Menin Kam̦õn̦õn̦õ ko Kwõj Kããlõti Rem̦m̦an Ke ñan Kwe?
‘Kom̦win mãlejjoñ ak lale men eo ej kabuñbũruon Irooj.’—EPESÕS 5:10.
1, 2. (1) Etke jejel̦ã bwe Jeova ekõn̦aan bwe jen m̦õn̦õn̦õ? (2) Kõnke iien kam̦õn̦õn̦õ ko rej juon menin letok jãn Anij, ta eo men in en kar kõm̦m̦akũt kõj ñan kõm̦m̦ane?
BAIBÕL̦ eo ej kwal̦o̦k bwe Jeova ekõn̦aan bwe jen m̦õn̦õn̦õ. Ñan waanjoñak, Sam 104:14, 15 (UBS) ej ba bwe Jeova ej kaddek “keinikkan ko ñõn armij, bwe ren madmid air jonikkan, im kõmmõn wine kein kamõnõnõik burueir, im oil in olive kein kejjatõltõl turin mejeir, kab bread bwe en kakajur ir.” Alikkar bwe Jeova ej letok kijed m̦õñã bwe jen maroñ mour. Ej kaddek keinikkan ko bwe en wõr kijed m̦õñã, oil im wain. Meñe wain ejjab juon men armej ro rej aikuji ak emaroñ “kamõnõnõik burueir.” (Ekklisiastis 9:7; 10:19) Jeova ekõn̦aan bwe jen m̦õn̦õn̦õ. Ekõn̦aan bwe bũruod en obrak kõn “lañlõñ.”—Jerbal 14:16, 17.
2 Innem jejjab aikuj l̦õmn̦ak bwe ebõd ñe jej kõjerbal iien ko ad ñan “kallimjeke bao ko rej ekkãke” im “wut ko imelaj.” Ad kõm̦m̦ane men in im men ko jet rekamõnõnõ remaroñ kakajoor kõj im kõm̦m̦an bwe jen m̦õn̦õn̦õ. (Matu 6:26, 28; Sam 8:3, 4) An juon armej m̦õn̦õn̦õ im ãjimmourur ej juon “menin letok an Anij.” (Ekklisiastis 3:12, 13, UBS) Iien ko jej kõjerbali ñan menin kam̦õn̦õn̦õ ko rej m̦õttan menin letok eo an Anij ñan kõj. Innem, jej aikuj kõjerbal iien kein ilo juon wãween ej kabuñbũruon Anij.
Kõm̦m̦ani Jokãlõt ko Rem̦m̦an kõn Menin Kam̦õn̦õn̦õ Ko
3. Etke armej ro rej kõm̦m̦ani jokãlõt ko reoktak jãn doon kõn menin kam̦õn̦õn̦õ ko?
3 Ro ejim̦we wãween aer l̦õmn̦ak kõn menin kam̦õn̦õn̦õ ko rejel̦ã bwe ranemkwoj in kããlõt men ko rekõn̦aan kõm̦m̦ani. Rej bareinwõt jel̦ã bwe ewõr jet menin kam̦õn̦õn̦õ me rejjab aikuj in kõm̦m̦ani ñan jiddik. Etke armej ro rej kõm̦m̦ani jokãlõt ko reoktak jãn doon? Ñan jipañ kõj mel̦el̦e kõn men in, jemaroñ keidi jokãlõt ko jej kõm̦m̦ani kõn menin kam̦õn̦õn̦õ ko ñan m̦õñã ko jej kañi. Armej ro jãn aelõñ ko ipel̦aakin lal̦ eoktak kain m̦õñã ko enno̦ ippãer. Ilo ejja wãween in wõt, Kũrjin ro jãn aelõñ ko ipel̦aakin lal̦ in eoktak kain menin kam̦õn̦õn̦õ ko em̦m̦an ippãer. Emaroñ ãindein ippãn armej ro rej jokwe ilo juon wõt jikin. Kõn̦aan ko aer rej oktak jãn doon. Ñan waanjoñak, juon armej emaroñ l̦õmn̦ak bwe elimo riit bok. Ak eo juon emaroñ l̦õmn̦ak bwe ejalimo riit. Bar juon armej emaroñ em̦m̦an ippãn baajkõl̦ ak ro jet remaroñ dike men in. Ãinwõt an armej ro maroñ kããlõt kain m̦õñã rot enno̦ ippãer, ãindein remaroñ bar kããlõt kain menin kam̦õn̦õn̦õ rot rekõn̦aan kõm̦m̦ane.—Rom 14:2-4, UBS.
