Barbara ear lukkuun epaake jemãn.a (Lale kõmel̦el̦e eo itulal̦.) Ke juon iaan ro repaake ear jiroñl̦o̦ke naan kein, men in ear l̦ap an kõmetake bũruon jãn an kaenõm̦m̦ane. Ekkã an ba ippãn make bwe Anij en kar jab bõk jemãn meñe ejel̦ã ta eo em̦m̦antata. Elõñ iiõ tokãlik, ke Barbara ear kajjioñ jeje kõn men eo ear wal̦o̦k ñan jemãn ilo juon bok, ear alikkar bwe ejjañin jako an bũrom̦õj kõn jemãn.

Ãinwõt Barbara, emaroñ lukkuun to an jako an juon bũrom̦õj, el̦aptata ñe ear lukkuun epaake armej eo emej. Baibõl̦ ej ba bwe mej ej ‘rũkõjdat eo ãliktata.’ (1 Korint 15:26) Mej ej wal̦o̦k ñan jabdewõt armej im ejjel̦o̦k juon emaroñ bõbrae an wal̦o̦k. Ekkã an wal̦o̦k ilo iien ko jejjab kõtmãne, im ej jelõt ro rejitõnbõro ippãd. Kõj aolep jej bũrom̦õj ñe juon eo ejitõnbõro ippãd ej mej. Kõn men in, ñe juon eo jej yokwe ej mej, jejjab aikuj bwilõñ ñe jej bũrom̦õj im jejaje ta eo jen kõm̦m̦ane.

Bõlen em̦õj am̦ l̦õmn̦ak kõn kajjitõk kein: ‘Ewi toon an juon bũrom̦õje juon eo emej? Ta ko emaroñ jipañ juon armej ñe ej bũrom̦õj? Ewi wãween aõ maroñ kaenõm̦m̦an ro rebũrom̦õj? Ro rejitõnbõro ippãd me remej renaaj ke bar mour?’

Kwõnañin ke nañinmej im kajju bar mour? Bõlen joñan an m̦õkaj am̦ mour, kwõmel̦o̦kl̦o̦k ke kwaar nañinmej. Bõtab, ejjab ãindein ñe jej bũrom̦õj kõn juon eo ejitõnbõro ippãd me ear jako ilo mej. Ilo juon bok (Healing a Spouse’s Grieving Heart) me juon taktõ etan Alan Wolfelt ear je, ear ba: “Ejjel̦o̦k juon armej emaroñ lukkuun jako an bũrom̦õj.” Bõtab, ear wõnm̦aanl̦o̦k im ba: “Ñe emootl̦o̦k elõñ iiõ im ro jet rej jipañe, enaaj etal im dikl̦o̦k an bũrom̦õj.”

Ñan waanjoñak, jen l̦õmn̦ak kõn ta eo ear wal̦o̦k ñan Ebream ke lel̦l̦ap eo ippãn ear mej. Ilo Baibõl̦ eo m̦oktata ilo kajin Hibru, ear ba bwe “Ebream ear jino bũrom̦õj kõn Sera, im liaajlo̦l̦ kõn e.” Naan in “jino” ej kaalikkar bwe eto an kar Ebream bũrom̦õj.a (Lale kõmel̦el̦e eo itulal̦.) Bar juon waanjoñak ej kõn Jekob, eo me kar m̦on̦e im ba bwe l̦adik eo nejin etan Josep emej kõnke juon menninmour ear m̦ane. Jekob ear bũrom̦õj ium̦win “elõñ raan,” im ear lukkuun pen an ro uwaan baam̦le eo an kaenõm̦m̦ane. Meñe elõñ iiõ tokãlik, ak ear jab jako an Jekob bũrom̦õj kõn Josep.​—Jenesis 23:2; 37:34, 35; 42:36, UBS; 45:28.

Men in ej bar wal̦o̦k ñan elõñ ilo raan kein me emej ro rejitõnbõro ippãer. Erkein ej ruo iaan waanjoñak ko.

