Report Eo An Ri Keañ Ro An Ailiñ Eo
Kajededlok Inen Ailiñ eo ilo Jabdewõt Ien Emõntok
NAN in Anij, Bible eo, ej rejañ kij bwe jen niknik. Kiiñ Solomon ear ba: “Ke e jiboñ kwon jeor ine eo am, im ke e jota kwon jab drebij peõm; bwe kwo jaje ewi iairro e naj jerammõn, eñin ak eo juõn, ak elañe irro re naj emõnin wõt juõn.”—Ecclesiastes 11:6.
Ilo jabdewõt ien emõn, Ri Kennan ro an Jehovah rej jeor “ine” eo ilo air kwalok nan kin news eo emõn kin Ailiñ in Anij. Ilo elõñlok jen 230 ailiñ ko im ene ko, rej wõnmanlok im “katakin im kwalok Jisõs bwe E dri Kraist.” (Jerbal 5:42) Bwebwenato ko tok ilõl renaj kalikar kin wãwen an Ri Kennan ro an Jehovah jab ‘drebij peir’ ilo jerbal in kwalok nan.
◻ Ilo Republic in Cape Verde, juõn ian Ri kennan ro an Jehovah ear etetal iturin prison eo ke ear kwalok nan. Ilo melaj in prison eo, jet ri kalbuj ro rar bed ion juõn wijki. Ke rar lo Ri Kennan eo itulõl, ri kalbuj ro rar lamõj im kajitõkin e kin jet magazine ko. Ri Kennan eo ear lukwoj jet magazine in Watchtower im Awake! ñõn juõn dekã im kare lok i ion worwor in prison eo. Tokjen itoklimo in ilo jinoin, ear jemlok ilo an jinoe 12 Bible study ko. Jilu ian ri kalbuj rein rar wujleplok air mour ñõn Anij im kalikare ilo air baptais ilo den. Juõn ian ri kalbuj ro ear jerbal einwõt juõn ri kwalok ej full-time, ak pioneer, iumin elõñlok jen juõn yiõ ñõn kiõ. Bõtab, ewi wãwen rej kwalok nan ilo prison? Mokta prison eo rar ajeje ilo elõñ territory ko. Inem territory eo rej ajeje ibwiljin jilu Ri Kennan ro im rej kwalok nan jen room ñõn room ilo kalbuj eo. Ri Keañ rein an Ailiñ eo rej jeblak ibben ro rej itoklimo ilo ejja wãwen eo wõt Ri Kennan ro an Jehovah rej kõmmõne ibelakin lõl—ilo air kõmmõn bar jeblak ko. Bõtab, men eo einjuõn ej emakijkij in ien air katakin armij kin Bible eo. Jen air katak Bible eo juõn ak ruo alen ilo juõn week iumin juõn ak elõñlok awa ko, jet ri kalbuj ro rej katak ran otemjej! Bareinwõt, Ri Kennan ro rar bõk melim jen ri tel eo an prison eo ñõn kõmmõn aolep kwelok ko an congregation eo iloan prison eo.
◻ Juõn kõrã ilo Portugal ear jolet elõñ book ko an Watch Tower Society eo elikin jibwin ear mij. Kinke ear jab juõn ian Ri Kennan ro an Jehovah, kar ejelok an itoklimo ñõn kejbarok book ko. Bõtab, ear jab kõnan kokkure ir. Juõn ran ear jiroñ juõn ian Ri Kennan ro an Jehovah eo ear kebak e ilo jerbal in kwalok nan jen em-ñõn-em kin book ko. Ri Kennan eo ear kajitõkin e elañe ear jela kin tokjen book kein. Kõrã eo ear uak im ba: “Ilo mol, ijjab jela kin lukkun tokjen eo air, ak ewi wãwen imaroñ jela?” Kõrã eo ear mõnõnõ in katak Bible eo, im ejjabto tokelik ear kaorõk book kein an jibwin. Kiõ e bareinwõt ej juõn Ri Kennan eo an Jehovah emwij an baptais. Koba ibben men in, lio nejin im juõn jeran ebake family eo rej bareinwõt katak Bible eo. Book kein rej juõn men in jolet elap an aorõk!