4. Meñe jej anemkwoj in kããlõt menin kam̦õn̦õn̦õ ko, etke jej aikuj kõjparok? Ta waanjoñak eo im ej jipañ kõj ñan mel̦el̦e kõn men in?
4 Meñe ewõr ad maroñ ñan kõm̦m̦an jokãlõt ko kõn menin kam̦õn̦õn̦õ ko, bõtab ejjab mel̦el̦ein bwe jemaroñ kõm̦m̦ani aolep men ko im rej kareel kõj. Jen bar l̦õmn̦ak kake waanjoñak eo kõn m̦õñã. Emaroñ enno̦ ippãd elõñ kain m̦õñã ko. Bõtab, jeban kañi m̦õñã ko me remeñ im rõkõt. Jenaaj nañinmej ñe jej kañi. Ilo ejja wãween in, jemaroñ kõn̦aan kajjioñ kõm̦m̦ani elõñ kain menin kam̦õn̦õn̦õ ko. Bõtab, jeban kõm̦m̦ani m̦anit ko rettoon im rejekkar kab relãj ak jabdewõt men im rej likũt mour eo ad ilo kauwõtata. Men kein rej n̦ae naan in kakapilõk ko ilo Baibõl̦. Rej kajorrããn jem̦jerã eo ad ippãn Jeova im ãjmour eo ad. Kõn men in, jej aikuj kõm̦m̦an pepe ko rem̦m̦an kõn menin kam̦õn̦õn̦õ ko jej kããlõt in kõm̦m̦ani. Jej aikuj lukkuun l̦õmn̦ak kõn ta eo jekõn̦aan kõm̦m̦ane, innem kããlõt menin kam̦õn̦õn̦õ eo me em̦m̦an ñan kõj im ej kabuñbũruon Jeova. (Epesõs 5:10) Ewi wãween jemaroñ kããlõt menin kam̦õn̦õn̦õ eo em̦m̦an ñan kõj?
5. Ewi wãween ad maroñ jel̦a bwe menin kam̦õn̦õn̦õ ko jej kããlõt in kõm̦m̦ani rejjab idaaptõk ippãn kien ko an Anij?
5 Ñe menin kam̦õn̦õn̦õ ko jej kããlõt in kõm̦m̦ani rejjab idaaptõk ippãn kien ko ilo Baibõl̦, men in enaaj kabuñbũruon Jeova im em̦m̦an ñan kõj. (Sam 86:11) Ñan jipañ eok kããlõt menin kam̦õn̦õn̦õ ko rem̦m̦an, kwõmaroñ kõjerbal juon laajrak in kajjitõk ko me kwõmaroñ kõl̦mãnl̦o̦kjen̦ kaki. Ewõr jilu iaan kajjitõk ko me jemaroñ kajjitõkin kõj make kaki. Erkein ej kajjitõk ko jilu: kain rot? ewi joñan? im wõn ro? Jen etale kajjitõk kein kiiõ.
Kain Rot Menin Kam̦õn̦õn̦õ Ko?
6. Kain rot menin kam̦õn̦õn̦õ ko jeban kããlõti ñan jidik? Etke jejjab kããlõti men kein?
6 M̦okta jãn ad kããlõt jabdewõt menin kam̦õn̦õn̦õ ko, jej aikuj kajjitõk ippãd make: Ta ko rej wal̦o̦k ilo kain kam̦õn̦õn̦õ rot in? Jen keememej bwe ewõr ruo kain menin kam̦õn̦õn̦õ. Kein kajuon ej kitibuj men ko jeban kõm̦m̦ani ñan jidik. Eo kein karuo ej kitibuj men ko jemaroñ kããlõt ñan kõm̦m̦ani. Kain rot menin kam̦õn̦õn̦õ eo kein kajuon? Enañin aolep menin kam̦õn̦õn̦õ ko ilo lal̦ in enana rej kitibuj men ko me rej n̦ae naan in tõl ko ilo Baibõl̦ ak rupe kien ko an Anij. (1 Jon 5:19) Kũrjin ro rem̦ool rejamin kããlõt kein kam̦õn̦õn̦õ rot in. Men in ej kitibuj pija in tim̦on̦ ak jabdewõt men ewõr anijnij, lesbian im em̦m̦aan ñan em̦m̦aan, kowadoñ im lãj ak pija ko rettoon. Ej bareinwõt kitibuj jabdewõt men me rej kwal̦o̦k an armej ro kajorrããn ro jet ak kwal̦o̦k bwe ejjab nana kõm̦m̦ani m̦anit ko rettoon. (1 Korint 6:9, 10; riit Revelesõn 21:8.) Jekdo̦o̦n ia eo jej pãd ie, jejamin kããlõt kain menin kam̦õn̦õn̦õ rot kein. Jekõn̦aan kwal̦o̦k ñan Jeova bwe jej dike “men eo e nana.”—Rom 12:9; 1 Jon 1:5, 6.