• Gail, juon lel̦l̦ap me 60 an iiõ ej ba: “Robert, l̦eo ippa, ear mej ilo Jul̦ae 9, 2008 eo. Aolep jibboñ ãlikin am̦ro m̦abuñ im ej pojak in etal im jerbal, kõm̦ro ej mejenmaik doon, atbo̦kwõj doon, im ba ñan doon bwe kõm̦ro ej yokwe doon. Kõm̦ro kar bar kõm̦m̦ani men kein ilo jibboñõn eo ear wal̦o̦k ãkjitõn eo ñane. Meñe em̦õj an mootl̦o̦k de 6 iiõ, ak ej l̦ap wõt aõ bũrom̦õj. Ijjab tõmak enaaj bõjrak aõ bũrom̦õj kake Rob.”

• Etienne, juon l̦al̦l̦ap me 84 an iiõ ej ba: “Meñe elõñl̦o̦k jãn 18 iiõ jãn ke kõrã eo ippa ear jako, ak ejjab bõjrak aõ bũrom̦õj im oñkake. Aolep iien ñe ij loe menin kõm̦anm̦an ko raiboojoj, ij l̦õmn̦ake kõrã eo ippa im pijaikl̦o̦k joñan an naaj kar m̦õn̦õn̦õ ñe ear loi men kein ij loi.”

Ealikkar bwe ãindein kõj armej, jenaaj baj bũrom̦õj wõt kõn ro rejitõnbõro ippãd meñe emaroñ mootl̦o̦k elõñ iiõ jãn ke rar jako. Kõj kajjojo eokkõtaktak wãween ad bũrom̦õj jãn doon. Kõn men in, ejjab jim̦we ñe jej illu ak inepata ippãn juon kõn wãween an kwal̦o̦k an bũrom̦õj. Bareinwõt, jejjab aikuj bõk l̦õmn̦ak eo bwe ebõd ñe el̦ap ad bũrom̦õj. Ak ewi wãween bwe en dikl̦o̦k ad bũrom̦õj?

Elukkuun lõñ naanin rõjañ ko ro jet rej kwal̦o̦k kõn men in. Bõtab, ejjab aolepeer rej jipañ kõj. Ñan waanjoñak, jet remaroñ rõjañ eok bwe kwõn jab jañ im kwal̦o̦k am̦ bũrom̦õj. Ak ro jet remaroñ rõjañ eok bwe kwõn jañ im kwal̦o̦k aolep eñjake ko am̦. Bõtab, Baibõl̦ ej kwal̦o̦k naanin rõjañ im kakapilõk ko me remaroñ jipañ kõj ñan bõk l̦õmn̦ak eo ejim̦we kõn men in, im elõñ ekkatak ko kar kõm̦m̦ani rej errã ippãn naanin kakapilõk kein.

Ilo m̦anit ko ilo jet aelõñ ko, rej ba bwe ejekkar im menin kajjookok ñan an em̦m̦aan ro jañ. Ak m̦ool ke bwe ej juon menin kajjookok ñe juon ej jañ, el̦aptata ñe ej pãd ilo̦bwilej? Elõñ taktõ ro rej kile bwe jañ ej m̦õttan wãween ad kwal̦o̦k ad bũrom̦õj. Im ñe jej kwal̦o̦k ad bũrom̦õj, jidik kõn jidik, men in enaaj jipañ kõj bwe en em̦m̦anl̦o̦k ad mour jekdo̦o̦n ewi joñan an kar l̦ap ad bũrom̦õj. Bõtab, ñe jej n̦ooje ad bũrom̦õj, men in emaroñ l̦ap an ko̦kkure kõj jãn an jipañ kõj. Baibõl̦ ejjab rejetake mel̦el̦e in bwe ebõd ñan ad jañ kõn ad bũrom̦õj ak bwe ekajjookok ñan an em̦m̦aan ro jañ. Ñan waanjoñak, l̦õmn̦ak m̦õk kõn joñak eo an Jijej. Meñe ear wõr an maroñ ñan kõmour ro remej, ak ear bũrom̦õj im jañ im̦aan mejãn armej ro ke l̦eo m̦õttan etan Lazerõs ear mej!​—Jon 11:33-35.

