehovah ejamin likjap.
2:1, 2. Elap an kauwatata ñan kij elañe jej ba bwe jej karejar ñan Anij ak bukõt mokta mweiuk ko jen “ailiñ in Anij, im kwojarjar eo An.”—Matu 6:33; 1 Timote 6:9, 10.
3:1-3, 5. Jehovah ej kõtmene bwe ro rej tel ibwiljin armij ro an ren jerbal ilo jimwe.
3:4. Elañe jekõnan bwe Jehovah en uake jar ko ad, jej aikwij kejbãrok bwe jen jab jerawiwi ak mour ilo ruo miãñõn.
3:8. Jerbal eo ad ñan kwalok kin news eo emõn, eo ekoba ennan in ekajet ko, emaroñ tõbrak elañe jej bõk kakajur jen jitõb kwojarjar an Jehovah.
5:5. Kanan in kin Messiah eo ej kamol ñan kij bwe ñe ri kijirãt ro rej tarinaik armij ro an Anij, “ri tel ro ad rekajurtata”—juõn joñan elap in maan ro ewõr air maroñ—renaj jutak im tel ibwiljin armij ro an Jehovah.
5:7, 8. Ñan elõñ armij, Christian ri kabit ro rainin rej “einwõt mõlawi eo Anij ej jilkintok”—juõn jerammõn jen Anij. Men in ej eindein kinke ej kajerbal ri kabit ro ñan keañ kin ennan in Ailiñ eo. Ilo air niknik in jurake ri kabit ro ilo jerbal in kwalok nan, ‘sheep ro jet’ rej jibañ armij ro ñan air ejaak juõn kõtan emõn ibben Anij. (Jon 10:16) Ej juõn jerammõn elap ibbed ñan bõk kunad ilo jerbal in, eo ej bõktok aemlolo eo emol ñan ro jet!
6:3, 4. Jej aikwij kajeoñe Jehovah Anij ilo ad kwalok joij im tiriamo ñan ro me ebin ad kaddek juõn kõtan emõn ibbeir ak ro me rej mõjno ilo jitõb.
7:7. Ñe jej iion abañ ko ilo jemlokinlok jukjuk im bed in enana, jen jab ebwer. Jen men in, einwõt Micah, jej aikwij ‘kõttar im kejatdrikdrik kin Anij eo ad.’
7:18, 19. Einwõt Jehovah ej mõnõnõ in jeorlok bwid ko ad, jej aikwij mõnõnõ in jeorlok bwid ko an ro rej jerawiwi nae kij.
Wõnmanlok im ‘Kabuñ im Bokake Jehovah’
Ro rej tarinaik Anij im armij ro an ‘naj kokkure im kõttãik ir ñan indio.’ (Obadiah 10) Bõtab, jemaroñ kajeorlok illu eo an Jehovah ilo ad bokake nan in kakkõl eo jen Anij im ‘oktak jen jerawiwi ko ad.’ (Jonah 3:10) “Ilo ran ko rej itok,” melelen, ilo “ran ko eliktata,” naj kautiej kabuñ eo emol ilõñin aolep kabuñ ko rewan im ro rekiblie renaj ibweptok ñan e. (Micah 4:1; 2 Timote 3:1) Jen beek ilo buruõd ñan ‘kabuñ ñõn Jehovah im bokake e indrio im indrio.’—Micah 4:5.
Book ko in Obadiah, Jonah, im Micah rej katakin kij elõñ katak ko raorõk! Meñe kar jeje book kein elõñlok jen 2,500 yiõ ko remotlok, ennan eo air rej “mour im jerbal wõt,” ñan kiõ.—Dri Hibru 4:12.
[Pija eo ilo peij 18]
Obadiah ear kanan: ‘Naj kokkure im kõttãik [Edom] ñõn indrio’
[Pija eo ilo peij 19]
Micah ear ‘kõttar im kejatdrikdrik kin Anij,’ im kwomaroñ bareinwõt
[Pija eo ilo peij 21]
Jerbal in kwalok nan ej juõn jerammõn jej aikwij kaorõke