7, 8. Ta eo enaaj jipañ kõj ñan kõm̦m̦ane jokãlõt ko rem̦m̦an kõn menin kam̦õn̦õn̦õ ko? Ta waanjoñak eo jemaroñ l̦õmn̦ak kake ñe jej kããlõt menin kam̦õn̦õn̦õ ko?
7 Menin kam̦õn̦õn̦õ eo kein karuo ej kitibuj men ko im jej aikuj kanooj l̦õmn̦ak kaki m̦okta jãn ad kããlõti. Baibõl̦ eo emaroñ jab kwal̦o̦k kõn kain kam̦õn̦õn̦õ rot in. Ak naan in tõl ko ilo Baibõl̦ renaaj jipañ kõj ñan mel̦el̦e kõn l̦õmn̦ak eo an Jeova kõn ta eo em̦m̦an im ejim̦we. Innem, m̦okta jãn ad kããlõt kain kam̦õn̦õn̦õ rot in, jej aikuj kõjparok bwe ren jab n̦ae naan in tõl ko ilo Baibõl̦. (Jabõn Kõnnaan 4:10, 11) Innem jej aikuj kããlõt men ko me reban kõm̦m̦an bwe en nana ad mour im abn̦õn̦õ. (Galetia 6:5; 1 Timote 1:19) Ewi wãween jemaroñ kõm̦m̦ani jokãlõt ko rem̦m̦an? Bar l̦õmn̦ak m̦õk kõn m̦õñã ko. M̦okta jãn ad edjoñe juon m̦õñã ekããl, jekõn̦aan jel̦ã ta ko kar kãreiki ilo m̦õñã eo. Ilo ejja wãween in wõt, m̦okta jãn ad kããlõt menin kam̦õn̦õn̦õ ko, jekõn̦aan jel̦ã ta ko rej wal̦o̦k ie bwe jen maroñ lale el̦aññe em̦m̦an im ekkar ñan juon Kũrjin.—Epesõs 5:17.
8 Ñan waanjoñak, bõlen em̦m̦an ippam̦ bããjkõt ak bal̦ebo̦o̦l̦ im iukkure ko erl̦o̦k wõt. Ãindein ippãn bar elõñ armej ro. Iukkure jab kein remaroñ kalimomo im iruj lo̦jed kaki. Bõtab, jet iukkure ko me rej jiãiik doon emaroñ lãj wãween aer iukkure im rej likũt mour eo an juon armej ilo kauwõtata. Bar jet iukkure el̦ap aer kauwõtata im rej bõktok jorrããn ñan ri iukkure ro. Im ilo iukkure ko jet, el̦ap an armej kaññiñi im lãj ñan doon im l̦õmn̦ak bwe em̦m̦anl̦o̦k aelõñ eo aer jãn ro jet. Ta eo kwõj aikuj kõm̦m̦ane ñe em̦m̦an ippam̦ iukkure ko me ej wal̦o̦k men kein rejjab em̦m̦an? El̦aññe kwõj kanooj l̦õmn̦ak kõn men in, alikkar bwe kwõban kããlõt menin kam̦õn̦õn̦õ rot in me rej idaaptõk ippãn l̦õmn̦ak ko an Jeova. Im rejjab errã ippãn naan ko jej kwal̦o̦k naan ippãn armej ro kaki ñan aenõm̦m̦an im yokwe doon. (Aiseia 61:1, UBS; Galetia 5:19-21) Ak el̦aññe kwõj loe bwe menin kam̦õn̦õn̦õ eo ejjab n̦ae naan in tõl ko an Jeova, innem men in em̦m̦an ñan eok im enaaj kam̦õn̦õn̦õik eok.—Galetia 5:22, 23; riit Pilippai 4:8.
Ewi Joñan Aõ Jol̦o̦k Iien ñan Menin Kam̦õn̦õn̦õ Ko?