Ñe jet armej rej illulu, ekkã an men in bar kaalikkar bwe armej rein rebũrom̦õj, el̦aptata ñe elukkuun kar idiñ an armej ro rejitõnbõro ippãer kar mej. Elõñ un ko unin an ro rebũrom̦õj illu. Ñan waanjoñak, remaroñ illu ñe juon eo rej kautieje ej jiroñl̦o̦k er jet naan ko ej l̦õmn̦ak renaaj kar kaenõm̦m̦an er ak ilo m̦ool reoktak im kõmetak er. Juon l̦al̦l̦ap in South Africa etan Mike ej ba: “Kar 14 wõt aõ iiõ ke jema ej mej. Ilo kar iien ilomej eo, rũkaki in kabuñ eo ear ba bwe Anij ej aikuji armej ro rem̦m̦an im ej m̦õkaj im bõk er.a (Lale kõmel̦el̦e eo itulal̦.) Men in ear lukkuun kalluuk eõ kõnke ear lukkuun l̦ap ammim aikuji jememmim. Kiiõ em̦õj an mootl̦o̦k 63 iiõ, ak ij metak wõt jãn naan kein an.”

Ak ta ñe armej ro rej n̦arueer make? Ñe juon armej ej mej ilo idiñ, juon eo ebũrom̦õj emaroñ aolep iien l̦õmn̦ak ippãn make im ba, ‘Eban kar mej armej eo ñe in kar kõm̦m̦ane men in.’ Ak bõlen armej in ear akwããl ippãn armej eo m̦okta jãn an wal̦o̦k ãkjitõn eo. Men in emaroñ kõm̦m̦an bwe en l̦apl̦o̦k an armej in nana an mour im n̦aruon make.

Ñe juon eo ejitõnbõro ippam̦ emej im kwõj illu im nana am̦ mour, elukkuun aorõk bwe kwõn jab n̦ooje eñjake kein am̦. Kwõn kõnnaan ippãn juon m̦õttam̦ me enaaj roñjake eok im jipañ eok ñan mel̦el̦e bwe eñjake rot kein rej wal̦o̦k ippãn elõñ ro rebũrom̦õj. Baibõl̦ ej kakeememej kõj ilo an ba: “Juon jeran ej yokwe iien otemjej; im juon jein im jatin, ear l̦otak bwe en rijjipañ ilo iien jorrããn.”​—Jabõn Kõnnaan 17:17.

Eo em̦m̦antata me juon eo ebũrom̦õj emaroñ m̦õttãiki ej Rũkõm̦anm̦an eo ad, Jeova Anij. Kwal̦o̦k bũruom̦ ñane ilo jar kõnke “kwõaorõk ippãn.” (1 Piter 5:7) Aolep ro rej kõm̦m̦ane men in renaaj bõk “aenõm̦m̦an jãn Anij, eo ej el̦l̦ã jãn jel̦ã otemjej,” im men in enaaj kaenõm̦m̦an bũrueer im l̦õmn̦ak ko aer. Eñin ej kallim̦ur eo an Anij. (Pilippai 4:6, 7) Kwõn bareinwõt kõtl̦o̦k bwe Anij en jipañ im kaenõm̦m̦an eok ilo am̦ riiti naan ko an rekaenõm̦m̦an ilo Baibõl̦. Kõm̦m̦ane juon laajrak in eoon ko rekaenõm̦m̦an. (Lale bo̦o̦k eo ilo katak in.) Kwõmaroñ bar kakkilõklõke jet iaaer. Ñe kwõj kilõki eoon kein im likũti ilo l̦õmn̦ak eo am̦, men in enaaj jipañ eok el̦aptata ñe kwõj make iaam̦ ilo boñ im kwõjaje kiki.​—Sam 147:3, UBS.