9. Ta kajjitõk eo kein karuo? Im uwaak eo ad ñan kajjitõk in ej kalikkar ta?
9 M̦oktata jaar etale kajjitõk eo kein kajuon me ej ba, kain rot? Uwaak eo ad ñan kajjitõk in ej kalikkar ta men ko jekõn̦aan kõm̦m̦ani im em̦m̦an ippãd. Kiiõ jenaaj etale kajjitõk in: Ewi joñan? Innem jej aikuj kajjitõk ippãd make: Ewi joñan aõ jol̦o̦k iien ñan menin kam̦õn̦õn̦õ ko? Uwaak eo ad ñan kajjitõk in kein karuo ej kalikkar ta men ko jej likũti im̦aantata ilo mour eo ad ak jej watõki bwe raorõktata. Innem, ta eo emaroñ jipañ kõj ñan jel̦ã ewi joñan ad kaorõk menin kam̦õn̦õn̦õ ko ilo mour eo ad?
10, 11. Ewi wãween naan ko an Jijej ilo Matu 6:33 rej jipañ kõj ñan jel̦ã ewi joñan iien eo jen jol̦o̦ke ilo menin kam̦õn̦õn̦õ ko?
10 Jijej Kũraij ear jiroñ rũkal̦oor ro an: “Kwõn yokwe Irooj am̦ Anij kõn aolepen bũruom̦, im kõn aolepen am̦, im kõn aolepen am̦ l̦ol̦ãtãt, im kõn aolepen am̦ kajoor.” (Mark 12:30) Innem, jej kwal̦o̦k bwe ad yokwe Jeova ej men eo m̦oktata ilo mour eo ad. Ewi wãween? Ilo ad pokake naan kein an Jijej: “A kom̦win pukot m̦okta aelõñ in Anij, im [wãnõk, NW] eo An; im naaj korl̦o̦k men kein otemjej ñan kom̦.” (Matu 6:33) Naan kein an Jijej remaroñ jipañ kõj ñan jel̦ã ewi joñan ad kaorõk menin kam̦õn̦õn̦õ ko im en ewi joñan ad jol̦o̦k iien ñan men kein.
11 Jijej ear jiroñ kõj ñan “pukot m̦okta aelõñ in Anij.” Ear jab ba jen pukot wõt Aelõñ in Anij. Jijej ear jel̦ã bwe elõñ men ko jenaaj aikuj bar kõm̦m̦ani. Jenaaj aikuj kappok ad jerbal, kijed m̦õñã, jikin jokwe, ad nuknuk, jikin jikuul̦, menin kam̦õn̦õn̦õ ko, im men ko jet. Bõtab, men kein rejjab aikuj m̦oktata ilo mour eo ad. Aelõñ eo an Anij ej itok m̦oktata. (1 Korint 7:29-31) Ñe jejel̦ã ta men eo ej aikuj aorõktata ilo mour eo ad, jenaaj likũt menin kam̦õn̦õn̦õ ko im men ko jet ãlik im pukot m̦oktata Aelõñ in Anij. El̦aññe jej kõm̦m̦ane men in, jenaaj lo tokjãn menin kam̦õn̦õn̦õ ko.
12. Ewi wãween Luk 14:28 (UBS) emaroñ jipañ kõj ñe jej kããlõt menin kam̦õn̦õn̦õ ko?
12 M̦okta jãn ad kããlõt menin kam̦õn̦õn̦õ ko, jej aikuj kõl̦mãnl̦o̦kjen̦ kõn joñan iien eo jenaaj jol̦o̦ke ñan men kein. Ãinwõt juon armej me ej iten kããlõt juon em̦, ej aikuj etale “ewi drettan wõnen an naaj kaleke.” (Luk 14:28, UBS) Menin kam̦õn̦õn̦õ ko remaroñ lukkuun kañ iien ko ad ãinwõt jet m̦weiuk ko me el̦ap aer kañ jããn. Jej aikuj jel̦ã ewi joñan ad naaj jol̦o̦k iien ñan menin kam̦õn̦õn̦õ ko. El̦aññe jenaaj kamaatl̦o̦k aolep iien ko ad ñan men kein, innem enaaj ejjel̦o̦k ad iien kõm̦m̦ani men ko raorõk ãinwõt katak ippãd make, katak Baibõl̦ ippãn eo pãleed im ajri ro nejid, im kweilo̦k ak kwal̦o̦k naan. (Mark 8:36, UBS) Bõtab, el̦aññe menin kam̦õn̦õn̦õ ko rej kakajoor im kam̦õn̦õn̦õik kõj ñan wõnm̦aanl̦o̦k ilo jerbal eo an Anij, jen lale bwe iien eo jej jol̦o̦k ñan men kein en wõr tokjãn.
Wõn Ro M̦õtta?
13. Etke jej aikuj kanooj lale wõn ro jej kobal̦o̦k ippãer ilo iien kam̦õn̦õn̦õ ak iiaio ko?
13 Kajjitõk eo kein kajilu ej: Wõn ro ij pãd ippãer ilo iien kam̦õn̦õn̦õ ko? Eaorõk uwaak eo ñan kajjitõk in kõnke el̦aññe em̦m̦an armej ro jej kobal̦o̦k ippãer enaaj em̦m̦an jokãlõt ko ad. Ak el̦aññe armej ro rejjab em̦m̦an innem eban em̦m̦an jokããlõt ko ad. Ñan waanjoñak, eitoklimoõd in m̦õñã ñe jej pãd ippãn ro jet. Ejjel̦o̦k oktak men in jãn iien kam̦õn̦õn̦õ ko. El̦apl̦o̦k an limo iien iiaio ko ñe jej pãd ippãn ro m̦õttad me rem̦m̦an. Kõn men in, jemel̦el̦e bwe elõñ iaad, el̦aptata jodrikdrik ro, relimo ñe rej pãd ippãn ro jet im kõm̦m̦ani menin kam̦õn̦õn̦õ ko. Ak m̦okta jãn ad kããlõt menin kam̦õn̦õn̦õ ko, jej aikuj kanooj lale wõn ro im em̦m̦an iiaio ippãer im wõn ro enana kobal̦o̦k ippãer. Men in enaaj jipañ kõj ñan jel̦ã el̦aññe em̦m̦an menin kam̦õn̦õn̦õ eo ñan kõj.—2 Kronikel 19:2; riit Jabõn Kõnnaan 13:20; Jemes 4:4.
14, 15. (1) Ewi wãween joñak eo an Jijej emaroñ jipañ kõj kããlõt ro m̦õttad me rem̦m̦an? (2) Ñe jej kããlõt ro m̦õttad, ta kajjitõk ko jen kajjitõk ippãd make kaki?
14 El̦aññe jej l̦oore joñak eo an Jijej, men in enaaj jipañ kõj ñan kããlõt ro m̦õttad me rem̦m̦an. Jãn jinoin, Jijej ear yokwe armej otemjej. (Jabõn Kõnnaan 8:31) Ke ear pãd ioon lal̦, ear kwal̦o̦k an yokwe im kautiej jabdewõt armej. (Matu 15:29-37) Bõtab, Jijej ear jel̦ã wõn ro en kwal̦o̦k jouj ñan er im wõn ro en epaake er. Meñe Jijej ear jouj ñan aolep armej, ak ear jab m̦õttaik aolep armej. Naan ko an ñan rũkal̦oor ro an 11 rej kwal̦o̦k ewi wãween an kar kããlõt ro m̦õttan. Ear ba: “Kom̦ ro jera, el̦aññe kom̦ij kõm̦m̦an men ko ij jiroñ kom̦.” (Jon 15:14; bar lale Jon 13:27, 30, UBS.) Jijej ear kããlõt wõt armej ro me rar l̦oor e im karejar ñan Jeova bwe ren jeran im m̦õttan.
15 Kõn men in, m̦okta jãn am̦ kããlõt juon armej bwe en m̦õttam̦, em̦m̦an ñe kwõj keememej ta eo Jijej ear ba. Kajjitõk ippam̦ make: Naan im kõm̦m̦an ko an armej in rej ke kalikkar bwe ej pokake naan in jiroñ ko an Jeova im Jijej? Ej ke yokwe men ko rem̦m̦an im dike men ko renana? Enaaj ke jipañ eõ ñan likũt m̦okta Aelõñ eo im tiljek wõt ñan Jeova? El̦aññe kwõj ba aet ñan kajjitõk kein, innem em̦m̦an armej in kwõj kããlõte bwe en m̦õttam̦ im kwõmaroñ kobal̦o̦k ippãn ilo iien kam̦õn̦õn̦õ ko.—Riit Sam 119:63, UBS; 2 Korint 6:14; 2 Timote 2:22.
Menin Kam̦õn̦õn̦õ ko Jej Kããlõti Rej Ke Errã Ippãn Baibõl̦ Eo?