Ewõr juon em̦m̦aan 40 an iiõ etan Jack, im ej kab jako lio ippãn kõnke ear nañinmej in kããnjõr. Jack ej ba bwe ewõr iien ej lukkuun bũrom̦õj kõn an make iaan. Bõtab, ilo an jar, men in ear jipañe. Ej ba: “Ñe ij jar ñan Jeova, ej ãinwõt ñe ijjab make iaõ. Ekkã aõ ruj in lukwõn boñ im jaje bar kiki. Bõtab, ãlikin aõ riit im kõl̦mãnl̦o̦kjen̦ kõn eoon ko rekaenõm̦m̦an jãn Baibõl̦ im kwal̦o̦k bũruõ ilo aõ jar, ij kile an kajju aenõm̦m̦an bũruõ im l̦õmn̦ak ko aõ, im men in ej kõm̦m̦an bwe in maroñ bar kiki.”

Juon jiroñ etan Vanessa ear mej jinen kõn an kar nañinmej. Jiroñ in bareinwõt ear kile joñan an kar jar jipañe. Ej ba: “Ilo iien ko me elukkuun l̦ap aõ bũrom̦õj, iar jañ im jar ñan Anij. Jeova ear roñjake jar ko aõ im ear kakajoor eõ ilo aolep iien kein.”

Jet ro me jerbal eo aer ej ñan lel̦o̦k naanin kakapilõk ñan ro rebũrom̦õj rej rõjañ rein rebũrom̦õj bwe ren jipañ ro jet ak kõjerbal iien ko aer ñan bõk kun̦aaer ilo jerbal ko me rej jipañ ro jet ilo ejjel̦o̦k on̦ãn. Aer kõm̦m̦ane men in emaroñ kõm̦m̦an bwe ren lañlõñ im emaroñ kadikl̦o̦k aer bũrom̦õj. (Jerbal 20:35) Elõñ Kũrjin ro rebũrom̦õj rar loe bwe ilo aer kate er ñan jipañ ro jet, men in ear lukkuun kaenõm̦m̦an er.​—2 Korint 1:3, 4.

Enañin ke wõr juon iien me juon eo kwepaake ear bũrom̦õj kõn juon eo ejitõnbõro ippãn me emej, bõtab kwaar jaje kilen kaenõm̦m̦ane? Jet iien jemaroñ jab lukkuun jel̦ã ta eo jen ba ak kõm̦m̦ane ñan kaenõm̦m̦an ro rebũrom̦õj. Kõn men in, jemaroñ jujen jab ba ak kõm̦m̦ane jabdewõt men. Bõtab, ewõr men ko jemaroñ kõm̦m̦ani ñan jipañ im kaenõm̦m̦ane ro rebũrom̦õj.

Enañin aolep iien men eo de eo kwõmaroñ kõm̦m̦ane ñan kaenõm̦m̦ane ro rebũrom̦õj ej ilo am̦ lol̦o̦k er im kwal̦o̦k am̦ bũrom̦õj ippãer. Ilo elõñ aelõñ ko, wãween an armej ro kwal̦o̦k aer kea kake juon eo ebũrom̦õj ej ilo aer atbo̦kwõje ak jibwe pein. El̦aññe armej eo ebũrom̦õj ekõn̦aan bwebwenato ippam̦, kwõmaroñ roñjake e im kajjioñ mel̦el̦e kõn eñjake ko an. Men eo em̦m̦antata kwõmaroñ kõm̦m̦ane ñan jipañ baam̦le ko rebũrom̦õj ej ilo am̦ kõm̦m̦ani jerbal ko aer me rejjab maroñ kõm̦m̦ani ilo tõre eo. Ñan waanjoñak, kwõmaroñ kõmat kijeer m̦õñã, lale ajri ro, ak jipañl̦o̦k er ilo aer kõm̦m̦ani karõk ko ñan iien mej eo, el̦aññe em̦m̦an ippãer. Meñe jemaroñ kaenõm̦m̦an ro jet ilo naan ko ad, bõtab men ko jej kõm̦m̦ani el̦apl̦o̦k aer kaalikkar bwe jej yokwe im kea kake er.