16. Ta ko jej aikuj kajjitõkin kõj make kaki kõn menin kam̦õn̦õn̦õ ko?
16 Ej kab m̦õj ad etale kajjitõk kein jilu ikijjeen menin kam̦õn̦õn̦õ ko: kain rot? ewi joñan? im wõn ro? M̦okta jãn ad kõm̦m̦ani menin kam̦õn̦õn̦õ ko, jej aikuj kõl̦mãnl̦o̦kjen̦ kõn kain kam̦õn̦õn̦õ rot eo, ewi joñan ad jol̦o̦k iien ñane, im wõn ro m̦õttad ilo iien in. Bwe en em̦m̦an menin kam̦õn̦õn̦õ ko ñan kõj, rej aikuj errã ippãn kien ko ilo Baibõl̦. Ñe jej l̦õmn̦ak kõn kain rot menin kam̦õn̦õn̦õ ko jej kõm̦m̦ani, jej aikuj kajjitõkin kõj make: Ta ko rej wal̦o̦k ilo men in? Jeova ej ke buñbũruon kõn kam̦õn̦õn̦õ rot in? Ak el̦ap ke lãj im kowadoñ kab mour ettoon ie? (Jabõn Kõnnaan 4:20-27) Ñe jej l̦õmn̦ak kõn ewi joñan ad jol̦o̦k iien ñan men kein, jej aikuj kajjitõkin kõj make: Ewi joñan aõ naaj jol̦o̦k iien ñan menin kam̦õn̦õn̦õ ko? Ewõr ke tokjãn aõ naaj jol̦o̦k iien ñan men kein? (1 Timote 4:8) Im ñe jej l̦õmn̦ak kõn ro m̦õttad, jej aikuj kajjitõk ippãd make: Wõn ro renaaj kobatok ippa ilo iien in? Renaaj ke ro im em̦m̦an m̦wilier ak ro enana m̦wilier?—Ekklisiastis 9:18; 1 Korint 15:33.
17, 18. (1) Ewi wãween ad maroñ jel̦ã el̦aññe menin kam̦õn̦õn̦õ ko jej kããlõti rej errã ippãn kien ko ilo Baibõl̦? (2) Ta eo kwõnaaj kõm̦m̦ane ñe kwõj kããlõt menin kam̦õn̦õn̦õ ko?
17 El̦aññe menin kam̦õn̦õn̦õ ko jej kããlõti rej idaaptõk ippãn kien ko ilo Baibõl̦ ilo jabdewõt wãween kein jilu, eokwe alikkar bwe rejjab em̦m̦an ñan kõj. Bõtab, el̦aññe rej errã ippãn kien ko ilo Baibõl̦ ilo aolep wãween ko jilu me jaar etali, eokwe menin kam̦õn̦õn̦õ ko jej kããlõti renaaj bõktok nõbar ñan Jeova im rem̦m̦an ñan kõj.—Sam 119:33-35.
18 Innem ñe jej kõm̦m̦an pepe ko kõn menin kam̦õn̦õn̦õ ko, jej aikuj kate kõj ñan kõm̦m̦ane men eo ejim̦we, kõm̦m̦an joñan iien ñan men kein, im pãd ippãn armej ro rem̦m̦an. Jej aikuj pokake naan in kakapilõk in ilo Baibõl̦ eo: “Innãm el̦aññe kom̦ij m̦õñã ak idaak ak kõm̦m̦an jabdewõt, kom̦win kõm̦m̦an men otemjej ñan aiboojoj an Anij.”—1 Korint 10:31.
Kwõj Ke Keememej?
• Ewi wãween Pilippai 4:8 ej jipañ kõj ñan jel̦ã kain menin kam̦õn̦õn̦õ rot jen kããlõte?
• Ewi wãween Matu 6:33 ej jipañ kõj ñan jel̦ã ewi joñan iien eo jen jol̦o̦ke ñan menin kam̦õn̦õn̦õ ko?
• Ewi wãween Jabõn Kõnnaan 13:20 ej jipañ kõj ñan lale wõn ro jen pãd ippãer ilo iien kam̦õn̦õn̦õ ak iiaio ko?
[Diagram ilo peij 9]
✔Kain rot
[Diagram ilo peij 10]
✔Ewi joñan
[Diagram ilo peij 12]
✔Wõn ro
[Pija ilo peij 10]
Ewi wãween jemaroñ l̦oor joñak eo an Jijej ñe jej kããlõt ro m̦õttad im menin kam̦õn̦õn̦õ ko?