Bõlen tokãlik, kwõmaroñ bwebwenato ippãer kõn armej eo emej. Kwõmaroñ kwal̦o̦k kõn men ko rem̦m̦an kõn armej in ak bwebwenato ko rekam̦õn̦õn̦õ kwõj keememej kõn armej in. Am̦ bwebwenato ippãn ro rebũrom̦õj kõn men in emaroñ kõm̦m̦an aer ettõñdikdik. Ñan waanjoñak, ewõr juon kõrã etan Pam me ear jako l̦eo ippãn etan Ian jiljino iiõ ko remootl̦o̦k. Kõrã in ej ba: “Jet iien armej rej bwebwenato ippa im kwal̦o̦k kõn men ko rem̦m̦an Ian ear kõm̦m̦ani me iar jab jel̦ã kaki im men in ej kõm̦m̦an aõ m̦õn̦õn̦õ.”

Elõñ ekkatak ko rej kwal̦o̦k bwe el̦ap an ro rebũrom̦õj bõk kaenõm̦m̦an im jipañ jãn ro m̦õttaer ilo jinoin, bõtab tokãlik kõn an rein m̦õttaer poub rej jino mel̦o̦kl̦o̦k er. Kõn men in, kate eok ñan keini wõt am̦ lol̦o̦k ak ko̦o̦l̦e ro rebũrom̦õj ãlikin iien eo ear jako ro rejitõnbõro ippãer.a (Lale kõmel̦el̦e eo itulal̦.) Elõñ ro elukkuun to aer bũrom̦õj, im rej lukkuun kam̦m̦oolol bwe remaroñ bwebwenato ippãn ro m̦õttaer ñan kadikl̦o̦k aer bũrom̦õj.

L̦õmn̦ak m̦õk kõn bwebwenato eo an juon jiroñ in Jepaan etan Kaori. Ear lukkuun bũrom̦õj kõnke ear mej jinen im 15 allõñ tokãlik ear bar mej ledik eo jein. Ak elukkuun em̦m̦an bwe ro m̦õttan rar jab bõjrak jãn aer jipañe im kaenõm̦m̦ane. Juon iaaer ej juon kõrã etan Ritsuko. Kõrã in el̦ap an rũtto jãn Kaori im ear kõn̦aan epaake Kaori ãinwõt juon m̦õttan. Kaori ej ba: “Ilo m̦ool, iar jab m̦õn̦õn̦õ kõn men in. Iar jab kõn̦aan bwe jabdewõt en bõk jikin jinõ, im iar jab l̦õmn̦ak bwe emaroñ wõr en̦ imaroñ epaake ãinwõt aõ kar epaake jinõ. Bõtab, kõnke ear em̦m̦an an M̦am̦a Ritsuko kõm̦m̦an ñan ña, iar jino lukkuun epaake. Kajjojo wiik, kõm̦ro kõn kwal̦o̦k naan im etal ñan iien kweilo̦k ko an Ri Kõnnaan ro an Jeova. Ear kõm̦m̦an iien ippa ñan idaak ti im bwebwenato, ekõn bõktok kijõ m̦õñã, im elõñ alen an kar jejetok ñan ña ilo lõta ak kaat. Wãween ko rem̦m̦an M̦am̦a Ritsuko ear kwal̦o̦ki ear lukkuun jipañ eõ.”

Emootl̦o̦k kiiõ 12 iiõ jãn iien eo ear jako jinen Kaori, im rainin e im l̦eo ippãn rej kal̦apl̦o̦k ijo kun̦aaerro ilo jerbalin kwal̦o̦k naan. Kaori ej ba, “M̦am̦a Ritsuko ej wõnm̦aanl̦o̦k im kwal̦o̦k an kea kake eõ. Ñe ij jam̦bol̦o̦k ñan bukwõn eo aõ kar m̦okta, aolep iien ij lol̦o̦ke im el̦ap an kakajoor eõ ñe kõm̦ro ej bwebwenato.”

Bar juon bwebwenato ej kõn juon Ri Kõnnaan an Jeova etan Poli me ej jokwe ilo Cyprus. Kõrã in ear bõk tokjãn jãn an ro m̦õttan wõnm̦aanl̦o̦k wõt im jipañe. Etan l̦eo ippãn ej Sozos im ear juon armej ejouj. Ear juon em̦m̦aan ej lale eklejia im ear lukkuun em̦m̦an joñak eo an. Ekkã an kũrl̦o̦k kõrã im em̦m̦aan ro me ejako ro pãleer im ajri ro ratajinemjen ñan m̦weo im̦weerro bwe ren m̦õñã im bwebwenato ippãn doon. (Jemes 1:27) Ekabũrom̦õjm̦õj bwe ke Sozos ear 53 an iiõ, ear mej jãn nañinmej in tumor ilo kõmãlij eo an. Poli ej ba, “Ejako l̦eo ippa me kõm̦ro ar mour ippãn doon ium̦win 33 iiõ.”

Ãlikin kar iien mej eo, Poli im l̦adik eo ediktata nejin etan Daniel me 15 an iiõ rar em̦m̦akũtl̦o̦k ñan Canada. Rar kobal̦o̦k ippãn juon iaan eklejia ko an Ri Kõnnaan ro an Jeova. Poli ej ba, “Ro m̦õtta ilo eklejia eo aõ ekããl rar jab jel̦ã jabdewõt kõn apañ ko im men ko kõmar iiooni m̦oktal̦o̦k. Jekdo̦o̦n ak men in ear jab bõbrae er jãn aer kepaake kõm im kaenõm̦m̦an kõm ikijjeen naan ko aer im jipañ ko aer. El̦ap aer kar jipañ l̦adik eo nejũ, el̦aptata ilo tõre in me elukkuun aikuji jemãn! Em̦m̦aan ro rar lale eklejia eo rar lukkuun kwal̦o̦k aer kea kake Daniel. Juon iaaer ekõn kobaiki Daniel ilo iien ko rar iiãio ak iukkure ippãn doon.” Rainin, elukkuun em̦m̦an an l̦adik in im jinen mour.

Ealikkar bwe elõñ wãween ko jemaroñ kõm̦m̦ani ñan jipañ im kaenõm̦m̦an ro rebũrom̦õj. Baibõl̦ ej bar kaenõm̦m̦an kõj ilo an kwal̦o̦k kõn juon kõjatdikdik ekam̦õn̦õn̦õ me enaaj wal̦o̦k ilju im jekl̦aj.

Bõlen kwõj keememej kõrã eo etan Gail ilo kar juon iaan katak ko m̦oktal̦o̦k me ear l̦õmn̦ak bwe eban jako an bũrom̦õj kõn an mej Rob, l̦eo ippãn. Kõrã in ej kiiõ reim̦aanl̦o̦k ñan an bar loe ilo jukjukun pãd eo ekããl me Anij ear kallim̦ur kake. Kõrã in ej ba: “Eoon eo em̦m̦antata ippa ej Revelesõn 21:3, 4.” Eoon kein rej kwal̦o̦k kõn kallim̦ur eo an Anij kõn an naaj pãd ippãn armej ro im jipañ er. Ej kwal̦o̦k bwe Anij “enaaj kõm̦õrãik jãn mejãer dãnnin kõmjaal̦al̦ otemjej, im enaaj ejjel̦o̦k bar mej, im rejãmin bar liaajlo̦l̦, ak jañ, ak eñtaan; bwe men ko m̦okta rejako.”

Gail ej ba: “Elukkuun alikkar kallim̦ur in an Anij. El̦ap aõ bũrom̦õj kõn armej ro me ejako juon eo ejitõnbõro ippãer im rejaje kõn kallim̦ur in bwe juon iien remaroñ bar loe armej in.” Gail ej kaalikkar an tõmak ilo kallim̦ur in ilo an m̦õn̦õn̦õ in kal̦apl̦o̦k kun̦aan ilo jerbalin kwal̦o̦k naan im jipañ armej ro ñan jel̦ã kõn kallim̦ur in an Anij bwe juon iien “enaaj ejjel̦o̦k bar mej.”

Bõlen kwõmaroñ l̦õmn̦ak bwe men in eban wal̦o̦k. Ak l̦õmn̦ak m̦õk kõn waanjoñak eo kõn em̦m̦aan eo etan Job. Ear lukkuun nañinmej im eñtaan. (Job 2:7) Job ear kõn̦aan mej kõn an eñtaan, ak ear tõmak bwe ewõr an Anij maroñ ñan kõmouri bwe en bar mour ijin ioon lal̦. Ear ba: “O em̦m̦an Kwõn n̦ooj eõ ilo Sheol [lõb] . . . El̦aññe Kwõnaaj kũr, innem inaaj uwaak Eok; Kwõnaaj kõn̦aan menin kõm̦m̦an an Peim̦.” (Job 14:13, 15) Job ear tõmak bwe ñe emej, Anij enaaj bũrom̦õj im Enaaj lukkuun kõn̦aan kõjerkake jãn mej.

M̦õttan jidik Anij enaaj bar kõmour Job im elõñ ro rar mej ñe lal̦ in enaaj oktak im juon pedetaij. (Aiseia 65:21-25) Bokin Jerbal 24:15 (UBS) ej lukkuun kam̦ool bwe ro remej renaaj “jerkak jãn mej.” Bareinwõt, Jijej ear ba: “Kom̦win jab bwilõñ kõn men in; bwe awa ej itok, ilo eo ro otemjej rej pãd ilo lõb ko, renaaj roñ ainikien, im naaj diwõjtok.” (Jon 5:28, 29) Job enaaj lo an jejjet kũtien kallim̦ur in. Ñe enaaj bar mour, eban bar rũttol̦o̦k im bwijwol̦ã. Enaaj bar ro̦o̦l im juon “likao” im “kanniõkin enaaj em̦m̦anl̦o̦k jãn kanniõkin niñniñ.” (Job 33:24, 25) Enaaj bar wal̦o̦k men in ñan aolep ro rej kwal̦o̦k aer kam̦m̦oolol Anij kõn tũriam̦okake eo an ilo an kõpel̦l̦o̦k juon ial̦ bwe ro remej ren bar jerkak im mour ijin ioon lal̦.

El̦aññe kwõj bũrom̦õj kõn juon eo ejitõnbõro ippam̦ me ear mej, mel̦el̦e kein ilo katak kein remaroñ jab lukkuun jol̦o̦k am̦ bũrom̦õj. Bõtab, ilo am̦ kõl̦mãnl̦o̦kjen̦ kõn kallim̦ur ko an Anij ilo Baibõl̦, men in enaaj kakajoor im kaenõm̦m̦an eok kõnke ewõr am̦ kõjatdikdik bwe juon iien kwõmaroñ bar loe armej in.​—1 Tessalonika 4:13, UBS.

Kokõn̦aan ke kal̦apl̦o̦k am̦ jel̦ã kõn wãween bwe en dikl̦o̦k am̦ bũrom̦õj? Ak ewõr ke kajjitõk ko jet kokõn̦aan jel̦ã uwaakier, ãinwõt “Etke Anij ej kõtl̦o̦k bwe en wõr nana im eñtaan?” Jouj im lale weep jait eo am, www.jw.org/mh ñan lale uwaak ko jãn Baibõl̦ me rekaenõm̦m̦an im renaaj jipañ eok.